1. Aha do akibatna molo metmet rohatta?

 GANUP ari do adong masalahta. Jala berjuang do hita pasaehon i. Boi do lam maol hita pasaehon masalah i molo metmet rohatta. Dang taharappon metmet rohatta. Alana dos songon panakko do i, na mambuat las ni rohatta dohot pos ni rohatta. Jala boi do i mambahen hita merasa dang mararga be diritta. Poda 24:10 mandok, “Molo [metmet] roham di ari hagogotan, lam moru ma gogom.” Metmet ni roha i mambahen hita gale jala dang margogo pasaehon akka masalahta.

2. Aha do na mambahen hita marmetmet ni roha, jala aha do na lao taparsiajari di artikel on?

² Boi do gabe metmet rohatta ala marpikkiran negatif hita tu diritta sandiri, sai mangingot-ingot hasalaatta, manang alani parsahiton. Boi do muse gabe metmet rohatta ala dang dapotta dope tugas na taharappon manang ala dang denggan tanggapan ni akka halak di inganatta marbarita. Di artikel on lao taparsiajari ma aha na mangurupi hita asa unang torus marmetmet ni roha.

3. Aha do na boi mangurupi hita molo marpikkiran negatif hita tu diritta sandiri?

³ Mura do hita marpikkiran negatif tu diritta sandiri jala sai mangingot akka hasalaatta di tikki naung salpu. Alani i, olo do ninna rohatta dang lomo be roha ni Jahowa hita sahat tu tano na imbaru. Bahaya do molo torus songon i pakkilalaatta. Attong aha do na ikkon taulahon asa unang sai negatif hita tu diritta sandiri? Ingot ma, didok do di Bibel “nunga mardosa sude jolma” asing ni Jesus. (Rom 3:23) Jadi dang hea diharappon Jahowa hita ikkon sempurna, jala dang sai dipaingot-ingot Jahowa hasalaatta i. Ama  parholong do Jahowa i jala sabar. Lomo do rohana mangurupi hita. Diida Ibana do upayatta asa unang mangulahon na sala. Jala diida Ibana do upayatta asa unang marpikkiran negatif hita tu diritta sandiri. Sai rade do Ibana mangurupi hita.​—Rom 7:18, 19.

4-5. Songon na didok di 1 Johannes 3:19, 20, aha do na mambahen dua donganta on dang torus marpikkiran negatif tu dirina sandiri?

⁴ Parrohahon ma pengalaman ni si Debora dohot si Maria. b Tikki gelleng dope si Debora, kasar do keluargana tu ibana. Jala jarang do ibana dipuji. Ujungna dung magodang ibana, gabe marpikkiran negatif ma ibana tu dirina sandiri. Otik pe hasalaan na diulahon ibana, pittor merasa gagal do ibana. Songon i do tong si Maria. Tikki gelleng, jotjot do dipaila keluargana ibana. Ujungna dung magodang si Maria, gabe merasa ma ibana dang mararga be dirina. Sahat tu na tardidi pe ibana, sai tong do songon i perasaanna. Merasa ma ibana dang cocok gabe Saksi Jahowa.

⁵ Nang pe songon i, toktong do halak i na dua manomba Jahowa. Boasa? Ala dipasahat nasida do sude holso ni rohana tu Jahowa di bagasan tangiang. (Ps. 55:23) Pos do roha ni nasida diboto Jahowa Debata parholong do aha na mambahen halak i sappe marpikkiran negatif tu dirina sandiri. Gariada diida Jahowa do akka parangetta na denggan na so tasadari dope.​—Jaha 1 Johannes 3:19, 20.

