1. Tikki taida akka toppaan, aha do na ro tu pikkiranta?

MOLO taida sude toppaan ni Jahowa di alam semesta on, sarupa do ra perasaanta songon si Daud na mandok, “Molo huida langit na binahenmi, songon i nang bulan dohot akka bintang na tinoppami, tung aha ma huroha jolma i, umbahen na diingot Ho ibana? Jala tung aha ma anak ni jolma i, umbahen na diparrohahon Ho ibana?” (Ps. 8:3, 4) Gelleng hian do hita dibandingkon tu toppaan ni Jahowa na asing, misalna akka bintang. Alai nang pe songon i, diparrohahon Jahowa do hita. Diparrohahon Jahowa do jolma na parjolo, i ma si Adam dohot si Hawa. Jala, dibahen do nasida gabe bagian sian keluargana.

2. Aha do na diparettahon Jahowa tu si Adam dohot tu si Hawa?

² Si Adam dohot si Hawa do anak ni Jahowa na parjolo di portibi on. Sebagai anggota keluarga ni Jahowa, adong do na ikkon diulahon nasida. Didok Debata, “Marpinoppari ma hamu asa lam godang hamu. Gohi hamu ma tano on jala rajai ma i.” (1 Mus. 1:28) Lomo do roha ni Jahowa asa marpinoppari nasida jala mangurus tano on. Molo torus do dioloi nasida paretta ni Jahowa i, boi ma nasida gabe anggota keluarga ni Jahowa salelengna.

3. Boasa sada hasangapon di jolma gabe bagian sian keluarga ni Jahowa?

³ Sada hasangapon do di si Adam dohot si Hawa gabe bagian  sian keluarga ni Jahowa. Songon na disurat di Psalmen 8:5, didok si Daud do, “Holan saotik do dibahen Ho [jolma i] uttoru sian akka suru-suruan, dilehon Ho do hamuliaon dohot hasangapon tu ibana.” Tutu do i, memang dang sarupa gogo, bisuk, dohot kesanggupan ni jolma tu akka suru-suruan. (Ps. 103:20) Alai holan saotik do “uttoru” jolma sian akka suru-suruan. Songon i ma sangap ni jolma i ditoppa Jahowa. Luar biasa do i!

4. Ala dang dioloi si Adam dohot si Hawa Jahowa, aha do na masa tu nasida? Jala aha do na lao tabahas di artikel on?

 ⁴ Ala mangalo si Adam dohot si Hawa tu Jahowa, gabe dang bagian sian keluarga ni Jahowa be nasida. Gabe susa ma pinoppar ni nasida. Alai nang pe songon i, dang gabe muba rencana ni Jahowa tu jolma. Lomo do roha ni Jahowa asa akka jolma na mangoloi Ibana gabe anakna salelengna. Tabahas ma jo bukti na patuduhon na mararga do hita di Jahowa, jala aha na ikkon taulahon asa boi hita gabe bagian sian keluarga ni Jahowa. Tabahas ma muse pasu-pasu na tadapot molo gabe anak ni Debata hita.

5. Ala ditoppa Jahowa do hita mirip tu Ibana, songon dia do hita mangargai i?

⁵ Ditoppa Jahowa do hita mirip songon Ibana. (1 Mus. 1:26, 27) Ala ditoppa do hita mirip songon Debata, gabe boi ma tatiru akka sifatna na massai denggan i. Gabe boi ma tapatudu holong, asi ni roha, boi ma hita setia, jala mangulahon na sittong. (Ps. 86:15; 145:17) Molo tatiru akka sifat ni Jahowa, tapasangap ma Ibana, jala tapatudu ma na mandok mauliate do hita tu Jahowa ala ditoppa hita mirip tu Ibana. (1 Ptr. 1:14-16) Jala molo tabahen songon i gabe las ma roha ni Jahowa, hita pe gabe marlas ni roha ma. Jadi, ala dilean Jahowa do tu hita kemampuan lao maniru akka sifatna i, boi ma hita memenuhi syarat gabe anggota keluargana.

