1, 2. (a) Songon dia do pangkilalaan ni Sitindangi Ni Jahowa mangida Bibel? (b) Dia do ayat ni Bibel na dihalomohonmuna?

LAS do roha ni Sitindangi Ni Jahowa manjaha Bibel. Sian Bibel, boi tadapot hadameon, pangkirimon dohot tudutudu. (Rom 15:4) Bibel, ”hata ni Debata” ndang hata ni jolma.​—1 Tes. 2:13.

² Jotjot do adong ayat na tahalomohon sian Bibel. Umpamana, adong na lomo rohana manjaha buku injil, ala sian i, boi marsiajar sian parange ni Jahowa na tarida sian hangoluan ni Jesus. (Joh. 14:9) Adong na lomo rohana manjaha buku Pangungkapon, i ma surirang na paboahon taringot ”na naeng masa”. (Pgk. 1:1) Na asing muse, dame dihilala tingki manjaha buku Psalmen, jala adong na mandapot laba sian bisuk na disurat di buku Poda. Tangkas ma, Bibel buku na diparade tu sude jolma.

3, 4. (a) Songon dia do pangkilalaanta mangida angka bukunta? (b) Tu ise do diparade angka publikasinta?

³ Ala las do rohanta manjaha Bibel, tontu las do rohanta manjaha sude bukunta na dipatupa sian Bibel. Sude angka buku, brosur, majalah dohot angka na asing, Jahowa  do na paradehon i tu hita. Angka buku i mangurupi hita jonok tu Ibana jala patoguhon haporseaonta.​—Tit. 2:2.

⁴ Godang angka bukunta diparade tu Sitindangi Ni Jahowa. Adong do na diparade tu angka na poso dohot tu angka natuatua. Godang hatorangan dohot video na adong di website diparade tu na so Sitindangi Ni Jahowa. Sude na diparade on, patuduhon Jahowa manggohi janjiNa laho mangalehon tudutudu tu sude jolma.​—Jes. 25:6.

5. Songon dia do hita boi mambahen las roha ni Jahowa?

⁵ Las do rohanta mangalehon tingki laho manjaha Bibel dohot angka bukunta. Ra, ndang dos godang ni tingki na tapangke laho manjaha angka buku na tajalo i. Nang pe songon i, boi do pos rohanta molo tapangke tingkinta marsiajar Bibel dohot angka bukunta, on mambahen las roha ni Jahowa. (Eps. 5:15, 16) Alai, adong na porlu taparrohahon. Aha ma i?

6. Aha do na mambahen ndang tadapot laba sian na pinarade ni Jahowa?

⁶ Molo ndang manat hita, boi do didok rohanta angka ayat na adong di Bibel dohot hatorangan na adong di bukunta, ndang marlangku tu hita. Umpamana, songon dia do molo angka ayat na disurat ndang hombar tu na masa di ngolunta? Manang, songon dia do pangkilalaanta molo na tinuju ni buku i ndang apala tu hita? Jahaonta do i manang na ndang? Molo ndang denggan tajaha, ndang dapotta be hatorangan na boi marlaba tu hita. Songon dia do bahenonta asa unang masa on? Ingkon taingot do, sude hatorangan i ro sian Jahowa. Bibel mandok, ”Ahu do Jahowa Debatam, na mangajarhon tu ho bahen hatuaonmu.” (Jes. 48:17) Di artikel on, taulas ma tolu sipaingot na mangurupi hita mandapot laba sian na pinarade ni Jahowa tu hita.

7. Boasa ingkon taparade pingkiran tingki manjaha Bibel?

⁷ Parade ma roha dohot pingkiran tingki manjaha. Olo do sipata adong ayat ni Bibel ditujuhon tu sasahalak manang tu sadasada punguan. Alai Bibel mandok, ”Ai nasa surat i, sinihathon ni Debata do; jala hasea mamodai.” (2 Tim. 3:16) I do alana, ingkon taparade do pingkiranta tingki manjaha Bibel. Sahalak donganta baoa patorangkon, sai dilului ibana do pigapiga parsiajaran sian sada hatorangan ni Bibel. On, mangurupi ibana mandapot parsiajaran na asing sian ayat ni Bibel na dijaha. Alani i, andorang so tajaha Bibel, tajalo ma pangurupion sian Jahowa asa dilehon tu hita pingkiran na rade dohot bisuk laho mangantusi parsiajaran sian Bibel.​—Esr. 7:10; jaha Jakobus 1:5.

8, 9. (a) Tingki manjaha Bibel, sungkunsungkun aha do na porlu taalusi? (b) Aha do diajarhon taringot Jahowa sian aturan tu na gabe sintua?

