Diparettahon Jahowa do tu jolma na parjolo, “Gohi hamu ma tano on jala rajai ma i.” Maksudna lomo do roha ni Jahowa asa gabe Paradeiso tano on. (1 Mus. 1:28) Marlakku dope paretta on tu akka halak na lao mewarisi tano on. Alai saonari dang songon Taman Eden najolo be tano on. Jadi dung sae Armagedon pasti godang do ulaonta lao padenggatton tano on. Ulaon na massai balga do i!

Sarupa do ulaonta annon tu halak Israel najolo tikki mulak nasida sian Babel. Nungnga tarulang saleleng 70 taon luat ni nasida. Alai disurirangkon si Jesaya do, boi do gabe bagak muse luat ni nasida i alani bantuan ni Jahowa. Didok di surirang i, “Bahenonna ma akka gurun gabe songon porlak ni Jahowa.” (Jes. 51:3) Marhasil do halak Israel padenggatton luat ni nasida i gabe luat na massai bagak. Sarupa songon i ma, alani bantuan ni Jahowa boi do marhasil akka halak na mewarisi tano on padenggatton portibi on gabe Paradeiso.  Alani i mulai sian saonari tapatudu ma na lomo do rohatta padenggatton tano on.

Sada carana berupaya ma hamu mambahen ias jala rapi jabumuna, nang pe akka halak di sakalilingmuna dang mangulahon i. Dung i dohot ma hamu paiasson jala mangarawat Bale Harajaon manang Bale Kebaktian. Molo cocok do situasimuna, boi do hamu mendaftar gabe relawan penanggulangan bencana. Molo diulahon hamu i, berarti na rade do hamu mangurupi akka dongan na butuh bantuan. Pikkirhon ma muse on, ‘Keterampilan aha do na boi huparsiajari na marguna annon di Paradeiso?’

Dung dipahehe Jesus boru ni si Jairus, dipangido ibana do asa dilehon mangan boruna i. (Mrk. 5:42, 43) Dang maol paradehon kebutuhan ni dakdanak na marumur 12 taon. Alai coba ma jo pikkirhon godang ni ulaonta annon tikki saut janji ni Jesus na mandok “begeon ni saluhut na di kuburan i ma soarana jala kaluar ma nasida”. (Joh. 5:28, 29) Memang dang pola godang dipaboa di Bibel hatorangan taringot halak na dipahehe. Alai boi do tabayakkon pasti porlu do sipanganon, inganan tinggal, dohot pakkean molo nungnga dipahehe nasida. Alani i sian saonari tapatudu ma na lomo rohatta mangurupi nasida. On ma piga-piga na boi taulahon.

Molo adong pengumuman na lao ro pengawas wilayah mengunjungi huria, olo do hamu mendaftar menjamu nasida? Molo adong anggota Betel na ditugasson tu lapangan manang molo adong donganta na berhenti sian tugasna gabe pengawas wilayah, olo do hamu mangurupi nasida mangalului tempat tinggal? Molo di wilayahmuna dibahen parpunguan regional manang parpunguan istimewa, olo do hamu gabe relawan manang menyambut delegasi na ro?

Sesuai tu Ulaon ni Apostel 24:15, marmiliar halak lao dipahehe annon. Godangan sian nasida dang hea dope marsiajar taringot Jahowa. Alai dung hehe nasida annon, disi ma kesempatanna mananda Jahowa. a Akka naposo ni Debata na setia ma annon na mangajari nasida. (Jes. 11:9) Si Charlotte, donganta borua na hea marbarita na uli di Eropa, di Amerika Selatan, dohot di Afrika mandok, “Sai hupaima do tikkina mangajari akka halak na dipahehe. Molo hujaha kisah hidup ni sasahalak tikki mangolu dope ibana jotjot do au marpikkir, ‘Autsugari ma ditanda ibana Jahowa, pasti dang songon on ngoluna.’ Jadi dang sabar be au naeng mangajari nasida taringot Jahowa jala paboahon pasti denggan do ngoluna molo manomba Jahowa.”

Akka naposo ni Jahowa na setia na mangolu andorang so ro Jesus tu portibi on porlu do tong diajari. Contohna si Daniel, dang diattusi ibana akka surirang na disurat ibana. Jadi bayakkon ma pasti las do rohatta tikki tapaboa tu si Daniel songon dia akka surirangna i digenapi. (Dan. 12:8) Bayakkon ma muse songon dia las ni rohatta paboahon tu si Rut dohot tu si Naomi, nasida do oppung ni Mesias. Pasti las hian do muse rohatta mangajari akka halak na dipahehe di liat portibi on, apalagi ma di tikki i dang adong be na mambahen hita susa, jala dang adong be disi pengaruh ni portibi na jahat songon saonari!

Songon dia do hamu patuduhon na rade hamu mangajari akka halak na dipahehe annon? Berupaya ma hamu maningkatton keterampilanmuna mangajari jala taratur ma hamu marbarita na uli. (Mat. 24:14) Molo tung pe terbatas tikkimuna marbarita alani umur manang situasimuna, toktong ma bahen na terbaik. On patuduhon na lomo do rohamuna mangajari akka halak na dipahehe annon.

Pikkirhon ma sukkun-sukkun on: Tarpaima do hamu tikki dilean Debata tano on gabe warisanmuna? Tarpaima do hamu mambahen tano on gabe Paradeiso dohot paradehon akka na porlu tu halak na dipahehe, jala mangajari nasida? Pakke ma setiap kesempatan na adong saonari na patuduhon na rade hamu mangolu salelengna di tano on!