1-2. (a) Aha do dosa i, jala boha ma carana asa boi hita manaluhon i? (Ida “Hata na Dipatorang”.) (b) Aha do na lao tabahas di artikel on, dohot di akka artikel na asing di majalah on? (Ida ma bagian “Tu Akka na Manjaha na Dihaholongi Hami”.

 AHA do buktina na massai holong roha ni Jahowa tu hamu? Asa dapotmuna alusna, pikkirhon ma aha na diulahon Jahowa asa boi hamu malua sian dosa dohot hamatean. Musu na massai gogo dosa a i. Dang adong jolma na boi manaluhon i molo mangasahon gogona sandiri. Nungnga mardosa be sude jolma. Ganup ari sai taulahon do na sala, jala alani dosa do umbahen na mate hita. (Rom 5:12) Alai adong do barita na uli. Rade do Jahowa mangurupi hita manaluhon dosa i, jala sanggup do Ibana paluahon hita sian dosa dohot hamatean!

² Nungnga hira-hira 6.000 taon Jahowa mangurupi akka jolma asa boi gabe ale-alena, nang pe mardosa dope nasida. Boasa olo Jahowa mangulahon i? Ala massai holong do roha ni Jahowa tu jolma mulai sian tikki ditoppa Jahowa nasida. Ala holong roha ni Jahowa tu jolma, godang do upaya na dibahen Jahowa asa boi jolma malua sian dosa. Diboto Jahowa do, gabe mate do jolma alani dosa. Alai dang lomo roha ni Jahowa molo mate jolma. Lomo do rohana asa mangolu jolma saleleng ni lelengna. (Rom 6:23) I do tujuan ni Jahowa manoppa jolma. Jadi di artikel on, lao tabahas ma tolu sukkun-sukkun: (1) Aha do harapan na dilehon Jahowa tu akka jolma na mardosa?  (2) Aha do na diulahon akka halak na disurat di Bibel lao mambahen las roha ni Jahowa? (3) Aha do na diulahon Jesus lao paluahon jolma sian dosa dohot hamatean?

HARAPAN NA DILEHON JAHOWA TU JOLMA NA MARDOSA

3. Boasa gabe mardosa si Adam dohot si Hawa?

³ Tikki ditoppa Jahowa jolma na parjolo, lomo do rohana asa marlas ni roha nasida. Dilehon Jahowa do inganan na massai bagak tu nasida, dilehon do pasangan hidup dohot tugas na boi mambahen nasida marlas ni roha. Boi ma nasida marpinoppari jala manggohi tano on. Jala boi ma nasida mambahen saluhut tano on gabe paradeiso, songon Taman Eden. Holan sada do paretta na dilehon Jahowa tu nasida. Nungnga dipaboa Jahowa hian, molo dang dioloi nasida parettana, gabe mardosa ma nasida jala mate. Taboto do aha na masa. Adong sada suru-suruan na jahat na menggoda si Adam dohot si Hawa asa mangalo tu Debata. Dang holong roha ni suru-suruan on tu Jahowa dohot tu jolma. Ujungna, diulahon si Adam dohot si Hawa do na didok suru-suruan na jahat i. Dang porsea nasida tu Jahowa, hape nungnga dipatudu Jahowa holongna tu nasida. Akibatna gabe matua ma nasida, dung i mate.—1 Mus. 1:​28, 29; 2:​8, 9, 16-18; 3:​1-6, 17-19, 24; 5:5.

