PARSIAJARAN 33
Sai Diparrohahon Jahowa do Akka Naposona
“Diparrohahon Jahowa do halak na makkabiari Ibana.”—PS. 33:18.
ENDE 4 Jahowa do Parmahanku
NA LAO DIULAS *
1. Boasa dipangido Jesus tu Jahowa asa dijaga akka siseanna?
DI BORNGIN parpudi andorang so mate Jesus, martangiang ma ibana tu Debata Jahowa. Dipangido ibana ma tu Jahowa asa dijaga akka siseanna. (Joh. 17:15, 20) Memang, sai dijaga Jahowa do akka naposona. Alai ditangiakkon Jesus pe i, ala diboto ibana bahenon ni Sibolis nama akka tantangan na maol tu siseanna. Jala diboto Jesus do asa boi nasida monang mangalo Sibolis, ikkon diurupi Jahowa do nasida.
2. Sesuai tu Psalmen 33:18-20, boasa dang porlu hita mabiar nang pe godang hasusaanta?
2 Di portibi na dirajai Sibolis on, godang do hasusaan na diadopi halak Kristen saonari. Boi do gabe kecil hati hita alani akka hasusaan i, bahkan boi do i manguji kesetiaanta tu Jahowa. Alai songon na lao taida di artikel on, dang porlu hita mabiar. Diparrohahon Jahowa do hita. Diboto Ibana do hasusaan na taadopi jala lomo rohana mangurupi hita. Saonari taida ma dua contoh di Bibel na patuduhon ‘diparrohahon Jahowa do akka halak makkabiari Ibana’.—Jaha Psalmen 33:18-20.
TIKKI MERASA KESEPIAN HITA
3. Akka aha do na mambahen hita merasa kesepian?
3 Nang pe taboto godang akka dongan sahaporseaon di huria, alai olo do hita merasa kesepian. Misalna akka na poso merasa dang adong donganna tikki paboahon haporseaonna di sikkola manang tikki pinda tu huria na baru. Asing ni i, adong do akka dongan na torus merasa kecil hati jala merasa dang adong na mangattusi perasaanna. Dang olo nasida menceritahon i tu na asing, ala didok rohana dang adong na parduli tu nasida. Perasaan kesepian boi do mambahen hita lam kecil hati manang gabe lam khawatir. Alai dang lomo roha ni Jahowa molo songon i perasaanta. Sian dia taboto?
4. Boasa merasa kesepian si Elia?
4 Marsiajar ma hita sian si Elia. Nungnga lobi sian 40 ari ibana melarikan diri sian si Izebel na naeng pamatehon ibana. (1 Raj. 19:1-9) Tikki sahalakna di gua didok ibana do tu Jahowa, “Holan au nama na mangolu.” (1 Raj. 19:10) Hape sebenarna adong dope panurirang na asing di Israel. Adong do 100 panurirang naung diselamatton si Obaja sian si Izebel. (1 Raj. 18:7, 13) Attong boasa merasa kesepian si Elia? Na dirippu ibana do nungnga mate sude panurirang na diselamatton si Obaja i? Ala na so tamba do sisomba Jahowa dukkon peristiwa di Dolok Karmel? Manang, na merasa do ibana dang adong na mamboto situasina i jala dang adong na parduli tu ibana? Memang dang dipaboa di Bibel taringot i. Alai diattusi Jahowa do songon dia perasaan ni si Elia, jala diboto Ibana do songon dia carana mangurupi si Elia.
Tikki merasa kesepian hita, aha do na boi taparsiajari sian cara ni Jahowa mangurupi si Elia? (Ida paragraf 5-6)
5. Songon dia do Jahowa mangurupi si Elia?
5 Adong piga-piga cara ni Jahowa mangurupi si Elia. Contohna ditogihon Ibana do si Elia asa makkatai tu Ibana. Dua hali ma disukkun Jahowa tu si Elia, “Marhua ho dison Elia?” (1 Raj. 19:9, 13) Tikki dipaboa si Elia sude na di rohana, ditangihon Jahowa do ibana. Dibahen Jahowa do mukjizat lao paposson roha ni si Elia massai balga do huasona jala dang ditadikkon Jahowa ibana. Dipaboa Jahowa do muse tu si Elia, godang nai dope halak Israel na toktong manomba Ibana. (1 Raj. 19:11, 12, 18) Pasti lega do perasaan ni si Elia dung paboahon sude na di rohana jala mangida songon dia Jahowa mangalusi ibana. Asing ni i dilehon Jahowa do tu si Elia tugas na penting. Disuru do ibana asa melantik si Hasael gabe raja di Siria, si Jehu gabe raja di Israel, jala si Elisa gabe panurirang. (1 Raj. 19:15, 16) Hasilna gabe boi ma si Elia torus marpikkiran positif. Dang holan i, ditugasson Jahowa do si Elisa lao mandongani ibana. Tikki merasa kesepian hamu, songon dia do Jahowa mangurupi hamu?
