1. Songon dia do sahalak dakdanak paboahon harapanna tu janji taringot haheheon?

 SAHALAK dakdanak na margoar si Matthew marsahit na posi jala jotjot do ibana operasi. Tikki marumur pitu taon ditonton ibana dohot keluargana ma acara bulanan JW Broadcasting^®. Di ujung ni acara i, adong ma video musik taringot menyambut akka halak na dipahehe. b Dung sae acara i, dijonoki ibana ma natua-tuana, ditiop ma tangan ni nasida, jala didok ma, “Diida bapa dohot omak do i kan, molo tung pe mate au, hehe do au annon. Paima hamu ma, pasti saut do i.” Bayakkon hamu ma songon dia las ni roha ni natua-tuana mamboto na nyata do janji taringot haheheon i di anak ni nasida.

2-3. Boasa denggan tarimangi janji taringot haheheon?

² Denggan do molo tarimangi janji ni Bibel taringot haheheon na lao masa haduan. (Joh. 5:28, 29) Boasa? Alana dang taboto aha na lao masa tu hita. Olo do gabe marsahit na parah hita manang olo do toppu mate halak na tahaholongi. (Pjm. 9:11; Jak. 4:13, 14) Harapanta taringot haheheon boi mangurupi hita asa martahan tikki mangadopi situasi sisongon i. (1 Tes. 4:13) Marhite Bibel dipapos do rohatta na massai holong do roha ni Jahowa tu hita jala takkas do diboto Ibana hita. (Luk. 12:7) Ala massai holong do rohana tu hita, dilehon Ibana do kesempatan asa boi hita mangolu saleleng ni lelengna. Jala molo tung pe mate hita, paheheonna do hita jala paulakkonna do akka sifat dohot ingatanta. On patuduhon na massai takkas do ditanda Ibana hita.

³ Di artikel on tabahas ma boasa boi porsea hita tu janji taringot haheheon. Dung i tabahas ma muse peristiwa na disurat di Bibel na boi patoguhon haporseaotta. Tikki i didok Jesus  do hatana na gabe ayat tema ni parsiajaran on, “Mulak mangolu do muse ibotomi.” (Joh. 11:23) Jala tabahas ma muse songon dia asa lam pasti janji taringot haheheon i di hita.

4. Aha do na boi paposson rohatta tu sada janji? Paboa ma contohna.

⁴ Asa boi tahaporseai sada janji, ikkon pos do rohatta tu halak na marjanji i na lomo rohana jala sanggup ibana pasautton janjina i. Bayakkon ma jo on: Sega ma jabumuna alani badai. Ro ma sahalak donganmuna jala marjanji tu hamu. Didok ibana ma, ‘Huurupi pe ho paturehon jabumon.’ Pos do rohamuna na lomo rohana mangurupi hamu. Apalagi ma molo malo ibana martukkang jala lengkap peralatanna, pasti lam pos do rohamuna na sanggup ibana menepati janjina i. Attong boha do molo janji ni Debata taringot haheheon? Tutu do lomo rohana jala sanggup Ibana pasautton i?

5-6. Boasa boi pos rohatta na lomo do roha ni Jahowa pahehehon halak na mate?

⁵ Lomo do roha ni Jahowa pahehehon halak na mate. Sian dia taboto? Marhite tondi parbadia, ditogu-togu Ibana do akka panurat ni Bibel manuratton janji taringot haheheon. (Jes. 26:19; Hos. 13:14; Pgk. 20:11-13) Jala tikki marjanji Jahowa, pasti ditepati Ibana do i. (Jos. 23:14) Bahkan, masihol do Jahowa lao pahehehon halak na mate. Boasa boi tadok songon i?

⁶ Rimangi ma na didok si Job. Pos do rohana molo mate pe ibana, lomo do roha ni Jahowa paheheon ibana. (Job 14:14, 15) Songon i ma tong perasaan ni Jahowa tu sude naposona na setia naung mate. Lomo do rohana asa mulak mangolu muse nasida, sehat, jala marlas ni roha. Attong boha do marmiliar halak naung mate na so hea dope marsiajar taringot Jahowa? Lomo do tong roha ni Jahowa pahehehon nasida. (Ul. 24:15) Dipahehe Jahowa pe nasida asa adong do kesempatan ni nasida gabe ale-alena jala mangolu saleleng ni lelengna di tano on. (Joh. 3:16) Takkas ma, massai lomo do roha ni Jahowa pahehehon halak na mate.