6. Songon dia do dibahen Jahowa paradehon tano on asa boi gabe inganatta tinggal?

⁶ Dilean Jahowa do tano na massai uli gabe inganatta tinggal. Sebelum ditoppa Jahowa jolma, jolo diparade Ibana do tano on lao inganan ni jolma tinggal. (Job 38:4-6; Jer. 10:12) Alani burju ni Jahowa, diparade Ibana do sude akka na denggan dohot na mambahen las rohatta. (Ps. 104:14, 15, 24) Dung sae dibahen Jahowa i, diida Ibana ma massai “denggan do i sude”. (1 Mus. 1:10, 12, 31) Dilean Jahowa do hasangapon tu jolma boi “marhuaso” tu akka toppaanna na di tano on. (Ps. 8:6) Lomo do roha ni Jahowa akka jolma i boi marlas ni roha menikmati akka toppaanna i salelengna. Pasti mandok mauliate do hita di sude na dibahen Jahowa i.

7. Sesuai tu Josua 24:15, pilihan aha do na boi tabahen?

⁷ Dilean Jahowa do tu hita hak lao mamillit. Alani i, boi do tapillit akka na naeng taulahon di ngolutta. (Jaha Josua 24:15.) Las hian do roha ni Jahowa molo tapillit manomba Ibana. (Ps. 84:11; Poda 27:11) Ala dilean Jahowa do tu hita hak lao mamillit, adong ma kesempatanta mambahen akka keputusan na denggan. Saonari taida ma songon dia Jesus mangulahon i.

8. Songon dia do cara ni Jesus mamakke hakna lao mamillit?

⁸ Tatiru ma Jesus na mambahen kepentingan ni halak na asing uppetting sian kepentinganna sandiri. Hea do sada tikki nungnga loja hian Jesus dohot akka siseanna. Jadi naeng istirahat ma halak i. Hape ro ma akka halak mandapotton nasida naeng mambege ajaran ni Jesus. Gabe dang jadi be nasida istirahat. Alai dang jut roha ni Jesus, gariada asi do rohana mangida halak i. Jadi aha do na  diulahon Jesus? “Godang ma diajarhon ibana tu nasida taringot tu Debata.” (Mrk. 6:30-34) Tatiru ma Jesus, talean ma tikki dohot gogotta mangurupi akka dongan na asing. Molo taulahon i, na pasangappon Debata Jahowa do hita disi. (Mat. 5:14-16) Jala, i pe patuduhon na lomo do rohatta gabe anggota keluarga ni Debata.

9. Aha do na porlu diingot akka natua-tua?

⁹ Dilean Jahowa do kesanggupan margelleng tu jolma, jala dilean do tanggung jawab mangajari gellengna i asa makkaholongi dohot manomba Jahowa. Nang pe umgogo suru-suruan sian jolma, alai dang dilean kemampuan dohot tanggung jawab i tu nasida. Sada hasangapon do di natua-tua pagodang-godangkon gellengna. Songon dia do carana akka natua-tua mangargai silehon-lehon ni Jahowa i? Tanggung jawab na massai penting do di natua-tua “mangajar-ajari jala mamodai [anakkonna] hombar tu lomo ni roha ni Jahowa”. (Eps. 6:4; 5 Mus. 6:5-7; Ps. 127:3) Lao mangurupi natua-tua mangajari akka gellengna, diparade organisasi do godang publikasi, video, musik, dohot akka artikel web di jw.org. On patuduhon holong hian do roha ni Jahowa dohot Jesus tu akka dakdanak. (Luk. 18:15-17) Molo berupaya do akka natua-tua mangajari gellengna jala Jahowa na diandalhon halak i, pasti las do roha ni Jahowa. Jala molo diulahon nasida i, na mangurupi gellengna do nasida disi asa gabe anggota keluarga ni Jahowa salelengna.

10-11. Aha do laba ni tobusan tu hita?

