1. Boasa lomo rohatta tu halak na sabar?

 LOMO do rohatta tu halak na sabar. Taargai do nasida ala dang marungut-ungut tikki paimahon. Taargai do muse nasida ala sabar tu hita tikki tabahen na sala. Jala las do rohatta ala sabar guru studitta tikki maol hita marsiajar, mangattusi, manang mangulahon sada ajaran ni Bibel. Alai na paling penting, mandok mauliate do hita tu Debata Jahowa ala sabar Ibana tu hita.​—Rom 2:4.

2. Di situasi na songon dia do hita boi gabe dang sabar?

² Nang pe taargai halak na sabar, alai dang sai mura asa toktong hita sabar. Uppamana, dang mura di hita boi toktong tenang tikki terjebak macet, tarlumobi ma tikki tarlambat hita. Boi do gabe muruk hita molo adong halak na mambahen jut rohatta. Jala sipata dang mura di hita asa torus sabar paimahon tano na imbaru na dijanjihon Jahowa. Olo do hamu asa lam sabar? Di artikel on taparsiajari ma aha do lapatan ni sabar jala boasa i penting. Taparsiajari ma muse aha do na boi mangurupi hita asa boi lam sabar.

3. Songon dia do halak na sabar tikki adong na mambahen jut rohana?

³ Tabahas ma songon dia do halak na patuduhon sifat sabar. Parjolo, halak na sabar lambat tarrimas manang dang mura-mura muruk. Tikki adong halak na mambahen jut rohana, toktong do ibana tenang jala dang olo ibana mambalos. Dang olo ibana kasar mangalusi. Hata “lambat tarrimas” parjolo sahali disurat di Bibel tikki paboahon taringot Jahowa. Didok di ayat i, “Au do Jahowa, Debata na  burju jala parasi roha. Au do Jahowa na lambat tarrimas, jala gok holong ni roha dohot hasittongan.”​—2 Mus. 34:6.

4. Songon dia do halak na sabar tikki adong na dipaima ibana?

⁴ Na paduahon, halak na sabar tenang do tikki adong na dipaima ibana. Nang pe leleng ibana paimahon sian na diharappon, dang gabe jut rohana. (Mat. 18:26, 27) Godang do situasi na mambahen hita ikkon sabar paimahon. Misalna, ikkon sabar do hita manangihon tikki adong na makkatai, jala dang tapotong tikki makkatai ibana. (Job 36:2) Ikkon sabar do muse hita tikki mangurupi parsiajar Bibelta mangattusi ajaran ni Bibel, manang mangurupi ibana mambolokkon kebiasaan na sala.

5. Aha do muse na diulahon halak na sabar?

⁵ Na patoluhon, halak na sabar dang buru-buru. Memang adong do situasi na manuntut asa hatop hita bertindak. Alai molo adong karejo na penting na ikkon dipasae, berupaya do ibana asa unang buru-buru mamulai manang pasaehon karejona i. Gariada masuk akkal do diatur ibana tikkina lao mambahen rencana aha na lao ulahononna. Jala diboto ibana do porlu tikki lao mangulahon karejona i asa denggan hasilna.

6. Songon dia do halak na sabar i tikki masa sitaonon tu ibana?

⁶ Na paopatton, halak na sabar dang marungut-ungut tikki masa sitaonon tu ibana. Tottu dang sala molo tapaboa perasaatta tu ale-aletta taringot masalah na taadopi. Alai halak na sabar dang sai berfokus tu masalahna i. Gariada dipikkirhon ibana do akka na denggan di ngoluna jala berupaya mambahen na terbaik asa toktong marlas ni roha manomba Jahowa. (Kol. 1:11) Jadi, ikkon dipatudu halak Kristen do hasabaron di opat situasi i. Boasa? Tabahas ma piga-piga alasanna.

7. Songon na disurat di Jakobus 5:7, 8, boasa ikkon sabar hita? (Ida gambar.)

⁷ Massai penting do hasabaron i asa boi tadapot hangoluan saleleng ni lelengna. Songon naposo ni Jahowa na setia najolo, ikkon sabar do hita paimahon Jahowa pasautton janjina. (Heb. 6:11, 12) Dipatudos do di Bibel situasitta tu sahalak partani. (Jaha Jakobus 5:7, 8.) Kerja keras do sahalak partani manuan dohot maniram suan-suananna. Alai dang diboto ibana andigan i tubu. Jadi ikkon sabar do partani jala pos rohana pasti panen do ibana annon. Dos songon i ma, toktong ma hita sibuk di ulaonta manomba Jahowa, nang pe ‘dang taboto andigan ro Tuanta i’. (Mat. 24:42) Sabar do hita paimahon, alana pos do rohatta pasti saut do sude janji ni Jahowa di tikkina. Alai molo dang sabar hita gabe loja ma hita paimahon, lam mandao sian hasittongan, jala gabe fokus ma hita mangalului hasonangan saonari. Alai molo sabar hita, gabe boi ma hita martahan sahat tu ujungna jala selamat.​—Mik. 7:7; Mat. 24:13.

