1. Aha do na mambahen hamu asa tertarik mamparsiajari surirang ni Bibel?

 LOMO do rohamuna mamparsiajari Bibel? Sahalak donganta na poso na margoar si Ben mandokkon, “Lomo do rohakku mamparsiajari surirang ni Bibel.” Setuju do hamu? Manang maol do ra dihilala hamu mamparsiajari surirang ni Bibel? Olo do ra bosan hamu tikki marsiajar taringot akka surirang i. Alai molo diboto hamu boasa dibahen Jahowa asa disurat akka surirang i di Bibel, gabe tertarik ma hamu lao mamparsiajari i.

2. Aha do na lao tabahas di artikel on?

² Di artikel on, lao tabahas ma boasa porlu taparsiajari akka surirang ni Bibel, jala songon dia carana mamparsiajari i. Dung i, tabahas ma dua surirang na adong di bukku Daniel. Jala taida ma aha do manfaatna molo taattusi lapatan ni surirang i.

3. Aha do na porlu taulahon asa boi mangattusi surirang ni Bibel?

³ Porlu do tapangido bantuan asa boi taattusi surirang ni Bibel. Bayakkon ma molo lao hamu mardalani tu sada tempat, jala dang diboto hamu dope daerah i. Alai adong ma donganmuna na takkas mamboto daerah i. Tikki dipaboa hamu didia posisimuna, diboto ibana do i dohot akka dalan na adong disi. Pasti las do rohamuna molo olo donganmuna i mandongani hamu. Dos songon donganmuna i do Jahowa. Diboto Ibana do aha na lao masa di joloan ni ari. Jadi asa boi taattusi surirang ni Bibel, ikkon serep do rohatta mangido bantuan ni Jahowa.​—Dan. 2:28; 2 Ptr. 1:19, 20.

4. Boasa dibahen Jahowa asa disurat akka surirang i di Bibel? (Jeremia 29:11) (Ida gambar.)

 ⁴ Songon natua-tua na parholong, lomo do roha ni Jahowa asa denggan ngolu ni ianakkonna di ari na naeng ro. (Jaha Jeremia 29:11.) Alai dang diboto natua-tuatta aha na lao masa di ari na naeng ro. Holan Jahowa do na mamboto i, jala sittong do sude hatana i. Dipillit Ibana do akka bawa lao manurat akka surirang ni Bibel asa boi taboto akka peristiwa na penting di ari na naeng ro. (Jes. 46:10) Silehon-lehon ni Jahowa na massai arga do surirang i. Alai songon dia do asa pos rohamuna na saut do sude surirang ni Bibel i?

5. Aha do na boi ditiru akka na poso sian si Max?

⁵ Saonari on, godang do parsikkola na so mangargai Bibel. Olo do ra pakkataion dohot pangalaho ni nasida mambahen ragu akka donganta na poso tu standar ni Jahowa. Parrohahon ma pengalaman ni donganta bawa na margoar si Max. Didok ibana, “Tikki sikkola au, ragu do au tu hasittongan na diajarhon natua-tuakku. Jala dang pos rohakku na sian Debata do Bibel i.” Boha do tanggapan ni natua-tuana? Didok si Max, “Tenang do nasida tikki hupaboa i, hape sasittongna huboto khawatir do nasida.” Dialusi natua-tuana do sukkun-sukkun ni si Max sian Bibel. Alai adong do tong na diulahon si Max. Didok ibana, “Huparsiajari sandiri ma surirang ni Bibel. Jala hupaboa do aha na huparsiajari i tu akka dongan na poso di huria.” Hasilna didok ibana, “Gabe pos rohakku na sian Debata do Bibel i.”

