1-2. Aha do na porlu taulahon huhut paimahon tano na imbaru?

 MASSAI arga do janji ni Jahowa di hita, i ma janji lao manggattihon portibi na dirajai Sibolis on gabe tano na imbaru. (2 Ptr. 3:13) Nang pe dang taboto andigan i saut, alai akka na masa di portibi on patuduhon saut nama i satokkin nai.​—Mat. 24:32-34, 36; Ul. 1:7.

² Dang soal sadia leleng hita di hasittongan, porlu do tapatogu haporseaotta tu janji i. Boasa? Alana haporseaon na togu pe boi do gabe gale. Didok Apostel Paulus haporseaon na gale, ‘dosa na boi mangabbati hita’ do i. (Heb. 12:1) Asa unang gale haporseaotta, porlu do taratur hita mangarimangi akka bukti na paposson rohatta na lao saut do tano na imbaru i.​—Heb. 11:1.

3. Aha do na lao tabahas di artikel on?

³ Di artikel on, lao tabahas ma tolu cara asa boi hita patoguhon haporseaotta tu janji taringot tano na imbaru: (1) mangarimangi tobusan, (2) mangarimangi huaso ni Jahowa, dohot (3) mangulahon akka ulaon na mambahen hita jonok tu Jahowa. Tabahas ma muse songon dia hata ni Jahowa tu si Habakuk patoguhon haporseaotta saonari. Parjolo, tabahas ma jo piga-piga situasi na mungkin taadopi saonari. Tikki mangadopi situasi i, porlu do togu haporseaotta tu janji taringot tano na imbaru.

 PATUDUHON HAPORSEAON NA TOGU

4. Boasa ikkon togu haporseaotta tikki mambahen keputusan?

⁴ Ikkon togu do haporseaotta tikki mambahen keputusan ganup ari. Misalna tikki mamillit dongan, hiburan, pendidikan, parkarejoan, pasangan, manang mamutusson lao marianakkon do hita manang na dang. Denggan do molo tasukkun diritta: ‘Sian pilihan na hubahen, hupatudu do na parsatokkinan portibi saonari on jala lao ro ma tano na imbaru manggattihon i? Manang sarupa do pilihan na hubahen songon pilihan ni akka halak na so porsea tu hangoluan salelengna?’ (Mat. 6:19, 20; Luk. 12:16-21) Molo togu haporseaotta tu tano na imbaru, gabe tabahen ma keputusan na terbaik.

5-6. Boasa ikkon togu haporseaotta tikki masa sitaonon? Paboa ma ilustrasina.

⁵ Ikkon togu do muse haporseaotta tikki masa sitaonon di ngolutta. Olo do dianiaya hita, marsahit na parah, manang mangadopi situasi na asing na mambahen hita kecil hati. Di mulana olo do tahilala sanggup do hita martahan mangadopi sitaonon i. Alai molo jotjot jala leleng masa sitaonon i, porlu do haporseaon na togu asa boi hita martahan jala torus marlas ni roha manomba Jahowa.​—Rom 12:12; 1 Ptr. 1:6, 7.

⁶ Tikki masa sitaonon, bisa jadi hita merasa dang lao saut be janji ni Jahowa taringot tano na imbaru. Molo tubu perasaan sisongon i, na gale do haporseaotta? Belum tentu. Parrohahon ma ilustrasi on. Molo torus ro udan saleleng piga-piga minggu, olo do hita merasa dang na lao las be ari. Alai faktana pasti las do muse ari. Dos songon i ma tikki merasa kecil hati hita alani sitaonon, mungkin tahilala dang lao ro be tano na imbaru i. Alai molo togu haporseaotta, taboto do na lao saut janji ni Debata i. (Ps. 94:3, 14, 15; Heb. 6:17-19) Molo songon i haporseaotta, pasti tabahen do ulaon manomba Jahowa na uppetting di ngolutta.

7. Cara marpikkir sisongon dia do na ikkon tahindari?

⁷ Porlu do muse haporseaon na togu tikki marbarita na uli. Alana godang do halak na merasa “barita na uli” taringot tano na imbaru dang mungkin terjadi. (Mat. 24:14; Hes. 33:32) Ikkon hati-hati do hita asa unang cara marpikkir sisongon i mambahen hita ragu tu na diajarhon Jahowa. Jadi porlu do tapatogu haporseaotta. Tabahas ma tolu carana.

MANGARIMANGI TOBUSAN

8-9. Aha do manfaatna molo tarimangi tobusan?

⁸ Sada cara lao patoguhon haporseaotta i ma mangarimangi tobusan. Tobusan gabe jaminan pasti saut do akka janji ni Debata. Tarimangi ma boasa porlu diparade tobusan jala songon dia pengorbanan ni Jahowa lao paradehon i. Hasilna, gabe dipatogu ma haporseaotta na lao saut do janji ni Debata taringot hangoluan salelengna di tano na imbaru. Boasa boi tadok songon i?

