1-3. (a) Aha do na ingkon tapauba nang pe nunga tardidi? (b) Tingki maol hita mambahen hamubaon, aha do sungkunsungkun na boi ro tu rohanta? (Ida gombar di mula ni parsiajaran.)

SALELENG martaontaon diulahon si Kevin do marjuji, marisap, mabuk jala marnarkoba. ^[1] (Ida catatan.) Dung i, diparsiajari ibana ma taringot Jahowa jala naeng gabe alealeNa. Marhite pangurupion ni Jahowa dohot hataNa, boi ma ibana mambahen hamubaon di ngoluna.​—Heb. 4:12.

² Dung tardidi si Kevin, tongtong dope ibana mambahen hamubaon asa boi gabe halak Kristen na denggan. (Eps. 4:31, 32) Umpamana, parmuruk hian do ibana andorang so mananda hasintongan. Ndang dirimpu ibana songon i maolna mangorom hamurukonna. Si Kevin mandok, sasintongna ummaol do mangorom diri asa unang muruk, sian na pasohon hasomalan na so denggan na diulahon ibana andorang so tardidi! Alai, boi do ibana mambahen  hamubaon ala dipangido ibana pangurupion sian Jahowa jala marsitutu marsiajar Bibel.

³ Andorang so tardidi hita, nunga tabahen godang hamubaon asa boi mangolu hombar tu na didok Bibel. Alai dung tardidi pe, ingkon tongtong do tabahen hamubaon asa boi maniru Debata dohot Kristus. (Eps. 5:1, 2; 1 Ptr. 2:21) Umpamana, marungutungut, manggosip jala mandok hata na so tutu taringot dongan sahaporseaon. Manang, mabiar do hita tu hata ni angka dongan ala ndang taulahon na denggan. Ra, nunga marsitutu hita saleleng martaontaon mambahen hamubaon, alai sai tongtong dope hita mangulahon hahurangan na sarupa. Olo do gabe sungkunsungkun rohanta, ’Boasa maol hita mambahen hamubaon nang pe nunga tardidi? Aha do na ingkon huulahon asa boi mangulahon prinsip ni Bibel na mambahen lam denggan parangengku?’

4. Boasa ndang boi tongtong tabahen las roha ni Jahowa?

⁴ Tahaholongi do Jahowa jala lomo do rohanta asa sian nasa roha mambahen las rohaNa. Alai, ndang boi sai taulahon on ala hita jolma na mardosa. Jotjot do hita mangkilala songon hata ni apostel Paulus na mandok, ”Ai nang pe husangkapi mangulahon na denggan, ndang tarulahon ahu i.”​—Rom 7:18, Bibel siganup ari; Jak. 3:2.

5. Aha do na ingkon tapauba sian dirinta andorang so tardidi jala aha do na boi mangambati hita nang pe naung tardidi?

⁵ Andorang so tardidi, nunga tapasiding angka ulaon na dihasogohon roha ni Jahowa. (1 Kor. 6:9, 10) Alai, tongtong dope hita jolma na mardosa. (Kol. 3:9, 10) Alani i, olo dope taulahon na sala nang pe hita nunga martaontaon tardidi. Sian tingki tu tingki, ra adong do sangkap dohot pingkiran na so denggan manang maol do tahilala mangorom hahuranganta. Alani i, porlu do hita mangalo hahurangan na sarupa saleleng martaontaon.

6, 7. (a) Aha do na mambahen hita boi maraleale tu Jahowa nang pe hita jolma na mardosa? (b) Boasa boi pos roha mangido tu Jahowa asa disesa dosanta?

⁶ Nang pe hita jolma na mardosa, alai boi do hita maraleale jala manomba Jahowa. Sai ingot ma songon dia hamu parjolo sahali boi gabe aleale ni Jahowa. Diida Ibana do na denggan sian dirimuna jala lomo rohaNa asa ditanda hamu Ibana. (Joh. 6:44) Diboto Ibana do hahuranganmuna jala diboto Ibana do na laho ulahononmu dope na sala. Alai nang pe songon i, tongtong do lomo rohaNa hamu gabe alealeNa.

