1. Sesuai tu 1 Tessalonik 5:11, aha do na ikkon torus diulahon sude halak Kristen?

 HEA do adong pembangunan manang renovasi Bale Harajaon di huriamuna? Molo hea, pasti diingot hamu dope tikki parjolo sahali marpungu disi. Mandok mauliate do hamu tu Jahowa. Jala alani las ni rohamuna olo do ra sappe tangis hamu tikki parjolo sahali marende di Bale i. Tottu gabe dipasangap do goar ni Jahowa alani pembangunan Bale Harajaon i. Alai adong dope na boi taulahon lao pasangappon Ibana, i ma patoguhon akka dongan sahaporseaon. Umbalga do pengaruh ni i sian pembangunan Bale Harajaon. Hea do ditaringoti Apostel Paulus on di 1 Tessalonik 5:11, i ma ayat tema ni artikel on. *​—Jaha.

2. Aha do na lao tabahas di artikel on?

² Dipatudu Apostel Paulus do roha sapakkilalaan tikki patoguhon akka dongan sahaporseaon. Gabe teladan na denggan do ibana di hita. Di artikel on, lao tabahas ma songon dia si Paulus mangurupi akka dongan sahaporseaon (1) asa martahan mangadopi hasusaan, (2) asa gabe siboan dame, jala (3) asa toktong togu haporseaon ni nasida tu Jahowa. Taida ma songon dia hita maniru Apostel Paulus lao patoguhon akka donganta saonari.​—1 Kor. 11:1.

3. Nang pe susa si Paulus, alai aha do na uppetting di ibana?

³ Massai holong do roha ni si Paulus tu akka dongan sahaporseaonna. Dipatudu ibana do asi ni roha dohot empati tu akka donganna na susa, ala ibana sandiri pe hea do  susa. Hea do si Paulus dang marhepeng jala ikkon karejo do ibana mambahen tenda asa boi paradehon na porlu di ibana dohot akka halak na mandongani ibana. (Ul. 20:34) Tikki di Korint, mambahen tenda do ibana raphon si Akuila dohot si Priskilla. Alai setiap “ari Sabat”, lao do ibana marbarita tu halak Jahudi dohot tu halak Junani. Dung ro si Silas dohot si Timoteus, “dipakke si Paulus ma sude tikkina lao paboahon hata ni Debata tu akka jolma”. (Ul. 18:2-5) Sai diingot si Paulus do na uppetting di ngoluna, i ma manomba Debata Jahowa. Kerja keras do si Paulus patoguhon akka dongan sahaporseaon. Dipaingot si Paulus do nasida asa unang sappe akka hasusaan dohot tanggung jawab keluarga mangabbati nasida mangulahon “na urrikkot”, i ma manomba Debata Jahowa.​—Plp. 1:10.

4. Songon dia do si Paulus dohot si Timoteus mangurupi akka dongan na dianiaya?

⁴ Dang leleng dung dibentuk huria na baru di Tessalonik, dianiaya ma akka dongan disi. Ala dang dapot ni akka halak di kota i si Paulus dohot si Silas, ditakkup nasida ma akka dongan jala diboan “tu jolo ni akka pamaretta”. Gogo ma didok akka halak di kota i, “Dialo nasida do akka paretta ni Kesar.” (Ul. 17:6,7) Boi tabayakkon pasti mabiar do akka dongan disi. Baru dope nasida gabe halak Kristen, alai toppu ma masa penganiayaan tu nasida. Alai dang lomo roha ni si Paulus gabe dang semangat be nasida melayani Jahowa alani kejadian i. Memang ikkon lao do ibana dohot si Silas sian kota i, alai dipastihon si Paulus do asa adong na patoguhon akka dongan disi. Didok si Paulus do tu nasida, “Husuru hami ma si Timoteus mandapotton hamu . . .  lao manjujui jala patoguhon haporseaonmuna asa unang adong sian hamu na gale haporseaonna alani akka hasusaan i.” (1 Tes. 3:2, 3) Bisa jadi nga hea dialami si Timoteus dohot akka dongan di Listra penganiayaan, jala diida si Timoteus do songon dia si Paulus patoguhon nasida. Ala nungnga hea dirasahon ibana dukungan ni Jahowa, gabe boi ma diurupi si Timoteus akka dongan di Tessalonik asa marpos ni roha, pasti diurupi Jahowa do nasida mangadopi penganiayaan i.​—Ul. 14:8, 19-22; Heb. 12:2.

