1. Sebelum mate Jesus, aha do na didok ibana tu sahalak parjahat na di sappingna? (Lukas 23:39-43)

 HACCIT do dihilala Jesus dohot dua parjahat na di sappingna tikki naeng mate nasida. (Luk. 23:32, 33) Dang sisean ni Jesus parjahat na dua i alana direhei nasida do Jesus. (Mat. 27:44; Mrk. 15:32) Alai sada sian parjahat i gabe muba do pandanganna tu Jesus. Didok ibana ma tu Jesus, “Jesus, ingot ma au molo dung masuk ho tu Harajaonmi.” Dialusi Jesus ma ibana, “Tutu do na hudok on tu ho sadari on, rap do ho dohot au di Paradeiso.” (Jaha Lukas 23:39-43.) Olo do ra nungnga hea dibege parjahat i barita taringot “Harajaon banua ginjang”, naung jotjot dibaritahon Jesus saleleng pelayananna. Alai di tikki i dang sisean dope ibana. Jala dang didok Jesus na lao mamaretta bawa i rap dohot ibana di surgo. (Mat. 4:17) Jadi na dipaboa Jesus tu ibana taringot Paradeiso na di tano on do. Boasa boi tadok songon i?

2. Sian dia taboto na halak Jahudi do parjahat na bertobat i?

² Halak Jahudi do ra parjahat na bertobat i. Sian dia taboto? Didok ibana do tu parjahat na sada nai, “Na so mabiar do ho tu Debata?” (Luk. 23:40) Holan sada do Debata na disomba halak Jahudi. Alai molo halak sian bangso na asing porsea tu godang dewa. (2 Mus. 20:2, 3; 1 Kor. 8:5, 6) Autsugari ma bawa i sian bangso na asing, pasti gabe songon on sukkun-sukkunna, “Na so mabiar do ho tu akka dewa?” Asing ni i, holan tu “halak Israel na songon biru-biru na lilu” do Jesus disuru marbarita, dang tu sude bangso. (Mat. 15:24) Jotjot do dipaboa Jahowa tu halak Israel na lao paheheonna do halak na mate. Bisa jadi nga hea diboto parjahat na bertobat i taringot  on. Jadi sian hatana i, hira na berharap do parjahat i na paheheon ni Jahowa do Jesus lao mamaretta di Harajaon ni Debata. Jala berharap do muse parjahat i asa dipahehe Debata ibana.

3. Aha do na bisa jadi diingot parjahat i tikki dipaboa Jesus taringot Paradeiso? (1 Musa 2:15)

³ Ala halak Jahudi do parjahat i, tottu nga diboto ibana taringot si Adam dohot si Hawa dohot Paradeiso na dibahen Jahowa. Jadi tikki dipaboa Jesus taringot Paradeiso, bisa jadi na diingot ibana i ma taman na bagak di tano on.​—Jaha 1 Musa 2:15.

4. Hata ni Jesus tu parjahat i mambahen hita mamikkirhon aha?

⁴ Hata ni Jesus tu parjahat i mambahen hita mamikkirhon songon dia do annon ngolutta di Paradeiso. Boi do taboto songon dia Paradeiso i sian pamarettaon ni Raja Salomo na dame. Dipaboa do di Bibel umbalga do Jesus sian si Salomo. Jadi pos ma rohatta pasti undenggan do annon pamarettaon ni Jesus dohot si 144.000 i lao mambahen tano on gabe Paradeiso na massai uli. (Mat. 12:42) Pasti lomo do roha ni ‘biru-biru na asing’ mamboto aha na porlu ulahonon ni nasida asa boi mangolu salelengna di Paradeiso.—Joh. 10:16.

