1. Paboa ma aha na terjadi boasa dibahen Jesus mukjizatna na parjolo.

 PIKKIRHON ma sada peristiwa di ujung ni taon 29 M, tikki dimulai Jesus pelayananna di tano on. Diundang ma Jesus, si Maria omakna, dohot piga-piga siseanna tu pesta pernikahan di Kana, sada huta di sabola utara ni Nasaret inganan ni Jesus tinggal. Ra martondong dope si Maria dohot keluarga ni pengantin i jala dohot do ibana marhobas disi. Alai tikki pesta habis ma anggur jala boi do i mambahen maila keluarga dohot pengantin. b Mungkin godang do tamu na ro, lobi sian na diperkirahon. Pittor hatop ma si Maria mandokkon tu Jesus anakna, “Dang adong be anggur ni nasida.” (Joh. 2:1-3) Aha do na dibahen Jesus? Dibahen ibana ma mukjizatna na parjolo, i ma manguba aek gabe “anggur na dumenggan”.​—Joh. 2:9, 10.

2-3. (a) Aha do mukjizat na hea dibahen Jesus? (b) Aha do na lao tabahas di artikel on?

² Godang do mukjizat na dibahen Jesus saleleng pelayananna di tano on. c Misalna hea do Jesus mangalehon mangan  5.000 bawa jala di tikki na asing 4.000 bawa. Sasittongna molo termasuk akka borua dohot dakdanak na dietong, boi do jumlahna lobi sian 27.000 halak. (Mat. 14:15-21; 15:32-38) Di dua peristiwa i dipamalum Jesus do tong godang halak na marsahit. (Mat. 14:14; 15:30, 31) Bayakkon ma pasti las hian do roha ni nasida tikki dipamalum jala dilehon Jesus nasida mangan.

³ Godang do na boi taparsiajari sian mukjizat na dibahen Jesus. Di artikel on, tabahas ma parsiajaran na boi patoguhon haporseaotta sian akka mukjizat i. Dung i tabahas ma muse, songon dia hita boi maniru serep ni roha dohot asi ni roha na dipatudu Jesus tikki mambahen mukjizat.

4. Aha do manfaatna molo taparsiajari akka mukjizat na dibahen Jesus?

⁴ Sian akka mukjizat na dibahen Jesus, marsiajar do hita taringot ibana dohot Bapakna. Boasa? Alana sian Jahowa do huaso ni Jesus lao mambahen akka mukjizat i. Ulaon ni Apostel 10:38 mandok, “Dipillit Debata [do Jesus] marhite tondi parbadia. Dilehon Debata do tu ibana huaso. Didalani ibana do sude luat i lao mangulahon na denggan. Jala dipamalum ibana do sude na dirajai Sibolis, ai Debata do na mandongani ibana.” Ingot ma sian hata dohot tindakan ni Jesus, sempurna do ibana maniru cara marpikkir dohot perasaan ni Bapakna, termasuk tikki mambahen mukjizat. (Joh. 14:9) Saonari tabahas ma tolu parsiajaran na boi tadapot sian mukjizat na dibahen Jesus.

5. Aha do na mangonjar roha ni Jesus mambahen mukjizat? (Mateus 20:30-34)

⁵ Parjolo, massai holong do roha ni Jesus dohot Bapakna tu hita. Tikki di tano on Jesus, dipatudu ibana do holongna tu akka halak. Dibahen ibana do mukjizat lao mangurupi akka halak na marsitaonon. Misalna, hea do dua halak na buta jou-jou mangido asa diurupi Jesus. (Jaha Mateus 20:30-34.) Gabe “asi ma roha ni Jesus” jala dipamalum ma nasida. Alani holongna gabe asi ma rohana. Jala alani holong i do gabe olo Jesus mangalehon mangan dohot pamaluppon sahalak na marsahit kusta. (Mat. 15:32; Mrk. 1:41) Pos do rohatta massai holong do roha ni Jahowa Debata ‘parasi roha’ dohot Jesus Anakna tu hita. Haccit do dihilala nasida molo marsitaonon hita. (Luk. 1:78; 1 Ptr. 5:7) Pasti massai lomo do roha ni nasida lao manalpuhon akka na mambahen jolma marsitaonon!

