1-2. Aha do arti ni tobusan, jala boasa porlu hita ditobus?

TIKKI mardosa si Adam, dang boi be ibana mangolu saleleng ni lelengna. Alai dang holan ibana, dohot do sude pinopparna. Ala sengaja do si Adam mangulahon dosa, dang disesa Jahowa dosana i. Alai boha molo akka pinopparna? Alani si Adam do nasida mardosa. (Rom 5:12, 14) Attong, boi dope halak i malua sian dosa dohot hamatean jala mandapot hangoluan na saleleng ni lelengna? Songon dia do dibahen Jahowa paluahon halak i? Disi mardosa si Adam, pittor dibahen Jahowa do rencana lao paluahon sude pinoppar ni si Adam sian dosa dohot hamatean. (1 Mus. 3:15) Di tikki naung ditottuhon Jahowa, disuru Ibana ma Anakna sian surgo “mangalean ngoluna lao manobus godang jolma”.​—Mrk. 10:45; Joh. 6:51.

² Aha do arti ni tobusan? Molo di Akka Bukku Junani Kristen, tobusan artina, arga na ikkon digarar Jesus lao manobus akka naung digadaihon si Adam. (1 Kor. 15:22) Boasa porlu hita ditobus? Alana standar ni Jahowa mandok, ikkon hosa do gatti ni hosa. (2 Mus. 21:23, 24) Asa boi didalatton standar ni Jahowa na adil i, ikkon dilean Jesus do ngoluna na sempurna lao manggattihon ngolu na sempurna na dipamago si Adam. (Rom 5:17) Alani i gabe “Ama na Saleleng ni lelengna” ma Jesus tu sude halak na porsea tu tobusanna i.​—Jes. 9:6; Rom 3:23, 24.

3. Sesuai tu Johannes 14:31 dohot 15:13, boasa olo Jesus mangalean ngoluna na sempurna?

³ Ala massai holong do roha ni Jesus tu Jahowa dohot tu hita, dilehon ibana ma ngoluna gabe tobusan. (Jaha Johannes 14:31; 15:13.) Alani holongna i, boi ma Jesus toktong setia sahat tu na mate, jala boi ma dipasae ibana tugas sian Jahowa. Gabe saut ma rencana ni Jahowa tu jolma dohot tu portibi on. Di artikel on taulas ma boasa diloas Jahowa haccit ditaon Jesus sahat tu na mate. Taida ma muse songon dia Apostel Johannes patuduhon na diargai ibana do tobusan. Dung i, taulas ma songon dia hita mandok mauliate tu tobusan i jala songon dia hita patuduhon na taargai do pengorbanan ni Jahowa dohot Jesus.

4. Patorang ma songon dia do hamatean ni Jesus i.

⁴ Bayangkon ma songon dia haccitna tikki naeng dipamate Jesus. Sasittongna, boi hian do dipangido Jesus asa diurupi akka suru-suruan ibana. Alai dang diulahon Jesus i, gariada dipasombu ibana do tentara ni Rom manakkup jala mamukkuli ibana. (Mat. 26:52-54; Joh. 18:3; 19:1) Tikki dicambuk nasida Jesus, maribak ma sibukna jala marmudari. Dung i disuru akka tentara i ma Jesus mamboan hau na massai borat di tanggurungna na marmudari i. Tikki mamboan hau na borat i, dang margogo be Jesus. Alani i, disuru akka tentara ma si Simon mamboan hau i tu inganan ni Jesus di pakkuhon. Ai pas lewat do ibana tikki i. (Mat. 27:32) Dung sahat Jesus tusi, dipakkuhon akka tentara i ma tangan dohot patna tu hau i. Tikki dipajongjong hau i, lam haccit ma dihilala ibana tangan dohot patna na dipakkuhon i ala ditarik borat ni dagingna. Tangis do omakna dohot akka donganna mangida ibana dibahen songon i. Alai molo halak Jahudi, direhei do Jesus. (Luk. 23:32-38; Joh. 19:25) Pasti haccit hian do dihilala Jesus tikki i. Ala dipajongjong hau i, haccit hian ma dihilala Jesus paru-paru dohot ate-atena gabe maol ma ibana marhosa. Alai nang pe ikkon songon i haccitna ditaon Jesus, toktong do ibana setia. Martangiang ma ibana tu Jahowa pasahatton ngoluna. Dung i unduk ma ibana jala mate. (Mrk. 15:37; Luk. 23:46; Joh. 10:17, 18; 19:30) Hamatean ni Jesus on ma hamatean na ungngeri na hea masa! Alana, ikkon jolo leleng do ibana tersiksa jala dileai.

5. Aha do na paling mambahen haccit roha ni Jesus?

⁵ Nang pe haccit hian dihilala Jesus ala songon i carana ibana dipamate, alai na paling mambahen haccit rohana, alani aha ibana dipamate. Ditudu do Jesus sebagai parjahat na mangaleai Debata dohot goarna. (Mat. 26:64-66) Marsak situtu do Jesus alani i, jala hea do dipangido ibana tu Jahowa asa unang i alasanna ibana dihukum mate. (Mat. 26:38, 39, 42) Jadi boasa diloas Jahowa Anak hasianna i manaon na haccit sahat tu na mate? Taida ma tolu alasanna.