5. Aha do na ro tu pikkiranmuna tikki mambayakkon Paradeiso?

⁵ Aha do na ro tu pikkiranmuna molo mambayakkon Paradeiso? Olo do ra dibayakkon hamu sada taman na bagak songon Taman Eden najolo. (1 Mus. 2:7-9) Diingot hamu do ra surirang ni si Mika na mandok, “Ganup halak hundul ma di toru ni hau anggurna be dohot di toru ni hau arana be.” (Mik. 4:3, 4) Diingot hamu do muse akka ayat ni Bibel na mandok, godang sipanganon di Paradeiso. (Ps. 72:16; Jes. 65:21, 22) Coba ma bayakkon on: Hundul ma hamu di taman na bagak. Disi boi do dihirup hamu udara na ias dohot angur ni bunga-bunga dohot akka suan-suanan. Gok do sipanganon na tabo di mejamuna, jala dibege hamu ma soara ni ekkel ni keluargamuna dohot donganmuna, termasuk ma i naung dipahehe. Marlas ni roha do hamu ala boi rap marpungu dohot nasida. Dang holan nipi sudena i. Pos do rohatta pasti terjadi do i annon di tano on. Asing ni i, godang do ulaon na boi mambahen las rohatta di Paradeiso. Aha ma i?

6. Aha do na taulahon annon di Paradeiso? (Ida gambar.)

⁶ Lomo do roha ni Jahowa asa tanikmati hasil ni karejotta. (Pjm. 2:24) Saleleng Pamarettaon Saribu Taon, pasti sibuk do hita annon. Godang do kebutuhan ni halak na malua sian hasusaan bolon dohot marjuta halak na dipahehe annon. Misalna porlu do pakkean, sipanganon, dohot inganan tinggal. Lao  memenuhi i, pasti godang do annon na taulahon. Dos songon si Adam dohot si Hawa na mangurus Taman Eden, pasti las do rohatta mambahen tano on gabe Paradeiso. Bayakkon ma muse songon dia las ni rohatta mangajari marjuta halak na dipahehe taringot Jahowa dohot lomo ni rohana, jala mangurupi akka halak na setia na mate andorang so ro Jesus tu tano on.

7. Songon dia do annon ngolutta di Paradeiso, jala boasa boi pos rohatta?

⁷ Pasti dame do ngolutta di Paradeiso jala denggan sude taratur. Boasa boi pos rohatta? Alana nungnga dipatudu Jahowa songon dia annon ngolu ni akka halak na gabe rakyat di pamarettaon ni Anakna. Boi ma i taida sian pamarettaon ni Raja Salomo.

8. Songon dia do hata na disurat si Daud di Psalmen 37:10, 11, 29 digenapi najolo? (Ida “Sukkun-Sukkun sian na Manjaha” di majalah on.)

⁸ Marhite tondi parbadia disurat Raja Daud do songon dia annon ngolu ni akka halak molo dung mamaretta raja na marbisuk jala na setia. (Jaha Psalmen 37:10, 11, 29.) Jotjot do ra tajahahon Psalmen 37:11 tu akka halak tikki martukkar pikkiran taringot Paradeiso di ari na naeng ro. Jesus pe hea do dikutip ibana ayat i tikki marjamita di dolok. Dipaboa ibana do na lao digenapi i di ari na naeng ro. (Mat. 5:5) Alai hea do ayat i digenapi tikki mamaretta Raja Salomo. Di pamarettaon ni Raja Salomo marlas ni roha do naposo ni Debata, jala dame do dihilala nasida tinggal di luat na “godang susu dohot madu”. Nungngna marjanji Debata, “Molo toktong dioloi hamu akka aturanku . . . bahenokku ma dame luatmuna, jala boi do hamu sonang modom, dang mabiar tu manang aha pe.” (3 Mus. 20:24; 26:3, 6) Digenapi ma janji i saleleng pamarettaon ni Raja Salomo. (1 Kron. 22:9; 29:26-28) Jala marjanji do Debata, “dang adong be” halak na jahat na manomba akka debata na asing. (Ps. 37:10) Alani i, hata na di Psalmen 37:10, 11, 29 hea do digenapi najolo jala lao digenapi ma i muse di ari na naeng ro.

9. Aha do na didokkon Ratu Syeba taringot pamarettaon ni si Salomo?

 ⁹ Dibege Ratu Syeba do barita taringot hadameon dohot las ni roha ni akka halak di pamarettaon ni Raja Salomo. Pola do ro ibana tu Jerusalem sian hutana na dao holan lao mangida i. (1 Raj. 10:1) Dukkon diparrohahon ibana pamarettaon ni si Salomo, didok ibana ma, “Dang adong dope hape nanggo satongana na hubege i . . . Marlas ni roha ma akka pejabat dohot akka parkarejom na toktong rap dohot ho ganup ari. Ai boi do begeon ni nasida akka podam!” (1 Raj. 10:6-8) Alai sebenarna situasi na terjadi tikki mamaretta Raja Salomo, holan gambaran do i tu na lao bahenon ni Jahowa annon tikki mamaretta Anakna Jesus.