7-8. Boasa boi pos rohatta na sanggup do Jahowa pahehehon halak na mate?

⁷ Sanggup do Jahowa pahehehon halak na mate, alana “Debata Pargogo na So Hatudosan” do Ibana. (Pgk. 1:8) Umgogo do Ibana sian sude musuna, termasuk ma i hamatean. (1 Kor. 15:26) Gabe dipatogu do haporseaotta jala tarapul do rohatta mamboto on. Taparrohahon ma jo pengalaman ni donganta borua si Emma Arnold. Diuji do haporseaonna dohot keluargana tikki masa sitaonon na borat saleleng Perang Dunia II. Mate do akka halak na dihaholongi nasida di kamp konsentrasi Nazi. Lao mangapuli boruna na berduka didok si Emma ma, “Molo dang boi halak na mate mangolu muse, berarti umgogo do hamatean i sian Debata. Alai dang mungkin songon i kan?” Takkas ma, dang adong na umgogo sian Jahowa. Molo sanggup do Debata Pargogo na so Hatudosan manoppa hangoluan, pasti sanggup do tong Ibana pahehehon halak na mate.

⁸ Alasan na asing boasa boi pos rohatta na sanggup do Jahowa pahehehon halak na mate, i ma ala dang terbatas ingatanna. Boi do dijou Ibana goar ni akka bintang sada-sada. (Jes. 40:26) Asing ni i, diingot Ibana do akka halak naung mate. (Job 14:13; Luk. 20:37, 38) Boi do diingot Jahowa sude taringot halak na lao paheheonna termasuk ma i penampilan, sifat, pengalaman ni nasida saleleng mangolu, dohot ingatan ni nasida.

9. Boasa boi pos rohamuna tu janji ni Jahowa taringot haheheon?

⁹ Takkas ma, boi do pos rohatta tu janji ni Jahowa taringot haheheon ala taboto na lomo  do rohana jala sanggup do Ibana pasautton i. Alai adong dope alasan na asing boasa boi pos rohatta tu janji ni Debata taringot haheheon: Nungnga hea Jahowa pahehehon halak na mate. Dipaboa do di Bibel, dilehon Jahowa do huaso tu piga-piga bawa na setia, termasuk ma i tu Jesus lao pahehehon halak na mate. Saonari tabahas ma jo sada kisah taringot haheheon na dibahen Jesus, na disurat di Johannes bindu 11.

10. Aha do na masa tikki marbarita Jesus di bariba ni Sunge Jordan, jala aha do na diulahon ibana? (Johannes 11:1-3)

¹⁰ Jaha Johannes 11:1-3. Bayakkon ma na masa di Betani di ujung ni taon 32 M. Disi do tinggal ale-ale ni si Jesus, i ma si Lasarus dohot dua ibotona si Maria dohot si Marta. (Luk. 10:38-42) Alai marsahit ma si Lasarus jala gabe khawatir ma dua ibotona i. Alani i disuru nasida ma halak paboahon i tu Jesus, na adong di bariba ni Sunge Jordan. Hira-hira dua ari pardalanan ma i sian Betani. (Joh. 10:40) Alai dung sahat barita i tu Jesus, nungnga mate be si Lasarus. Nang pe diboto Jesus nungnga mate ale-alena i, alai disi dope ibana tinggal saleleng dua ari nai. Dung pe i asa lao ibana tu Betani. Jadi dung sahat Jesus di Betani, nungnga opat ari si Lasarus mate. Lomo do roha ni Jesus mambahen mukjizat lao mangurupi akka ale-alena i jala lao pasangappon Debata.​—Joh. 11:4, 6, 11, 17.

11. Aha do na boi taparsiajari taringot na marale-ale sian na masa di Betani?

¹¹ Sian peristiwa na masa di Betani on, boi ma hita marsiajar taringot na marale-ale. Pikkirhon ma: Tikki disuru si Marta dohot si Maria halak paboahon barita tu Jesus, dang dipangido nasida asa ro Jesus tu Betani, holan paboahon na marsahit do si Lasarus ale-alena. (Joh. 11:3) Tikki mate si Lasarus, boi do sebenarna Jesus pahehehon ibana sian na dao. Alai ro do Jesus tu Betani asa boi mandongani ale-alena si Maria dohot si Marta. Adong do ale-alemuna na rade mangurupi hamu dang pola jolo dipangido? Molo adong, berarti ale-ale na boi diandalhon do ibana, na rade mangurupi hamu “tikki masa sitaonon”. (Poda 17:17) Tatiru ma Jesus, gabe ale-ale sisongon i ma hita tu na asing. Saonari tabahas ma muse na masa di Betani.

