1. Akka tujuan aha do na boi tabahen?

 ALA halak Kristen do hita, holong hian do rohatta tu Jahowa. Lomo do rohatta mangalehon na undenggan tu Ibana. Alai asa boi taulahon i, porlu do hita mambahen tujuan asa lam denggan sifatta, marsiajar akka keterampilan na marguna tu organisasi, jala mangalului cara lao mangurupi akka dongan sahaporseaon.

2. Boasa ikkon tabahen tujuan jala berupaya mencapai tujuan i?

² Boasa ikkon mambahen kemajuan hita? Alasan utamana, ala lomo do rohatta mambahen las roha ni Jahowa. Las do roha ni Jahowa molo tapakke kemampuatta lao manomba Ibana. Asing ni i muse, las do rohatta mambahen kemajuan asa boi taurupi akka donganta. (1 Tes. 4:9, 10) Dang soal nungnga sadia leleng hita di hasittongan, porlu do hita sude mambahen kemajuan. Saonari tabahas ma songon dia carana hita mangulahon i.

3. Nasehat aha do na dilehon Apostel Paulus tu si Timoteus? (1 Timoteus 4:12-16)

³ Memang poso dope si Timoteus tikki dibahen Apostel Paulus suratna na parjolo tu ibana. Alai, nungnga gabe sintua na berpengalaman be si Timoteus di tikki i. Nang pe songon i, dijujui si Paulus do ibana asa toktong mambahen kemajuan. (Jaha 1 Timoteus 4:12-16.) Sian suratna tu si Timoteus taboto ma adong dua na porlu ditingkatton si Timoteus. Na parjolo, padenggatton akka sifatna songon holong, haporseaon, jala toktong badia. Na paduahon, porlu do muse ditingkatton ibana keterampilanna manjaha di jolo ni halak, mamodai, dohot mangajari. Di artikel on tabahas ma aha na boi tatiru sian si Timoteus na mambahen tujuan asa lam jonok tu Jahowa. Jala tabahas  ma muse akka keterampilan aha na boi tatingkatton di organisasi.

4. Boasa godang tugas na dilehon tu si Timoteus? (Pilippi 2:19-22)

⁴ Godang do tugas na dilehon tu si Timoteus lao melayani Jahowa. Boasa boi songon i? Ala denggan akka sifatna. (Jaha Pilippi 2:19-22.) Sian hata ni si Paulus taringot si Timoteus di ayat on, taboto ma molo si Timoteus halakna serep marroha, setia, jala bertanggung jawab. Ibana pe parholong jala parduli tu akka dongan sahaporseaonna. Alani i ma holong hian roha ni si Paulus tu si Timoteus. Jala dang ragu ibana mangalehon akka tanggung jawab na borat tu si Timoteus. (1 Kor. 4:17) Sarupa songon i ma, molo berupaya hita padenggatton akka sifatta, lam godang ma na boi taulahon di huria jala lam holong ma roha ni Jahowa tu hita.​—Ps. 25:9; 138:6.

5. (a) Songon dia do carana asa diboto hamu sifat na dia na porlu dipadenggan hamu? (b) Songon dipatudu di gambar, aha do na diulahon donganta na poso on asa lam berempati tu na asing?

⁵ Tottuhon ma sifat na naeng dipadenggan hamu. Tangiakkon jala pikkirhon ma aha do na porlu dipadenggan hamu sian dirimuna. Pillit ma sada sifat na porlu dipadenggan hamu. Misalna, asa lam berempati manang asa lam tergerak hamu mangurupi akka dongan. Manang, boi do muse dibahen hamu tujuan asa gabe sibahen dame jala asa lam mura manalpuhon hasalaan ni akka dongan. Pangido ma akka dongan na boi dihaporseai hamu asa dilehon saran tu hamu.​—Poda 27:6.