6. Molo ragu dope hamu tu ajaran ni Bibel, aha do na porlu diulahon hamu, jala boasa?

⁶ Molo ragu dope hamu tu ajaran ni Bibel, unang pola maila hamu. Alai ikkon hatop do hamu mambolokkon keraguan i. Dos songon tasik do keraguan i. Molo dipasombu hamu i, lam leleng boi do gabe sega barangmuna na massai arga. Asa unang “sega” haporseaonmuna, sukkun ma dirimuna, ‘Pos do rohakku tu na diajarhon Bibel taringot ari na naeng ro?’ Molo dang pos dope rohamuna, parsiajari hamu ma akka surirang ni Bibel naung masa. Saonari taida ma songon dia carana mangulahon i.

7. Aha do na mambahen si Daniel boi mangattusi akka surirang? (Daniel 12:10) (Ida gambar.)

⁷ Gabe teladan do si Daniel tu hita tikki mamparsiajari surirang. Denggan do motifna mamparsiajari surirang i, i ma asa mamboto hasittongan. Serep do roha ni si Daniel. Diboto ibana do urupan ni Jahowa do ibana mangattusi akka surirang i molo toktong ibana marale-ale tu Jahowa jala mangoloi parettana. (Dan. 2:27, 28; jaha Daniel 12:10.) Dipatudu si Daniel do muse na serep rohana ala diandalhon ibana bantuan ni Jahowa. (Dan. 2:18) Manat do muse si Daniel tikki mamparsiajari surirang i. Dibahen ibana do  riset sian akka surat na badia na adong di tikki i. (Jer. 25:11, 12; Dan. 9:2) Songon dia do hamu boi maniru si Daniel?

8. Aha do motif ni piga-piga halak mamparsiajari surirang? Alai ikkon songon dia do motifta?

⁸ Tapikkirhon ma alasanta mamparsiajari surirang. Ala naeng mamboto hasittongan do umbahen na diparsiajari hamu i? Molo i do, pasti diurupi Jahowa do hamu. (Joh. 4:23, 24; 14:16, 17) Alai adong do halak na asing motifna tikki mamparsiajari surirang. Adong do na naeng mambuktihon dang tutu Bibel i sian Debata. Alani i didok roha ni nasida, boi do nasida sandiri na manottuhon dia na sittong dohot na sala. Jadi ikkon denggan do motifta tikki marsiajar. Asing ni i, adong do sada sifat na penting na porlu tapatudu asa boi taattusi surirang ni Bibel.

9. Sifat aha do na porlu tapatudu asa boi taattusi surirang ni Bibel? Patorang ma.

⁹ Serep ma rohatta. Marjanji do Jahowa mangurupi halak na serep roha. (Jak. 4:6) Jadi porlu do tapangido bantuan sian Jahowa asa taattusi surirang ni Bibel. Molo serep do rohatta, olo do hita mamakke publikasi na diparade naposo haposan. Alana nasida do na dipakke Jahowa lao mangurupi hita asa toktong jonok tu Ibana. (Luk. 12:42) Debata na taratur do Jahowa i. Jadi masuk akkal do molo holan sada do sarana na dipakke Ibana lao mangurupi hita mangattusi isi ni Bibel.​—1 Kor. 14:33; Eps. 4:4-6.

10. Aha do na boi tatiru sian si Esther?

¹⁰ Tabahen ma riset. Pillit ma sada surirang na menarik di hamu jala riset hamu ma i. On ma na diulahon donganta borua na margoar si Esther. Lomo do rohana mamparsiajari surirang taringot haroro ni Messias. Didok ibana, “Tikki marumur 15 taon au, huriset ma akka bukti na patuduhon tutu do disurat akka surirang i sebelum jaman ni Jesus.” Dung diparsiajari ibana taringot Gulungan Laut Mati, gabe pos ma rohana. Didok ibana, “Piga-piga surirang i toho do disurat sebelum jaman ni Jesus. Jadi pasti sian Debata do akka surirang i.” Didok si Esther muse, “Marulak-ulak do hujaha akka bahan i asa boi huattusi.” Alai las do rohana ala dang sia-sia upayana i. Dung diparsiajari ibana akka surirang i, didok ibana ma, “Saonari nungnga pos be rohakku sittong do isi ni Bibel i.”

