1. Aha do na diulahon Jahowa tu halak na mangulahon dosa na balga?

 DI ARTIKEL sebelumna, nungnga tabahas hata ni Apostel Paulus tu huria Korint tikki adong sahalak bawa na mangulahon dosa na balga. Ala dang bertobat bawa i, gabe dipakaluar do ibana sian huria. Alai songon na dipaboa di ayat tema ni artikel on, olo do Jahowa mangurupi halak na mangulahon dosa na balga asa boi bertobat. (Rom 2:4) Songon dia do cara ni Jahowa mamakke akka sintua di jamanta saonari lao mangurupi sasahalak asa boi bertobat?

2-3. Molo taboto adong donganta na mangulahon dosa na balga, aha do na ikkon taulahon? Boasa ikkon taulahon songon i?

² Dang boi akka sintua mangurupi sasahalak na mangulahon dosa na balga molo dang diboto nasida aha masalahna. Jadi molo taboto adong donganta na mangulahon dosa na balga, aha do na ikkon taulahon? Parjolo sahali, ikkon tajujui do ibana asa mangido bantuan tu akka sintua.—Jes. 1:18; Ul. 20:28; 1 Ptr. 5:2.

³ Alai boha do molo dang olo ibana paboahon i tu akka sintua? Hita sandiri ma na paboahon i tu akka sintua asa boi ibana diurupi. Molo taulahon songon i, on patuduhon na holong do rohatta tu ibana, ala taboto boi do akka sintua mangurupi ibana. Molo dang olo ibana muba, boi do gabe sega parale-aleonna tu Jahowa. Jala molo diboto akka na so sisomba Jahowa dosana i, boi do gabe dang denggan pandangan ni nasida tu Jahowa dohot tu organisasina. Jadi ikkon barani do hita paboahon i tu sintua ala holong rohatta tu Jahowa dohot tu akka dongan.—Ps. 27:14.

 NA IKKON DIULAHON AKKA SINTUA LAO MANGURUPI HALAK NA MANGULAHON DOSA NA BALGA

4. Aha do na ikkon diupayahon akka sintua?

⁴ Tikki adong donganta na mangulahon dosa na balga, rapat ma punguan ni akka sintua lao mamillit tolu sintua na gabe panitia na lao manjuppangi donganta na marsala i. a Ikkon serep do roha ni akka sintua na tolu i. Ikkon disadari nasida do dang boi nasida mamaksa donganta na marsala i asa bertobat, nang pe nungnga berupaya nasida mangurupi ibana. (5 Mus. 30:19) Ikkon disadari nasida do dang sude halak mangalehon tanggapan na positif tikki dijuppangi, songon Raja Daud. (2 Sam. 12:13) Adong do bahkan na so olo manangihon nasehat sian Jahowa. (1 Mus. 4:​6-8) Nang pe songon i, ikkon berupaya do akka sintua mangurupi halak na marsala i asa bertobat. Aha do na ikkon diingot akka sintua tikki manjuppangi halak na marsala?

5. Ikkon songon dia do sikap ni akka sintua tikki manjuppangi halak na marsala? (2 Timoteus 2:​24, 25) (Ida gambar.)

⁵ Nang pe mangulahon dosa na balga sasahalak, arga dope ibana di Jahowa. (Luk. 15:​4, 6) Jadi tikki manjuppangi halak na marsala i, dang boi gabe kasar, dang sopan, manang gabe leas roha ni akka sintua tu ibana. Tujuan ni nasida dang holan manukkun manang papunguhon informasi sian ibana. Gariada, ikkon dipatudu nasida do akka sifat na disurat di 2 Timoteus 2:​24, 25. (Jaha.) Jadi ikkon lambok do akka sintua jala burju, asa boi nasida mangurupi halak na marsala i manguba cara marpikkirna.