6. Aha do na dilehon Debata tu Jesus?

⁶ Paduahon, nungnga dilehon Debata huaso tu Jesus lao manalpuhon sude sitaonon ni jolma. Marhite akka mukjizat, dipatudu Jesus do na sanggup ibana manalpuhon sude sitaonon na so boi diatasi jolma. Misalna, sanggup do Jesus paluahon hita sian dosa warisan na mambahen hita susa, termasuk ma i sahit dohot hamatean. (Mat. 9:1-6; Rom 5:12, 18, 19) Akka mukjizat ni Jesus i patuduhon sanggup do ibana pamaluppon “sude sahit” jala pahehehon na mate. (Mat. 4:23; Joh. 11:43, 44) Asing ni i, sanggup do Jesus pasohon badai jala paluahon jolma sian suru-suruan na jahat. (Mrk. 4:37-39; Luk. 8:2) Pasti gabe dipatogu do rohatta mamboto na dilehon Jahowa do huaso tu Jesus Anakna lao paluahon hita.

7-8. (a) Aha do parsiajaran na patoluhon sian mukjizat na dibahen Jesus? (b) Mukjizat na dia do na dipaima-ima hamu di tano na imbaru?

⁷ Patoluhon, gabe pos ma rohatta na lao saut do akka janji ni Debata dung mamaretta Harajaon ni Debata di tano on. Akka mukjizat na dibahen Jesus tikki mangolu di tano on paposson rohatta, umbalga dope annon  bahenonna dung gabe Raja ibana di Harajaon ni Debata. Pikkirhon ma na lao tahilala dung mamaretta Kristus di tano on. Sehat jala sempurna ma hita, dang adong be akka sahit, jala dang adong be jolma na marsitaonon. (Jes. 33:24; 35:5, 6; Pgk. 21:3, 4) Dang adong be kelaparan manang bencana alam. (Jes. 25:6; Mrk. 4:41) Jala tahilala ma las ni roha tikki menyambut akka halak na tahaholongi na mulak mangolu muse. (Joh. 5:28, 29) Mukjizat na dia do na dipaima-ima hamu di tano na imbaru?

⁸ Dipatudu Jesus do serep ni roha dohot asi ni roha tikki mambahen mukjizat. Dua sifat on ma na naeng tatiru. Saonari taida ma dua contohna, tamulai ma sian mukjizat na dibahen Jesus di pesta pernikahan di Kana.

9. Aha do na diulahon Jesus di pesta pernikahan? (Johannes 2:6-10)

⁹ Jaha Johannes 2:6-10. Tikki habis anggur di pesta pernikahan i, wajib do Jesus mambahen mukjizat? Daong. Alana dang adong surirang na paboahon lao bahenon ni Messias do anggur. Alai bayakkon ma songon dia perasaanmuna molo habis siinumon di pesta pernikahanmuna. Asi do roha ni Jesus tu keluarga i, tarlumobi tu pengantin i jala dang olo ibana gabe maila nasida. Alani i songon na dipaboa di awal ni artikel on, dibahen Jesus ma mukjizat. Diuba ibana do hira-hira 390 liter aek gabe anggur na dumenggan. Olo do ra dibahen godang anggur i asa boi  dipakke muse di tikki na asing manang asa boi digadis lao mangurupi pasangan na baru menikah i. Pasti las hian do roha ni nasida.

10. Aha do hatorangan na menarik na disurat di Johannes bindu 2? (Ida gambar.)

¹⁰ Parrohahon ma hatorangan na menarik na disurat di Johannes bindu 2. Dang Jesus na mangisi aek tu gucci i. Alai disuru ibana do akka parhobas mangisi aek tu gucci i. (Ayat 6, 7) Jala dung dibahen ibana aek i gabe anggur, dang Jesus na mamboan anggur i tu ketua ni parhobas i. Alai akka parhobas i do muse na disuru. (Ayat 8) Jala dang diisi Jesus anggur i tu makkuk huhut mandok tu akka tamu, ‘Dai hamu ma anggur na hubahen on!’