⁹ Aha do na dibahen Jahowa lao paradehon tobusan? Disuru Jahowa ma Anak haholonganna i ma Jesus tu tano on gabe jolma na sempurna. Tikki di tano on Jesus, toktong do ibana setia nang pe godang sitaonon. Susa do dihilala ibana jala haccit do parmatena. Massai arga do tobusan i dibayar Jahowa! Dang mungkin Debata parholong paloasson Anakna i marsitaonon jala mate hape holan satokkin do tahilala ngolu na dumenggan. (Joh. 3:16; 1 Ptr. 1:18, 19) Ala dilehon Jahowa Anak haholonganna i manobus hita, pos ma rohatta boi do hita mangolu saleleng ni lelengna di tano na imbaru.

 MANGARIMANGI HUASO NI JAHOWA

10. Sesuai tu Epesus 3:20, aha do na sanggup dibahen Jahowa?

¹⁰ Cara na paduahon lao patoguhon haporseaotta, i ma mangarimangi huaso ni Jahowa. Sanggup do Jahowa pasautton sude janjina. Memang godang do halak na merasa dang mungkin hita mangolu salelengna di tano na imbaru. Alai jotjot do Jahowa manjanjihon akka na so mungkin diulahon jolma. Boi do diulahon Ibana i alana Debata Pargogo na so Hatudosan do Ibana. (Job 42:2; Mrk. 10:27) Jadi dang pola longang rohatta tikki dibahen Ibana janji na luar biasa tu hita.​—Jaha Epesus 3:20.

11. Paboa ma akka janji ni Debata na luar biasa. (Ida kotak “ Akka Janji ni Jahowa na Luar Biasa na Digenapi.”)

¹¹ Pikkirhon ma piga-piga janji ni Jahowa tu naposona najolo na hira na so mungkin terjadi. Misalna didok Jahowa do tu si Abraham dohot si Sara na lao marianakkon nasida nang pe nungnga matua. (1 Mus. 17:15-17) Didok Ibana do muse tu si Abraham, pinopparna do annon na lao mewarisi tano Kanaan. Hira na so mungkin do i terjadi alana saleleng martaon-taon pinoppar ni si Abraham, i ma halak Israel gabe hatoban di Mesir. Alai tutu do saut janjina i. Belakangan, dipaboa Jahowa do tu si Elisabet na lao marianakkon ibana nang pe nungnga matua. Dipaboa Jahowa do muse tu si Maria sahalak perawan, na lao ditubuhon ibana Anak ni Debata. Jala marhite Anakna i ma pasautton ni Jahowa janjina marribu taon naung salpu di Taman Eden!​—1 Mus. 3:15.

12. Songon dia do Josua 23:14 dohot Jesaya 55:10, 11 paposson rohatta tu huaso ni Jahowa?

¹² Molo tarimangi sude janji ni Jahowa jala songon dia Ibana pasautton i, gabe taattusi ma Debata na marhuaso do Ibana. Gabe lam togu ma haporseaotta tu janjina taringot tano na imbaru. (Jaha Josua 23:14; Jesaya 55:10, 11.) Haporseaotta i mambahen hita lam denggan paposson roha ni akka halak pasti saut do tano na imbaru i, dang holan nipi i. Tikki paboahon janji taringot tano na imbaru dohot langit na imbaru didok Jahowa do, “Sittong jala boi do dihaporseai akka hata on.”​—Pgk. 21:1, 5.

MANGULAHON AKKA ULAON NA MAMBAHEN HITA JONOK TU JAHOWA

13. Boasa parpunguan boi patoguhon haporseaotta?

¹³ Cara na asing lao patoguhon haporseaotta, i ma paradehon tikki mangulahon akka ulaon na mambahen hita jonok tu Jahowa. Misalna taida ma aha do manfaatna molo ro hita tu parpunguan. Si Anna, naung marpulu taon di dinas sepenuh waktu khusus mandok, “Parpunguan mambahen lam togu haporseaokku. Nang pe dang pola malo sahalak donganta marjamita manang dang dipaboa ibana sada hal na baru, alai denggan do huparrohahon jamitana i. Alana boi do i mangurupi au asa lam denggan pangattusionku taringot isi ni Bibel jala patoguhon haporseaokku.” b Dipatogu do muse rohatta tikki tatangihon komentar ni akka dongan di parpunguan.​—Rom 1:11, 12; 10:17.

14. Boasa ulaon marbarita boi patoguhon haporseaotta?

¹⁴ Dipatogu do muse haporseaotta molo dohot hita tu ulaon marbarita. (Heb. 10:23) Si Barbara naung 70 taon lobi melayani Jahowa mandok, “Sai dipatogu do haporseaokku molo marbarita na uli au. Lam jotjot hupaboa tu na asing taringot janji ni Jahowa na luar biasa, gabe lam togu ma haporseaokku.”

