TOTTU las do rohatta ala marragam dilehon Jahowa hadiah tu hita. Jala las do rohatta ala diloas Ibana do hita manottuhon songon dia caratta lao menikmati hadiah na dilehonna i. Sada hadiah na dilehon Jahowa, i ma anggur. Bibel mandok, “Las do roha molo adong sipanganon, jala sonang do roha molo adong anggur.” (Pjm. 10:19; Ps. 104:15) Alai olo do ra diida hamu piga-piga halak na gabe kecanduan minum anggur manang minuman beralkohol. Asing ni i, marragam do pandapot ni akka halak taringot minum minuman beralkohol. Jadi aha do na boi mangurupi halak Kristen tikki manottuhon naeng minum minuman beralkohol manang na dang?

Tikki naeng mambahen keputusan taringot on, unang ma taihutton pandangan ni akka halak manang hasomalan di daerahta. Alai Hata ni Debata ma na taihutton. Molo taulahon songon i, pasti denggan do ngolutta jala marlas ni roha.

Godang do ra diida hamu halak na jotjot minum jala olo sappe mabuk. Adong do halak na minum minuman beralkohol holan asa boi tenang perasaanna. Adong muse halak na minum asa unang stres nasida mamikkiri masalahna. Jala di piga-piga daerah, godang halak mandok halak na jago do molo godang minum.

Ala holong roha ni Jahowa tu hita, dilehon Ibana do tu hita nasehat taringot minuman beralkohol. Contohna dipaboa ibana do aha akibatna molo pagodangku hita minum. Di Poda 23:​29-35, dipaboa do taringot halak na mabuk jala aha do akibatna. a Songon i ma na dihilala si Daniel sebelum gabe Saksi Jahowa ibana. Saonari nungnga gabe sintua di Eropa ibana. Didok ibana, “Najolo godang do au minum minuman beralkohol. Ala songon i hasomalanku, gabe dang denggan au mambahen keputusan. Akibatna susa ma ngolukku, jala lungun do rohakku molo huingot i.”

Songon dia do asa denggan keputusan na tabahen taringot minum minuman beralkohol? Jala songon dia asa unang gabe susa hita ala pagodangku minum? Ikkon olo do hita mangihutton cara marpikkir ni Debata tikki mambahen keputusan.

Saonari taida ma aha na dipaboa Bibel taringot minuman beralkohol jala boasa adong piga-piga halak na manginum i.

Di Bibel dang hea hita diorai minum minuman beralkohol. Gariada didok Bibel, “Marlas ni roha ma ho mangallang sipanganonmu. Jala marlas ni roha ma ho manginum anggurmu.” (Pjm. 9:7) Jesus pe olo do minum anggur, songon i nang akka naposo ni Jahowa na asing.—Mat. 26:​27-29; Luk. 7:34; 1 Tim. 5:23.

Nang pe dang diorai hita minum minuman beralkohol, alai diorai do hita pagodangku manginum i jala sappe mabuk. Didok Bibel, “Unang ma mabuk hamu alani anggur.” (Eps. 5:18) Gariada didok do muse “parmabuk . . . dang adong parbagiananna di Harajaon ni Debata”. (1 Kor. 6:10) Jadi dang lomo roha ni Debata molo pagodangku hita minum jala sappe mabuk. Alani i, unang ma taihutton pandangan ni godang halak dohot hasomalan di daerahta taringot minum minuman beralkohol. Alai tabahen ma keputusan na palasson roha ni Debata.

Adong na mandok, dang pola boha molo diinum nasida godang minuman beralkohol, asal ma unang mabuk. Alai sasittongna sala do pandangan sisongon i. Takkas do didok Bibel, halak na “hatagian minum anggur” ujungna boi mambahen ibana mangulahon dosa na balga. Akibatna gabe sega ma parale-aleonna tu Jahowa. (Tit. 2:3; Poda 20:1)  Didok Jesus do muse, halak na “dirajai siinumon na marlobi-lobi” dang boi masuk tu Harajaon ni Debata. (Luk. 21:​34-36) Jadi aha do na boi mangurupi halak Kristen asa unang gabe susa nasida alani minuman beralkohol?

Boi do gabe marjea hita molo taihutton hasomalan ni halak di daerahta taringot minuman beralkohol. Alani i, ikkon marbisuk do hita tikki mambahen keputusan taringot sipanganon dohot siinumon. Tapikkirhon ma songon dia perasaan ni Jahowa taringot i. Bibel mandok, “Manang aha pe na diallang hamu, na diinum hamu, manang na diulahon hamu, ulahon hamu ma i sude lao pasangappon Debata.” (1 Kor. 10:31) Tikki mambahen keputusan, pikkirhon ma sukkun-sukkun dohot prinsip ni Bibel on:

Holan lao pasonakkon roha ni halak do huinum on? 2 Musa 23:2 mandok, “Unang ihutton halak na mangulahon na jahat, nang pe godang na mangulahon i.” Memang tu halak Israel do sipasingot on dilehon Jahowa. Alai marguna do tong sipasingot on tu hita. Alani i, unang ma taihutton cara marpikkir dohot pandangan ni akka halak di portibi on taringot minuman beralkohol. Alana molo taihutton i, lam leleng boi do gabe dang taihutton be standar ni Jahowa jala mandao sian Ibana.—Rom 12:2.