⁷ Mansai dihaholongi Jahowa do hita jala dilehon Ibana do silehonlehon na arga. Disuru Ibana do anakNa tu tano on bahen tobusan di hita. (Joh. 3:16) Tingki taulahon na sala, boi do tapangido tu Jahowa asa disalpuhon hasalaanta. Alani tobusan, pos do rohanta molo Ibana boi manesa dosanta jala hita boi tongtong gabe alealeNa. (Rom 7:24, 25; 1 Joh. 2:1, 2) Ingot ma, Jesus mate laho manobus dosa ni angka jolma na marsitutu mambahen hamubaon. Nang pe tahilala godang situtu hasalaanta, tongtong ma martangiang tu Jahowa  mangido hasesaan ni dosa. Molo ndang taulahon on, dos ma songon na so olo manunsi tanganta na kotor. Mandok mauliate do hita tu Jahowa ala nunga dipaloas hita gabe alealeNa, nang pe hita jolma na mardosa!​—Jaha 1 Timoteus 1:15.

8. Boasa ndang boi leas roha tu hahuranganta?

⁸ Alai, unang ma leas rohanta tu hahuranganta manang talului sidalian asa tongtong mangulahon i. Dipaboa Jahowa do tu hita jolma na songon dia na boi gabe alealeNa. (Ps. 15:1-5) Alani i, molo naeng jonok hita tu Jahowa, ingkon marsitutu do hita maniru Ibana dohot anakNa. Ingkon marsitutu do hita mangorom sangkap na so denggan jala pasidingkon i sian dirinta. Nang pe naung leleng hita tardidi, ingkon tongtong do hita mambahen lam denggan parangenta.​—2 Kor. 13:11.

9. Sian dia do taboto na marsitutu hita manolukkon jolma na imbaru?

⁹ Apostel Paulus mandok tu halak Kristen, ”Tanggali hamu ma jolma na buruk i, isara di pangalaho najolo, ai laho mago do i hinorhon ni angka hisaphisap sipaotooto. Alai paimbaru hamu ma [tongtong] dirimuna di bagasan tondi ni rohamuna! Jala solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan!” (Eps. 4:22-24) Ayat on patuduhon hita porlu tongtong marsitutu mambahen hamubaon jala manolukkon ”jolma na imbaru”. Alani i, nang pe hita nunga leleng manomba Jahowa, ingkon tongtong do taparsiajari angka parangeNa. Bibel boi do mangurupi hita mambahen hamubaon jala maniru parange ni Jahowa.

10. Aha do na ingkon taulahon asa boi tongtong mangihuthon na didok Bibel jala sungkunsungkun aha do na boi ro tu rohanta?

¹⁰ Sude do hita marlomo ni roha laho mangihuthon aha na didok Bibel. Alani i, porlu do hita marsitutu molo naeng mambahen hamubaon. Boasa hita porlu marsitutu mambahen hamubaon? Boi do Jahowa mambahen asa mura hita mangulahon na sintong?

11-13. Boasa lomo roha ni Jahowa asa marsitutu hita pasidingkon sangkap na so denggan?

¹¹ Tingki tapingkirhon taringot hasiangan on dohot sude na adong di bagasanna, pos do rohanta molo Jahowa marhagogoon laho mangulahon manang aha pe. Umpamana, ditompa Ibana do mata ni ari na mansai balga hagogoonna, na boi mambahen hatiuron dohot las ni ari ganup detik. Holan otik do sian i na dihaporluhon laho mambahen mangolu angka na di tano on. (Ps. 74:16; Jes. 40:26) Dilehon Jahowa do gogo tu angka naposoNa di tano on. (Jes. 40:29) Tangkas ma, molo boi Jahowa mangulahon  on, tontu boi do Ibana mambahen hita asa mura mangalo hahuranganta jala pasidingkon sangkap na so denggan. Alai, boasa ndang diulahon Ibana i?

¹² Dilehon Jahowa do tu hita hak na sumurung. Diloas do hita mamillit laho mangoloi Ibana manang ndang. Tingki tapillit mangoloi Debata jala marsitutu mangulahon lomo ni rohaNa, on patuduhon hita mangkaholongi jala mambahen las rohaNa. Didok Sibolis do molo Jahowa ndang Parhuaso na denggan. Alani i molo taoloi Jahowa, patuduhon na lomo do rohanta molo Debata gabe Parhuaso di hita. Jala pos do rohanta, diargai Jahowa do ganup na taulahon asa boi mangoloi Ibana. (Job 2:3-5; Poda 27:11) Tingki marsitutu hita mangorom hahuranganta nang pe maol taulahon, on patuduhon na marsihohot do hita tu Jahowa jala lomo rohanta Ibana gabe Parhuaso di hita.