12. Aha do na dijanjihon Jesus tu si Marta, jala boasa boi pos roha ni si Marta tu janji i? (Johannes 11:23-26)

¹² Jaha Johannes 11:23-26. Dung diboto si Marta nga jonok be Jesus tu Betani, pittor didapotton ibana ma Jesus. Didok ibana ma, “Molo dison hian ho Tuan, dang mate ibotokki.” (Joh. 11:21) Sasittongna boi do dipamalum Jesus si Lasarus. Alai lomo do roha ni Jesus mangulahon lobi sian i. Didok ibana ma tu si Marta, “Mulak mangolu do muse ibotomi.” Dipapos Jesus do muse roha ni si Marta asa porsea tu janjina i. Didok ibana, “Au do haheheon dohot hangoluan.” Takkas ma nungnga dilehon Debata huaso tu Jesus lao pahehehon halak na mate. Sebelumna nungnga hea dipahehe Jesus dakdanak borua dang leleng dung mate dakdanak i. Hea do muse dipahehe Jesus  sahalak doli-doli na mate di sadari i. (Luk. 7:11-15; 8:49-55) Alai boi do Jesus pahehehon halak naung mate saleleng opat ari jala naung mulai busuk bakkena?

13. Songon na disurat di Johannes 11:32-35, songon dia do reaksi ni Jesus tikki diida ibana si Maria dohot na asing tangis? (Ida gambar.)

¹³ Jaha Johannes 11:32-35. Bayakkon ma aha na masa muse dukkon i. Ro ma si Maria, iboto ni si Lasarus na sada nai manjuppangi Jesus. Sarupa do hatana songon si Marta, didok ibana, “Molo dison hian ho Tuan, dang mate ibotokki.” Tung massai lungun do roha ni si Maria dohot akka halak na adong disi. Tikki dibege jala diida Jesus nasida tangis, gabe lungun ma rohana. Alani asi ni rohana tu akka ale-alena i, gabe tangis ma Jesus. Diboto ibana do songon dia haccitna molo mate halak na dihaholongi. Jadi, lomo hian do roha ni Jesus lao manalpuhon akka na mambahen nasida tangis!

14. Sian reaksi ni Jesus mangida si Maria tangis, aha do na boi taparsiajari taringot Jahowa?

¹⁴ Sian reaksi ni Jesus mangida si Maria tangis, taboto ma Debata parasi roha do Jahowa i. Boasa tadok songon i? Songon naung tabahas di artikel sebelumna, sempurna do Jesus maniru cara marpikkir dohot perasaan ni Bapakna. (Joh. 12:45) Jadi tikki tajaha dohot do Jesus tangis mangida akka donganna na berduka, boi do tasimpulhon songon i do tong perasaan ni Jahowa. Lungun do rohana mangida hita tangis alani sitaononta. (Ps. 56:8) Gabe tergerak ma rohatta lam jonok tu Jahowa Debata parasi roha.

15. Songon na disurat di Johannes 11:41-44, aha do na terjadi di kuburan ni si Lasarus? (Ida gambar.)

¹⁵ Jaha Johannes 11:41-44. Dung sahat Jesus di kuburan ni si Lasarus, dipangido ibana ma asa dipapinda batu na manutup kuburan i. Mulana dang setuju si Marta, ala didok rohana pasti nungnga bau i. Alai didok Jesus ma, “Dang naung hudok tu ho, molo porsea ho idaonmu ma hasangapon ni Debata?” (Joh. 11:39, 40) Dung i, diida Jesus ma doppak ginjang jala martangiang ma ibana di jolo ni natorop. Lomo do rohana asa dipasangap Debata Jahowa alani na lao bahenonna. Dung i gogo ma didok Jesus, “Lasarus, kaluar ma ho!” Gabe  kaluar ma si Lasarus sian kuburan i. Menurut piga-piga halak, dang mungkin terjadi na dibahen Jesus on.​—Ida Johannes 11:17 di Alkitab Edisi Pelajaran Bahasa Indonesia.