5. Aha do pengaruhna tu si Bryant ala dipatogu sahalak sintua ibana?

⁵ Aha dope na diulahon si Paulus lao patoguhon akka donganna? Tikki dikunjungi ibana muse huria di Listra, di Ikonium, dohot di Antiokia, “dipillit si Paulus dohot si Barnabas ma akka sintua di ganup huria”. (Ul. 14:21-23) Akka sintua i ma na patoguhon akka dongan di huria i, dos songon na diulahon akka sintua di jamanta saonari. Taida ma jo pengalaman ni donganta si Bryant. Didok ibana, “Tikki marumur 15 taon au, ditinggalhon bapa ma hami jala ditinggalhon omakku ma muse Jahowa. Gabe kecil hati ma au alani i.” Aha do na mangurupi si Bryant boi martahan? Didok ibana, “Adong do sahalak sintua na margoar si Tony na jotjot manogihon au makkata-hatai di parpunguan dohot di tikki na asing. Dipaingot ibana ma godang do akka halak na hea mangadopi situasi na sarupa songon au, alai boi do nasida toktong marlas ni roha. Dijahahon ibana do tu au Psalmen 27:10, jala jotjot do dipaingot ibana au tu teladan ni Raja Hiskia na toktong setia tu Jahowa nang pe ditinggalhon bapakna Jahowa.” Aha ma pengaruh ni i tu si Bryant? Didok ibana, “Ala sai torus do au dipatogu si Tony, gabe semangat  ma au muse. Ujungna merintis ma au.” Hamu akka sintua, parrohahon hamu ma ise di huriamuna na porlu dipatogu marhite “akka hata na denggan” songon si Bryant.​—Poda 12:25.

6. Aha dope na diulahon si Paulus lao patoguhon akka dongan?

⁶ Dipaingot si Paulus do muse akka donganna taringot pengalaman ni akka naposo ni Jahowa najolo na ‘songon ombun godangna’. Martahan do nasida mangadopi hasusaan na borat ala diurupi Jahowa. (Heb. 12:1) Dipaboa si Paulus do on tu akka donganna i asa barani nasida jala fokus tu “kota ni Debata na mangolu i”. (Heb. 12:22) Songon i do tong na tahilala saonari. Dipatogu do hita tikki manjaha songon dia Jahowa mangurupi si Gidion, si Barak, si Daud, si Samuel, dohot na asing. (Heb. 11:32-35) Godang do tong pengalaman ni donganta di jaman saonari na patoguhon haporseaon. Akka donganta di kantor pusat jotjot do manjalo surat sian akka dongan di liat portibi on. Di surat i didok nasida, dipatogu do haporseaon ni nasida tikki manjaha kisah hidup ni naposo ni Jahowa di jamanta saonari.

7. Aha do na boi taparsiajari sian nasehat ni si Paulus di Rom 14:19-21?

⁷ Boi do hita patoguhon akka dongan molo gabe siboan dame hita di huria. Memang dang sai sapandapot hita dohot akka dongan, alai unang ma sappe dang marsada hita alani i. Jala unang ma tapaksahon pandapotta molo dang adong prinsip ni Bibel na maralo tu pandapot ni donganta. Marsiajar ma hita sian halak Kristen di huria na di Rom najolo. Di huria i adong do halak Jahudi dohot akka halak sian bangso na asing. Ala dang marlakku be Patik ni si Musa, dang ikkon diihutton halak Kristen be patik taringot sipanganon na dia na boi diallang dohot na so boi diallang. (Mrk. 7:19) Mulai sian i adong ma piga-piga halak Jahudi na merasa dang sala mangallang sude sipanganon, alai halak Jahudi na asing dang setuju. Gabe dang marsada huria alani i. Jadi didok si Paulus ma tu nasida, “Tumagon ma unang mangallang jagal, manang unang manginum anggur, manang mangulahon manang aha pe na mambahen gale haporseaon ni donganmuna.” (Jaha Rom 14:19-21.) Diurupi si Paulus do akka dongan i asa mangida bahayana molo dang marsada huria. Boi do i mambahen gale haporseaon ni nasida. Si Paulus pe olo do mengalah asa unang gabe gale haporseaon ni akka donganna. (1 Kor. 9:19-22) Boi do hita patoguhon akka dongan jala gabe siboan dame di huria, molo olo hita mengalah jala dang mamaksahon pandapotta sandiri.