6. Aha do na ikkon diulahon akka sintua sebelum manjuppangi halak na marsala i? (Rom 2:4)

⁶ Porlu do dilului nasida petunjuk sian Jahowa. Berupaya do akka sintua maniru Jahowa tikki berurusan dohot halak na mangulahon dosa na balga. Ikkon diingot nasida do hata ni si Paulus na mandok, “Burju do Debata mangurupi hamu asa muba hamu.” (Jaha Rom 2:4.) Porlu do diingot akka sintua, biru-biru ni Kristus do na diparmahani nasida. Jadi tikki mamparmahani huria, ikkon berupaya do akka sintua maniru Kristus jala mangihutton petunjuk na sian ibana. (Jes. 11:​3, 4; Mat. 18:​18-20) Sebelum manjuppangi halak na marsala i, ikkon jolo martangiang do panitia i tu Jahowa. Tujuanna asa boi nasida mangurupi ibana bertobat. Ikkon dibahen nasida do riset sian publikasitta, jala ikkon martangiang do nasida mangido bisuk sian Jahowa. Asing ni i, ikkon dipikkirhon nasida do situasi ni halak na marsala i. Berupaya do akka sintua  mamboto aha do na mambahen ibana sappe mangulahon dosa na balga.—Poda 20:5.

7-8. Boha do cara ni akka sintua maniru kesabaran ni Jahowa tikki mangurupi halak na marsala?

⁷ Ikkon ditiru nasida do kesabaran ni Jahowa. Porlu do diingot akka sintua cara ni Jahowa berurusan dohot halak na mangulahon dosa na balga di tikki najolo. Misalna, sabar do Jahowa tu si Kain. Dipaboa Jahowa do tu si Kain aha akibatna molo dang muba ibana, jala aha do pasu-pasuna molo dioloi ibana Jahowa. (1 Mus. 4:​6, 7) Asing ni i, disuru Jahowa do Panurirang Natan pasingotton si Daud. Dipakke si Natan do sada ilustrasi na mangurupi si Daud asa bertobat. (2 Sam. 12:​1-7) “Torus” do disuru Jahowa akka panurirangna pasingotton bangso Israel na mangalo Ibana. (Jer. 7:​24, 25) Sian contoh on taboto ma, dang dipaima Jahowa jolo bertobat naposona, baru pe diurupi Ibana nasida. Gariada, berupaya do Jahowa mangurupi nasida asa bertobat, nang pe diulahon nasida dope dosa na balga i.

⁸ Porlu do akka sintua maniru Jahowa tikki mangurupi halak na mangulahon dosa na balga. Songon na didok di 2 Timoteus 4:​2, ikkon “sabar” do nasida tikki mangurupi halak na marsala i. Jadi ikkon tetap tenang jala sabar do akka sintua asa boi mangurupi halak na marsala i mangulahon na sittong. Alana molo jut roha ni akka sintua mangida ibana, olo do ra dang ditangihon ibana nasehat ni nasida jala dang bertobat.

9-10. Boha do cara ni akka sintua mangurupi halak na marsala i asa menyadari kesalahanna?

⁹ Ikkon berupaya do akka sintua mamboto aha na mambahen sappe diulahon ibana dosa na balga. Uppamana, aha do na mambahen gabe dang jonok be hubunganna tu Jahowa? Na so hea be ibana belajar pribadi manang marbarita na uli? Na so hea be ibana martangiang tu Jahowa? Na so olo be ibana manolak keinginan na sala? Ise do akka donganna? Songon dia do hiburan na dipillit ibana? Aha do pengaruh ni sudena i tu cara marpikkir dohot tindakanna? Diboto ibana do molo tindakanna i berpengaruh tu pakkilalaan ni Jahowa?

¹⁰ Boi do akka sintua manukkun tu ibana aha do na mambahen gabe dang jonok be hubunganna tu Jahowa, na mambahen sappe diulahon ibana dosa na balga. Alai tikki mangulahon i, ikkon burju do akka sintua jala dang disukkuni nasida akka na so porlu diboto nasida. (Poda 20:5) Asing ni i, songon na diulahon si Natan tu Raja Daud, boi do akka sintua mamakke ilustrasi lao mangurupi halak na marsala i asa menyadari kesalahanna. Di pertemuan na parjolo, olo do ra dipatudu halak na marsala i na manolsoli ibana jala olo bertobat.