⁸ Bahen ma sungkunsungkun. Tingki manjaha Bibel, tasungkun ma dirinta, ’Aha do diajarhon ayat on taringot Jahowa? Songon dia do hatorangan on boi pangkeonku? Songon dia  do hatorangan on pangkeonku mangurupi na asing?’ Molo tarimangi angka sungkunsungkun on, dapotta ma laba sian na manjaha Bibel. Taida ma sada tudosan. Dipaboa do di Bibel, angka parange na porlu patuduhonon ni sintua. (Jaha 1 Timoteus 3:2-7.) Ndang sude sian hita na gabe sintua, alani i olo do ra tadok ndang marlangku on tu hita. Alai, marhite tolu sungkunsungkun na di ginjang i, taida ma songon dia ayat i boi marlangku tu hita.

⁹ ”Aha do diajarhon ayat on taringot Jahowa?” Dipaboa Jahowa do tu hita pigapiga parange na ingkon diulahon angka sintua. Nunga ditontuhon Ibana parange sisongon i tu baoa na mangaradoti huria. On patuduhon, arga do di Jahowa ulaon di huria. Bibel mandok, nunga ditobus i marhite mudar ni anakNa sandiri. (Ul. 20:28) Dipangido Jahowa do angka sintua gabe sitiruon jala ingkon martanggungjawab do nasida tu na niulahonna maradophon huria. Lomo roha ni Jahowa tahilala hadameon alani pangaradotion ni nasida. (Jes. 32:1, 2) Tingki tajaha taringot parange naung ditontuhon tu angka sintua, sian on tangkas ma taboto na disarihon Jahowa hita.

10, 11. (a) Tingki manjaha parange na ditontuhon tu sintua, songon dia do hatorangan on pangkeonta? (b) Songon dia do hatorangan on pangkeonta mangurupi na asing?

 ¹⁰ ”Songon dia do hatorangan on boi pangkeonku?” Molo hamu sahalak sintua, ingkon jotjot do parrohahononmuna parange naung ditontuhon tu sintua jala marsitutu mangulahon i. Molo ”lomo roha ni sada halak naeng gabe sintua di huria”, ingkon patuduhononna do parange sisongon i. (1 Tim. 3:1, Bibel siganup ari) Alai, sude halak Kristen boi do marsiajar laho patuduhon parange na denggan, na ditontuhon tu sintua. Umpamana, dipangido Jahowa do hita sude patuduhon parange na denggan. (Plp. 4:5; 1 Ptr. 4:7) Molo sintua gabe sitiruon, boi ma hita marsiajar sian nasida jala maniru haporseaon ni nasida.​—1 Ptr. 5:3; Heb. 13:7.

¹¹ ”Songon dia do hatorangan on pangkeonku mangurupi na asing?” Tapangke ma parange na ditontuhon tu angka sintua mangurupi parsiajar Bibel dohot halak na asing, mangantusi imbar ni sintua di huria Kristen tu pemimpin ni agama. Angka parange naung ditontuhon tu angka sintua, mangurupi hita mangantusi ulaon ni nasida di huria. Jala, on boi mangonjar rohanta patuduhon pangargaion tu angka sintua. (1 Tes. 5:12) Molo tapatuduhon do pangargaion, on mambahen sintua marlas ni roha mangulahon ulaon di huria.​—Heb. 13:17.

12, 13. (a) Mamangke alat riset na adong di hita, aha do na boi tasulingkiti? (b) Bahen ma tudosan songon dia na masa tingki hatorangan i disurat boi mangalehon parsiajaran tu hita nang pe ndang sude dipatorang.

¹² Lului ma. Tingki marsiajar Bibel hita, talului ma alus ni sungkunsungkun na di toru on:

• Ise do na manurat on?

• Didia jala nandigan do on disurat?

• Aha do na masa tingki disurat hatorangan i?

Boi do tadapot angka parsiajaran sian hatorangan di Bibel nang pe ndang sude dipatorang.

¹³ Umpamana, Hesekiel 14:13, 14 mandok, ”Tung sura mardosa sada luat dompak ahu mangoseosei: Jadi patoltolonku ma tanganku dompak luat i, jala ponggolhononku, sian i tungkot parbohalan, jala tongoshononku tusi haraparon, jala pansingkononku sian i jolma nang pinahan. Tung sura pe ditongatongana na tolu halak on: si Noak, si Daniel dohot si Job, hosanasida sandiri do paluahon nasida, Alani hatigorannasida, ninna Tuhan Jahowa.” Molo talului hatorangan tu ayat on, taboto ma hata on disurat si Hesekiel hirahira taon 612 SM. Tingki i, nunga marratus taon si Noak dohot si Job dung mate. Alai, diingot Jahowa dope haporseaon ni nasida. Jala, 20 taon dope ra umur ni si Daniel  tingki didok Jahowa ibana halak partigor songon si Noak dohot si Job. Aha do na taparsiajari sian on? Diparrohahon Jahowa do parange na denggan na dipatuduhon ni sude naposoNa, dohot ma i angka na poso.​—Ps. 148:12-14.