¹³ Dipaboa Jahowa do na ingkon marsitutu hita maniru angka parangeNa. (Kol. 3:12; jaha 2 Petrus 1:5-7.) Dipangido Ibana do asa marsitutu hita mangorom roha dohot pingkiranta. (Rom 8:5; 12:9) Tingki marsitutu hita mambahen hamubaon jala marhasil, tahilala ma las ni roha.

14, 15. Aha do na porlu taulahon asa boi maniru holong ni Debata? (Ida ma kotak ”Bibel dohot Tangiang Mangurupi Nasida Mambahen Hamubaon.”)

¹⁴ Aha do na ingkon taulahon asa boi maniru angka parange ni Jahowa? Tingki mambahen hamubaon, taloas ma Jahowa mangurupi hita. Rom 12:2 mandok,  ”Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.” Asa boi taboto aha na dihalomohon roha ni Debata, ingkon tapangasahon do pangurupion na dilehon Ibana. Ingkon tajaha do Bibel ganup ari, tarimangi jala martangiang ma mangido tondi parbadia laho mangurupi hita. (Luk. 11:13; Gal. 5:22, 23) Molo taulahon i, boi ma Jahowa mangurupi hita mangantusi lomo ni rohaNa jala boi ma taparsiajari songon dia pingkiranNa. Dung i, aha na tapingkiri, na tahatahon dohot na taulahon boi ma mambahen las roha ni Jahowa. Jala boi ma hita marsiajar mangorom hahuranganta. Alai nang pe nunga taulahon on, porlu do hita sai marsitutu mangorom i.​—Poda 4:23.

¹⁵ Asing ni manjaha Bibel ganup ari, hita porlu mamparsiajari angka publikasi songon Joujou Paboahon dohot Sadarlah! Godang artikel sian majalah on boi mangurupi hita maniru parange ni Jahowa jala dipaboa do songon dia cara mangorom hahuranganta. Ra adong do dapotta artikel manang ayat na boi mangurupi hita. Boi ma tapapungu manang tasurat angka ayat dohot artikel on, asa boi muse tajaha di tingki na asing.

16. Boasa ndang porlu hita marmetmet ni roha molo ndang boi hatop mambahen hamubaon?

 ¹⁶ Dihaporluhon do tingki laho marsiajar maniru parange ni Jahowa. Molo dihilala hamu ndang boi dope mambahen godang hamubaon laho maniru parange ni Debata, porlu ma hamu sabar. Parjolo sahali, ingkon marsitutu do hamu laho mangulahon na didok Bibel. Molo lam marsitutu hamu pahombarhon pingkiran dohot parniulaonmu tu lomo ni roha ni Jahowa, lam mura ma hamu mangihuthon pingkiranNa jala lam mura mangulahon na sintong.​—Ps. 37:31; Poda 23:12; Gal. 5:16, 17.

17. Aha do na tapaima di ari na naeng ro molo marsihohot hita tu Jahowa?

¹⁷ Sai tarpaima do hita tu ari na naeng ro, tingki ndang mardosa be hita jala boi manomba Jahowa salelengna. Di tingki i, ndang porlu be hita marsitutu mangalo hahuranganta jala mura ma hita maniru Jahowa. Alai saonari pe, boi do hita manomba Jahowa ala dilehon Ibana do silehonlehon, i ma tobusan. Nang pe mardosa, boi do tabahen las rohaNa molo tongtong hita marsitutu mambahen hamubaon jala mangihuthon aha na diajarhon Bibel.

18, 19. Songon dia do asa pos rohanta molo Bibel boi mangurupi hita asa tongtong mambahen hamubaon?

¹⁸ Diulahon si Kevin do sude na diparsiajari ibana asa boi mangorom diri unang mura muruk. Dirimangi jala marsitutu do ibana mambahen hamubaon di ngoluna hombar tu na didok Bibel. Diihuthon ibana do poda na dilehon dongan sahaporseaon. Nang pe porlu pigapiga taon si Kevin mangulahon on, alai boi do ibana gabe sahalak parhobas di huria. Jala nunga 20 taon on ibana gabe sahalak sintua. Alai saonari, tongtong dope ibana marsitutu mangalo hahuranganna.

¹⁹ Songon si Kevin, ingkon tapadenggan do tongtong parangenta. Molo taulahon on, lam jonok ma hita tu Jahowa. (Ps. 25:14) Jala tingki marsitutu hita mambahen hamubaon asa boi palashon roha ni Debata, urupanNa do hita asa marhasil. Pos ma rohanta, Bibel boi do mangurupi hita mambahen hamubaon di ngolunta.​—Ps. 34:9.