11. Aha do na diulahon Jesus tu akka pardosa?

¹¹ Ikkon berupaya do akka sintua maniru Jesus. Tikki makkatai tu si Saulus na sian Tarsus, disukkun Jesus do ibana, “Saulus, Saulus, boasa dibahen ho na haccit tu au?” Diurupi Jesus do si Saulus asa menyadari kesalahanna. (Ul. 9:​3-6) Asing ni i, taringot “boru-boru Izebel”, didok Jesus do, “Hulehon do tikki tu ibana asa muba.” Asa boi akka sintua maniru Jesus, ikkon berupaya do nasida mangurupi halak na marsala i menyadari kesalahanna. Jala porlu do lehonon ni nasida tikki tu halak na marsala i asa boi bertobat.—Pgk. 2:​20, 21.

12-13. Piga hali do akka sintua porlu manjuppangi halak na marsala? Patorang ma. (Ida gambar.)

¹² Jadi ikkon berupaya do akka sintua maniru Jesus jala dang pittor mambahen kesimpulan dang olo bertobat halak na marsala i. Boi do akka sintua mamillit lao manjuppangi halak na marsala i lobi sian sahali. Alana adong do halak na pittor bertobat tikki pertemuan na parjolo dohot akka sintua. Alai adong do na porlu tikki asa boi bertobat. Misalna di pertemuan  na parjolo, dang pittor bertobat ibana. Alai dung sae pertemuan na parjolo i, mulai ma dipikkirhon ibana nasehat na dilehon akka sintua, dipatudu ibana serep ni roha, jala martangiang ibana asa diampuni Jahowa. (Ps. 32:5; 38:18) Jadi di pertemuan na berikutna, ra nungnga muba be sikapna dibandingkon tu sikapna di pertemuan na parjolo.

¹³ Asa boi akka sintua mangurupi halak na marsala i, ikkon dipatudu nasida do haburjuon dohot roha sapakkilalaan. Porlu do nasida martangiang asa dipasu-pasu Jahowa upaya ni nasida, jala berharap do nasida asa disadari ibana kesalahanna i.—2 Tim. 2:​25, 26.

14. Molo bertobat halak na marsala, ise do na ikkon dipuji? Boasa songon i?

¹⁴ Molo bertobat halak na marsala, pasti massai las do rohatta! (Luk. 15:​7, 10) Alai ise do na ikkon dipuji? Akka sintua do? Didok si Paulus, “Anggiat ma dilehon Debata tikki tu nasida asa muba.” (2 Tim. 2:25) Jadi Jahowa do na mangurupi sasahalak asa muba, dang jolma. Dipaboa si Paulus do muse aha manfaatna molo bertobat sasahalak. Gabe lam bagas ma parbinotoanna taringot tu hasittongan, gabe disadari ibana ma kesalahanna, jala boi ma ibana kaluar sian jorat ni Sibolis.—2 Tim. 2:26.

15. Aha do na porlu diulahon akka sintua dung bertobat halak na marsala i?

¹⁵ Dung bertobat halak na marsala i, porlu do bahenon ni akka sintua kunjungan penggembalaan asa boi patoguhon haporseaonna, mangurupi ibana manolak godaan ni Sibolis, jala toktong mangulahon na sittong. (Heb. 12:​12, 13) Alai dang porlu dipaboa-boa punguan ni akka sintua kasus ni halak na bertobat i tu na asing. Nang pe songon i, adong do na porlu dipaboa nasida tu akka dongan di huria.