6. Aha do na dirasahon sasahalak molo mulak muse ibana mangulahon hasomalan na roa?

⁶ Sasahalak na berjuang asa unang mangulahon hasomalan na roa, boi do marmetmet ni roha molo gagal ibana. Memang wajar do molo metmet rohatta tikki taulahon na sala. (2 Kor. 7:10) Alai dang denggan molo sai tauhumi diritta jala tadok, ‘Dang na boi huulahon na denggan. Dang sesaon ni Jahowa be ra dosakki.’ Berbahaya do pikkiran sisongon i, ala boi do i mambahen hita dang manomba Jahowa be. Ingot ma Poda 24:10, ‘Molo metmet rohatta, moru do gogotta.’ Tapasae ma parsoalatta dohot Jahowa. Martangiang ma hita tu Ibana jala tapangido ma asi ni rohana asa disesa dosatta. (Jes. 1:18) Molo diida Jahowa hita manolsoli jala tabahen sian nasa gogotta lao muba, pasti salpuhonna do hasalaatta i. Dung i, juppangi hamu ma akka sintua. Boi do urupanna hamu asa togu muse.​—Jak. 5:14, 15.

7. Boasa dang pola metmet rohatta molo berjuang hita mangatasi hasomalan na roa?

⁷ Molo berjuang hamu asa unang diulahon hamu be hasomalan na roa,  parrohahon hamu ma na didok si Jean-Luc, sahalak sintua sian Prancis. Didok ibana, “Halak partigor di mata ni Jahowa, dang na halak na so hea sala. Alai halak na manolsoli molo sala ibana, jala olo muba.” (Rom 7:21-25) Unang ma tauhumi diritta, dang holan sahalakta na berjuang mangatasi hasomalan na roa. Ingot ma, sude do jolma mardosa. Alani i, sude do hita porlu mandapot asi ni roha ni Debata marhite tobusan.​—Eps. 1:7; 1 Joh. 4:10.

8. Ise do na boi mangurupi hita tikki metmet rohatta?

⁸ Boi do akka dongan di huria patoguhon hita! Sai rade do nasida manangihon hita jala urupan ni nasida do hita asa toktong togu. (Poda 12:25; 1 Tes. 5:14) Si Joy donganta borua sian Nigeria, hea do marmetmet ni roha. Didok ibana do songon on, “Dang huboto be manang aha sibahenokku molo dang adong akka dongan di huria. Marhite akka dongan di huria do dialusi Jahowa tangiakku. Marsiajar do au sian akka dongan, songon dia cara patoguhon na asing.” Dang sai diboto akka donganta na porlu hita dipatogu. Jadi hita ma na parjolo paboahon tu akka dongan na gabe teladan na porlu hita dipatogu.

9. Songon dia do Psalmen 41:4 dohot 94:19 patoguhon hita?

⁹ Tapangido ma tu Jahowa asa diurupi hita. Tikki marsahit hita, mura-mura do metmet rohatta. Tarlumobi molo parah sahitta i, gabe maol do hita marpikkiran na positif. Memang dang langsung dipamalum Jahowa sahitta i saonari, ala dang adong be mukjizat. Alai boi do dipatogu hita jala dibahen margogo manaon i. (Jaha Psalmen 41:4; 94:19.) Misalna, dipakke Jahowa do akka dongan di huria lao mangurupi hita karejo di jabu, belanja, manang manangiakkon hita. Taingot ma muse akka janji ni Debata na disurat di Bibel asa boi hita togu. Haduan dang adong be na marsahit di tano na imbaru.​—Rom 15:4.

10. Aha do na dibahen si Isang asa unang torus marmetmet ni roha?

¹⁰ Si Isang na tinggal di Nigeria, lumpu alani kecelakaan. Didok dokter, dang boi be ibana mardalan. Didok ibana ma, “Gabe metmet do rohakku jala mandele.” Alai dang torus ibana mandele. Aha do na mangurupi ibana? Didok ibana ma muse, “Torus do au martangiang dohot istrikku jala huparsiajari hami do Bibel. Sai diingot hami do akka pasu-pasu naung hujalo hami, termasuk ma i janji ni Debata lao mangolu di tano na imbaru.”