6. Songon dia do asa tercapai tujuanta lao padenggatton sifatta?

⁶ Berupaya ma padenggatton sifatmuna i. Songon dia carana? Parsiajari ma taringot sifat na naeng dipadenggan hamu. Misalna, manalpuhon hasalaan ni na asing. Jaha jala rimangi ma akka contoh na disurat di Bibel taringot halak na olo dohot na so olo manalpuhon hasalaan. Contohna Jesus, rade do ibana manalpuhon hasalaan ni na asing. (Luk. 7:47, 48) Diboto Jesus do adong hahurangan manang hasalaan ni nasida. Alai diingot Jesus do tong akka sifat ni nasida na denggan. Sebalikna molo halak Parise, ‘leas do rohana mangida na asing’. (Luk. 18:9) Tikki diparsiajari hamu akka contoh i, sukkun ma dirimuna, ‘Aha do na  huida sian na asing? Sifat na denggan na dia do sian nasida na naeng hutiru?’ Molo maol dirasa hamu manalpuhon hasalaan ni sasahalak, coba ma surat hamu akka sifatna na denggan. Dung i sukkun ma muse tu dirimuna, ‘Songon dia do Jesus mangida ibana? Olo do Jesus manalpuhon hasalaanna?’ Molo tabahen songon i, gabe boi ma tapauba cara marpikkirta. Mulana, olo do maol tahilala manalpuhon hasalaan ni dongan na mambahen haccit rohatta. Alai molo torus hita berupaya, lam leleng lam mura ma hita manalpuhon hasalaanna.

7. Songon na dipaboa di Poda 22:29, songon dia do Jahowa mamakke akka naposona na terampil saonari?

⁷ Tujuan na asing na boi tabahen, i ma marsiajar akka keterampilan na marguna tu organisasi. Coba ma jo tapikkirhon sadia godang akka dongan na dihaporluhon lao pajongjokkon fasilitas Betel, Bale Kebaktian, dohot Bale Harajaon. Godangan sian nasida, marsiajar akka keterampilan na baru sian akka donganta na berpengalaman. Songon na taida di gambar, akka dongan bawa dohot borua boi do rap marsiajar keterampilan na dihaporluhon lao mangarawat Bale Kebaktian dohot Bale Harajaon. Molo olo hita mamakke keterampilanta, gabe sae ma godang ulaon ni organisasi. Jala gabe dipasangap ma Jahowa “Raja na manoktong” dohot Jesus Kristus “Raja ni akka raja”. (1 Tim. 1:17; 6:15; jaha Poda 22:29.) Pasti lomo do rohatta bekerja keras jala mamakke keterampilanta lao pasangappon Jahowa, dang diritta sandiri.​—Joh. 8:54.

8. Songon dia do asa taboto keterampilan aha na naeng taparsiajari?

⁸ Tottuhon ma keterampilan na naeng diparsiajari hamu. Keterampilan aha do na naeng diparsiajari hamu? Boi do disukkun hamu i tu sintua di huriamuna manang boi do ra tu pengawas wilayahmuna. Misalna olo do dipaboa nasida, porlu dope dipadenggan hamu caramuna marbarita dohot mangajari. Sukkun ma tu nasida songon dia carana mangulahon i. Dung i berupaya ma mangihutton saran ni nasida. Songon dia carana asa tercapai tujuanmuna i?

9. Songon dia carana maningkatton keterampilanta?

⁹ Berupaya ma maningkatton keterampilanmuna i. Molo naeng lam terampil hamu mangajari, boi do diparsiajari hamu brosur Cara Asa Lam Denggan Manjaha dohot Mangajari. Molo dapotmuna tugas jamita di parpunguan tonga pokan, pangido ma tu sahalak donganta bawa na berpengalaman asa dibege ibana hamu tikki latihan. Dung i sukkun ma tu ibana aha na porlu dipadenggan hamu. Denggan ma persiappon hamu tugas i, asa boi diida akka dongan na botul-botul hamu bekerja keras jala boi diandalhon.​—Poda 21:5; 2 Kor. 8:22.