11. Aha ma na boi taparsiajari sian mukjizat ni Jesus?

¹¹ Aha ma na boi taparsiajari sian mukjizat na dibahen Jesus? Marsiajar do hita massai penting do patuduhon serep ni roha. Dang gabe dibangga-banggahon Jesus dirina alani mukjizat i. Jala dang hea dibangga-banggahon Jesus dirina alani akka na diulahon ibana. Sebalikna serep do rohana jala sai ditujuhon ibana do sude pujian dohot hasangapon holan tu Bapakna. (Joh. 5:19, 30; 8:28) Tatiru ma Jesus na serep roha. Seimbang ma caratta mangida diritta sandiri. Unang ma tabangga-banggahon diritta di sude na marhasil taulahon. Dang soal aha tugasta di organisasi ni Jahowa, unang ma diritta na tabangga-banggahon alai tapuji ma Jahowa Debata na tasomba. (Jer. 9:23, 24) Alana holan Ibana do na layak dipuji. Taingot ma dang boi hita marhasil molo dang diurupi Jahowa.​—1 Kor. 1:26-31.

12. Di situasi na songon dia do muse hita boi maniru serep ni roha ni Jesus? Paboa ma contohna.

¹² Parrohahon ma contoh na asing songon dia hita maniru serep ni roha ni Jesus. Bayakkon ma situasi on: Adong ma sahalak sintua na godang mangalehon tikkina lao mangurupi sahalak parhobas na poso mampersiappon jamitana na parjolo sahali dipasahat. Hasilna denggan ma donganta i pasahatton jamitana. Dung sae parpunguan, adong sahalak donganta na ro tu sintua i jala mandok, ‘Denggan do donganta i pasahatton jamitana ate.’ Dohonon ni sintua i do, ‘Ido, denggan do. Alana godang do tikkikku hulean mangurupi ibana mampersiappon jamita i.” Manang serep do rohana mandokkon, ‘Ido, denggan do donganta i marjamita. Bangga do au tu ibana.’ Molo serep rohatta unang ma tatarik pujian tu diritta sandiri alani akka na denggan na taulahon tu donganta na asing. Puas do tahilala mamboto na diida Jahowa jala diargai Ibana do na taulahon i. (Bandingkon tu Mateus 6:2-4; Heb. 13:16) Pasti las do roha ni Jahowa molo tatiru Jesus na patuduhon serep ni roha.​—1 Ptr. 5:6.

13. Aha do na diida Jesus di jonok ni kota Nain jala aha do na diulahon ibana? (Lukas 7:11-15)

¹³ Jaha Lukas 7:11-15. Bayakkon ma jo situasina tikki di tano on Jesus hira-hira taon 31 M. Lao ma ibana tu kota Nain, sada kota di Galilea na jonok tu Sunem. Najolo di Sunem hea do Panurirang Elisa pahehehon anak ni sahalak borua. (2 Raj. 4:32-37) Dung jonok Jesus tu gerbang ni kota i, pajuppang ma ibana dohot halak na mamboan na mate kaluar sian kota i. Massai lungun do situasina di tikki i. Alana anak sasada ni ina na mabalu do na mate i. Alai dang holan sahalak ni ina na mabalu i di tikki i, godang do halak sian kota i na mandongani ibana. Didapotton Jesus ma nasida jala dibahen ibana ma mukjizat. Dipahehe ibana ma anak ni ina na mabalu i. On ma haheheon na parjolo sian tolu haheheon na dibahen Jesus na disurat di bukku Injil.