11. Aha do manfaatna molo pos rohatta tu isi ni Bibel?

¹¹ Molo nungnga taattusi songon dia akka surirang ni Bibel i dipasaut, gabe lam pos ma rohatta tu Jahowa dohot tu petunjuk na dilehon Ibana tu hita. Asing ni i muse, surirang ni Bibel paboahon tu hita taringot harapan di ari na naeng ro. Jadi molo taparsiajari surirang, boi ma hita toktong marpikkiran positif, nang pe adong masalahta. Tabahas ma jo dua surirang na disurat si Daniel naung masa saonari. Molo taattusi surirang i, gabe marbisuk ma hita mambahen keputusan.

12. Manggombarhon aha do pat ni patung na sian “bosi na marcampur tano liat” i? (Daniel 2:41-43)

¹² Jaha Daniel 2:41-43. Tikki dipaboa si Daniel lapatan ni nipi ni Raja Nebukadnesar, didok ibana molo pat ni patung na diida raja i dibahen sian ‘bosi na marcampur tano liat na lembek’. Molo tabandingkon surirang on tu surirang na asing di bukku Daniel dohot Pangungkapon, gabe taboto ma pat ni patung i manggombarhon kuasa dunia Anglo-Amerika. Pamarettaon na paling marhuaso do i di tikkitta saonari. Taringot kuasa dunia on didok si Daniel, ‘gogo do deba bagian ni pamarettaon i, alai gale do na deba nai’. Boasa didok songon i? Alana akka rakyatna na digombarhon tano liat na lembek, dang boi marsada dohot nasida na songon bosi. b

13. Hatorangan aha do na porlu taboto sian surirang on?

¹³ Adong do dua hatorangan na porlu taboto sian patung i, tarlumobi di bagian patna. Parjolo, dipatudu kuasa dunia Anglo-Amerika do na marhuaso nasida. Misalna Amerika Serikat dohot Inggris do negara na monang di Perang Dunia I dohot Perang Dunia II. Alai lam gale do kuasa dunia on ala dang marsada rakyatna jala mangalo do nasida tu pamaretta. Na paduahon, Anglo-Amerika do kuasa dunia na parpudi na mamaretta tikki ro Harajaon ni Debata. Nang pe adong negara na mangalo Anglo-Amerika, alai dang na lao gabe gabe kuasa dunia na baru nasida. Taboto do muse, lao hancur ma pat ni patung i dibahen “batu” na manggombarhon Harajaon ni Debata.​—Dan. 2:34, 35, 44, 45.

14. Dung diboto hamu lapatan ni surirang taringot pat ni patung i, aha ma pengaruhna tu hamu?

¹⁴ Pos do rohamuna na sittong do surirang ni si Daniel taringot pat ni patung i? Molo i do, pasti balga do pengaruhna tu ngolumuna. Gabe dang holan mangalului hepeng manang arta be hamu, ala diboto hamu lao dihancurhon Debata nama portibi on satokkin nai. (Luk. 12:16-21; 1 Joh. 2:15-17) Asing ni i, gabe disadari hamu na massai penting do ulaon marbarita dohot mangajari. (Mat. 6:33; 28:18-20) Dung diparsiajari hamu surirang on, sukkun ma dirimuna, ‘Sian keputusan na hubahen, tarida do na pos rohakku na lao hancur nama tokkin nai sude pamarettaon ni jolma dibahen Harajaon ni Debata?’

