1. Boasa terkesan akka pejabat istana ni Babel tu si Daniel?

 POSO dope si Daniel tikki diboan ibana gabe tawanan sian Jerusalem tu Babel. Alai terkesan do akka pejabat istana tu si Daniel, ala “ganteng” do ibana jala sian keluarga na sangap. (1 Sam. 16:7) Alani i dilatik halak Babel ma ibana asa boi karejo di istana.​—Dan. 1:3, 4, 6.

2. Songon dia do Jahowa mangida si Daniel? (Hesekiel 14:14)

² Holong do roha ni Jahowa tu si Daniel, dang ala na ganteng ibana manang ala karejo di istana, alai ala olo do ibana setia tu Jahowa. Dianggap Jahowa do si Daniel halak na tigor marroha songon si Noak dohot si Job. Hape di tikki i, hira-hira marumur 20 taon dope si Daniel, dang songon si Noak dohot si Job naung martaon-taon setia manomba Debata. (1 Mus. 5:32; 6:9, 10; Job 42:16, 17; jaha Hesekiel 14:14.) Jala torus do dihaholongi Jahowa si Daniel saleleng ngoluna.​—Dan. 10:11, 19.

3. Aha do na lao tabahas di artikel on?

³ Di artikel on lao tabahas ma dua sifat ni si Daniel na mambahen ibana massai dihaholongi Jahowa. Na parjolo, tabahas ma tikki sadihari do si Daniel patuduhon akka sifat i. Dung i taida ma aha do na mangurupi si Daniel marsiajar patuduhon sifat i. Jala na parpudi tabahas ma songon dia hita boi maniru ibana. Nang pe artikel on dibahen tu akka na poso, alai hita sude boi do maniru si Daniel.

4. Songon dia do si Daniel patuduhon habaranion? Paboa ma contohna.

⁴ Halak na barani olo do mabiar, alai dang dipasombu ibana biar ni rohana mambahen ibana dang mangulahon na  sittong. Songon i ma si Daniel. Nang pe poso dope ibana, alai barani do ibana. Taparrohahon ma dua peristiwa na patuduhon halak na barani do ibana. Hira-hira dua taon dukkon dihancurhon halak Babel Jerusalem, marnipi ma Raja Nebukadnesar taringot patung na balga. Marsak do ibana alani nipina i. Diancam ibana ma sude halak na malo, termasuk ma si Daniel. Molo dang boi dipaboa nasida lapatan ni nipina, pamateonna ma nasida. (Dan. 2:3-5) Pittor hatop do si Daniel bertindak asa unang dipamate nasida. “Dijuppangi si Daniel ma raja i jala dipangido ma asa dilehon tu ibana tikki lao paboahon lapatan nipi ni raja i.” (Dan. 2:16) Ikkon barani do si Daniel di tikki i jala ikkon marhaposan tu Jahowa. Alana dang adong dipaboa di Bibel nungnga hea si Daniel paboahon lapatan ni nipi. Dipangido si Daniel ma donganna si Sadrak, si Mesak, dohot si Abednego b asa “martangiang tu Debata na di surgo mangido asi ni rohana, asa dipaboa rahasia i tu nasida”. (Dan. 2:18) Dialusi Jahowa do tangiang ni nasida. Ala diurupi Jahowa, gabe boi ma dipaboa si Daniel lapatan ni nipi ni si Nebukadnesar. Gabe dang dipamate nasida.

5. Nandigan do muse diuji habaranion ni si Daniel?

⁵ Dung i diuji do muse habaranion ni si Daniel. Marnipi do muse Raja Nebukadnesar taringot hau na massai balga. Marsak do tong ibana alani nipina i. Alai barani do si Daniel paboahon lapatan ni nipi i, termasuk ma paboahon na lao gabe rittik do raja i, jala dang mamaretta be ibana saleleng piga-piga taon. (Dan. 4:25) Olo do ra dianggap raja si Daniel halak na mangalo jala boi do dipamate ibana ala dipaboa lapatan ni nipi ni raja i. Alai barani do si Daniel pasahatton i.