4. Boasa sogo roha ni Jahowa molo mardosa jolma? Jala boasa olo Jahowa mangurupi hita? (Rom 8:​20, 21)

⁴ Boasa lomo roha ni Jahowa disurat cerita on di Bibel? Asa boi taboto akka hatorangan na massai rikkot. Misalna, gabe taboto ma sogo do roha ni Jahowa molo mardosa jolma. Alana boi do i mambahen sega hubungatta tu Ibana jala gabe mate. (Jes. 59:2) Sogo do roha ni Sibolis tu Jahowa dohot tu jolma. Las do rohana molo mardosa jolma jala mate. Alani i ma digoda ibana si Adam, si Hawa, dohot akka jolma sahat tu saonari. Tikki di Taman Eden, dirippu Sibolis do nungnga marhasil ibana mambahen gagal lomo ni roha ni Jahowa. Alai dang disadari ibana na massai holong do roha ni Jahowa tu jolma. Dang hea muba tujuan ni Jahowa tu pinoppar ni si Adam dohot si Hawa. Jadi dung mardosa si Adam dohot si Hawa, pittor dibahen Jahowa do jalan keluar na gabe harapan tu sude jolma. (Jaha Rom 8:​20, 21.) Diboto Jahowa do, pasti adong pinoppar ni si Adam dohot si Hawa na makkaholongi jala na mangoloi Ibana. Ala Jahowa do Bapakta jala Sitoppa hita, dibahen Ibana do dalan asa boi hita malua sian dosa jala gabe ale-alena. Aha ma i?

5. Dung mardosa si Adam dohot si Hawa, harapan aha do na dilehon Jahowa tu jolma? (1 Musa 3:15)

⁵ Jaha 1 Musa 3:15. Dipaboa Jahowa ma sada surirang na mambahen gabe adong harapan ni jolma. Na lao diripasson Ibana do Sibolis, jala lao adong ma ‘pinoppar’ na boi paluahon jolma sian dosa dohot hamatean. ‘Pinoppar’ on ma na lao manghancurhon Sibolis dohot sude hasusaan na dibahen ibana sian tikki di Taman Eden. (1 Joh. 3:8) Alai asa boi terjadi i, ikkon jolo marsitaonon do ‘pinoppar’ i sahat tu na mate. Diloas Jahowa do Sibolis mambahen na haccit tu ‘pinoppar’ i. Pasti haccit jala lungun do roha ni Jahowa tikki masa i. Alai olo do Ibana manaon i asa boi jolma na dihaholongi Ibana malua sian dosa dohot hamatean!

NA DIULAHON AKKA HALAK NA DISURAT DI BIBEL LAO MAMBAHEN LAS ROHA NI JAHOWA

6. Aha do na diulahon si Abel dohot si Noak lao mambahen las roha ni Jahowa?

⁶ Lam leleng, lam dipatakkas Jahowa do tu jolma songon dia carana asa boi nasida jonok tu Ibana. Misalna tu si Abel, i ma anak ni si Adam dohot si Hawa na paduahon. Ibana do  jolma na parjolo na porsea tu Jahowa dung na masa di Taman Eden. Massai holong do roha ni si Abel tu Jahowa. Lomo do rohana mambahen las roha ni Jahowa jala jonok tu Ibana. Alani i, dilehon ibana ma pelean tu Jahowa. Ala parmahan do si Abel, dibuat ibana ma piga-piga anak ni biru-biruna na parjolo tubu, jala dipelehon ma i tu Jahowa. Songon dia do perasaan ni Jahowa? Didok di Bibel, “Lomo do roha ni Jahowa tu si Abel dohot tu peleanna i.” (1 Mus. 4:4) Dipatudu Jahowa do muse na lomo rohana tu pelean ni halak na makkaholongi jala na porsea tu Ibana. Misalna, tu pelean ni si Noak. (1 Mus. 8:​20, 21) On patuduhon boi do jolma na mardosa mambahen las roha ni Jahowa jala jonok tu Ibana. b

7. Aha do na boi taparsiajari sian si Abraham na olo mamelehon anakna?

⁷ Si Abraham, i ma sahalak bawa na togu haporseaonna tu Jahowa. Hea do dipangido Jahowa ibana asa mangulahon tugas na borat. Dipangido Jahowa do ibana asa mamelehon anakna, si Isak. Pasti marsak hian do roha ni si Abraham tikki mandapot tugas on. Nang pe songon i, dioloi ibana do Jahowa. Tikki naeng dipamate si Abraham anakna, pittor diabbati Jahowa ma ibana. Sian on boi ma taboto aha do na diulahon Jahowa lao mangurupi akka jolma na porsea tu Ibana. Olo do Jahowa mamelehon Anak hasianna, ala massai holong do rohana tu jolma.—1 Mus. 22:​1-18.