10. Boasa boi tadok umbalga do Jesus sian si Salomo?

¹⁰ Dao do umbalga Jesus sian si Salomo. Molo si Salomo dang sempurna ibana, jala hea do dibahen ibana dosa na balga na ujungna mambahen susa naposo ni Debata. Alai molo Jesus, Raja na sempurna do ibana jala dang hea mambahen kesalahan. (Luk. 1:32; Heb. 4:14, 15) Toktong do Jesus setia tu Debata nang pe dibahen Sibolis ujian na massai borat tu ibana. Nungnga dibuktihon Jesus dang mardosa ibana jala dang olo ibana mambahen susa rakyatna. Jadi pos ma rohatta, Jesus do Raja na terbaik.

11. Ise do dongan ni Jesus mamaretta?

¹¹ Dang holan sahalak ni Jesus mamaretta annon, rap do ibana dohot 144.000 halak lao pasautton lomo ni roha ni Jahowa di tano on. (Pgk. 14:1-3) Tikki mangolu di tano on dope si 144.000 i, godang do tantangan naung diadopi nasida. Jadi pasti boi do diattusi nasida songon dia perasaan dohot situasi ni akka halak na mangolu di tano on. Tikki mamaretta nasida gabe raja, aha do na lao diulahon nasida?

12. Tugas aha do na dilehon Jahowa tu si 144.000?

¹² Umbalga do tugas ni Jesus dohot haha anggina si 144.000 i sian tugas ni si Salomo. Molo si Salomo mamaretta holan tu marjuta halak di sada negeri. Alai molo Jesus dohot si 144.000, mamaretta ma nasida tu marmiliar halak di liat portibi on. Sada hasangapon do on dilean Jahowa tu si 144.000.

13. Aha dope na lao diulahon si 144.000 i?

¹³ Lao gabe raja dohot malim do si 144.000 i songon Jesus. (Pgk. 5:10) Tikki marlakku dope Patik ni si Musa, akka malim do na mangurupi bangso Israel asa tetap sehat jala asa toktong jonok hubungan ni nasida tu Jahowa. Bibel mandok Patik i “holan bayangan ni akka na denggan na masa di ari na naeng ro do i”. Jadi haduan urupan ni si 144.000 i do tong naposo ni Debata asa tetap sehat jala asa toktong jonok hubungan ni nasida tu Jahowa. (Heb. 10:1) Saonari dang taboto dope songon dia annon akka malim dohot raja i mangalehon petunjuk tu rakyat ni Harajaon ni Debata na adong di tano on. Alai manang na songon dia pe carana, pasti dilehon do petunjuk na mangurupi nasida annon.​—Pgk. 21:3, 4.

14. Aha do na didok Jesus taringot ‘biru-biru na asing’ dohot “punguan na metmet”?

¹⁴ Digoari Jesus do akka halak na mamaretta rap dohot ibana i “punguan na metmet”. (Luk. 12:32) Jala didok Jesus adong dope punguan na asing na digoari ‘biru-biru na asing’. Gabe sada punguan ma nasida. (Joh. 10:16) Saonari rap saulaon do dua punguan on, jala annon pe rap saulaon do nasida lao mambahen tano on gabe Paradeiso. Alai di tikki i  “punguan na metmet” nungnga di surgo be nasida, molo ‘biru-biru na asing’ mangolu salelengna di tano on. Aha do na porlu diulahon ‘biru-biru na asing’ saonari asa boi nasida mangolu di Paradeiso?

15. (a) Songon dia do ‘biru-biru na asing’ mendukung haha anggi ni Kristus? (b) Aha do na boi tatiru sian sahalak donganta tikki manuhor obat ibana? (Ida gambar.)