“PISSANG MA HALAK NA MANGULAHON DOSA DI JOLO NI NATOROP”

16. Ise do maksudna “natorop” na dipaboa si Paulus di 1 Timoteus 5:20?

¹⁶ Jaha 1 Timoteus 5:20. Didok si Paulus do tu si Timoteus donganna sintua, asa  mamissang halak na mangulahon dosa “di jolo ni natorop”. Aha do maksud ni si Paulus? Na gabe dipissang do halak na marsala i di jolo ni sude dongan di huria? Dang sai songon i maksudna. Hata “natorop” na didok di ayat on, olo do ra maksudna piga-piga halak na mamboto kasusna. Misalna halak na mangida ibana mangulahon dosa i, manang na mambege kasusna i sian ibana. Jadi holan tu nasida do dipaboa akka sintua molo kasusna i nungnga ditangani jala nungnga dipissang be ibana.

17. Di situasi na songon dia do ikkon dipasahat akka sintua pengumuman di huria taringot halak na dipissang? Jala aha do tujuanna?

¹⁷ Alai sipata, godang do dongan di huria naung mamboto taringot kasusna i. Manang lao botoon ni akka dongan di huria nama i. Molo songon i na masa, ikkon dipissang do halak na marsala i di jolo ni “natorop”, manang di jolo ni sude dongan di huria. Maksudna, dipasahat akka sintua ma pengumuman di huria na paboahon naung dipissang do halak na marsala i. Aha do tujuanna? Didok si Paulus, “Asa gabe sipasingot i tu natorop i”, asa unang dohot nasida mangulahon dosa na balga.

18. Molo adong sahalak na poso na tardidi na marumur 18 taon tu toru mangulahon dosa na balga, aha do na ikkon diulahon akka sintua? (Ida gambar.)

¹⁸ Boha do molo adong sahalak na poso na tardidi na marumur 18 taon tu toru mangulahon dosa na balga? Diatur punguan ni akka sintua ma asa ro dua sintua manjuppangi na poso i dohot natua-tuana. b Sukkunon ni akka sintua i ma tu natua-tuana, aha do naung diulahon nasida lao mangurupi gellengna  asa boi muba jala bertobat. Molo olo do na poso i manangihon nasehat ni natua-tuana jala muba, boi do dua sintua i mamutusson asa unang pola dibahen panitia. Jala natua-tuana ma na mangurupi na poso i. Alana tu natua-tua do dilehon Jahowa tanggung jawab lao mamissang gellengna. (5 Mus. 6:​6, 7; Poda 6:20; 22:6; Eps. 6:​2-4) Alai porlu do dipastihon akka sintua tu natua-tuana, torus do diurupi nasida gellengna i manang na daong. Molo dang olo dakdanak i bertobat, aha do na ikkon diulahon akka sintua? Bahenon ni akka sintua ma panitia lao manjuppangi na poso i dohot natua-tuana.

“PARHOLONG DO JAHOWA JALA PARASI ROHA”

19. Boha do cara ni akka sintua maniru Jahowa tikki mangurupi halak na marsala?

¹⁹ Martanggung jawab do akka sintua na gabe panitia lao manjaga huria toktong ias di adopan ni Jahowa. (1 Kor. 5:7) Alai dibahen nasida do tong sian nasa gogona lao mangurupi halak na marsala i asa taronjar rohana bertobat. Asa boi diulahon nasida i, ikkon tetap do nasida marpikkiran na positif tu halak na marsala i. Alana lomo do roha ni nasida maniru Jahowa na “parholong jala parasi roha”. (Jak. 5:11) Parrohahon ma songon dia Apostel Johannes patuduhon na dihaholongi ibana akka dongan di huria. Didok ibana, “Hamu akka anakkokku, husurat do on tu hamu asa unang diulahon hamu dosa. Alai molo adong na mardosa, adong do na mangurupi hita na rap dohot Damang i, i ma Jesus Kristus na mangulahon lomo ni roha ni Debata.”—1 Joh. 2:1.

20. Aha do na lao tabahas di artikel na parpudi di majalah on?

²⁰ Alai sipata dang olo bertobat halak na mangulahon dosa na balga i. Molo songon i do na masa, ikkon dipakaluar do ibana sian huria. Aha do na ikkon diulahon akka sintua molo terjadi situasi sisongon i? Tabahas ma i di artikel na parpudi di majalah on.