¹⁰ Dilehon Jahowa do Anak haholonganna asa boi hita muse gabe anggota keluargana. Songon naung tabahas di  paragraf 4, ala mangalo si Adam dohot si Hawa tu Jahowa, gabe dang anggota keluarga ni Jahowa be halak i. (Rom 5:12) Alai songon dia do akka pinopparna? Ala holong roha ni Jahowa tu pinoppar ni si Adam, dilehon ma kesempatan tu nasida asa boi gabe anggota keluargana muse asal ma setia nasida tu Jahowa. Alani i do dilehon Jahowa Jesus Kristus Anak haholonganna i gabe tobusan. (Joh. 3:16; Rom 5:19) Alani tobusan i, gabe adong ma 144.000 halak na setia na dipillit gabe akka anak ni Debata.​—Rom 8:15-17; Pgk. 14:1.

¹¹ Asing ni si 144.000 halak i, adong dope kesempatan dilean Jahowa tu akka halak na asing gabe anggota keluargana. Alai ikkon toktong do nasida setia tu Jahowa, sappe ujian terakhir di ujung ni pamarettaon ni Jesus 1.000 taon i. (Ps. 25:14; Rom 8:20, 21) Alani harapan i, gabe boi ma nasida sian saonari manjou Jahowa ‘Ama’. (Mat. 6:9) Akka halak na dipahehe pe haduan, mandapot kesempatan do tong marsiajar taringot tu Jahowa. Molo setia do nasida, boi ma nasida gabe anggota keluarga ni Jahowa.

12. Sukkun-sukkun aha do na porlu tapikkirhon?

¹² Nakkin nga tabahas be akka bukti na patuduhon na mararga do jolma di Jahowa. Dipillit Ibana do 144.000 halak gabe anakna di surgo. Jala dilean do muse harapan tu “punguan bolon” lao mangolu salelengna di paradeiso. (Pgk. 7:9) Jadi, aha do na ikkon taulahon asa boi hita gabe bagian sian keluarga ni Jahowa salelengna?

13. Songon dia do carana asa boi hita gabe anggota keluarga ni Jahowa? (Markus 12:30)

¹³ Tasomba ma Jahowa sian nasa rohatta lao patuduhon holongta tu Ibana. (Jaha Markus 12:30.) Pasu-pasu na ummarga sian sude na dilean Jahowa tu hita, i ma boi manomba Jahowa. “Molo taoloi akka parettana”, berarti na holong do rohatta tu Jahowa. (1 Joh. 5:3)  Dipaboa Jesus do paretta ni Jahowa na ikkon taulahon, i ma mambahen sisean jala mandidi nasida. (Mat. 28:19) Ikkon masihaholongan do hita muse dohot akka dongan na asing. (Joh. 13:35) Molo toktong hita setia, boi ma hita gabe anggota keluarga ni Jahowa.​—Ps. 15:1, 2.

14. Songon dia ma carana patuduhon holong tu halak na asing? (Mateus 9:36-38; Rom 12:10)

¹⁴ Tapatudu ma holong tu na asing. Holong ma sifat ni Jahowa na paling penting. (1 Joh. 4:8) Nungnga dihaholongi Jahowa hian hita nang pe dang tatanda dope Ibana. (1 Joh. 4:9, 10) Tatiru ma Ibana, tahaholongi ma halak na asing. (Eps. 5:1) Sada cara patuduhon holong tu na asing, i ma molo taurupi nasida mananda Jahowa selagi adong dope tikki. (Jaha Mateus 9:36-38.) Molo taurupi sasahalak mananda Jahowa, boi ma ibana gabe anggota keluarga ni Jahowa. Molo nga tardidi ibana, toktong ma tahaholongi jala taargai ibana. (1 Joh. 4:20, 21) Songon dia carana? Ikkon porsea do hita tu donganta i. Seandaina pe dibahen donganta i keputusan na so masuk akkal tahilala, unang ma pittor tahakimi ibana. Unang ma ragu hita tu motifna manomba Jahowa. Gabe tadok, keputusanna i keputusan na mementingkan diri. Ikkon sangap do tabahen ibana.​—Jaha Rom 12:10; Plp. 2:3.