6. Boasa ikkon mate targattung Jesus di hau partinaonan?

⁶ Na parjolo, digattung pe Jesus di hau lao paluahon halak Jahudi do sian bura. (Gal. 3:10, 13) Nungnga marjanji halak Jahudi mangoloi Patik ni Debata, alai dilanggar nasida do i. Alani i ma gabe hona bura ni Debata nasida. Jadi ikkon mate do nasida, alana pinoppar ni si Adam na mardosa do nasida jala nungnga hona bura ni Debata. (Rom 5:12) Di Patik ni si Musa, halak na mardosa ikkon dipamate do. Dung i, digattung ma bakkena di hau. * Menurut Patik i, magigi situtu do Debata tu halak na targattung di hau. (5 Mus. 21:22, 23; 27:26) Jadi, tikki digattung Jesus di hau i, na manggattihon halak Jahudi do ibana disi, asa malua nasida sian bura. Jala gabe adong ma kesempatan ni nasida mangolu saleleng ni lelengna nang pe naung ditolak nasida Jesus.

7. Aha do alasan na paduahon boasa diloas Jahowa Anakna i manaon na haccit?

⁷ Alasan na paduahon, lao mangalatik Jesus gabe Sintua ni Malimta. Diloas Jahowa pe Jesus manaon na haccit, asa boi do diboto ibana songon dia maolna toktong setia tikki diuji massai borat. Ala massai borat situtu do sitaononna i, hea do Jesus martangiang “marhite angguk-angguk dohot ilu-ilu”. Ala nungnga hea dirasahon ibana songon dia boratna manaon na haccit, gabe diattusi ibana ma pakkilalaatta. Jala “boi ma ibana mangurupi akka halak na marsitaonon tikki diuji”. Jadi mandok mauliate ma hita tu Jahowa, ala dipillit Ibana do Jesus gabe Sintua ni Malimta na boi ‘mangattusi hagaleotta’.​—Heb. 2:17, 18; 4:14-16; 5:7-10.

8. Aha do alasan na patoluhon boasa diloas Jahowa Jesus marsitaonon?

⁸ Na patoluhon, diloas Jahowa pe Jesus marsitaonon lao mangalusi sukkun-sukkun on do: Boi do jolma toktong setia tu Debata nang pe susa ibana? Didok Sibolis, dang mungkin olo jolma mangoloi Debata molo so adong na binuatna. Menurut Sibolis songon si Adam do sude jolma i, dang holong rohana tu Jahowa. (Job 1:9-11; 2:4, 5) Alai pos do roha ni Jahowa tu Jesus na toktong do ibana setia nang pe diuji massai borat. Ala toktong Jesus setia, gabe terbukti ma na pargabus do Sibolis.

9. Aha do na boi tatiru sian si Johannes?

⁹ Ajaran taringot tu tobusan, mambahen lam togu haporseaon ni halak Kristen. Alani i gabe torus ma nasida marbarita na uli nang pe ditentang. Jala toktong do nasida setia nang pe ikkon manaon na haccit saleleng ni ngoluna. Misalna, Apostel Johannes. Toktong do ibana setia marbarita na uli taringot Kristus dohot tobusan lobi sian 60 taon. Tikki hampir marumur 100 taon ibana, dipenjarahon halak Rom ma ibana di Pulo Patmos. Aha hajahatonna? ‘Mambaritahon taringot tu Debata dohot taringot tu Jesus.’ (Pgk. 1:9) Pengalaman ni si Johannes on, gabe sitiruon na denggan do tu hita taringot mampartahatton haporseaon!

10. Songon dia do si Johannes patuduhon na diargai ibana tobusan?

¹⁰ Sian akka na disurat si Johannes, takkas ma tarida na massai holong do rohana tu Jesus jala diargai ibana do tobusan i. Buktina adong do lobi 100 hali disurat ibana taringot tobusan i dohot manfaatna. Misalna disurat si Johannes do, “Molo adong na mardosa, adong do na mangurupi hita na rap dohot Damang i, i ma Jesus Kristus.” (1 Joh. 2:1, 2) Disurat si Johannes do muse boasa massai penting “paboahon taringot tu Jesus”. (Pgk. 19:10) Takkas ma massai diargai si Johannes do tobusan i. Porlu do tatiru si Johannes on. Songon dia carana?

11. Aha do na boi mangurupi hita tikki targoda mangulahon dosa?

¹¹ Tolak ma godaan mangulahon dosa. Molo taargai do tobusan, unang ma ro tu rohatta pikkiran sisongon on, ‘Boasa pola ikkon berjuang au menolak godaan? Ai molo huulahon pe dosa, boi do au martangiang mangido tu Debata asa disesa dosakki.’ Harusna, molo digoda hita mangulahon na sala, pittor hatop ma tadok, ‘Dang olo au! Dang mungkin hubahen haccit roha ni Jahowa dohot Jesus. Hape nungnga godang akka na denggan na dilean nasida tu au.’ Pittor martangiang ma hita tu Jahowa mangido, “Urupi ma [au] asa unang targoda.”​—Mat. 6:13.