8. Songon dia do hasabaron mambahen denggan hubungatta tu na asing? (Kolosse 3:12, 13)

⁸ Ikkon sabar do hita asa denggan hubungatta dohot akka dongan. Denggan ma tatangihon nasida tikki makkatai. (Jak. 1:19) Hasabaron pe mangurupi hita asa mardame dohot na asing. Molo sabar hita, dang pahatophu hita bertindak manang mandok hata na so tabo begeon tikki marsak hita. Jala molo sabar hita, dang hatop hita muruk tikki adong na mambahen haccit rohatta. Dang olo hita mambalos, gariada ‘sabar do hita tu na asing, jala rade manalpuhon hasalaan ni nasida’.​—Jaha Kolosse 3:12, 13.

9. Songon dia do sifat sabar mangurupi hita mambahen keputusan na denggan? (Poda 21:5)

⁹ Molo sabar hita gabe diurupi do hita mambahen akka keputusan na denggan. Dang gabe terburu-buru hita, alai jolo tariset do asa tabahen keputusan na denggan. (Jaha Poda 21:5.) Misalna tikki naeng mangalului parkarejoan. Biasana pittor tajalo do karejo na parjolo sahali ditawarhon tu hita, nang pe parkarejoan i boi mambahen hita gabe dang taratur marpungu manang marbarita. Alai molo sabar hita, tabahen do tikki lao mamikkirhon sadia leleng do pardalanan tu inganan parkarejoan i, piga jom hita karejo disi, jala aha do pengaruh ni karejo i tu keluargatta dohot hubungatta tu Jahowa. Molo sabar hita, gabe dang tabahen keputusan na so denggan.

10. Boha do carana asa lam sabar?

¹⁰ Martangiang ma asa lam sabar. Sada sian parbue ni tondi parbadia do hasabaron i. (Gal. 5:22, 23) Alani i boi do hita martangiang tu Jahowa mangido tondi parbadia asa diurupi hita patuduhon hasabaron. Molo masa situasi na manguji hasabaronta, torus ma tapangido tondi parbadia asa boi hita sabar. (Luk. 11:9, 13) Boi do muse tapangido tu Jahowa asa diurupi hita mangida sada masalah sian sudut pandangna. Dung martangiang hita, porlu do tabahen upaya lao patuduhon hasabaron ganup ari. Molo jotjot tatangiakkon i jala berupaya patuduhon i, urupan ni Jahowa ma hita gabe halak na sabar jala gabe bagian sian diritta ma i.

11-12. Sian dia do taboto na sabar Jahowa?

¹¹ Rimangi ma akka contoh na disurat di Bibel. Godang do disurat di Bibel contoh  taringot akka halak na sabar. Molo tarimangi i boi ma taboto songon dia carana patuduhon hasabaron. Alai sebelum tabahas akka contoh i, taida ma songon dia Jahowa gabe teladan na sempurna taringot hasabaron.

¹² Marlea do dibahen Sibolis goar ni Jahowa tikki di Taman Eden. Berupaya do Sibolis mambahen si Hawa marpikkir dang adil Jahowa jala dang denggan carana mamaretta. Alai dang pittor dihancurhon Jahowa Sibolis di tikki i. Sabar do Jahowa jala boi do dikendalihon Ibana dirina. Diboto Jahowa porlu do tikki lao patuduhon pamarettaonna do na undenggan. Huhut paimahon i, sabar do Jahowa nang pe dileai goarna. Asing ni i, sabar do Jahowa paimahon asa adong kesempatan ni akka halak boi mangolu saleleng ni lelengna. (2 Ptr. 3:9, 15) Hasilna, marjuta halak saonari boi mananda Ibana. Molo tarimangi manfaat na tadapot ala sabar Jahowa, lam sabar ma hita paimahon Jahowa bertindak.

