1, 2. Sungkunsungkun aha do na tubu di rohanta sian hata ni Jesus na disurat di Mateus 24:14?

NUNGA disurirangkon Jesus, barita na uli taringot Harajaon ingkon dibaritahon tu sude jolma saleleng ari parpudi. (Mat. 24:14) Sitindangi Ni Jahowa, ditanda di liat portibi on alani ulaonnasida marbarita. Adong do na marlomo ni roha tu barita ni nasida, alai na deba nai ndang. Nang pe ndang sude marlomo ni roha tu barita na tapasahat, alai godang do na mangargai ulaonta marbarita. Holan Sitindangi Ni Jahowa do na manggohi surirang ni Jesus laho marbarita. Boasa boi tadok songon i? Boasa pos rohanta molo hita mangulahon ulaon na disurirangkon Jesus?

² Godang kelompok agama mandok, nasida pe marbarita na uli. Alai, nasida mangulahon i marhite jamita di gereja, TV, internet, manang holan paboahon sambing taringot Jesus. Adong muse mandok, marbarita na uli  do nasida marhite mangalehon pangurupion tu halak na asing songon dokter, perawat manang guru. Alai, songon i do na nidok ni Jesus?

3. Songon na disurat di Mateus 28:19,20 aha do opat siulahonon ni halak Kristen?

³ Halak na asing i do dipangido Jesus ro mandapothon siseanna? Ndang! Dung dipahehe, didok Jesus ma tu angka siihuthon ibana, ”Laho ma hamu, podai hamu ma saluhut bangso, didi hamu ma nasida, . . .  laos ajari hamu ma nasida mangaradoti nasa hata naung hupatikkon tu hamu.” (Mat. 28:19, 20) Ala hita siihuthon Jesus, adong opat na porlu taulahon. Hita ingkon mambahen sisean, mambahen tardidi jala mangajari. Alai, na parjolo na ingkon taulahon, i ma laho manjumpangi. Sahalak sarjana Alkitab patorangkon, ”’Laho’, i ma na ingkon diulahon sude na porsea, nang pe mardalan pat manang manaripari laut.”​—Mat. 10:7; Luk. 10:3.

4. Aha do na hombar tu hata ”sijala jolma”?

⁴ Songon dia do bahenon ni sisean i laho mangulahon on? Sadasada do nasida disuru marbarita manang ingkon diuluhon do mangulahon i? Ndang tolap holan sahalak sisean marbarita tu ”sude bangso” alani i, ingkon sada punguan do nasida laho pasahathon barita i. On ma ulaon na didok ni Jesus tu siseanna tingki dijou nasida gabe ”sijala jolma”. (Jaha Mateus 4:18-22.) Sijala dengke na nidok ni Jesus, ndang holan sahalak. Ndang songon halak na mangkail na paimahon dengke mangallang umpan. Laho manangkup dengke mamangke jala, porlu diuluhon jala porlu godang halak laho mangulahon i.​—Luk. 5:1-11.

5. Aha do opat sungkunsungkun na porlu taalusi, jala boasa i porlu?

⁵ Laho mamboto ise na mamaritahon barita na uli saonari, porlu taboto alus ni opat sungkunsungkun na di toru on:

• Barita aha do na laho dipasahat?

• Aha do na mangonjar roha ni nasida?

• Songon dia do nasida laho mangulahon i?

• Sahat tudia jala sadia leleng do i diulahon?

Alus ni sungkunsungkun on, mangurupi hita mamboto ise na mangulahon ulaon on, jala patoguhon rohanta asa tongtong marbarita.​—1 Tim. 4:16.

6. Boasa pos rohanta molo hita pasahathon barita na diparentahon ni Jesus?

⁶ Jaha Lukas 4:43. Jesus mamaritahon ”barita na uli taringot Harajaon” jala i do na ingkon dibaritahon  siihuthon ibana. Punguan na dia do na mamaritahon barita na uli taringot Harajaon? Holan Sitindangi Ni Jahowa do na mangulahon i! Diulahon do i nang pe adong na so marlomo ni roha. Umpamana, parrohahon ma na didok ni sahalak imam Katolik taringot Sitindangi Ni Jahowa. Disungkun ibana do Sitindangi Ni Jahowa di sude negara na hea diingani ibana taringot aha na dibaritahon nasida. Imam i mandok, ”Oto hian do nasida, alusna holan sada, ’Barita na uli taringot Harajaon.’” Aha na didok ni imam i, patuduhon molo hita ndang na oto, alai i sasintongna patuduhon hita halak Kristen na marsada ni roha. (1 Kor. 1:10) Tarida do muse barita on sian majalah Joujou Paboahon Barita Harajaon ni Jahowa. Majalah on, adong di 254 bahasa jala ganup bulan dicetak godangna hirahira 59.000.000. On ma majalah na gumodang disarhon di liat portibi on!