16. Songon dia do peristiwa na disurat di Johannes bindu 11 patoguhon haporseaotta tu janji taringot haheheon?

¹⁶ Peristiwa na disurat di Johannes bindu 11 patoguhon haporseaotta tu janji taringot haheheon. Taingot ma muse janji ni Jesus tu si Marta, “Mulak mangolu do muse ibotomi.” (Joh. 11:23) Songon Bapakna, lomo do roha ni Jesus jala sanggup do ibana menepati janjina i. Tikki tangis Jesus tarida ma na massai lomo do rohana pahehehon halak na mate jala manalpuhon lungun ni roha na dihilala akka halak alani hamatean. Jala tikki kaluar si Lasarus sian kuburan, on patuduhon sanggup do Jesus pahehehon halak na mate. Pikkirhon ma muse sipaingot ni Jesus tu si Marta, “Dang naung hudok tu ho, molo porsea ho idaonmu ma hasangapon ni Debata?” (Joh. 11:40) Godang do alasanta boi porsea na lao pasautton ni Jahowa do janjina lao pahehehon halak na mate. Attong boha do carana asa lam nyata harapan i di hita?

17. Tikki tajaha taringot haheheon na disurat di Bibel, aha do na porlu taingot jala tarimangi?

¹⁷ Jaha jala rimangi ma haheheon na hea masa. Di Bibel adong do dipaboa peristiwa taringot haheheon ni halak na mate. c Manat ma parsiajari hamu i jala ingot ma peristiwa nyata do i. Lului hamu ma parsiajaranna. Rimangi ma songon dia i patuduhon na lomo do roha ni Debata pahehehon halak na mate jala sanggup do Ibana mangulahon i. Asing ni i na paling penting, rimangi ma muse taringot haheheon ni Jesus. Ingot ma godang do saksi mata na mangida tikki Jesus dipahehe, jala on mambahen lam pos rohatta tu janji taringot haheheon.​—1 Kor. 15:3-6, 20-22.

18. Songon dia do carana memanfaatton akka ende na paboahon janji taringot haheheon? (Ida surat na di toru.)

 ¹⁸ Tangihon, endehon, jala ingot ma akka ende na paboahon janji taringot haheheon. d (Eps. 5:19) Akka ende i mambahen lam nyata janji ni Debata taringot haheheon di hita jala patoguhon haporseaotta tu harapan na massai arga on. Tangihon ma akka ende i, marlatik ma hamu mangendehon i, jala bahas ma makna ni lirikna tikki ibadat keluarga hamu. Ingot ma lirikna jala rimangi ma songon dia i boi patoguhon haporseaonmuna. Hasilna, molo masa situasi na mengancam ngolumuna manang molo mate halak na dihaholongi hamu, boi ma tondi parbadia ni Jahowa mangurupi hamu mangingot akka ende i, asa dipatogu jala tarapul rohamuna.

19. Aha do na boi tabayakkon taringot haheheon? (Ida kotak “ Aha do na lao Sukkunonmuna tu Nasida?”)

¹⁹ Bayakkon ma dirimuna di tano na imbaru. Dilehon Jahowa do tu hita kesanggupan lao mambayakkon diritta adong di tano na imbaru. Sahalak donganta borua paboahon, “Hubahen do tikki lao mambayakkon dirikku adong di tano na imbaru. Sappe hira na boi ma huanggo angur ni bunga mawar disi.” Bayakkon ma muse tikki pajuppang hamu tu akka bawa dohot borua na setia na disurat di Bibel. Tu ise do hamu naeng pajuppang? Aha do na lao sukkunonmuna tu nasida? Bayakkon ma muse tikki pajuppang hamu dohot halak na dihaholongi hamu dung hehe nasida. Bayakkon ma aha do na parjolo sahali dohononmuna tu nasida. Bayakkon ma hamu makkaol nasida jala songon dia las ni rohamuna tikki pajuppang dohot nasida.

20. Aha do na gabe tekadta?

²⁰ Mandok mauliate do hita tu Jahowa alani janji taringot haheheon! Pos do rohatta pasti saut do janjina i alana lomo do roha ni Jahowa jala sanggup do Ibana mangulahon i. Alani i bertekad ma hita asa torus patoguhon haporseaotta tu harapan na massai arga on. Molo taulahon i, gabe lam jonok ma hita tu Debata na marjanji tu hita, ‘Mulak mangolu do muse halak na dihaholongi hamu!’