11. Boasa boi toktong si Cindy marlas ni roha nang pe parah sahitna?

¹¹ Si Cindy na tinggal di Meksiko parah do sahitna. Didok dokter boi do ibana mate alani sahitna i. Aha do na diulahon ibana asa martahan mangadopi i? Nang pe marsahit, alai dibahen ibana do tujuanna ikkon marbarita na uli tiap ari. Didok ibana ma, “Ala hubahen songon i, dang holan tu sahitti be pikkiranku. Songon on ma hubahen: Tikki makkatai au tu dokter dohot tu perawat husukkun ma attong kabar ni keluarga ni nasida. Husukkun ma boasa olo nasida gabe dokter manang perawat hape karejo na loja do i. Sian alus ni nasida i gabe huboto ma topik aha do na menarik di nasida. Godang do sian nasida na mandok jarang do pasien na manukkun kabar ni nasida. Jadi mandok mauliate do nasida tu au ala burju au. Adong do na mangalehon nomor HP ni nasida tu au. Ala sai diurupi Jahowa do au gabe las hian ma rohakku.”​—Poda 15:15.

12-13. Songon dia do akka donganta na marsahit boi marbarita na uli, jala aha do hasilna?

 ¹² Molo marsahit sasahalak mura do metmet rohana, alana dang godang be na boi diulahon ibana lao marbarita. Nang pe songon i godang do donganta na marsahit, sai mangalului cara asa boi toktong marbarita na uli. Misalna donganta si Laurel na di Amerika Serikat. Nungnga 37 taon ibana mamakke mesin alat bantu pernapasan. Asing ni i, nungnga piga-piga hali ibana dioperasi. Marsahit kanker do ibana dohot marsahit kulit na parah. Nang pe songon i parah ni sahitna torus do ibana marbarita na uli. Marbarita na uli do ibana tu akka perawat dohot akka halak na ro tu jabuna mangida ibana. Hasilna adong do 17 halak na diurupi ibana gabe Saksi Jahowa. c

¹³ Asa boi akka donganta na marsahit na dirawat di jabu marbarita, parrohahon ma na didok ni si Richard sahalak sintua di Prancis. Didok ibana, “Boi do dipajang nasida akka bukkutta asa mura diida halak. Jadi tikki lewat halak diida ma i jala disukkun ma. Nang pe dang boi akka donganta on marbarita na uli sian jabu tu jabu, alai alani cara on gabe boi ma nasida tetap semangat.” Boi do muse nasida marbarita na uli lewat surat manang telepon.

14. Aha do na boi tatiru sian si Daud?

¹⁴ Adong do piga-piga alasan na mambahen hita dang mandapot tugas na taharappon sian Jahowa. Olo do ala nungnga matua hita, marsahit, manang ala situasi na asing. Molo on do na masa tu hita saonari tatiru ma Raja Daud. Nang pe lomo roha ni si Daud pajongjokkon bagas joro ni Jahowa, alai dang ibana na dipillit. Alai nang pe songon i dilehon ibana do godang perak dohot mas lao mangurupi pembangunan i. Sitiruon na denggan do si Daud on di hita.​—2 Sam. 7:12, 13; 1 Kron. 29:1, 3-5.

15. Aha do na diulahon si Hugues asa unang torus metmet rohana?

¹⁵ Alani masalah kesehatan, dang sintua be donganta si Hugues na di Prancis. Jala dang boi be ibana karejo. Didok ibana, “Mulana mandele do au, ala sai hupikkiri akka na so boi be huulahon. Alai ikkon boi do au toktong marlas ni roha mangulahon akka na boi dope huulahon tu Jahowa. Dang olo au menyerah, hutiru do si Gidion dohot 300 tentarana. Nang pe nungnga loja nasida alai torus marporang.”​—Pangh. 8:4.

16. Aha do na boi taparsiajari sian akka suru-suruan?

 ¹⁶ Di tikki ni Raja Ahab, hea do dipangido Jahowa pandapot ni akka suru-suruan taringot carana mangoto-otoi si Ahab. Godang do suru-suruan na mangalehon pandapot. Alai holan pandapot ni sada suru-suruan do na jadi. (1 Raj. 22:19-22) Gabe mandele do akka suru-suruan na asing jala didok di bagasan rohana, ‘Ala loja au mangalehon pandapotti.’ Tottu daong ate. Serep do roha ni akka suru-suruan i jala Jahowa do na dipasangap nasida.​—Pangh. 13:16-18; Pgk. 19:10.