7. Sian dia do taboto molo angka pandita ndang mangulahon parenta ni Jesus laho marbarita?

⁷ Ndang dibaritahon angka pandita Harajaon ni Debata. Didok nasida, Harajaon ni Debata i adong di bagasan roha. (Luk. 17:21) Ndang diajarhon nasida Harajaon ni Debata i sada pamarentaon na diparenta ni sada Raja, i ma Jesus. Holan di tingki ari Natal manang tingki ari Paska do jotjot ditaringoti nasida Jesus. Ndang dipatorang nasida, holan Harajaon ni Debata na boi paluahon jolma sian hasusaan jala na pasohothon hajahaton. (Pgk. 19:11-21) Ndang diantusi angka pemimpin ni gereja aha na diulahon Jesus dung gabe Raja di Harajaon ni Debata. Ala ndang diantusi nasida barita na dipasahat ni Jesus, ujungna ndang diantusi nasida boasa ingkon dibaritahon i.

8. Aha do na ingkon diingot tingki mangulahon ulaon marbarita?

⁸ Ndang hepeng na niluluan ni sisean ni Jesus tingki marbarita. Didok Jesus, ”Sibasabasa do i tu hamu; antong, basabasahon hamu ma i!” (Mat. 10:8) Alani i, ulaon marbarita na uli ndang dalan laho mangalului hepeng. (2 Kor. 2:17) Ndang digaji sisean ni Jesus tingki marbarita. (Jaha Ulaon ni Apostel 20:33-35.) Nang pe naung tangkas parenta ni Jesus, alai godang do angka gereja manjalo hepeng marhite kolekte laho pajongjongkon gereja, manggaji pandita dohot angka parkarejo di gereja i. Alani i, godang pemimpin ni gereja na gabe mamora.​—Pgk. 17:4, 5.

9. Aha do na patuduhon Sitindangi Ni Jahowa marbarita ala nionjar ni roha?

⁹ Dibahen Sitindangi Ni Jahowa do  kolekte di Bale Harajaon manang di parpunguan bolon? Ndang! Alai, ulaon ni nasida dipatupa marhite sumbangan sukarela. (2 Kor. 9:7) Taon naung salpu, dua miliar jom dipangke Sitindangi Ni Jahowa marbarita na uli, jala sia juta parsiajaran Bibel di jabu dipatupa ganup bulan. Ndang digaji nasida, alai marhite las ni roha dipangke nasida hepengna sandiri mangulahon i. Taringot ulaon ni Sitindangi Ni Jahowa, sahalak peneliti mandok, ”Na tinuju ni nasida, i ma marbarita dohot mangajari.” Didok muse, ndang adong halak na digaji di Sitindangi Ni Jahowa. Antong, molo so hepeng do na talului tingki marbarita, aha do na mangonjar rohanta mangulahon i? Holongta tu Jahowa dohot tu dongan do umbahen na rade hita mangulahon i. Ulaon on, manggohi surirang na disurat di Psalmen 110:3. (Jaha.)

10. Songon dia do dibahen Jesus dohot siseanna marbarita?

¹⁰ Songon dia do dibahen Jesus dohot siseanna marbarita? Laho do nasida manjumpangi halak. Umpamana, marbarita do nasida di dalan, di pasar manang sian jabu tu jabu. (Mat. 10:11; Luk. 8:1; Ul. 5:42; 20:20) Marbarita sian jabu tu jabu, i ma na dumenggan asa boi pajumpang dohot godang halak.

11, 12. Tingki marbarita na uli, songon dia do Sitindangi Ni Jahowa marimbar sian na asing na mangangku Kristen?

 ¹¹ Dibaritahon halak na mangangku Kristen do barita na uli songon na dibaritahon Jesus? Holan jamita do na jotjot dipasahat pandita tu ruasna. Ndang diajari nasida na asing gabe sisean, alai sae do holan ruas na adong dijamitai nasida. Sipata, holan ruasna do dijujui laho marbarita. Umpamana, taon 2001, Paus Paulus Johannes II paboahon marhite surat, asa diulahon angka ruasna marbarita mangihuthon apostel Paulus na mandok, ”Marjea do ahu, aut so hubaritahon” barita na uli i. Didok paus on muse, ulaon marbarita, ndang holan diulahon halak naung dilatik, sude ruas ni gereja ingkon dohot do marbarita. Alai, holan pigapiga do na mangulahon na didokna i.

¹² Songon dia do molo Sitindangi Ni Jahowa? Holan nasida do na mamaritahon naung gabe Raja Jesus di taon 1914. Diulahon nasida do parenta ni Jesus, jala patujolohon ulaon i di ngolu ni nasida. (Mrk. 13:10) Buku Pillars of Faith—American Congregations and Their Partners mandok, marbarita na uli do ulaon na rumingkot di Sitindangi Ni Jahowa. Dipaboa muse, molo adong diida nasida halak na male, holsoan, marsahit, olo do nasida mangurupi. Alai, ndang hea lupa nasida paboahon taringot haluaon dohot ajal ni hasiangan on. Sitindangi Ni Jahowa, marbarita na uli maniru Jesus dohot angka siseanna.