6. Aha do na mambahen si Daniel asa boi gabe barani?

⁶ Aha do na mangurupi si Daniel asa boi barani saleleng ngoluna? Tikki poso si Daniel, pasti marsiajar do ibana sian teladan ni omak dohot bapakna. Dioloi nasida do paretta ni Jahowa tu akka natua-tua, asa mangajarhon patik ni Debata tu gelleng ni nasida. (5 Mus. 6:6-9) Dang holan ajaran dasar ni Patik na diboto si Daniel, songon  Sappulu Patik. Alai diboto ibana do muse godang hatorangan taringot patik i, misalna taringot aha na boi dohot na so boi diallang halak Israel. c (3 Mus. 11:4-8; Dan. 1:8, 11-13) Diparsiajari ibana do muse sejarah ni naposo ni Debata jala diboto ibana do aha na masa tu nasida tikki dang diihutton nasida standar ni Jahowa. (Dan. 9:10, 11) Pengalaman ni si Daniel saleleng ngoluna mambahen pos rohana pasti sanggup do Jahowa dohot suru-suruanna mangurupi ibana.​—Dan. 2:19-24; 10:12, 18, 19.

7. Aha do muse na mambahen si Daniel gabe barani? (Ida gambar.)

⁷ Diparsiajari si Daniel do muse akka tulisan ni akka panurirang ni Debata, termasuk ma surirang ni si Jeremia. Sian i gabe diboto si Daniel ma na lao marujung penawanan ni halak Jahudi di Babel. (Dan. 9:2) Dung diida si Daniel sai saut do hata ni Jahowa gabe lam pos ma rohana tu Jahowa, jala i ma na mambahen ibana gabe barani. (Bandingkon tu Rom 8:31, 32, 37-39.) Jala na paling penting, jotjot do si Daniel martangiang tu Bapakna na di surgo. (Dan. 6:10) Diakkui ibana do hasalaanna tu Jahowa jala dipaboa ibana do sude na di rohana. Dipangido si Daniel do muse bantuan sian Jahowa. (Dan. 9:4, 5, 19) Sarupa do si Daniel songon hita. Dang disi tubu ibana gabe halak na barani. Alai ala marsiajar, martangiang, jala porsea tu Jahowa, gabe boi ma ibana patuduhon sifat i.

8. Asa boi hita barani, aha do na porlu taulahon?

⁸ Asa boi hita barani, aha do na porlu taulahon? Bisa jadi halak na barani do natua-tuatta jala dijujui nasida do hita asa barani. Alai dang boi bahenon ni nasida hita barani songon nasida. Gabe halak na barani dos do songon na mamparsiajari sada keterampilan na baru. Sada cara asa malo hita, i ma manat mamparrohahon na dibahen gurutta jala maniru ibana. Dos songon i ma, boi do hita gabe barani molo taparrohahon songon dia halak na asing patuduhon sifat i, jala tatiru nasida. Attong aha ma na nungnga taparsiajari sian si Daniel? Ikkon takkas do tatanda Hata ni Debata. Jotjot ma hita martangiang tu Jahowa asa lam jonok hita. Jala porlu do muse hita porsea tu Jahowa asa pos rohatta na urupanna do hita. Hasilna, tikki diuji haporseaotta gabe barani ma hita.

9. Aha do manfaatna molo barani hita?

⁹ Godang do manfaat na tadapot molo barani hita. Taparrohahon ma jo pengalaman ni si Ben na tinggal di Jerman. Di sikkolana sude do halak porsea tu evolusi jala didok nasida dang toho ajaran ni Bibel taringot toppaan. Sada tikki, dilehon ma kesempatan tu si Ben lao paboahon di jolo ni kalas boasa porsea ibana na tutu do adong na manoppa saluhutna. Barani do si Ben paboahon haporseaonna i. Aha ma hasilna? Didok si Ben, “Denggan do ditangihon gurukku au. Disurat ibana do hatorangan na hupaboa tikki presentasi jala dibagihon ma i tu akka siswa di kalas.” Songon dia do reaksi ni akka dongan ni si Ben? Didok ibana muse, “Godang do na manangihon au jala didok nasida kagum do nasida tu au.” Pengalaman ni si Ben patuduhon molo barani hita pasti diargai halak na asing do hita. Gariada olo do ra gabe tertarik nasida naeng mananda Jahowa. Takkas ma godang do manfaatna molo barani hita.

10. Aha do lapatan ni hata “setia” na disurat di Bibel?

¹⁰ Di Bibel jotjot do dipaboa taringot hata “setia” manang “holong na manoktong”, lao patuduhon holong na dipatudu Debata tu akka naposona. Hata “setia” boi do muse dipakke lao manggombarhon holong na dipatudu naposo ni Debata tu akka dongan sahaporseaonna. (2 Sam. 9:6, 7) Sian tikki tu tikki, boi do gabe lam setia hita. Taida ma songon dia si Daniel patuduhon na setia do ibana.