14. Songon dia do buku na diparade tu angka na poso mangurupi nasida, jala aha do labana molo tajaha i? (Ida gombar di mula ni parsiajaran.)

¹⁴ Buku na diparade tu angka na poso. Nunga taboto, boi do hita mandapot laba sian sude ayat na disurat di Bibel. Alani i, boi do hita mandapot laba sian sude buku na diparade tu hita. Taparrohahon ma pigapiga tudosan. Saonari, diparade Jahowa do godang hatorangan tu angka na poso. ^[1] (Ida catatan.) Angka hatorangan on, mangurupi na poso mangadopi elaela di singkola dohot di parngoluon ni nasida. Alai, songon dia do hita sude boi mandapot laba sian hatorangan na diparade marhite buku on? Tingki tajaha hatorangan i, taboto ma elaela na dihilala na poso jala boi ma hita mangalehon pangurupion tu nasida.

15. Boasa ringkot sude halak Kristen manjaha hatorangan na diparade tu angka na poso?

¹⁵ Ringkot di sude halak Kristen manjaha hatorangan di buku na diparade tu angka na poso. Godang parsoalan na diulas di buku i mangkorhon tu sude halak Kristen. Umpamana, ingkon tajaga do haporseaon, taorom muruk, unang tarelaela jala tapadao hiburan dohot parsaoran na roa. Alani i, nang pe buku on diparade tu angka na poso, alai hatoranganna marojahan sian Bibel jala marlaba do tu sude halak Kristen.

16. Songon dia do publikasi na diparade tu na poso marlaba tu hita?

¹⁶ Buku na diparade tu angka na poso, boi mangurupi nasida patoguhon paralealeonna tu Jahowa. (Jaha Parjamita 12:1, 13.) Ndang holan nasida, hita pe boi do mandapot laba. Umpamana Sedarlah! April 2009 na marisi, ”Kaum Muda Bertanya . . . Bagaimana Aku Bisa Menikmati Pembacaan Alkitab?” Adong do pigapiga sipaingot dohot kotak na boi digunting, disimpan jala dipangke tingki marsiajar. Holan tu na poso do on marlaba? Sahalak ina paboahon, maol dihilala ibana mambahen panjahaion Bibel. Alai, dipangke ibana ma hatorangan na adong di artikel i. Saonari, sai tarpaima do ibana laho manjaha Bibel jala didok ibana, las rohana ala boi tangkas diantusi aha na jinahana sian Bibel. Didok muse, ”Ndang hea dope huhilala las ni roha sisongon i tingki laho manjaha Bibel.”

17, 18. Songon dia do hatorangan na diparade tu umum boi marlaba tu hita? Bahen ma tudosan.

 ¹⁷ Buku na diparade tu umum. Sian taon 2008, las do rohanta marsiajar mamangke Joujou Paboahon siparsiajaran. Edisi on, diparade tu Sitindangi Ni Jahowa, alai adong do majalah na diparade tu umum. Songon dia do angka majalah on marlaba tu hita? Taida ma sada tudosan. Molo tatogihon sasahalak dohot tu parpunguan, tontu las do rohanta molo ro ibana. Tingki jamita dipasahat, olo do ra dipingkirhon hamu songon dia pangkilalaan ni ibana mambege jamita i. Sungkunsungkun do ra rohamu songon dia hatorangan i boi padengganhon ngolunasida. Ujungna, lam taronjar ma rohamuna patuduhon pangargaion tu hatorangan na dibegemuna sian jamita i.

¹⁸ Songon i ma pangkilalaanta tingki manjaha buku na diparade tu umum. Umpamana, Joujou Paboahon edisi umum dohot artikel na diparade di jw.org, patorangkon Bibel jala mura antusan. Tingki tajaha hatorangan on, tamba ma pangantusionta. Jala, lam togu ma haporseaonta tu hasintongan. Dung i, taboto ma cara na dumenggan laho marbarita. Songon i ma tongtong majalah Sadarlah! patoguhon haporseaonta na tutu do adong Panompa. Majalah Sadarlah! mangurupi hita laho mangkatindangkon na tahaporseai.​—Jaha 1 Petrus 3:15.

19. Songon dia do hita patuduhon pangargaion tu sude na pinarade ni Jahowa?

¹⁹ Diparade Jahowa do tudutudu dohot panogunoguon tu hita. (Mat. 5:3) Tongtong ma tajaha jala taulahon di parngoluonta sude hatorangan na dipaboa tu hita. Molo tabahen songon i, tadapot ma laba jala on patuduhon na taargai do sude na pinarade ni Jahowa tu hita.​—Jes. 48:17.