8. Songon dia do si Paulus manjaga asa toktong dame huria?

⁸ Gabe teladan do si Paulus tikki berurusan dohot akka dongan na so setuju tu keputusan na penting di huria. Contohna di abad na parjolo, adong do halak Jahudi na mamaksa halak Kristen na so sian Jahudi asa disunat. Olo do ra asa unang tersinggung akka halak Jahudi na asing. (Gal. 6:12) Sasittongna dang setuju si Paulus tu pandangan ni nasida i. Alai dang dipaksahon si Paulus pandanganna diihutton akka dongan di tikki i. Gariada dipasahat ibana do masalah i tu akka apostel dohot akka sintua na di Jerusalem. (Ul. 15:1, 2) Hasilna gabe boi ma huria i toktong dame jala marlas ni roha.​—Ul. 15:30, 31.

9. Aha do na boi tatiru sian si Paulus?

 ⁹ Molo adong masalah na boi mambahen huria dang marsada, denggan do molo tasukkun akka donganta bawa na dilantik Jahowa. Asing ni i, boi do tong talului akka petunjuk sian publikasi na diparade organisasi. Molo taihutton akka petunjuk i jala dang tapaksahon pandanganta sandiri, na mangurupi huria do hita disi asa toktong dame.

10. Aha dope na diulahon si Paulus asa toktong mardame huria?

¹⁰ Aha dope na diulahon si Paulus asa toktong mardame huria? Berfokus do ibana tu kelebihan ni akka donganna, dang tu kelemahan ni nasida. Di ujung ni suratna tu halak Rom, dipaboa ibana do disi godang goar ni akka dongan sahaporseaonna. Alai dang holan i, disurat ibana do muse akka na denggan na dibahen nasida. Jadi tatiru ma si Paulus. Akka na denggan ma na taida sian akka donganta. Molo tabahen songon i, gabe lam akrab jala marsihaholongan ma hita dohot sude na di huria.

11. Molo adong parsoalanta dohot dongan di huria, aha do na ikkon taulahon?

¹¹ Sipata halak Kristen na matang pe olo do berbeda pandapot songon si Paulus dohot si Barnabas. Hea do si Barnabas naeng mamboan si Markus di pardalanan utusan injil ni nasida, alai dang setuju si Paulus. Akibatna gabe tubu ma parbadaan di nasida. Gabe marsirang ma si Paulus dohot si Barnabas. (Ul. 15:37-39) Alai nang pe songon i berupaya do si Paulus, si Barnabas, dohot si Markus asa mardame. On patuduhon lomo do roha ni nasida asa dame jala marsada huria. Buktina di pudian ni ari, akka na denggan do na dihatahon si Paulus taringot si Barnabas dohot si Markus. (1 Kor. 9:6; Kol. 4:10) Saonari pe molo adong parsoalanta dohot dongan di huria, berupaya ma hita mardame. Akka na denggan ma na taida sian donganta i. Hasilna gabe boi ma dame jala marsada huria.​—Eps. 4:3.

12. Tantangan aha do na diadopi akka donganta?

¹² Molo taurupi akka dongan asa toktong marhaporseaon tu Jahowa, na patoguhon nasida do hita disi. Adong do akka donganta na mandapot tantangan sian keluargana na so Saksi, sian dongan sakarejo, manang donganna sasikkola. Adong muse na marsahit na parah manang ikkon berjuang melawan perasaan negatif. Asing ni i, adong do donganta naung leleng tarpaima tu ari ni Jahowa. Akka situasi on boi do manguji haporseaon ni nasida tu Jahowa. Songon i do na dihilala halak Kristen di abad na parjolo. Songon dia ma si Paulus patoguhon nasida?

13. Songon dia do si Paulus mangurupi akka donganna lao mambela haporseaon ni nasida?

¹³ Dipakke si Paulus do Hata ni Debata lao patoguhon haporseaon ni akka donganna. Di tikki i adong do piga-piga halak Jahudi naung gabe halak Kristen, alai dang malo dope mambela haporseaonna di jolo ni keluargana na so sahaporseaon. Didok keluargana i, undenggan do agama Jahudi sian agama Kristen. Jadi marhite suratna tu halak Heber, diurupi si Paulus ma nasida asa boi patoguhon haporseaonna. (Heb. 1:5, 6; 2:2, 3; 9:24, 25) Penjelasan ni si Paulus na masuk akkal di suratna i mangurupi nasida asa denggan mangalusi keluargana na menentang i. Saonari pe porlu do taurupi akka donganta mambela haporseaon ni nasida. Carana, tapakke ma publikasi na diparade organisasi.  Molo adong akka dongan na poso na direhei ala dang mangarayahon hari ulang tahun dohot ari raya, boi do tapakke bukku Mangolu Saleleng ni Lelengna pelajaran 44 lao mangurupi nasida mambela haporseaonna.