12. Songon dia do hita boi mangulahon poda na disurat di 1 Johannes 3:16-18?

¹² Makkaholongi akka dongan. Tikki tahaholongi akka dongan, i patuduhon na taargai do tobusan. Boasa? Alana dang holan hita na ditobus, dohot do akka donganta i. Jadi takkas ma massai holong do tong roha ni Jesus tu nasida. (Jaha 1 Johannes 3:16-18.) Tarida do holongta tu akka dongan sian sikapta tu nasida. (Eps. 4:29, 31–5:2) Misalna, taurupi do nasida tikki marsahit. Manang tikki masa bencana alam, tapatogu do nasida asa sabar manaon i. Alai songon dia ma hita boi toktong patuduhon holong tikki haccit rohatta dibahen akka dongan?

13. Boasa ikkon tasalpuhon hasalaan ni akka dongan?

¹³ Songon dia do molo maol tahilala lao manalpuhon hasalaan ni akka dongan? (3 Mus. 19:18) Taingot ma poda on, “Toktong ma hamu sabar tu na asing, jala rade ma hamu manalpuhon hasalaan ni nasida nang pe haccit rohamuna dibahen. Songon Jahowa na rade manalpuhon hasalaanmuna, songon i ma ulahon hamu.” (Kol. 3:13) Tikki tasalpuhon hasalaan ni akka dongan, i patuduhon na massai taargai do tobusan na sian Jahowa. Saonari, tabahas ma muse songon dia carana asa torus taargai tobusan i.

14. Songon dia do carana asa lam taargai tobusan?

¹⁴ Tadok ma mauliate tu Jahowa alani tobusan. Si Joanna donganta borua naung marumur 83 taon na tinggal di India mandok, “Penting hian do hurasa mandok mauliate tu Jahowa alani tobusan ganup ari.” Jadi, tikki martangiang hita tu Jahowa ganup ari, penting do tong tapikkiri hasalaan na taulahon di sadari i, jala minta maaf ma hita tu Jahowa. Alai molo dosa serius do na taulahon, ikkon tapaboa do i tu akka sintua, asa diurupi hita. Pasti olo do nasida manangihon hita, jala lehononna ma poda sian Hata ni Debata. Ditangiakkon nasida ma hita. Dipangido nasida ma tu Jahowa asa disesa dosatta i marhite tobusan ni Jesus, asa denggan muse hubunganta tu Jahowa.​—Jak. 5:14-16.

15. Boasa ikkon taparade tikki lao manjaha dohot mangarimangi tobusan?

¹⁵ Mangarimangi pengorbanan ni Jahowa dohot Jesus. Donganta si Rajamani naung marumur 73 taon mandok, “Tikki hujaha akka na haccit na ditaon Jesus, sai ro do ilukku.” Sarupa do ra pakkilalaanmuna songon donganta on. Jadi molo tarimangi pengorbanan ni Jesus tu hita, gabe lam balga ma holongta tu ibana dohot tu Bapakna Jahowa, na mangalehon tobusan i. Asa lam mura hita mangarimangi taringot tobusan on, tabahen ma topik on gabe bahan pelajaran pribadi manang pelajaran keluarga.

16. Aha do manfaatna molo jotjot taajarhon taringot tobusan tu na asing? (Ida gambar sampul.)

¹⁶ Ajarhon ma tobusan i tu na asing. Molo jotjot tahatahon taringot tobusan on tu na asing, gabe lam taargai ma i. Diparade organisasi do akka publikasi dohot video na mangurupi hita mangajarhon taringot tobusan. Misalna, dipatorang do i di parsiajaran 4 di bukku Barita na Uli sian Debata! Judulna, “Jesus Kristus, Ise do Ibana?” Manang boi do muse taida hatorangan i di pasal 5 bukku Aha do na Diajarhon Bibel tu Hita? Na marjudul, “Silehonlehon ni Debata na Ummarga i ma Tobusan.” Asing ni i, ganup taon talean do muse undangan tu godang halak asa ro nasida tu Borngin Parningotan Hamamate ni Jesus. Hasangapon na massai balga do sian Jahowa boi mangajarhon taringot tobusan i tu akka halak.

17. Boasa boi tadok silehon-lehon na massai arga do tobusan i?

¹⁷ Nungnga taparsiajari, boasa ikkon torus taargai tobusan i. Alani tobusan, boi ma hita marale-ale tu Jahowa nang pe dang sempurna. Alani tobusan, gabe boi ma dihancurhon sude karejo ni Sibolis. (1 Joh. 3:8) Asing ni i, alani tobusan gabe saut ma sude rencana ni Debata tu portibi on. Boi ma portibi on mulak muse gabe paradeiso. Sude halak na tinggal disi, makkaholongi Jahowa jala manomba Ibana. Berupaya ma hita patuduhon na taargai do tobusan i tiap ari. Alana silehon-lehon na massai arga do i sian Jahowa.