15. Ise do saonari “raja utara” dohot “raja selatan”? (Daniel 11:40)

¹⁵ Jaha Daniel 11:40. Dipaboa do di Daniel bindu 11 taringot dua raja manang dua pamarettaon na bersaing. Molo tabandingkon surirang on dohot surirang ni Bibel na asing, boi ma taboto molo saonari “raja utara”, i ma Rusia dohot negara na mendukung ibana. Jala “raja selatan”, i ma kuasa dunia Anglo-Amerika. c

16. Aha do na dibahen “raja utara” tu naposo ni Debata?

¹⁶ Dianiaya “raja utara” do naposo ni Debata na tinggal di daerah na dikuasai nasida. Adong do donganta na dipukkuli jala dipenjarahon alani haporseaon ni nasida. Nang pe songon i, dang gabe mabiar  akka donganta na disi. Gariada gabe lam togu do haporseaon ni nasida tu Jahowa dohot tu Bibel. Alana diboto nasida do penganiayaan i mambuktihon tutu do surirang ni si Daniel i. d (Dan. 11:41) Dung taboto on, gabe lam togu do haporseaotta jala toktong setia tu Jahowa.

17. Aha do tantangan na diadopi naposo ni Debata di daerah na dikuasai “raja selatan”?

¹⁷ Najolo pe, dianiaya “raja selatan” do naposo ni Jahowa. Saleleng Perang Dunia I dohot Perang Dunia II, godang do akka donganta na dipenjarahon ala netral nasida. Jala piga-piga anak ni Saksi na dipakaluar do sian sikkola ala dang olo hormat bendera. Piga-piga taon na parpudi on, diuji do kesetiaan ni naposo ni Jahowa na tinggal di daerah ni “raja selatan” i. Misalna saleleng kampanye pemilihan umum, olo do targoda donganta lao mendukung sada partai politik manang calon sian partai politik i. Memang  dang dohot nasida mamillit tikki pemilihan i. Alai, olo do di roha dohot pikkiran ni nasida gabe dohot nasida marpihak. Jadi massai penting do tapastihon na toktong hita netral di roha dohot pikkiranta.​—Joh. 15:18, 19; 18:36.

18. Gabe holsoan do hita alani persaingan ni “raja utara” dohot “raja selatan”? (Ida gambar.)

¹⁸ Akka halak na so porsea tu surirang ni Bibel, olo do gabe holsoan alani persaingan ni “raja utara” dohot “raja selatan”. (Dan. 11:40) Adong do di nasida na dua sinjata nuklir na boi pamatehon sude na mangolu di tano on. Alai taboto do dang lao paloasson ni Jahowa i masa. (Jes. 45:18) Jadi, unang ma gabe holsoan hita alani persaingan ni “raja utara” dohot “raja selatan” i. Gariada lam togu ma haporseaotta tu ari na naeng ro. Gabe lam pos ma rohatta nungnga tung massai jonok be ujung ni portibi na jahat on.

19. Aha do na porlu taingot taringot akka surirang ni Bibel?

¹⁹ Dang taboto songon dia akka surirang ni Bibel i saut. Gariada Panurirang Daniel pe dang diattusi sude lapatan ni surirang na disurat ibana. (Dan. 12:8, 9) Alai tung pe dang takkas taattusi songon dia sada surirang saut, dang na berarti dang na lao saut i. Pos ma rohatta urupan ni Jahowa do hita mangattusi i di tikki na pas, songon naung dibahen Ibana di tikki naung salpu.​—Am. 3:7.

20. Surirang ni Bibel na dia do na lao masa satokkin nai, jala aha do na porlu torus taulahon?

²⁰ Lao diumumhon akka bangso ma taringot boa-boa na mandok, “Dame do sude jala dang adong be sihabiaran!” (1 Tes. 5:3) Satokkin nai, lao diserang akka pamaretta ni portibi on do sude agama na so sittong jala dihancurhon ma i. (Pgk. 17:16, 17) Jala diserang nasida ma naposo ni Debata. (Hes. 38:18, 19) Dung i dimulai ma porang na parpudi, i ma Armagedon. (Pgk. 16:14, 16) Pos do rohatta masa do akka peristiwa on satokkin nai. Huhut paimahon i, anggiat ma hita torus patuduhon pangargaion tu Jahowa, Bapakta na parholong i. Taparsiajari ma surirang ni Bibel jala taurupi ma na asing mangulahon na sarupa.