15. Tu ise do porlu tapatudu asi ni roha dohot haburjuon?

¹⁵ Tapatudu ma asi ni roha dohot haburjuon tu akka halak. Molo naeng toktong do hita gabe keluarga ni Jahowa salelengna, ikkon taulahon do paretta ni Jahowa. (Luk. 6:32-36) Misalna diajarhon Jesus do tu hita asa tapatudu asi ni roha dohot haburjuon tu akka halak, termasuk ma i tu musutta. Memang dang sai mura mangulahon i, alai ikkon tatiru do cara marpikkir ni Jesus. Molo taoloi Jahowa jala tatiru Jesus, i patuduhon na lomo do rohatta gabe anggota keluarga ni Jahowa salelengna.

16. Songon dia do hita boi manjaga nama baik ni keluarga ni Jahowa?

¹⁶ Tajaga ma nama baik ni keluarga ni Jahowa. Molo di sada keluarga, biasana abangna do na ditiru adekna. Molo na denggan do na diulahon abangna i, i ma na ditiru adekna. Alai molo na sala do diulahon abangna i, i do tong na ditiru adekna. Songon i ma nang di keluarga ni Jahowa. Molo adong sahalak donganta di huria mangulahon na sala manang gabe murtad, olo do gabe ditiru dongan na asing i. Gabe sega ma nama baik ni keluarga ni Jahowa. (1 Tes. 4:3-8) Jadi, unang ma tatiru na mangulahon na sala jala unang ma tapaloas manang aha pe mambahen hita dao sian Bapakta Jahowa.

17. Cara marpikkir na songon dia do na ikkon tabolokkon, jala boasa?

¹⁷ Jahowa ma na taandalhon, unang arta. Molo sai parjolo do talului Harajaon ni Debata jala sai tautamahon lomo ni rohana, marjanji do Jahowa paradehon sipanganon, pakkean, dohot tempat tinggal di hita. (Ps. 55:22; Mat. 6:33) Molo sai taingot i, dang ro be tu rohatta, ikkon godang do artatta asa boi las roha jala aman ngolutta. Alana taboto do, boi pe hita marlas ni roha molo taulahon do lomo ni roha ni Jahowa. (Plp. 4:6, 7) Molo tamba artatta, habis ma tikki dohot tenagatta lao mangurus i. Gabe sai holan na tusi ma pikkiranta. Hape dipangido Jahowa do hita mangutamahon lomo ni rohana. Jadi ikkon fokus do hita mangulahon lomo ni roha ni Jahowa. Pasti dang olo hita songon bawa na mora na di jaman ni Jesus. Ala paholongku rohana tu artana, gabe disia-siahon ibana ma kesempatan lao manomba Jahowa jala gabe anak ni Debata!​—Mrk. 10:17-22.

18. Aha do pasu-pasu na lao jaloon ni akka halak na toktong setia?

¹⁸ Molo toktong hita setia jala mangoloi Debata, boi ma hita makkaholongi jala manomba Jahowa saleleng-lelengna. Marlas ni roha ma hita tinggal di tano on, inganan naung diparade Jahowa hian di hita. Jala haduan, dipaimbaru ma sude di Harajaon ni Debata. Dung i dipasae Jesus ma sude hasusaan na dibahen si Adam dohot si Hawa ala dang mangoloi Debata. Paheheon ni Jahowa ma marjuta halak naung mate. Dilean ma tu nasida kesempatan mangolu saleleng ni lelengna di paradeiso, jala sempurna ma nasida. (Luk. 23:42, 43) Molo nga sempurna be annon sude jolma na di tano on, jaloon ni nasida ma “hamuliaon dohot hasangapon” sian Debata songon naung disuratton si Daud hian.​—Ps. 8:5.

19. Aha ma na ikkon torus taingot?

¹⁹ Massai godang do pasu-pasu na luar biasa na diparade Jahowa tu “punguan bolon”. Massai holong do roha ni Debata tu hamu. Lomo do rohana asa gabe bagian sian keluargana hamu. Jadi torus ma ulahon hamu lomo ni rohana. Ingot hamu ma akka janji ni Debata i tiap ari. Argai hamu ma kesempatan naung dilean tu hamu lao manomba Bapakta na di surgo i jala mamuji Ibana saleleng ni lelengna.