1. Aha do na tahaporseai?

 ALA NAPOSO ni Jahowa hita, porsea do hita na holong roha ni Jahowa tu hita, jala lomo rohana asa marlas ni roha hita. (Rom 8:35-39) Pos do muse rohatta molo taulahon prinsip ni Bibel, pasti parohon manfaat do i. (Jes. 48:17, 18) Alai songon dia do reaksitta molo masa sitaonon na so tarduga?

2. Sitaonon aha do na mungkin taadopi, jala sukkun-sukkun aha do na ro tu rohatta?

² Sude do sisomba Jahowa mangadopi sitaonon. Olo do adong anggota keluarga na mambahen hita kecewa. Adong muse na mangadopi masalah kesehatan na serius na boi mambatasi hita manomba Jahowa. Na asing mangadopi sitaonon alani bencana alam manang dianiaya alani haporseaon. Tikki mangadopi sitaonon sisongon i, sukkun-sukkun do ra rohatta, ‘Boasa masa on tu au? Na adong do na sala huulahon? Na so dipasu-pasu Jahowa be au?’ Hea do dihilala hamu songon i? Molo hea, unang pola metmet rohamuna. Godang do sisomba Jahowa na setia na makkilala sisongon i.​—Ps. 22:1, 2; Hab. 1:2, 3.

3. Aha do na boi taparsiajari sian Psalmen 34:19?

³ Jaha Psalmen 34:19. Taparrohahon ma dua parsiajaran penting na disurat di ayat on: (1) Godang do hasusaan di halak  na tigor marroha. (2) Paluaon ni Jahowa do hita sian sitaononta. Songon dia do Jahowa paluahon hita? Sada carana i ma mangurupi hita asa seimbang mangida parngoluotta di portibi saonari on. Marjanji do Jahowa molo tasomba Ibana tahilala ma las ni roha, alai dang dijanjihon Ibana na bebas hita sian sitaonon di ngolutta saonari. (Jes. 66:14) Dilehon Jahowa do tu hita harapan lao mangolu salelengna di ari na naeng ro, jala lomo do rohana asa berfokus hita tu harapan i. (2 Kor. 4:16-18) Sambil paimahon i, diurupi Ibana do hita asa torus setia manomba Ibana ganup ari.​—And. 3:22-24.

4. Aha do na lao tabahas di artikel on?

⁴ Di artikel on, tabahas ma akka pengalaman ni naposo ni Jahowa na disurat di Bibel dohot di jamanta saonari. Songon nasida, olo do masa tu hita sitaonon na so tarduga. Alai molo taandalhon Jahowa, sai urupanna do hita. (Ps. 55:22) Tikki mambahas akka pengalaman i tasukkun ma diritta, ‘Songon dia do reaksikku molo masa situasi na sarupa? Songon dia pengalaman ni nasida patoguhon haporseaokku tu Jahowa? Parsiajaran aha do na boi huterappon di ngolukku?’

5. Sitaonon aha do na diadopi si Jakkob alani pambahenan ni si Laban? (Ida gambar sampul.)

⁵ Akka naposo ni Jahowa na disurat di Bibel mangadopi sitaonon na so tarduga. Contohna si Jakkob. Disuru bapakna do ibana lao mambuat istri sian boru ni si Laban, keluargana na manomba Debata. Jala dipapos bapakna do si Jakkob pasti pasu-pasuon ni Jahowa do ibana. (1 Mus. 28:1-4) Jadi diulahon si Jakkob ma i. Borhat ma ibana sian tano Kanaan lao tu huta ni si Laban. Adong dua boru ni si Laban, i ma si Lea dohot si Rahel. Holong do roha ni si Jakkob tu si Rahel boru ni si Laban na upposo. Jala setuju do ibana karejo pitu taon tu si Laban asa boi si Rahel gabe istrina. (1 Mus. 29:18) Alai dang mardalan rencana i songon na diharappon si Jakkob. Ditipu si Laban do ibana, dilehon si Laban do si Lea gabe istri ni si Jakkob. Memang saminggu dukkon i, dilehon ibana do si Rahel gabe istri ni si Jakkob. Alai ikkon karejo do muse si Jakkob tu si Laban pitu taon nai. (1 Mus. 29:25-27) Saleleng 20 taon si Jakkob karejo tu si Laban, dang denggan pambahenanna tu si Jakkob.​—1 Mus. 31:41, 42.