13. Songon dia do Jesus maniru hasabaron ni Bapakna? (Ida gambar.)

¹³ Sempurna do Jesus maniru hasabaron ni Bapakna Jahowa, jala dipatudu ibana do sifat i saleleng mangolu di tano on ibana. Memang dang sai mura Jesus patuduhon i. Tarida do i tikki berurusan ibana tu siboto surat dohot tu halak Parise na munafik. (Joh. 8:25-27) Alai songon Bapakna, lambat do Jesus tarrimas. Dang olo ibana mambalos molo adong na mambahen haccit rohana manang dileai ibana. (1 Ptr. 2:23) Sabar do Jesus manaon hasusaanna jala dang marungut-ungut. I do alana dijujui Bibel do hita asa mangingot Jesus na ‘sabar jala togu  manaon akka hata ni jolma na mardosa’. (Heb. 12:2, 3) Pos ma rohatta, boi do hita sabar manaon sitaononta marhite bantuan ni Jahowa.

14. Aha do na boi tatiru sian si Abraham na sabar? (Heber 6:15) (Ida gambar.)

¹⁴ Godang do sian hita naung leleng paimahon ro ujung ni portibi on. Alai olo do gabe didok rohatta dang na lao taida i di ngolutta on. Jadi boha do carana asa toktong sabar hita paimahon i? Parrohahon ma teladan ni si Abraham. Tikki marumur 75 taon ibana, dang adong dope gellengna. Alai marjanji do Jahowa, “Bahenokku ma pinopparmu gabe bangso na bolon.” (1 Mus. 12:1-4) Memang dang diida ibana sude saut janji ni Jahowa i. Dukkon menyeberang ibana sian Sunge Euprat jala paimahon saleleng 25 taon, diida si Abraham do tubu anakna si Isak. Jala 60 taon dukkon i, diida ibana do tubu pahoppuna, i ma si Esau dohot si Jakkob. (Jaha Heber 6:15.) Alai dang diida si Abraham pinopparna i gabe bangso na bolon jala mangingani Tano na Dijanjihon. Nang pe songon i, toktong do ibana setia jala marale-ale tu Jahowa. (Jak. 2:23) Molo dung hehe annon si Abraham, pasti las do rohana mamboto gabe dipasu-pasu do sude bangso di tano on alani haporseaon dohot hasabaronna. (1 Mus. 22:18) Aha do parsiajaranna? Olo do ra dang taida sude saut janji ni Jahowa di tikkitta saonari. Alai molo sabar hita songon si Abraham, pos ma rohatta pasu-pasuon ni Jahowa do hita saonari jala umbalga do upa na lao jalootta di tano na imbaru.​—Mrk. 10:29, 30.

15. Aha do na boi tariset tikki pelajaran pribadi?

 ¹⁵ Godang dope contoh ni akka halak na sabar na disurat di Bibel. (Jak. 5:10) Denggan do molo tariset taringot nasida. b Misalna, poso dope si Daud tikki dilantik gabe raja ni Israel. Alai ikkon sabar do ibana paimahon saleleng martaon-taon asa boi mamaretta di Israel. Asing ni i, toktong do si Simeon dohot si Hanna setia manomba Jahowa huhut paimahon Messias na dijanjihon. (Luk. 2:25, 36-38) Tikki diparsiajari hamu akka contoh on, lului hamu ma alus ni sukkun-sukkun on: Boasa boi sabar ibana? Aha do manfaat na didapot ibana ala sabar? Boha do carakku maniru ibana? Taparsiajari ma muse contoh ni akka halak na so patuduhon hasabaron. (1 Sam. 13:8-14) Sukkun ma muse dirimuna, ‘Boasa dang sabar nasida? Jala aha do akibatna ala dang sabar nasida?’

16. Manfaat aha do na tadapot molo sabar hita?

¹⁶ Tapikkirhon ma manfaatna molo sabar hita. Molo sabar hita gabe marlas ni roha ma hita jala gabe halak na tenang. Asing ni i muse, boi ma gabe lam sehat fisikta dohot pikkiranta. Molo sabar hita tu na asing gabe boi ma lam denggan hubungatta dohot nasida. Huriatta pe boi ma gabe lam marsada. Molo adong pe na mangaleai hita, dang gabe lam parah situasina ala dang mura-mura hita muruk. (Ps. 37:8; Poda 14:29) Alai na paling penting molo sabar hita, na maniru Bapakta Jahowa do hita disi, jala lam jonok ma hubungatta tu Ibana.

17. Aha do tekadta?

¹⁷ Massai denggan do sifat hasabaron i jala godang do manfaatna tu hita. Memang dang sai mura asa gabe halak na sabar. Alai molo tapangido bantuan ni Jahowa, pasti diurupi Ibana do hita lao patuduhon sifat i. Jala molo sabar hita paimahon tano na imbaru, gabe pos ma rohatta “diparrohahon Jahowa do halak na makkabiari Ibana, halak na maima-ima holong ni roha na pinatuduna”. (Ps. 33:18) Sai anggiat ma hita bertekad asa toktong sabar.