Holan asa jago do au idaon ni halak? Di piga-piga daerah, dang gabe masalah molo sering sasahalak minum minuman beralkohol jala sappe mabuk. (1 Ptr. 4:3) Alai didok do di 1 Korint 16:​13, “Toktong ma hamu sadar, togu di haporseaon, toktong barani, jala toktong ma hamu margogo.” Boi do minuman beralkohol mambahen sasahalak gabe margogo manang jago? Daong. Gariada gabe dang boi ibana tiur marpikkir jala mambahen keputusan na denggan. Jesaya 28:7 pe mandok, halak na lilu alani anggur ujungna dang boi mambahen keputusan na denggan. Jadi dang patuduhon halak na jago sasahalak molo godang diinum ibana minuman beralkohol. Gariada i patuduhon halak na oto do ibana.

Holan Jahowa do na boi mangalehon gogo tu hita jala mambahen hita ‘toktong sadar jala togu di haporseaon’. (Ps. 18:32) Asa boi hita gabe halak na songon i, ikkon tapadao do diritta sian hasomalan na boi mambahen hita marjea jala na boi  manegai hubungatta tu Jahowa. Songon i ma na diulahon Jesus tikki di tano on. Gabe diargai halak ma ibana ala toktong barani jala toktong mangulahon na sittong.

Ikkon minum do au asa unang stres mamikkiri masalahku? Molo adong masalahta, Jahowa ma na taandalhon, unang ma gabe tainum minuman beralkohol. Alana didok Bibel, “Tikki marsak situtu rohakku, diapuli Ho [Jahowa] do au jala dibahen Ho do las rohakku.” (Ps. 94:19) Tikki adong masalahta, lam jotjot ma hita martangiang tu Jahowa. Asing ni i, tapangido ma saran sian akka dongan na togu haporseaonna tu Jahowa. Alai molo tainum minuman beralkohol holan asa unang stres mamikkiri masalahta, gabe maol ma hita mangulahon na sittong. (Hos. 4:11) Songon pengalaman ni si Daniel na dipaboa nakkin, didok ibana, “Tikki marsak au ala adong masalahku, jala tikki merasa bersalah au, pittor minum minuman beralkohol ma au. Alai dang gabe sae sitaonokki, gariada gabe lam tamba do masalahku. Ditinggalhon akka donganku do au, jala huhilala dang mararga dirikku.” Jadi aha ma na diulahon si Daniel lao mangatasi masalahna i? “Husadari ma Jahowa do na mangurupi au, dang minuman beralkohol. Dung martangiang au tu Jahowa, boi ma huatasi masalahku.” Sian pengalaman on taboto ma, sai rade do Jahowa mangurupi hita nang pe borat sitaononta.—Plp. 4:​6, 7; 1 Ptr. 5:7.

Molo naeng minum minuman beralkohol hamu, rimangi ma sukkun-sukkun on, ‘Hea do dipasingot keluarga manang donganku au taringot hasomalanku minum?’ Molo hea, on patuduhon nungnga mulai kecanduan be hamu minum minuman beralkohol, jala olo do ra dang disadari hamu i. ‘Pagodangku do au minum?’ Adong do halak na marpikkir godang pe ibana minum, dang lao gabe kecanduan ibana. Alai sebenarna nungnga mulai kecanduan halak na songon i. ‘Sai busisaon do au molo dang minum apala sadari?’ Molo songon i situasimuna, olo do ra nungnga kecanduan hamu. Porlu do hamu tu dokter lao mangatasi kecanduanmuna i.

Adong halak Kristen na mamillit dang minum minuman beralkohol. Alana menurut nasida gabe godang do masalah molo diinum nasida i.  Na asing dang olo manginum i ala dang tabo dihilala nasida daina. Jadi molo adong donganta na mambahen keputusan sisongon i, taargai ma jala unang ma takritik.

Adong do halak na olo minum minuman beralkohol, alai dibatasi ibana sadia godang na lao inumonna. Asing ni i adong do na mambahen batasan sadia jotjot ibana minum. Olo do ra holan sahali saminggu manang sahali-sahali tikki mangan. Adong do muse halak na holan manginum anggur manang bir na otik kadar alkoholna. Alai dang olo nasida manginum minuman beralkohol na timbo kadar alkoholna, nang pe dicampur i dohot minuman na asing. Jadi molo nga takkas dibahen sasahalak batasan na lao siinumonna, gabe mura ma ibana mandalatton keputusanna i. Jala molo togu parale-aleon ni sasahalak tu Jahowa, dang pola dipikkiri ibana songon dia pandangan ni halak taringot keputusanna i. Alana nga pos be rohana tu keputusanna i.

Tikki mambahen keputusan hamu taringot minum minuman beralkohol, porlu do dipikkirhon hamu perasaan ni halak na asing. Rom 14:21 mandok, “Tumagon ma unang mangallang jagal, manang unang manginum anggur, manang mangulahon manang aha pe na mambahen gale haporseaon ni donganmuna.” Boha do carana mangulahon prinsip on? Molo gabe tartuktuk do annon donganta ala minum hita, unang ma tainum i. Molo taulahon songon i, on patuduhon na taargai jala tahaholongi do nasida. Jala dang holan diritta sandiri na tapikkirhon.—1 Kor. 10:24.

Asing ni i, di daerahta ditottuhon pamaretta do ra umur sadia sasahalak boi minum minuman beralkohol. Jala diorai do minum minuman beralkohol tikki mamboan kendaraan manang tikki mangoperasihon masin. Molo songon i situasina, ikkon taihutton do i.—Rom 13:​1-5.

Godang do hadiah na massai arga na dilehon Jahowa tu hita. Jala diloas Ibana do hita manottuhon songon dia caratta mamakke akka hadiah i. Termasuk ma manottuhon aha na lao taallang manang tainum. Anggiat ma akka na tapillit i boi mambahen las roha ni Jahowa.