6. Aha do na boi ditangiakkon hamu tikki merasa kesepian? (Psalmen 62:8)
6 Dipangido Jahowa do hita asa martangiang tu Ibana. Diboto Jahowa do sitaonon na masa tu hita. Jadi pos ma rohatta, pasti ditangihon Ibana do tangiangta. (1 Tes. 5:17) Alana lomo do roha ni Jahowa manangihon tangiang ni naposona. (Poda 15:8) Aha do na boi ditangiakkon hamu tikki merasa kesepian songon si Elia? Paboa ma sude na di rohamuna tu Jahowa. (Jaha Psalmen 62:8.) Paboa ma aha na dikhawatirhon hamu, jala aha dampakna tu hamu. Pangido ma tu Jahowa asa diurupi hamu mengatasi perasaanmuna i. Contohna molo mabiar hamu mangalehon kesaksian di sikkola sahalakmuna, pangido ma tu Jahowa asa dilehon tu hamu habaranion dohot bisuk asa denggan patorakkon i. (Luk. 21:14, 15) Molo berjuang do hamu mengatasi perasaan negatif, pangido ma tu Jahowa asa diurupi hamu paboahon perasaanmuna i tu dongan na matang. Pangido ma tu Jahowa asa boi diattusi donganta i perasaanmuna. Paboa ma sude na di rohamuna tu Jahowa, jala parrohahon ma songon dia Ibana mangalusi tangiangmuna i. Dung i jalo ma bantuan sian na asing asa unang merasa kesepian be hamu.
Torus ma hamu sibuk di ulaon marbarita rap dohot akka dongan na asing (Ida paragraf 7)
7. Aha do na boi diparsiajari hamu sian si Marsel?
7 Godang do tugas na dilehon Jahowa tu hita. Pos ma rohatta diargai Jahowa do upaya na tabahen lao mandalatton tugas di huria dohot di ulaon marbarita. (Ps. 110:3) Songon dia do akka tugas i mangurupi hita asa unang merasa kesepian? Taida ma pengalaman ni donganta si Marsel. * Dang leleng dukkon tardidi ibana, ditinggalhon dongan akrabna ma Jahowa. Didok si Marsel, “Dung ditinggalhon ibana Jahowa, gabe ragu ma au tu dirikku. Dang yakin au boi toktong setia tu Jahowa. Gabe merasa kesepian ma au jala ninna rohakku dang adong na mangattusi perasaankon.” Aha do na mangurupi si Marsel? Didok ibana, “Ala sibuk au di ulaon marbarita, gabe dang merasa kesepian be au jala dang torus marpikkiran negatif. Tikki rap marbarita na uli au dohot na asing, gabe marlas ni roha ma au muse.” Nang pe saonari dang boi langsung hita marbarita na uli dohot akka dongan, alai boi do gabe dipatogu hita molo marbarita mamakke surat manang telepon rap dohot nasida. Aha dope na mangurupi si Marsel? Didok ibana, “Sibuk do au mangulahon akka tugas di huria. Molo dapottu tugas sikkola di parpunguan, denggan do hupersiappon i. Gabe pos ma rohakku na arga do au di Jahowa dohot di akka dongan.”
TIKKI MASA SITAONON NA BORAT
8. Aha do dampakna molo masa sitaonon na borat tu hita?
8 Taboto do ikkon taadopi sitaonon saleleng ari parpudi on. (2 Tim. 3:1) Alai sipata masa do i di luar dugaanta. Contohna olo do toppu hita mengalami masalah ekonomi, marsahit na parah, manang mate halak na tahaholongi. Boi do gabe merasa tertekan hita jala dang sanggup manaon i. Tarlumobi ma molo margatti-gatti ro sitaonon i manang sahali ro sude. Alai taingot ma diparrohahon do Jahowa hita. Urupanna do hita asa toktong martahan mangadopi sitaonon na borat i.