11. Songon dia si Daniel mambuktihon na setia do ibana tu Jahowa dung matua? (Ida gambar sampul.)

¹¹ Saleleng ngolu ni si Daniel, ikkon dibuktihon ibana do na setia ibana tu Jahowa. Tikki marumur 90 taon lobi ibana, adong ma sada ujian na balga na ikkon diadopi ibana. Tikki i, nungnga ditaluhon Media Persia be Babel jala Raja Darius ma na mamaretta. Dang lomo roha ni akka pejabat tu si Daniel dohot tu Debata na disomba ibana. Alani i dibahen nasida ma rencana lao pamatehon si Daniel. Dibahen ma muse peraturan na mambahen si Daniel ikkon setia tu raja. Molo dang martangiang si Daniel tu Jahowa saleleng 30 ari, berarti na setia do ibana tu raja jala dang porlu dihukum. Alai dang olo si Daniel, alani i disappatton ma ibana tu lubang singa. Dipasu-pasu Jahowa do si Daniel ala toktong setia jala dipalua do ibana sian baba ni singa. (Dan. 6:12-15, 20-22) Boha ma caratta patuduhon na setia hita tu Jahowa songon si Daniel?

12. Boasa boi toktong setia si Daniel tu Jahowa?

¹² Songon naung dipaboa nakkin, asa boi hita setia tu Jahowa ikkon togu do holongta. Boi pe si Daniel toktong togu tu Jahowa ala massai holong do rohana tu Bapakna i. Boasa songon i togu holong ni si Daniel tu Jahowa? Ala dibahen si Daniel do tikkina lao mangarimangi sifat ni Jahowa dohot songon dia Ibana patuduhon akka sifatna i. (Dan. 9:4) Asing ni i, dirimangi si Daniel do sude akka na denggan na dibahen Jahowa tu ibana dohot tu akka naposona. Jala mandok mauliate do si Daniel tu Jahowa alani i.​—Dan. 2:20-23; 9:15, 16.

13. (a) Aha do na diadopi akka donganta na poso na manguji kesetiaan ni nasida tu Jahowa? Bahen ma contoh. (Ida gambar.) (b) Boha do tanggapanmuna molo adong na manukkun tu hamu taringot halak na homoseksual? (Ida ma video ‘Hasil sian Hasittongan i ma Hadameon’ di jw.org.)

 ¹³ Songon si Daniel, akka na poso saonari pe mangadopi akka halak na so mangargai Jahowa dohot standarna. Dang lomo roha ni akka halak sisongon i tu akka halak na berbeda pandanganna sian nasida. Gariada adong do na mangarehei akka donganta na poso asa unang setia be tu Jahowa. Taida ma pengalaman ni donganta na poso na margoar si Graeme na tinggal di Australia. Adong do tantangan na diadopi ibana tikki SMA. Tikki i hea do disukkun guruna tu akka murid di kalas, boha do tanggapan ni nasida molo adong donganna na homoseksual. Didok guruna ma akka na mendukung homoseksual asa pulik jongjong sian akka na so mendukung homoseksual. Didok si Graeme, “Holan au dohot akka donganku na Saksi ma na so mendukung homoseksual.” Aha do na masa dukkon i? Didok ibana, “Sahat tu na sae jam pelajaran di ari i, gabe direhei akka dongan dohot guru ma hami. Berupaya do au asa toktong tenang paboahon haporseaokku, alai dang olo nasida manangihon hatakku.” Aha do pengaruhna tu si Graeme? Didok ibana, “Sasittongna dang lomo rohakku direhei. Alai massai las do rohakku ala boi hupaboa haporseaokku jala toktong setia tu Jahowa.”