6. Aha dope sitaonon na asing na masa tu si Jakkob?

⁶ Adong do muse sitaonon na masa tu si Jakkob. Godang do anakna, alai dang boi nasida marsada ni roha. Bahkan digadis nasida do si Josep gabe hatoban. Molo si Simeon dohot si Lepi, gabe marlea do goar ni keluargana dohot goar ni Jahowa dibahen nasida. Asing ni i, mate do si Rahel istri na dihaholongi si Jakkob tikki manubuhon anakna na paduahon. Jala alani kelaparan na massai parah, ikkon pinda do si Jakkob tu Mesir dung matua ibana.​—1 Mus. 34:30; 35:16-19; 37:28; 45:9-11, 28.

7. Songon dia do Jahowa patuduhon na lomo rohana tu si Jakkob?

⁷ Nang pe masa sude sitaonon i, dang gabe gale haporseaon ni si Jakkob tu Jahowa dohot tu janjina. Jala dipatudu Jahowa do na lomo rohana tu si Jakkob. Misalna nang pe dioto-otoi si Laban ibana, dilehon Jahowa do godang arta tu si Jakkob. Pikkirhon ma songon dia las ni roha ni si Jakkob boi pajuppang muse dohot anakna si Josep, na dirippu ibana nungnga mate. Pasti mandok mauliate do ibana tu Jahowa alani i! Boi do marhasil si Jakkob mangadopi sitaonon ala jonok hubunganna tu Jahowa. (1 Mus. 30:43; 32:9, 10; 46:28-30) Takkas ma, molo jonok  hubungatta tu Jahowa, boi do hita marhasil mangadopi sitaonon na so tarduga.

8. Aha do na naeng diulahon Raja Daud?

⁸ Dang boi diulahon Raja Daud sude lomo ni rohana lao manomba Jahowa. Misalna lomo do roha ni si Daud lao mambangun bagas joro tu Debata. Dipaboa ibana ma keinginanna i tu Panurirang Natan. Dialusi Panurirang Natan ma ibana, “Bahen ma na denggan di roham. Ai didongani Debata na sittong do ho.” (1 Kron. 17:1, 2) Boi ma tabayakkon pasti gabe semangat do si Daud dung mambege hata i. Mungkin pittor dibahen ibana ma rencana lao mambangun proyek na balga i.

9. Songon dia do reaksi ni si Daud tikki mambege barita na so sesuai tu lomo ni rohana?

⁹ Dang leleng dukkon i, mulak ma muse Panurirang Natan pasahatton barita na so sesuai tu lomo ni rohana. “Di borngin i”, didok Jahowa do tu Panurirang Natan dang si Daud na lao mambangun bagas joro i, alai sada sian anakna do na lao mambangun i. (1 Kron. 17:3, 4, 11, 12) Songon dia do reaksi ni si Daud tikki mambege barita i? Disesuaihon ibana ma tujuanna. Berfokus ma ibana papunguhon hepeng dohot akka bahan na dihaporluhon anakna si Salomo annon lao mambangun bagas joro.—1 Kron. 29:1-5.

10. Songon dia do Jahowa mangalehon pasu-pasu tu si Daud?

¹⁰ Dukkon dipaboa tu si Daud na so ibana mambangun bagas joro i, dibahen Jahowa ma parjanjian tu ibana. Marjanji do Jahowa tu si Daud sada sian pinopparna ma annon na lao mamaretta saleleng ni lelengna. (2 Sam. 7:16) Di tano na imbaru, Jesus pinoppar ni si Daud do na gabe Raja di Pamarettaon Saribu Taon. Bayakkon ma songon dia las ni roha ni si Daud mamboto i annon! Sian on marsiajar ma hita molo tung pe dang boi taulahon sude na tahalomohon lao manomba Jahowa, dilehon Jahowa do tu hita pasu-pasu na asing na so hea tapikkirhon.

11. Songon dia do Jahowa mangalehon pasu-pasu tu halak Kristen di abad na parjolo? (Ulaon ni Apostel 6:7)

¹¹ Masa do muse sitaonon na so tarduga tu halak Kristen di abad na parjolo. Misalna berharap do nasida asa ro Harajaon ni Debata, nang pe dang diboto nasida andigan i masa. (Ul. 1:6, 7) Aha ma na diulahon nasida? Toktong do nasida sibuk marbarita na uli tu godang inganan jala diida nasida do songon dia Jahowa mamasu-masu ulaon ni nasida.​—Jaha Ulaon ni Apostel 6:7.

12. Aha do na diulahon halak Kristen di abad na parjolo nang pe masa haraparon?

¹² Di sada tikki, masa ma haraparon “di liat portibi on”. (Ul. 11:28) Bayakkon ma dampak ni haraparon i tu halak Kristen di abad na parjolo. Pasti khawatir do akka kepala keluarga songon dia nasida paradehon kebutuhan ni keluargana. Boha do molo akka na poso na berencana mangalehon godang tikki lao marbarita? Gabe tarpikkir do ra nasida menunda rencanana i. Alai dang soal songon dia situasina, boi do halak Kristen di abad na parjolo i menyesuaihon diri. Torus do nasida marbarita na uli sesuai tu kesanggupan ni nasida, jala las do roha ni nasida mangalehon bantuan tu akka dongan sahaporseaon na di Judea.​—Ul. 11:29, 30.