¹⁵ Dang adong kesempatan ni parjahat i lao patuduhon pangargaionna tu na binahen ni Kristus. Alai molo hita ‘biru-biru na asing’, godang do kesempatanta saonari lao patuduhon pangargaion tu Jesus. Misalna, boi do tapatudu holongta tu Jesus molo tadukung haha anggina. Didok Jesus lao diuhumi do ‘biru-biru na asing’ berdasarkan dukungan na dipatudu nasida tu haha anggina. (Mat. 25:31-40) Molo semangat hita marbarita na uli dohot mambahen sisean, na mendukung haha anggi ni Jesus do hita disi. (Mat. 28:18-20) Tapakke ma alat bantu marsiajar Bibel na dilehon tu hita, songon bukku Mangolu Saleleng ni Lelengna. Adong do parsiajar Bibelmuna saonari? Molo dang adong, bahen ma tujuan lao menawarhon parsiajaran Bibel tu godang halak.

16. Aha do na porlu taulahon asa boi gabe rakyat ni Harajaon ni Debata?

¹⁶ Sian saonari, tapatudu ma na lomo rohatta gabe rakyat ni Harajaon ni Debata. Berupaya ma hita gabe halak na dihalomohon Jahowa. Misalna jujur ma hita di pakkataion dohot di parniulaonta jala berupaya ma hita mangarajai diri asa seimbang ngolutta. Setia ma hita tu Jahowa, tu pasanganta, dohot tu akka dongan sahaporseaon. Molo sian saonari hita unduk tu Jahowa, gabe lam mura ma hita unduk tu Ibana di Paradeiso haduan. Asing ni i boi do tapadenggan akka sifatta, jala taparsiajari ma akka keterampilan na marguna annon di tano na imbaru. Ida ma artikel “Rade do Hamu Mewarisi Tano on?” di majalah on lao mamboto taringot i.

17. Molo hea hita mangulahon dosa na balga, porlu do hita torus merasa bersalah?

¹⁷ Ikkon berupaya do hita muse mambolokkon perasaan bersalah alani dosa na balga na hea taulahon. Memang dang na gabe “sengaja  hita mangulahon dosa” ala taboto adong tobusan. (Heb. 10:26-31) Alai pos ma rohatta disesa Jahowa do dosatta molo olo hita bertobat jala mangido bantuan sian akka sintua. (Jes. 55:7; Ul. 3:19) Ingot ma hata ni Jesus tu halak Parise, “Dang na lao manjou halak na mangulahon na sittong au umbahen na ro, alai manjou pardosa i do.” (Mat. 9:13) Pos ma rohatta nungnga disesa be sude dosatta alani tobusan ni Jesus.

18. Aha do na naeng dihatai hamu dohot parjahat na bertobat i?

¹⁸ Boi do dibayakkon hamu makkata-hatai annon hamu di Paradeiso dohot parjahat na bertobat i? Pasti mandok mauliate do hamu na dua tu tobusan ni Jesus. Tikki na makkata-hatai i hamu, boi do disukkun hamu tu ibana aha do na masa andorang so mate Jesus, jala songon dia perasaanna ala dialusi Jesus pangidoanna. Songon i nang sebalikna, bisa jadi disukkun ibana ma tu hamu songon dia mangolu di ari parpudi na dirajai Sibolis. Sada hasangapon do di hita boi mangajarhon Bibel tu akka halak na songon bawa i!​—Eps. 4:22-24.

19. Dang marna bosan hita annon mangolu di Paradeiso. Boasa? (Ida gambar sampul.)

¹⁹ Dang marna bosan hita annon mangolu di Paradeiso, alana sai adong do ulaon na mambahen las rohatta. Boi do hita annon disi bergaul tu godang halak. Na uppetting, boi ma lam akrab hita tu Bapakta Jahowa jala boi menikmati sude na diparade Ibana. Sai adong do na boi taparsiajari taringot Jahowa, jala boi do hita marsiajar sian akka toppaanna. Lam leleng hita mangolu, lam bagas ma holongta tu Jahowa. Mandok mauliate do hita tu Jahowa dohot tu Jesus, ala dilehon nasida do harapan tu hita boi mangolu saleleng ni lelengna di Paradeiso!