15. Boasa pelajaran pribadi boi patoguhon haporseaotta? (Ida gambar.)

 ¹⁵ Adong dope ulaon na asing na boi patoguhon haporseaotta, i ma pelajaran pribadi. Donganta si Susan paboahon godang do manfaat na dihilala ibana ala mambahen jadwal lao belajar pribadi. Didok ibana, “Di ari Minggu, hupersiappon ma artikel Joujou Paboahon na lao dibahas di minggu berikutna. Di ari Senin dohot Selasa huparade ma bahan tu parpunguan parsitongaan ni minggu. Di akka ari na asing, adong do proyek na hubahen di pelajaran pribadikku.” Ala torus diihutton ibana jadwal i, gabe lam togu ma haporseaon ni si Susan. Si Irene naung marpulu taon melayani di kantor pusat paboahon, lam togu do haporseaonna ala mamparsiajari surirang ni Bibel. Didok ibana, “Longang do rohakku dung mamboto digenapi Jahowa do surirangna secara terperinci.” c

“PASTI DO SAUT I”

16. Boasa marlakku dope tu hita saonari hata ni Jahowa tu si Habakuk? (Heber 10:36, 37)

¹⁶ Adong do piga-piga naposo ni Jahowa naung leleng paima-imahon ujung ni portibi na jahat on. Sian pandangan ni jolma, leleng nai dope ari ni Jahowa i. Diboto Jahowa do songon dia perasaan ni akka naposona. I do alana dipapos Ibana roha ni Panurirang Habakuk jala didok, “Ai na lao saut do parnidaan i di tikki naung ditottuhon, na lao tibu nama i masa, jala sittong do parnidaan i. Ai molo pe tarlambat i masa, toktong ma pos roham paimahon i! Ai pasti do saut i. Jala dang na lao tarlambat.” (Hab. 2:3) Holan tu si Habakuk do dipaboa Debata janji on? Manang marlakku do tong janji on tu hita saonari? Marhite panogu-noguon ni tondi parbadia, disuratton Apostel Paulus do muse hata on tu halak Kristen na tarpaima tu tano na imbaru. (Jaha Heber 10:36, 37.) Pos ma rohatta nang pe hira na leleng dope ari ni Jahowa i, “pasti do saut i jala dang na lao tarlambat”.

17. Songon dia do sahalak donganta borua mangulahon nasehat ni Jahowa tu si Habakuk?

 ¹⁷ Godang do akka donganta na menerappon nasehat asa ‘toktong sabar paimahon’ ari ni Jahowa. Bahkan adong do naung marpulu taon paimahon i. Misalna, si Louise na gabe Saksi Jahowa sian taon 1939 mandok, “Hea do au marpikkir nungnga ro be Armagedon sebelum tamat SMA au. Alai dang songon i na masa. Saleleng martaon-taon hujaha ma akka contoh di Bibel songon si Noak, si Abraham, si Josep, dohot akka halak na asing na toktong paimahon saut janji ni Jahowa. Godang do manfaat na hudapot dung manjaha akka contoh i. Gabe pos ma rohakku dohot akka dongan pasti saut do tano na imbaru i satokkin nai.” Godang do akka donganta naung leleng manomba Jahowa setuju tu hata ni si Louise on!

18. Boasa mengamati akka toppaan boi patoguhon haporseaotta tu tano na imbaru?

¹⁸ Memang dang ro dope tano na imbaru i. Alai taparrohahon ma akka na adong di sakalilingta, misalna akka bintang, hau, binatang, dohot jolma. Nang pe sebelumna dang adong akka toppaan i, alai pos do rohatta nyata do i sude, ala Jahowa na manoppa i. (1 Mus. 1:1, 26, 27) Dos songon i ma, nungnga marjanji Jahowa lao mambahen tano na imbaru. Pasti pasautonna do i. Di tano na imbaru, sempurna ma sude jolma, sehat, jala mangolu saleleng ni lelengna. Pos ma rohatta, pasti saut do tano na imbaru i di tikki naung ditottuhon Debata.​—Jes. 65:17; Pgk. 21:3, 4.

19. Songon dia do caramuna patoguhon haporseaon?

¹⁹ Sambil paimahon i, pakke hamu ma sude kesempatan na adong lao patoguhon haporseaonmuna. Pabagas ma pangargaionmuna tu tobusan. Rimangi ma huaso ni Jahowa. Jala ulahon ma akka ulaon na mambahen hamu jonok tu Jahowa. Molo diulahon hamu songon i, termasuk ma hamu ‘akka halak na porsea jala na sabar, na manjalo akka na dijanjihon Debata’.​—Heb. 6:11, 12; Rom 5:5.