Marsumpa lapatanna, “marjanji manang secara resmi paboahon naeng mangulahon sada ulaon, jala jotjot do didok Debata ma . . . na gabe saksina”. Boi do dibahen on tertulis manang didok langsung.

Adong do halak na mandok dang boi hita marsumpa. Alana hea do didok Jesus, “Unang ma marsumpa hamu . . . Molo olo dok ma ‘Olo’, molo dang dok ma ‘Dang’. Lobi sian i, sian Sibolis do i.” (Mat. 5:33-37) Tottu diboto Jesus do na adong dibahen sumpa di Patik ni si Musa, jala adong naposo ni Debata na mambahen sumpa. (1 Mus. 14:22, 23; 2 Mus. 22:10, 11) Diboto Jesus do muse molo Jahowa pe hea do marsumpa. (Heb. 6:13-17) Jadi tikki didok Jesus songon i, dang na berarti dang boi hita marsumpa. Alai, unang ma marmeam-meam hita tikki mambahen sumpa, jala molo marsumpa hita ikkon tapastihon do boi taulahon i. Alana, i do na dipangido Jahowa.

Attong boha do molo disuru hamu mambahen sumpa? Na parjolo, pikkirhon ma boi do diulahon hamu sumpa i manang na dang. Molo dang yakin hamu, tumagon ma unang marsumpa hamu. Didok di Bibel, “Tumagon do dang marjanji ho, sian apala marjanji alai dang dipasaut ho janjimi.” (Pjm. 5:5) Na paduahon, pikkiri ma akka prinsip ni Bibel na berkaitan tu sumpa i. Dung i, bahen ma keputusan sesuai tu panggora ni rohamuna. Akka prinsip ni Bibel na dia ma na boi dipikkirhon hamu?

Adong do sumpa na sesuai tu lomo ni roha ni Debata. Molo adong Saksi Jahowa naeng menikah, ikkon mambahen ikrar perkawinan do nasida. Dos songon sumpa do i. Marjanji do nasida di jolo ni Jahowa dohot di jolo ni akka halak, asa masihaholongan jala mangargai dongan saripena “saleleng nasida na dua mangolu di tano on”. (Dang sai sarupa janji na didok sude pengantin, alai tetap do ikkon marjanji nasida di jolo ni Jahowa.) Dung mambahen ikrar perkawinan, sah ma nasida gabe suami istri, jala ikkon marsada do nasida saleleng ngoluna. (1 Mus. 2:24; 1 Kor. 7:39) Pengaturan on, sesuai do tu lomo ni roha ni Debata.

Adong do sumpa na maralo tu lomo ni roha ni Debata. Halak Kristen dang boi marsumpa lao mamakke sinjata, mambela negara, manang mandok dang Saksi Jahowa be ibana. Molo dibahen songon i, na mangalo patik ni Debata do i.Alana halak Kristen, “dang sian portibi on”. Jadi dang boi nasida terlibat tu akka sisongon i.​—Joh. 15:19; Jes. 2:4; Jak. 1:27.

 Adong do sumpa na bergantung tu panggora ni roha. Sebelum mamutusson naeng mambahen sumpa manang na dang, manat ma tapikkiri hata ni Jesus na mandok, “Lehon ma tu Kesar appuna ni Kesar, jala tu Debata appuna ni Debata.”​—Luk. 20:25.

Tabayakkon ma sahalak Kristen na naeng mangurus paspor manang mangisi permohonan kewarganegaraan, alai disuru ma ibana marsumpa. Molo adong isi ni sumpa i na maralo tu patik ni Debata na mambahen terganggu panggora ni rohana, pasti dang olo ibana marsumpa. Boi ma dipangido ibana asa disesuaihon isi ni sumpa i, asa unang terganggu panggora ni rohana.

Dung disesuaihon isina, olo ma ibana mandok sumpa i. Ala menurut ibana molo diulahon ibana i, sesuai do i tu paretta na disurat di Rom 13:1 na mandok, “Ikkon unduk do sude halak tu pamaretta.” Jala olo do ra didok rohana dang sala mandok sumpa sisongon i ala sesuai do i tu lomo ni roha ni Debata.

Molo dipangido hamu maniop sada benda manang mambahen isyarat tikki mandok sumpa, ikkon diihutton hamu do panggora ni rohamuna naung terlatih. Halak Rom dohot halak Skit najolo, marsumpa do sambil maniop podang. On patuduhon na porsea nasida tu kekuatan ni dewa perang. Dibahen pe songon i tujuanna lao paboahon molo hata ni nasida i boi dihaporseai. Molo halak Junani, marsumpa do nasida sambil mangangkat tanganna tu langit. On patuduhon na porsea do nasida adong dewa di langit na mangida jala mambege sumpa i. Porsea do nasida, na ikkon dipartanggung jawabhon jolma do sumpana tu dewa i.

Boha do molo dipangido hamu marsumpa sambil maniop simbol negara na berhubungan tu agama palsu? Tottu dang olo hita mangulahon i. Alai boha do molo dipangido hamu marsumpa di pengadilan sambil mambahen tanganmuna di atas ni Bibel? Boi do diulahon hamu i. Adong do disurat di Bibel akka naposo ni Jahowa na marsumpa sambil mambahen isyarat. (1 Mus. 24:2, 3, 9; 47:29-31) Na uppetting na ikkon diingot hamu, tikki dibahen sasahalak sumpa sisongon i na marjanji do ibana di jolo ni Jahowa lao paboahon na sittong. Alani i ikkon selalu siap do hita mangalean alus na sittong tikki di pengadilan.

Massai arga do hubungatta tu Jahowa. Alani i sebelum marsumpa, ikkon martangiang do hita tu Jahowa, jala tapastihon molo sumpa i dang maralo tu panggora ni rohatta manang tu prinsip ni Bibel. Asing ni i, molo nungnga dibahen hamu sumpa, ikkon diulahon hamu do i.​—1 Ptr. 2:12.