13. Pasu-pasu aha do na dihilala halak Kristen di abad na parjolo saleleng masa haraparon i?

¹³ Pasu-pasu aha do na dihilala halak Kristen di abad na parjolo saleleng masa haraparon i? Akka dongan na manjalo bantuan, boi do diida nasida na diurupi Jahowa do nasida. (Mat. 6:31-33) Gabe lam jonok ma nasida tu akka dongan sahaporseaon na mangalehon bantuan tu nasida. Asing ni i, akka dongan na  menyumbang dohot na mangurupi marhite cara na asing pe marlas ni roha ala boi dohot mangalehon. (Ul. 20:35) Dipasu-pasu Jahowa do nasida sude ala boi menyesuaihon diri tu situasi na berubah i.

14. Aha do na masa tu si Barnabas dohot Apostel Paulus, alai songon dia do hasilna? (Ulaon ni Apostel 14:21, 22)

¹⁴ Jotjot do halak Kristen di abad na parjolo dianiaya, sipata masa do i di na so panagaman ni nasida. Parrohahon ma na masa tu si Barnabas dohot Apostel Paulus tikki marbarita na uli nasida di Listra. Mulana disambut akka halak na olo manangihon do nasida, alai ro ma akka halak na marsogo ni roha. “Dihasut nasida ma akka jolma” i, jala didangguri nasida ma Apostel Paulus. Dung i ditinggalhon ma ibana ala dirippu nungnga mate. (Ul. 14:19) Alai nang pe songon i, torus do marbarita na uli si Barnabas dohot si Paulus didia pe nasida tinggal. Hasilna, “godang ma na gabe sisean” jala lam togu do haporseaon ni akka dongan alani hata dohot tindakan ni nasida. (Jaha Ulaon ni Apostel 14:21, 22.) Godang do manfaatna ala torus si Barnabas dohot si Paulus marbarita na uli nang pe dianiaya nasida. Dos songon i ma, molo torus hita mangulahon akka na dipangido Jahowa, pasti dipasu-pasu Ibana do hita.

15. Aha do na boi taparsiajari sian donganta si A. H. Macmillan?

¹⁵ Sebelum taon 1914, berharap do akka naposo ni Jahowa saut na dihalomohon rohana. Parrohahon ma pengalaman ni donganta si A. H. Macmillan. Sarupa songon akka dongan di tikki i, berharap do donganta Macmillan asa mandapot upa lao mangolu di surgo satokkin nai. Alani i di jamitana di bulan September 1914 didok ibana, “Mungkin on ma jamitakku na parpudi.” Hape dang i jamitana na parpudi. Di pudian ni ari didok donganta si Macmillan ma di suratna, “Mungkin piga-piga sian hita pahatophu do menyimpulhon lao mangolu tu surgo. Hape adong dope ulaon na paling penting na ikkon taulahon, i ma sibuk di ulaon ni Tuan.” Jala i do na torus diulahon si Macmillan. Semangat do ibana marbarita na uli jala dipatogu ibana do akka dongan na dipenjara ala toktong netral. Torus do ro ibana tu parpunguan nang pe nungnga matua ibana. Aha do manfaatna ala toktong sibuk ibana sambil paimahon upana? Dang leleng sebelum mate ibana taon 1966, disurat ibana ma, “Toktong do togu haporseaokku sahat tu sadarion.” Sitiruon na denggan do on tu hita asa toktong martahan nang pe dang pittor sae sitaononta songon na taharappon.​—Heb. 13:7.

16. Aha do tantangan na so tarduga na masa tu donganta si Herbert Jennings dohot istrina? (Jakobus 4:14)

¹⁶ Godang do naposo ni Jahowa na berjuang mangadopi masalah kesehatan na so tarduga. Misalna parrohahon ma pengalaman ni donganta si Herbert Jennings. b Di kisah hidupna dipaboa do songon dia ibana dohot istrina menikmati tugas gabe misionaris di Ghana. Alai di pudian ni ari, marsahit gangguan mental na parah do ibana. Dipaboa donganta si Jennings do situasina songon na disurat di Jakobus 4:14 na mandok, “Dang diboto hamu songon dia ngolumuna sogot.” (Jaha.) Didok ibana do di kisah hidupna i, “Ikkon masuk akkal do hami, jadi ditinggalhon hami ma Ghana dohot akka dongannami disi. Mulak ma hami tu Kanada [asa boi hami marubat].” Diurupi Jahowa do donganta si Jennings dohot istrina asa torus setia melayani Jahowa nang pe mangadopi sitaonon.