8. Manggombarhon aha do akka pelean binatang na dipelehon halak Israel? (3 Musa 4:​27-29; 17:11)

⁸ Marratus taon dukkon i, dilehon Jahowa ma Patik tu halak Israel. Dipangido Jahowa ma nasida mangalehon pelean binatang, asa boi disalpuhon dosa ni nasida. (Jaha 3 Musa 4:​27-29; 17:11.) Alai taboto do, akka pelean i manggombarhon pelean na dumenggan na diparade Jahowa lao paluahon jolma sian dosa. Nungnga dipaboa akka panurirang na lao adong pinoppar na dijanjihon, i ma Anak ni Debata. Na lao marsitaonon do ibana jala mate. Dos ma ibana songon biru-biru na gabe pelean. (Jes. 53:​1-12) Bayakkon ma on: Olo do Jahowa mangalehon Anak hasianna gabe pelean asa boi paluahon sude jolma sian dosa dohot hamatean, termasuk ma hamu!

NA DIULAHON JESUS LAO PALUAHON JOLMA

9. Aha do na didok si Johannes Pandidi taringot Jesus? (Heber 9:22; 10:​1-4, 12)

⁹ Di taon 29 M, songon on ma na didok si Johannes Pandidi taringot Jesus na sian Nasaret, “Ida ma, ibana do Anak ni Biru-Biru ni Debata na manesa dosa ni portibi on!” (Joh. 1:29) Hata on patuduhon Jesus do pinoppar naung leleng dijanjihon Debata. Lao dipelehon Jesus do ngoluna gabe tobusan. Ujungna, ro do pinoppar na lao paluahon sude jolma sian dosa.—Jaha Heber 9:22; 10:​1-4, 12.

10. Songon dia do Jesus patuduhon na lao ‘manjou akka pardosa’ do ibana?

¹⁰ Berfokus do Jesus lao mangurupi akka halak na marsak alani dosa ni nasida, jala diundang Jesus do nasida asa gabe siseanna. Diboto Jesus do, alani dosa do umbahen na marsitaonon akka jolma. Jadi, marsitutu do ibana mangurupi akka halak na marsak ala hea mangulahon dosa. Didok ibana do, “Dang porlu pangubati tu halak na sehat, tu na marsahit do.” Didok ibana do muse, “Dang na lao manjou halak na mangulahon na sittong au umbahen na ro, alai manjou pardosa i do.” (Mat. 9:​12, 13) Jala i do na diulahon Jesus. Misalna, adong ma di tikki i sahalak borua na manucci pat ni Jesus mamakke iluna sandiri.  Lambok do Jesus makkatai tu borua i, jala diampuni ibana do dosa ni borua i. (Luk. 7:​37-50) Asing ni i, olo do Jesus paboahon hasittongan tu sahalak borua Samaria, nang pe diboto ibana boru-boru na so hasea do borua i. (Joh. 4:​7, 17-19, 25, 26) Jala, dilehon Debata do huaso tu Jesus lao manaluhon hamatean. Buktina dipahehe ibana do akka bawa, borua, dohot dakdanak.—Mat. 11:5.