17. Aha do na ikkon taulahon tikki metmet rohatta ala dang dapot dope tugas na taharappon?

¹⁷ Sada hasangapon do gabe Saksi Jahowa jala paboahon barita Harajaon. Sasittongna, dang penugasanta na mambahen hita mararga di jolo ni Debata. Alai molo serep rohatta gabe arga ma hita di Jahowa dohot di akka donganta. Jadi pangido ma tu Jahowa asa diurupi hamu toktong marserep ni roha. Tatiru ma akka naposo ni Debata na marserep ni roha na disurat di Bibel. Jala sai rade ma hita mangurupi akka donganta.​—Ps. 138:6; 1 Ptr. 5:5.

18-19. Boasa hita boi tetap marlas ni roha nang pe dang denggan tanggapan ni akka halak di inganatta marbarita?

¹⁸ Hea do metmet rohamuna, ala dang denggan tanggapan ni akka halak di ingananmuna marbarita? Manang hea do metmet rohamuna ala maol manjuppangi akka halak di jabuna? Molo songon i do situasina aha do na ikkon taulahon asa toktong marlas ni roha? Ida hamu saran na adong di kotak “ Cara Asa Lam Denggan Marbarita na Uli”. Penting hian do asa tetap positif hita tikki marbarita na uli. Aha do maksudna?

¹⁹ Tujuanta marbarita na uli, i ma lao paboahon goar ni Debata dohot Harajaonna. Nungnga didok Jesus hian holan saotik do akka halak na mardalan di dalan hangoluan. (Mat. 7:13, 14) Tikki marbarita na uli hita sada hasangapon do i, alana gabe rap saulaon ma hita dohot Jahowa, Jesus, dohot akka suru-suruan. (Mat. 28:19, 20; 1 Kor. 3:9; Pgk. 14:6, 7) Jahowa do na manarik sasahalak asa manomba Ibana. (Joh. 6:44) Jadi molo dang olo sasahalak manangihon barita na tapasahat, mungkin  di tikki na asing olo do ra ibana manangihon.

20. Aha do na boi taparsiajari sian Jeremia 20:8, 9?

²⁰ Adong do na boi taparsiajari sian Panurirang Jeremia. Maol do inganan ni ibana marbarita. Jala direhei akka halak do ibana “ganup ari”. (Jaha Jeremia 20:8, 9.) Alani i, hea do ibana marmetmet ni roha jala dang olo be lao marbarita. Alai dang torus songon i pakkilalaanna. Boasa? Ala “hata ni Jahowa” dos songon api di bagasan rohana. Sappe dang tahan be ibana manippan barita i di rohana. Hita pe boi do songon si Jeremia pakkilalaatta molo ringgas hita marsiajar Bibel jala mangarimangi i ganup ari. Hasilna, boi ma hita toktong marlas ni roha jala denggan ma hita marbarita na uli.​—Jer. 15:16.

21. Songon dia do hita asa unang torus marmetmet ni roha?

²¹ Si Debora na dipaboa nakkin mandok songon on, “Jotjot do marhasil Sibolis mamakke metmet ni rohatta asa unang tasomba be Jahowa.” Alai, umgogo do Jahowa sian Sibolis. Jadi molo metmet rohatta, tapangido ma asa diurupi Jahowa hita. Urupan ni Jahowa do hita asa unang sai marpikkiran negatif hita tu diritta sandiri, unang sai taingot-ingot akka hasalaatta naung salpu. Sai na dongananna do hita tikki marsahit hita. Urupanna do hita asa unang marmetmet ni roha molo dang dapot dope tugas na taharappon. Jala urupanna do hita asa toktong positif tikki marbarita na uli. Tapasahat ma sude holso ni rohatta tu Jahowa. Urupanna do hita asa unang torus marmetmet ni roha.