10. Ceritahon ma sada pengalaman na patuduhon boi do hita marhasil mamparsiajari sada keterampilan.

¹⁰ Boha do molo maol dihilala hamu marsiajar sada keterampilan? Unang ma menyerah! On ma na diulahon sahalak donganta na margoar si Garry na hurang lancar manjaha. Diingot ibana do tikki parjolo sahali ibana mandapot tugas manjaha di parpunguan, maila hian do ibana. Alai dang menyerah si Garry. Berupaya do ibana asa lam denggan manjaha. Ala olo si Garry manjalo pelatihan sian akka dongan na berpengalaman dohot sian publikasi, saonari gabe boi ma  ibana marjamita di Bale Harajaon, di parpunguan wilayah, dohot di parpunguan regional.

11. Songon si Timoteus, boha do carana asa lam godang na boi taulahon lao melayani Jahowa?

¹¹ Gabe parjamita manang guru na malo do si Timoteus? Dang adong dipaboa Bibel taringot i. Alai ala diihutton ibana do nasehat ni si Paulus, gabe lam terampil ma ibana mangulahon tugasna. (2 Tim. 3:10) Dos songon i ma, molo berupaya hita maningkatton keterampilanta, pasti lam godang ma na boi taulahon lao melayani Jahowa.

12. Hea do hamu diurupi dongan na asing? Paboa ma pengalamanmuna.

¹² Jotjot do hita sude diurupi akka dongan. Contohna, molo dirawat hita di rumah sakit, ro do Panitia Penghubung Rumah Sakit manang Kelompok Pengunjung Pasien manjuppangi hita. Molo adong masalahta, sai rade do akka sintua mangalehon tikkina lao manangihon jala patoguhon hita. Asing ni i molo porlu hita diurupi manstudihon parsiajar Bibelta, adong do akka donganta perintis na olo mandongani hita jala mangalehon saran na tahaporluhon. Marlas ni roha do nasida mangurupi hita. Hita pe boi do marlas ni roha songon nasida, molo olo hita mangurupi na asing. Alana songon na didok Jesus, “Umlas do roha ni halak na mangalehon sian na manjalo.” (Ul. 20:35) Attong molo lomo do rohamuna maniru nasida, aha ma na porlu diulahon hamu?

13. Tikki mambahen cita-cita, aha do na porlu taingot?

¹³ Ikkon jelas do ditetappon hamu cita-citamuna. Misalna olo do didok rohamuna, ‘Lomo do rohakku mandapot tugas tambahan di huria.’ Alai, molo dang jelas ditottuhon hamu tujuanmuna, gabe maol ma diulahon hamuna i. Jala, dang diboto hamu andigan boi tujuanmuna i tercapai. Jadi bahen ma cita-cita na jelas. Molo boi surat ma i jala songon dia carana mencapai i.

14. Boasa ikkon masuk akkal hita tikki mambahen tujuan?

¹⁴ Ikkon masuk akkal do hita menetappon tujuanta. Boasa? Alana dang boi  takendalihon sude situasitta. Taida ma jo pengalaman ni si Paulus. Baru dope dibentuk ibana huria di Tessalonik. Jala lomo do rohana naeng tinggal di kota i lao mangurupi halak Kristen na disi. Alai halak na marsogo ni roha mamaksa si Paulus asa maninggalhon kota i. (Ul. 17:1-5, 10) Molo torus si Paulus tinggal disi, parohon bahaya do i tu akka dongan sahaporseaonna. Jadi disesuaihon si Paulus ma carana mangurupi nasida. Disuru ibana ma si Timoteus tu Tessalonik lao patoguhon akka dongan na disi. (1 Tes. 3:1-3) Pasti marlas ni roha do halak i ala olo si Timoteus mangurupi nasida.

