Dipangido Jahowa do asa badia bangso Israel. Didok Jahowa ma tu nasida, “Unang lao hamu tusan tuson lao paboa-boahon na so sittong. Unang bahen hamu manang aha pe lao mambahen donganmuna mate. Ai Au do Jahowa.”​—3 Mus. 19:2, 16.

Molo di bahasa Heber, hata “unang bahen hamu manang aha pe lao mambahen donganmuna mate” songon on do di teks aslina, “Dang jadi ho hehe manindangi dompak mudar ni donganmu.” Aha do arti ni hata “hehe manindangi dompak mudar ni donganmu”? Bukku referensi Jahudi na mangomentari kalimat di ayat 16 i mandok songon on, “Susa do mamastihon . . . aha do sasittongna arti ni hata i. Alana kiasan do i di bahasa Heber.”

Adong piga-piga sejarawan na manghubungkon ayat 16 tu ayat 15 na mandok, “Unang papeol hamu hukum tikki mangadili. Unang marpihak hamu tu sasahalak holan ala na pogos manang na mora ibana. Ikkon tigor do hamu tikki mangadili donganmuna.” (3 Mus. 19:15) Molo songon i do, berarti hata ‘dang jadi hehe manindangi dompak mudar ni donganmu’, artina dang boi halak Israel menghakimi dohot cara na so adil, dang boi curang tikki marbisnis, dang boi pilih kasih di keluarga, jala dang boi margabus lao mambuat untung tu dirina sandiri. Memang, dang boi hita mangulahon i sude, alai asa lam taattusi lapatan ni hata i taparrohahon ma hatorangan on.

Molo taida hata parjolo di 3 Musa 19:16, didok Jahowa do tu halak Israel, dang boi halak i lao paboa-boahon hata na so sittong taringot donganna. Molo manggosip sasahalak boi do i parohon masalah, jala umparah do akibatna molo tafitnah sasahalak. (Poda 10:19; Pjm. 10:12-14; 1 Tim. 5:11-15; Jak. 3:6) Halak na memfitnah biasana sengaja do margabus lao manegai reputasi ni donganna. Bahkan olo do pemfitnah i mangalean kesaksian palsu, nang pe diboto ibana boi do dipamate donganna i alani hatana i. Songon i do na masa tu si Nabot, adong halak na margabus lao memfitnah ibana. Alani i, gabe didangguri ma ibana sappe mate. (1 Raj. 21:8-13) Jadi takkas ma halak na ‘hehe manindangi doppak mudar ni donganna’, pemfitnah do maksudna disi. Alana boi do mate sasahalak alani fitnah.

Asing ni i, halak na memfitnah pe patuduhon na sogo do rohana tu halak na difitnah ibana i. Di 1 Johannes 3:15 didok do, “Manang ise na marsogo ni roha tu donganna pambunu do i. Jala diboto hamu do, dang adong pambunu na mandapot hangoluan na saleleng ni lelengna.” Alani i ma dung didokkon Jahowa, “Unang bahen hamu manang aha pe lao mambahen donganmuna mate,” didok Jahowa do muse, “Molo sogo rohamuna tu donganmuna, unang sippan di rohamuna.”​—3 Mus. 19:17.

Patik di 3 Musa 19:16 on, penting do tong taulahon saonari. Ikkon tapasiding do akka pikkiran na jahat taringot donganta, jala unang ma hita memfitnah donganta. Takkas ma tikki didok sasahalak ‘hehe manindangi dompak mudar ni donganna’, i lapatanna difitnah ibana donganna ala dang lomo rohana, manang ala late rohana mangida donganna i. Jala i sasittongna patuduhon na sogo do rohana tu donganna i, hape hita halak Kristen dang boi sogo rohatta tu manang ise pe.​—Mat. 12:36, 37.