17. Songon dia do pengalaman ni donganta si Jennings patoguhon akka dongan na asing?

 ¹⁷ Balga do pengaruh ni pengalaman ni donganta si Jennings on tu donganta na asing. Sahalak donganta borua manurat, “Hona do tu rohakku tikki hujaha kisah hidup ni donganta si Jennings on. . . . Ikkon ditinggalhon ibana do tugasna asa boi marubat. On mangurupi au asa seimbang mangida situasikku.” Sahalak donganta bawa manurat, “Dung sappulu taon au gabe sintua, ikkon hulepas do tanggung jawabhu ala marsahit mental do au. Sering do au merasa gagal jala gabe tertekan tikki manjaha artikel kisah hidup. . . . Alai dung hujaha kisah hidup ni donganta si Jennings gabe terhibur ma au.” Gabe sipaingot do on tu hita, nang pe taadopi situasi na so tarduga boi do hita patoguhon na asing. Boi do hita gabe sitiruon alani haporseaon dohot ketekunanta.​—1 Ptr. 5:9.

18. Songon na di gambar, aha do na boi taparsiajari sian pengalaman ni sahalak ina na mabalu di Nigeria?

¹⁸ Godang do donganta na hona dampak ni pandemi COVID-19. Misalna parrohahon ma pengalaman ni sahalak ina na mabalu na tinggal di Nigeria. Otik do hepengna dohot sipanganonna. Di tikki manogot, disukkun boruna ma aha do annon allangon ni nasida molo nungnga diloppa boras na satakkar on. Didok donganta i ma tu boruna, ikkon ditiru nasida do ina na mabalu na sian Sarpat. Diloppa nasida ma boras na parpudi i jala ikkon porsea do nasida tu Jahowa. (1 Raj. 17:8-16) Sebelum dipikkiri nasida siallangon ni nasida tu arian, nga dijalo nasida be paket bantuan sian akka dongan sahaporseaon. Paket i marisi sipanganon na cukkup allangon ni nasida lobi dua minggu. Didok donganta i ma, dang dirippu ibana na dibege Jahowa do hatana tu boruna i. Jadi nang pe masa situasi na so tarduga, molo porsea hita tu Jahowa, boi do i mambahen hita lam jonok tu Ibana.​—1 Ptr. 5:6, 7.

19. Penganiayaan aha do na masa tu si Aleksey Yershov?

¹⁹ Di piga-piga taon na parpudi on, godang  do akka dongan na toktong setia nang pe masa penganiayaan na so tarduga. Parrohahon ma pengalaman ni donganta si Aleksey Yershov na tinggal di Rusia. Tikki tardidi donganta si Yershov tahun 1994, bebas do naposo ni Jahowa beribadat di negara i. Alai belakangan on muba ma situasi di Rusia. Di taon 2020, digerebek ma jabu ni si Yershov jala godang do barangna disita. Piga-piga bulan dukkon i, ditudu ma ibana sahalak kriminal. Asa lam borat hukumanna, ditudu ma ibana berdasarkan video rekaman na dibahen sasahalak na pura-pura berminat marsiajar Bibel saleleng sataon lobi. Massai jahat do pambahenan ni nasida i!

20. Songon dia do donganta si Yershov patoguhon hubunganna tu Jahowa?

²⁰ Aha do pengaruh ni penganiayaan i tu si Yershov? Gabe lam togu ma hubunganna tu Jahowa. Didok ibana, “Gabe lam jotjot ma au martangiang rap dohot istrikku. Husadari ma dang sanggup au mangadopi sitaonon on molo dang diurupi Jahowa. Parsiajaran pribadi mangurupi au asa unang marmetmet ni roha. Hurimangi do muse teladan ni naposo ni Debata na setia di tikki na salpu. Godang kisah na disurat di Bibel na menyoroti penting do asa toktong tenang jala patuduhon haporseaon tu Jahowa.”

21. Aha do naung taparsiajari di artikel on?

²¹ Aha do naung taparsiajari di artikel on? Olo do masa sitaonon na so tarduga di ngolutta saonari. Nang pe songon i, molo porsea hita tu Jahowa pasti urupanna do hita. Songon na didok di ayat tema ni artikel on, “Godang do hasusaan ni halak na tigor marroha, alai paluaon ni Jahowa do ibana sian i sude.” (Ps. 34:19) Anggiat ma torus hita berfokus tu cara ni Jahowa mangurupi hita, dang tu sitaonon na taadopi. Dung i boi ma tahilala hata ni si Paulus na mandok, “Margogo do au di sude na masa, ala dilehon Debata do huaso tu au.”​—Plp. 4:13.