11. Boasa dang mabiar akka pardosa jonok tu Jesus?

¹¹ Jadi boi ma taattusi boasa dang mabiar akka pardosa jonok tu Jesus jala makkatai tu ibana. Alana diattusi Jesus do perasaan ni nasida, jala burju do ibana tu nasida. (Luk. 15:​1, 2) Asing ni i, dipuji Jesus do akka halak na patuduhon haporseaon tu ibana, jala burju do ibana tu nasida. (Luk. 19:​1-10) Dipatudu Jesus do asi ni roha tu akka halak, dos songon Jahowa. (Joh. 14:9) Sian hata dohot tindakan ni Jesus, boi ma taboto Debata parasi roha do Jahowa i. Massai holong do rohana tu akka jolma nang pe dang sempurna nasida, jala lomo do rohana mangurupi nasida. Alani i ma, diurupi Jesus do akka halak asa olo manguba pangalaho ni nasida jala mangihutton ibana.—Luk. 5:​27, 28.

12. Aha do na dipaboa Jesus tu akka siseanna taringot hamateanna?

¹² Diboto Jesus do aha na lao masa tu ibana. Piga-piga hali do dipaboa ibana tu akka siseanna, na lao dihianati ma ibana jala digattung di sada hau. (Mat. 17:22; 20:​18, 19)  Diboto Jesus do hamateanna i lao manesa dosa ni jolma, songon naung dipaboa si Johannes Pandidi dohot akka panurirang na asing. Didok Jesus do muse, dung mate ibana, ‘toguonna ma sude ragam ni jolma ro tu ibana’. (Joh. 12:32) Boi do jolma na mardosa mambahen las roha ni Jahowa molo porsea nasida tu Jesus jala diihutton nasida parettana. Molo dibahen nasida songon i, ujungna boi ma nasida ‘malua sian dosa’. (Rom 6:​14, 18, 22; Joh. 8:32) Jadi barani do Jesus, jala rade do ibana mate lao paluahon sude jolma.—Joh. 10:​17, 18.

13. Songon dia do parmate ni Jesus, jala aha do na taparsiajari taringot Jahowa sian i? (Ida gambar.)

¹³ Parrohahon ma na masa tu Jesus. Dihianati ale-alena do ibana. Dung i, ditakkup akka musuna do ibana, direhei, ditudu mangulahon na jahat, jala disiksa. Ujungna, dipakkuhon akka tentara ma ibana di hau. Toktong do Jesus setia tu Jahowa nang pe marsitaonon jala haccitan. Pasti lungun hian do roha ni Jahowa mangida i. Alana, sanggup do Ibana mambahen asa unang marsitaonon Anakna i jala mate. Alai dang dibahen Ibana songon i. Boasa? Ala massai holong do roha ni Jahowa tu hita. Jesus mandok, “Ai songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”—Joh. 3:16.

14. Aha do na boi taparsiajari sian tobusan ni Jesus?

¹⁴ Tobusan ni Jesus ma bukti na umbalga, na massai holong do roha ni Jahowa tu pinoppar ni si Adam dohot si Hawa. Jala on patuduhon na massai holong do roha ni Jahowa tu hamu. Dilehon Ibana do Anak hasianna, jala rela do Ibana makkilala lungun ni roha asa boi paluahon hamu sian dosa dohot hamatean. (1 Joh. 4:​9, 10) Takkas ma, lomo do roha ni Jahowa mangurupi hita ganup marsada-sada asa boi manomba Ibana, nang pe mardosa dope hita saonari. Jala lomo do roha ni Jahowa asa malua hita sian dosa!

15. Aha do na ikkon taulahon asa boi diampuni Jahowa dosatta?

¹⁵ Silehon-lehon na massai arga do tobusan ni Jesus sian Jahowa. Alani tobusan i, gabe boi ma diampuni Jahowa dosatta. Alai asa boi diampuni Jahowa dosatta, adong na ikkon taulahon. Songon on ma na didok si Johannes Pandidi dohot Jesus Kristus, “Pauba hamu ma rohamuna, ai nungnga jonok Harajaon banua ginjang i.” (Mat. 3:​1, 2; 4:17) Jadi asa boi jonok hita tu Jahowa jala diampuni dosatta, ikkon muba do hita manang bertobat. Alai aha do arti ni bertobat? Jala aha do manfaatna molo bertobat hita? Lao tabahas ma sukkun-sukkun i di artikel na mangihut.