RINGKOT jala arga do pangkobasionta. Alai, ndang sude halak na tajumpangi tingki marbarita mangantusi on. Nang pe lomo rohanasida mamboto hata ni Bibel, alai ndang sude na olo marsiajar Bibel dohot hita.

Parrohahon ma pengalaman ni si Gavin. Nunga ro ibana marpungu tu Bale Harajaon, alai ndang olo ibana marsiajar Bibel. Dipaboa ibana, holan saotik do na diantusi ibana taringot Bibel, jala ndang lomo rohana adong na mamboto i. Mabiar ibana dipaotooto jala ndang olo ibana gabe anggota ni sada agama. Songon dia do pandapotmu? Boi dope urupanta si Gavin marsiajar? Pingkirhon ma pangkorhon ni pangantusion sian Bibel tu sasahalak. Didok Jahowa tu halak Israel, ”Ingkon mabaor nian songon nambur pangkataionku, songon pangonai ni udan nene tu duhutduhut.” (5 Mus. 31:19, 30; 32:2) Taparsiajari ma pigapiga hatorangan taringot nambur, jala songon dia i dipatudos tu pangkobasionta asa lam denggan hita mangurupi ”saluhut jolma” tingki marbarita.—1 Tim. 2:3, 4.

Lambok do nambur i. Nambur, mulana sian ombun na muba gabe aek santetek. Boasa didok Hata ni Jahowa ”songon nambur”? Alana, lambok jala burju do Ibana mangkatai tu naposoNa patoguhon rohanasida. Jahowa do na tatiru tingki tapatuduhon pangargaion tu haporseaon ni donganta. Tapapos ma roha ni nasida jala taargai ma na pinillitna di ngoluna. Molo tapatuduhon na tasarihon nasida, las ma rohanasida manjangkon barita na tapasahat, jala lam denggan ma pangkobasionta.

Nambur mambahen las roha. Pangkobasionta mamangke marragam isara, boi manambai las ni rohanta tingki mangurupi halak mangantusi hasintongan. Donganta si Chris na manogihon si Gavin marsiajar Bibel, ndang hea mamaksa ibana manjalo parsiajaran i. Alai, dilului ibana do isara na asing asa las roha ni si Gavin marsiajar Bibel. Dipaboa si Chris ma tu si Gavin, adong do hatorangan di Bibel na boi mangurupi ibana asa lam mangantusi na diajarhon di parpunguan. Dung i, dipatorang ibana muse surirang ni Bibel na paposhon roha ni si Gavin molo Bibel i tingkos. Alani i, boi ma nasida leleng mangkatahatai taringot surirang ni Bibel naung digohi. Ala jotjot nasida mangkatahatai, taronjar ma roha ni si Gavin jala olo ma ibana marsiajar Bibel.

Ringkot do nambur i. Molo logo ari di Israel, ndang ro udan saleleng pigapiga bulan. Alani i, molo ndang adong nambur, ndang tubu suansuanan. Songon naung disurirangkon Jahowa, torop do halak saonari na mauas mambege ”hata ni Jahowa”. (Am. 8:11) Dijanjihon Ibana do halak na miniahan songon ”nambur sian Jahowa” laho mamaritahon barita na uli taringot Harajaon na mangurupi ’birubiru na asing’. (Mik. 5:6; Joh. 10:16) Barita na tapasahat, i ma sada sian surirang ni Jahowa na mangalehon hangoluan tu na mauas di hasintongan. Taargai do barita na tapasahat on?

Pasupasu sian Jahowa do nambur i. (5 Mus. 33:13) Parohon pasupasu do pangkobasionta tu halak na olo manjangkon. Parohon pasupasu do parsiajaran Bibel na dijalo si Gavin. Dapotna ma alus ni sungkunsungkunna. Hatop do ibana mambahen hamajuon di partondion. Dung i, tardidi ma ibana jala nunga dohot marbarita na uli raphon tungganeboruna, si Joyce.

Molo tapatudos pangkobasionta tu nambur, boi ma taantusi marlaba do ulaonta di parbaritaon. Boasa? Ndang godang pangkorhon ni nambur santetek. Alai molo godang nambur na manetek, boi ma tubu suansuanan. Suang songon i, ndang godang pangkorhonna molo holan sahalakta na marbarita. Alai, ala marjuta Sitindangi Ni Jahowa na marbarita, boi ma on gabe panindangion tu ”saluhutna bangso”. (Mat. 24:14) Parohon pasupasu do pangkobasionta tu halak na asing? I do, molo pangkobasionta songon nambur na lambok jala ringkot di parngoluon!