9. Aha do na masa tu si Job?
9 Marsiajar ma hita sian si Job. Hea do sahali ro masalah na borat tu ibana. Holan di bagasan sadari, dipaboa ma tu si Job nungnga habis be ternakna ditakko jala dipamate akka parkarejona. Bahkan gellengna pe nungnga mate be sude. (Job 1:13-19) Pasti lungun hian do roha ni si Job alani i. Alai dang sae dope masalahna. Marsahit na parah muse ibana. (Job 2:7) Borat hian do situasi ni si Job di tikki i sappe didok ibana ma, “Magigi do au tu ngolukkon, dang olo be au mangolu.”—Job 7:16.
Tikki makkatai Jahowa tu si Job, dipatudu Ibana do na parduli Ibana tu akka toppaanna. Gabe pos ma roha ni si Job tu holong ni Jahowa (Ida paragraf 10)
10. Songon dia do Jahowa mangurupi si Job? (Ida gambar sampul.)
10 Diparrohahon Jahowa do sude na masa tu si Job. Alani holongna, diurupi do si Job asa marhasil mangadopi sitaononna i. Tikki makkatai Jahowa tu si Job, dipaboa Ibana do taringot akka binatang. On patuduhon na marbisuk situtu do Jahowa jala holong rohana tu akka toppaanna. (Job 38:1, 2; 39:9, 13, 19, 27; 40:15; 41:1, 2) Dipakke Jahowa do muse si Elihu, sahalak bawa na upposo sian si Job, lao patoguhon jala menghibur ibana. Marhite si Elihu dipapos Jahowa ma roha ni si Job, na sai lehononna do upa tu akka halak na setia. Dipakke Jahowa do muse si Elihu mangalehon nasehat tu si Job. Diurupi si Elihu do si Job asa unang holan mamikkiri dirina sandiri, alana dang sadia ibana martimbakkon Debata Jahowa na manoppa sasudena. (Job 37:14) Dilehon Jahowa do muse tugas tu si Job lao manangiakkon tolu donganna na mardosa. (Job 42:8-10) Songon dia do Jahowa mangurupi hita tikki masa sitaonon na borat?
11. Songon dia do Bibel mangurupi hita tikki masa sitaonon?
11 Saonari dang langsung be makkatai Jahowa tu hita, songon na dibahen Ibana tu si Job najolo. Alai makkatai do Ibana tu hita marhite Bibel. (Rom 15:4) Di Bibel dipaboa Jahowa do tu hita harapan taringot ari na naeng ro. Saonari taida ma jo piga-piga ayat ni Bibel na boi patoguhon rohatta tikki marsitaonon. Contohna didok Jahowa do “dang adong na boi manirang hita sian holong ni Debata”, termasuk ma akka sitaononta. (Rom 8:38, 39) Didok do muse, “jonok do Jahowa tu sude halak na jou-jou tu Ibana” marhite tangiang. (Ps. 145:18) Marjanji do Jahowa mangalehon gogo tu hita asa sanggup mangadopi tantangan manang aha pe molo torus hita mangandalhon Ibana. Bahkan, boi do hita marlas ni roha tikki marsitaonon. (1 Kor. 10:13; Jak. 1:2, 12) Taboto do muse holan parsatokkinan do sitaonon i molo dibandingkon tu upa na lao tajalo saleleng ni lelengna. (2 Kor. 4:16-18) Nungnga marjanji Jahowa lao dipamate do Sibolis dohot sude halak na jahat na mambahen hita susa. (Ps. 37:10) Asing ni akka ayat i, adong dope ayat na diingot hamu na boi patoguhon rohamuna molo masa sitaonon?
12. Aha do na ikkon taulahon asa tadapot manfaat tikki marsiajar Bibel?
12 Dipangido Jahowa do hita asa taratur mamparsiajari Bibel jala mangarimangi akka na tajaha i. Dung i taulahon ma aha na taparsiajari asa lam togu haporseaotta jala lam jonok hita tu Jahowa. Hasilna, gabe margogo ma hita mangadopi hasusaan. Dilehon Jahowa do muse tondi parbadiana tu akka halak na mangulahon parettana. Gabe dapotta ‘gogo lobi sian gogo ni sahalak jolma’, asa boi martahan mangadopi hasusaan manang aha pe.—2 Kor. 4:7-10.