13. Sahat tudia do barita na uli i dibaritahon?

¹³ Didok Jesus tu siihuthon ibana asa marbarita jala pasahathon barita na uli ”di liat portibi on”. Dung i, disuru do nasida mambahen sisean sian ”saluhut bangso”. (Mat. 24:14; 28:19, 20) On patuduhon, barita na uli ingkon dibaritahon di sandok portibi on.

14, 15. Aha do na patuduhon Sitindangi Ni Jahowa manggohi surirang ni Jesus taringot marbarita na uli di liat portibi on? (Ida gombar di mula ni parsiajaran.)

¹⁴ Holan Sitindangi Ni Jahowa do na manggohi surirang ni Jesus marbarita na uli di liat portibi on. Boasa tadok songon i? Adong do hirahira 600.000 halak pandita di Amerika Serikat, alai adong hirahira 1.200.000 Sitindangi Ni Jahowa marbarita na uli disi. Di liat portibi on, adong hirahira 400.000 imam Katolik, alai lobi sian ualu juta Sitindangi Ni Jahowa marbarita na uli di 240 negeri. Tarida ma, Sitindangi Ni Jahowa marbarita na uli di liat portibi on laho pasangaphon dohot mamuji Debata Jahowa!​—Ps. 34:2; 51:17.

¹⁵ Ala hita Sitindangi Ni Jahowa, na tatuju i ma marbarita na uli tu godang halak andorang so ro dope ari i. Laho mangulahon on, nunga marjuta buku, majalah, risalah manang gokkon tu kebaktian dohot tu ari Parningotan hamamate ni Jesus na diterjemahon jala disarhon lobi sian 700 bahasa. Sude on ndang manggarar. Taon naung  salpu, hirahira 4,5 miliar buku na marojahan sian Bibel disarhon. Disarhon do muse lobi sian 200 juta Bibel New World Translation of the Holy Scriptures lobi sian 130 bahasa. Situs Webta nunga adong lobi sian 750 bahasa. Holan Sitindangi Ni Jahowa do na mangulahon ulaon na balga on.

16. Sian dia do taboto Sitindangi Ni Jahowa diurupi tondi parbadia?

¹⁶ Sadia leleng do ulaon marbarita on diulahon? Jesus mandok, barita na uli dibaritahon sahat tu na ro ujungna. Tondi parbadia ni Debata do na mangurupi Sitindangi Ni Jahowa boi mangulahon ulaon parbaritaon on sahat tu na ro ari i. (Ul. 1:8; 1 Ptr. 4:14) Deba gereja olo do ra mandok, ’Adong tondi parbadia di nasida.’ Alai, boi do diulahon nasida songon na diulahon ni Sitindangi Ni Jahowa? Adong do kelompok na maniru ulaon ni Sitindangi Ni Jahowa, alai ndang tolap ni nasida mangulahon i. Adong do na rade marbarita, alai holan satongkin. Adong do na marbarita sian jabu tu jabu, alai ndang barita na uli taringot Harajaon ni Debata na dibaritahon. Alani i, ndang diulahon nasida ulaon marbarita songon na binahen ni Jesus.

17, 18. (a) Boasa pos rohanta molo Sitindangi Ni Jahowa do na mamaritahon barita na uli taringot Harajaon saonari? (b) Boasa hita boi tongtong mangulahon ulaon i?

¹⁷ Saonari, ise do na mamaritahon barita na uli taringot Harajaon? Holan Sitindangi Ni Jahowa! Sian dia taboto? Ala hita pasahathon barita na sintong, i ma barita na uli taringot Harajaon. Tingki marbarita, hita mamangke cara na sintong. Hita taronjar sian ias ni roha na patuduhon holongta tu Jahowa dohot tu dongan. Ulaon marbarita on ma ulaon na umbalga, ala ingkon dibaritahon tu sude halak na adong di sude bangso dohot marragam bahasa. Dung i, ingkon tongtong do hita mamaritahon barita na uli taringot Harajaon sahat tu na ro ujungna!

¹⁸ Longang do rohanta mangida ulaon ni naposo ni Jahowa mamaritahon barita na uli saleleng ari parpudi. Alai, boasa boi taulahon i? Apostel Paulus mandok, ”Ai diula Debata do di bagasan hamu giot ni roha nang ulaon saut, mangihuthon lomo ni rohana.” (Plp. 2:13) Jahowa do na mangalehon hagogoon asa boi hita tongtong mamaritahon barita na uli!​—2 Tim. 4:5.