15. Boasa porlu tasesuaihon tujuanta molo muba situasitta? Paboa ma sada pengalaman.

¹⁵ Adong na boi taparsiajari sian pengalaman ni si Paulus di Tessalonik. Bisa jadi nungnga tabahen tujuan. Alai ala muba situasitta, gabe dang boi tacapai tujuanta i. (Pjm. 9:11) Molo songon i na masa, bahen hamu ma muse tujuan na baru na boi dicapai hamu. I do na diulahon sapasang suami istri na margoar si Ted dohot si Hiedi. Alani masalah kesehatan, ikkon kaluar do nasida sian Betel. Alai holong do roha ni nasida tu Jahowa. Dilului nasida do muse cara na asing asa unggodang tikki ni nasida marbarita. Jadi merintis biasa ma nasida. Dung i dilantik ma nasida gabe perintis istimewa jala si Ted dilatih gabe pengawas wilayah pengganti. Di pudian ni ari, adong dibahen pengaturan taringot batas usia ni pengawas wilayah. Disadari nasida ma, dang boi be si Ted gabe pengawas wilayah ala nungnga matua. Mulana kecewa do nasida, alai disadari nasida do godang dope cara lao melayani Jahowa. Didok si Ted, “Huboto hami do, dang holan on cara melayani Jahowa.”

16. Aha do na boi taparsiajari sian Galatia 6:4?

¹⁶ Dang boi takendalihon sude na masa di ngolutta. Alai taingot ma, na mambahen hita berharga di Jahowa dang penugasanta. Alani i, unang ma sai tabandingkon diritta tu na asing na mandapot tugas na so dilehon tu hita. Si Hiedi mandok, “Dang boi hita marlas ni roha molo sai tabandingkon ngolutta tu na asing.” (Jaha Galatia 6:4.) Alani i, talului ma godang cara lao melayani Jahowa jala mangurupi na asing. b

17. Aha do na boi diulahon hamu asa dapotmuna tugas na dihalomohon hamu?

¹⁷ Asa boi unggodang tikki na dilehon hamu tu Jahowa, sederhana ma bahen ngolumuna jala hindari ma utang na so  porlu. Bahen ma cita-cita jangka pendek asa boi hamu mencapai cita-cita jangka panjang. Misalna molo lomo rohamuna gabe perintis biasa, coba hamu ma jo gabe perintis ekstra tetap. Molo cita-citamuna gabe parhobas di huria, boi do ditambai hamu tikkimuna di ulaon marbarita, mengunjungi na marsahit, dohot mangurupi akka dongan na matua di huria. Pengalaman na dapotmuna saonari, marguna do i di penugasanmuna haduan. Berupaya ma mangulahon na terbaik di tugas manang aha pe na dilehon tu hamu.​—Rom 12:11.

18. Aha do na boi diparsiajari hamu sian si Beverley? (Ida muse gambar.)

¹⁸ Nang pe nga matua, tetap do boi tabahen cita-cita. Taida ma contoh ni si Beverley, sahalak donganta borua na marumur 75 taon. Ala adong masalah kesehatan, maol do ibana mardalan. Alai lomo do rohana mendukung ulaon marbarita saleleng bulan Parningotan. Jadi dibahen ibana ma tujuan na jelas. Dung marhasil si Beverley meraih cita-citana i, las hian ma rohana. Gabe tergerak ma akka dongan na asing maniru semangatna. Pasti diargai Jahowa do upaya na dibahen akka donganta na matua, nang pe terbatas kesanggupan ni nasida.​—Ps. 71:17, 18.

19. Akka cita-cita aha do na boi diraih hamu?

¹⁹ Bahen ma cita-cita na boi diraih hamu. Berupaya ma hamu padenggatton akka sifatmuna asa las roha ni Jahowa. Parsiajari hamu ma akka keterampilan na mangurupi hamu mangalehon unggodang tu Debata dohot tu organisasina. Sai lului hamu ma cara mangurupi akka dongan sahaporseaon. c Songon si Timoteus, pasti diurupi Jahowa do hamu “asa diida sude halak na lam togu parale-aleonmu tu Debata”.​—1 Tim. 4:15.