13. Songon dia do “naposo haposan” mangurupi hita asa martahan mangadopi sitaonon?
13 Saonari diurupi Jahowa do “naposo haposan jala na marbisuk” lao paradehon godang artikel, video, dohot musik na boi patoguhon haporseaotta jala mangurupi hita toktong jonok tu Ibana. (Mat. 24:45) Ikkon tamanfaatton do sude persediaan on. Sahalak donganta borua sian Amerika Serikat paboahon massai diargai ibana do akka na diparade organisasi. Didok ibana, “Saleleng 40 taon au melayani Jahowa, godang hian do sitaonon na manguji kesetiaanku tu Ibana.” Oppung doli ni donganta on mate ala ditabrak supir na mabuk. Natua-tuana mate ala marsahit na parah. Jala ibana sandiri dua hali do hona kanker. Boasa boi ibana martahan? Didok donganta on, “Sai diparrohahon Jahowa do au. Sude na diparade naposo haposan mangurupi au asa sabar manaon hasusaakki. Sarupa do pakkilalaanku songon si Job na mandok, ‘Sappe mate au, toktong do au setia tu Debata!’”—Job 27:5.
Songon dia do hita boi mangurupi akka dongan di huria? (Ida paragraf 14)
14. Songon dia do Jahowa mangurupi hita marhite akka dongan sahaporseaon? (1 Tessalonik 4:9)
14 Dipangido Jahowa do naposona asa patuduhon holong jala menghibur akka dongan na marsitaonon. (2 Kor. 1:3, 4; jaha 1 Tessalonik 4:9.) Godang do akka donganta na maniru si Elihu. Tikki susa hita, rade do nasida mangurupi hita asa toktong setia. (Ul. 14:22) Songon i do na dihilala si Diana. Diurupi akka dongan di huria do ibana asa toktong jonok tu Jahowa tikki marsahit na parah suamina. Didok ibana, “Borat hian do situasinami on. Alai huida do songon dia Jahowa mangurupi hami. Godang do na diulahon akka dongan di huria lao mangurupi hami. Dikunjungi nasida do hami, ditelepon, jala dihaol do hami. Ala dang boi au mamboan mobil, sai adong do akka dongan na mamboan au marpungu dohot marbarita na uli.” Pasti las do rohatta ala dihaholongi akka dongan hita.
MANDOK MAULIATE TU JAHOWA ALA DIPARROHAHON HITA
15. Aha do na mambahen pos rohatta na boi do hita manaon hasusaatta?
15 Sude do hita manaon hasusaatta be. Alai unang ma hita merasa holan sahalakta mangadopi i. Taingot ma Bapak na parholong do Jahowa i, na sai toktong mamparrohahon hita. Torus do Ibana jonok tu hita, lomo do rohana manangihon tangiangta jala mangurupi hita. (Jes. 43:2) Jadi pos ma rohatta sai urupanna do hita asa sanggup manaon hasusaatta i. Diloas do hita martangiang tu Ibana. Dilehon do Bibel, diparade organisasi do godang publikasi dohot video, jala adong akka dongan na toktong makkaholongi hita.
16. Boha do carana asa toktong hita dijaga Debata?
16 Mandok mauliate do hita tu Jahowa ala sai diparrohahon hita. ‘Marlas ni roha do hita alani Ibana.’ (Ps. 33:21) Molo tamanfaatton akka na diparade Jahowa lao mangurupi hita, on patuduhon na taargai do holong ni Jahowa. Ikkon taulahon ma muse bagianta asa toktong hita dijaga Debata. Molo torus hita berupaya mangoloi Jahowa jala mangulahon na sittong di jolona, jagaonna do hita salelengna!—1 Ptr. 3:12.
ENDE 30 Bapakku, Ale-alekku, jala Debatakku
^ Porlu do hita diurupi Jahowa asa sanggup mangadopi akka sitaonon na masa saonari. Diboto Jahowa do na masa tu hita sude. Jala dilehon Ibana do bantuan tu hita asa boi mangadopi i. Di artikel on naeng taida ma songon dia Jahowa mamparrohahon akka naposona.
^ Piga-piga goar di artikel on nungnga digatti.