14. Aha do hatorangan na menarik na disurat di Lukas bindu 7? (Ida gambar.)

 ¹⁴ Parrohahon ma hatorangan na menarik na disurat di Lukas bindu 7. Didok dung “diida” Jesus ina na mabalu i, gabe “asi ma rohana”. (Ayat 13) Bisa jadi diida ibana ma tangis ina na mabalu i huhut mardalan di jolo ni bakke ni anakna i, gabe asi ma roha ni Jesus. Dang holan asi roha ni Jesus, alai bertindak do ibana mangurupi ina na mabalu i. Lambok ma ibana makkatai tu ina na mabalu i, didok, “Unang be sai tangis ho.” Dibahen Jesus ma mukjizat jala dipahehe ma anak ni ina na mabalu i. Dung i “dipasahat Jesus ma [anakna i] tu omakna”.​—Ayat 14, 15.

15. Aha do na boi taparsiajari sian mukjizat ni Jesus?

¹⁵ Aha ma na boi taparsiajari sian mukjizat ni Jesus on? Marsiajar do hita massai penting do patuduhon asi ni roha tu akka halak na berduka. Memang dang boi hita pahehehon halak na mate. Alai songon Jesus, tapakke ma daya pengamatan lao patuduhon asi ni roha tu akka halak na berduka. Berinisiatif ma hita mangurupi jala menghibur nasida sian hata dohot tindakanta. d (Poda 17:17; 2 Kor. 1:3, 4; 1 Ptr. 3:8) Nang pe sederhana i alai massai balga do pengaruhna tu nasida.

16. Songon na dipatudu di gambar, aha do na boi diparsiajari hamu sian pengalaman ni sahalak ina na baru mate boruna?

¹⁶ Parrohahon ma pengalaman on. Piga-piga taon naung salpu, tikki mangendehon ende Harajaon di parpunguan, diparrohahon sahalak donganta borua ma sahalak ina tangis di labbungna. Ende i paboahon janji taringot haheheon jala tangis do ibana ala baru dope mate boruna. Pittor ro ma donganta borua i manjonok tu ibana jala dihaol ma ibana huhut marende sahat tu na sae. Tikki mangingot pengalamanna i, didok ina na mate boruna i ma, “Boi do huhilala holong ni dongan sahaporseaon.” Massai las do rohana ala ro ibana tu parpunguan. Didok ibana, “Di Bale Harajaon do boi dapottu bantuan ni akka dongan.” Pos ma rohatta diparrohahon jala diargai Jahowa do akka na taulahon lao patuduhon asi ni  roha tu akka halak na “marmetmet ni roha”.​—Ps. 34:18.

17. Aha do naung taparsiajari di artikel on?

¹⁷ Dipatogu do rohatta molo taparsiajari akka mukjizat ni Jesus na disurat di Bibel. Di artikel on nungnga taparsiajari, sian akka mukjizat i taboto ma na massai holong do roha ni Jahowa dohot Jesus tu hita, sanggup do Jesus manalpuhon sude sitaonon ni jolma, jala boi do pos rohatta pasti saut do akka janji ni Debata di Harajaonna satokkin nai. Tikki taparsiajari akka mukjizat i tarimangi ma songon dia hita maniru sifat ni Jesus. Coba ma parsiajari hamu akka mukjizat ni Jesus na asing tikki pelajaran pribadi manang tikki ibadat keluarga. Parrohahon ma parsiajaran aha do na boi dapotmuna sian i, dung i bagihon ma i tu na asing. Molo diulahon hamu i, boi ma hamu masipatoguan dohot na asing.​—Rom. 1:11, 12.

18. Aha do na lao tabahas di artikel na mangihut?

¹⁸ Di ujung ni pelayanan ni Jesus di tano on, dibahen ibana ma mukjizat na patoluhon jala na parpudi pahehehon halak na mate. Alai unik do na sada on, alana ibana pahehehon ale-alena naung opat ari mate. Aha do parsiajaran na boi tadapot sian na disurat di bukku Injil taringot mukjizat on? Jala songon dia do on patoguhon haporseaotta tu janji taringot haheheon? Tabahas ma sukkun-sukkun on di artikel na mangihut.