14. Nang pe sibuk si Paulus marbarita dohot mangajari, alai aha do na diupayahon ibana?

¹⁴ Dijujui si Paulus do akka dongan “mangulahon na denggan” lao patuduhon holong ni roha. (Heb. 10:24) Si Paulus mangurupi akka dongan dang holan sian pakkataion alai dohot do sian pambahenan. Misalna tikki masa haraparon di Judea, dohot do si Paulus mangurupi papunguhon sumbangan tu nasida. (Ul. 11:27-30) Sasittongna sibuk hian do si Paulus marbarita dohot mangajari. Alai sai dilului ibana do cara asa boi dohot mangurupi akka dongan na susa di parhepengon. (Gal. 2:10) Hasilna gabe lam pos ma roha ni akka dongan i, na sai jagaon ni Jahowa do nasida. Saonari pe molo talean tikki, keterampilan, dohot upayatta lao mangurupi akka dongan na hona bencana, na patoguhon haporseaon ni nasida do hita disi. Boi do muse talean sumbangan. Molo taulahon i sude, gabe pos ma roha ni akka dongan dang hea ditinggalhon Jahowa nasida.

15-16. Songon dia do hita boi patoguhon akka dongan na gale haporseaonna?

¹⁵ Dang menyerah si Paulus mangurupi akka dongan na gale haporseaonna. Marasi ni roha do si Paulus tu nasida, jala lambok do ibana tikki makkatai. (Heb. 6:9; 10:39) Contohna, di suratna tu halak Heber jotjot do dipakke ibana hata “hita”. On patuduhon si Paulus pe berupaya do mangulahon nasehatna i. (Heb. 2:1, 3) Songon si Paulus, unang ma menyerah hita mangurupi akka dongan na gale haporseaonna.  Gariada berupaya ma hita patuduhon na botul-botul parduli hita tu nasida. Molo taulahon i, gabe boi ma dihilala akka dongan na holong rohatta tu nasida. Jala taingot ma, ikkon lambok do caratta pasahatton hatatta asa olo nasida manangihon.

¹⁶ Dipapos si Paulus do roha ni akka donganna, dang lupa Jahowa tu sude na denggan na hea diulahon nasida. (Heb. 10:32-34) Taulahon ma tong songon i. Tikki makkata-hatai dohot akka dongan na gale haporseaonna, tasukkun ma aha na mambahen nasida olo gabe Saksi Jahowa, jala songon dia Jahowa mangurupi nasida saleleng on. Asing ni i, tapapos ma roha ni nasida dang hea dilupahon Jahowa holong na dipatudu nasida saleleng on, jala dang hea ditinggalhon Jahowa nasida. (Heb. 6:10; 13:5, 6) Molo taulahon i sude, gabe semangat ma muse nasida asa torus melayani Jahowa.

17. Keterampilan aha do na porlu tatingkatton?

¹⁷ Songon parkarejo bangunan na porlu maningkatton keterampilanna, hita pe porlu do maningkatton keterampilanta lao patoguhon akka dongan. Dipatogu do akka dongan molo taceritahon pengalaman ni akka naposo ni Jahowa najolo na marhasil manaon hasusaan. Asing ni i molo akka na denggan do na tahatahon taringot akka donganta, gabe dame ma huria. Dipatogu do muse haporseaon ni akka dongan molo tabagihon akka parsiajaran na tadapot sian Bibel, molo taurupi nasida, jala tapatogu akka dongan na gale haporseaonna.

18. Aha do tekadmuna?

¹⁸ Marlas ni roha do akka dongan na dohot pajongjokkon Bale Harajaon. Boi do hita makkilala las ni roha sisongon i molo olo hita patoguhon akka dongan di huria. Molo Bale Harajaon boi do sega, alai anggo hasil ni ulaonta lao patoguhon akka dongan sahaporseaon, martahan do i saleleng ni lelengna. Alani i, bertekad ma hita asa torus ‘marsiurupan jala patoguhon akka dongan na asing’.​—1 Tes. 5:11.