14. Paboa ma carana asa boi hita toktong setia tu Jahowa.

¹⁴ Songon si Daniel, molo balga holongta tu Jahowa pasti bertekad do hita asa setia tu Ibana. Sada carana i ma molo taparsiajari akka sifat ni Jahowa. Uppamana, boi do taparsiajari akka toppaanna. (Rom 1:20) Asa lam bagas holong dohot pangargaionmuna tu Jahowa, jaha hamu ma artikel manang tonton ma video di seri “Adong do na Mambahen on?”. Parsiajari hamu ma brosur Benarkah Kehidupan Diciptakan? dohot Asal Mula Kehidupan​—Lima Pertanyaan yang Patut Direnungkan. Parrohahon ma aha na didok sahalak donganta borua sian Denmark na margoar si Ester taringot publikasi i. Didok ibana, “Luar biasa do brosur on. Dang dipaksa hita asa porsea tu Panoppa, alai dipaboa do akka bukti na mambahen hita marpikkir jala mambahen kesimpulan.” Si Ben na dipaboa nakkin mandok, “Brosur on patoguhon haporseaonku. Gabe pos do rohakku na tutu adong Debata na manoppa on sude.” Dung taparsiajari brosur on, setuju do hita tu hata ni Bibel na mandok, “Ale Jahowa Debatanami, na tama do ho manjalo hasangapon, hamuliaon, dohot huaso. Ai ho do manoppa saluhutna, jala alani lomo ni roham do umbahen na adong akka i jala tartoppa.”​—Pgk. 4:11. d

15. Aha do muse cara na asing na mambahen lam togu parale-aleonta tu Jahowa?

¹⁵ Asing ni i, bagas ma taparsiajari parngoluan ni Jesus asa lam balga holongta tu Jahowa. On ma na diulahon donganta borua na poso na margoar si Samira na tinggal di Jerman. Didok ibana, “Gabe lam takkas ma tatanda Jahowa molo taparsiajari taringot Jesus.” Tikki dakdanak si Samira, maol do dibayakkon ibana na massai holong do roha ni Jahowa tu ibana jala na boi do ibana marale-ale tu Jahowa. Alai dung diparsiajari ibana taringot Jesus, gabe boi ma ditanda ibana Jahowa.  Didok ibana muse, “Lomo do rohakku tu sifat ni Jesus na ramah tu akka halak jala holong do rohana tu akka dakdanak.” Lam godang na diparsiajari si Samira sian Jesus gabe lam holong ma rohana tu Jahowa. Didok ibana, “Lam leleng lam huattusi ma, sempurna do Jesus maniru Bapakna. Mirip hian do sifat ni nasida. Husadari ma boasa Jesus na disuru Jahowa tu tano on, i ma asa lam takkas do ditanda jolma Jahowa.” (Joh. 14:9) Jadi molo lomo rohamuna marale-ale tu Jahowa, lean ma tikkimuna lao mamparsiajari taringot Jesus. Molo diulahon hamu i, lam balga ma holongmuna tu Jahowa jala lam bertekad ma hamu asa toktong setia tu Ibana.

16. Aha do manfaatna molo setia hita? (Psalmen 18:25; Mika 6:8)

¹⁶ Molo setia hita tu na asing, gabe lam akrab ma hita tu nasida jala nasida pe gabe setia ma tu hita. (Rut 1:14-17) Jala molo setia hita tu Jahowa, tahilala ma dame ni roha dohot merasa puas. Alana marjanji do Jahowa setia tu akka halak na setia tu Ibana. (Jaha Psalmen 18:25; Mika 6:8.) Rimangi ma, olo do Sitoppa saluhutna marale-ale dohot hita. Molo marale-ale hita tu Jahowa dang boi tantangan, musu, dohot hamatean manirang hita sian Ibana. (Dan. 12:13; Luk. 20:37, 38; Rom 8:38, 39) Alani i massai penting do hita maniru si Daniel jala toktong setia tu Jahowa.

17-18. Aha do muse na boi taparsiajari sian si Daniel?

¹⁷ Di artikel on holan dua dope na taparsiajari taringot sifat ni si Daniel. Alai godang nai dope na boi taparsiajari taringot ibana. Uppamana dilehon Jahowa do akka parnidaan dohot nipi, jala dibahen Jahowa do muse ibana boi paboahon lapatan ni akka surirang. Godangan sian akka surirang i nungnga masa. Molo surirang na asing mangalehon hatorangan taringot akka na lao masa di ari na naeng ro na berpengaruh tu sude jolma saonari on.

¹⁸ Di artikel na mangihut lao tabahas ma dua surirang na disurat si Daniel. Molo taattusi surirang i, boi do i mangurupi hita, na poso manang na matua mambahen keputusan na marbisuk. Akka surirang i pe boi do mangurupi hita asa lam barani, toktong setia tu Jahowa, jala asa rade mangadopi tantangan na lao masa.