1-2. Akka situasi aha do na mambahen hita tangis?

 PASTI sude do hita hea tangis. Sipata alani las ni rohatta, olo do sappe tangis hita. Misalna tubu gellengta, taingot kenangan na mambahen las roha, manang pajuppang hita dohot dongan naung leleng dang pajuppang.

² Alai saonari jotjot do hita tangis alani godang ni sitaonon. Uppamana, adong do ra sasahalak na mambahen hita kecewa. Asing ni i, olo do ra marsahit na parah hita jala dang marnamalum, manang mate na tahaholongi. Di situasi sisongon i, olo do ra sarupa pakkilalaatta tu Panurirang Jeremia tikki naeng dihancurhon halak Babel nama Jerusalem. Didok si Jeremia, “Songon doras ni sunge do ilukku torus maraburan, . . . Torus do maraburan ilukku dang hea maradian.”—And. 3:​48, 49.

3. Boha do pakkilalaan ni Jahowa tikki diida Ibana susa akka naposona? (Jesaya 63:9)

³ Takkas do diboto Jahowa nungnga piga hali hita tangis alani godang ni sitaononta. Dipaboa do di Bibel, manang aha pe hasusaan na taadopi, parduli do Jahowa tu hita jala ditangihon Ibana do angguk-anggukta. (Ps. 34:15) Jala dipatudos do Jahowa i songon sahalak Ama. Holong hian do rohana tu hita. Tikki diida Ibana tangis hita, dohot do lungun rohana jala pittor naeng diurupi Ibana do hita.—Jaha Jesaya 63:9.

4. Akka ise do na lao tabahas, jala aha do na taparsiajari taringot Jahowa sian pengalaman ni nasida?

 ⁴ Sian Bibel, taboto ma songon dia pakkilalaan ni Jahowa tikki tangis akka naposona jala aha do na diulahon Ibana lao mangurupi nasida. Boi ma taparsiajari taringot on sian pengalaman ni si Hanna, si Daud, dohot Raja Hiskia. Tabahas ma situasi aha do na mambahen nasida sappe tangis, jala songon dia Jahowa mangurupi nasida. Dung i, tabahas ma aha na diulahon Jahowa lao mangapuli rohatta tikki lungun hian tahilala, tikki dihianati hita, manang tikki hira na so adong be jalan keluar sian masalahta.

TANGIS ALA MATE NA TAHAHOLONGI

5. Boha do pakkilalaan ni si Hanna alani godang ni sitaononna?

⁵ Godang do sitaonon ni si Hanna jala sappe tangis do ibana alani i. Sada sian sitaononna i, i ma mangoli muse suamina tu borua na asing na margoar si Pininna. Sai direhe-rehei si Pininna do si Hanna ala dang boi ibana marianakkon. Hape si Pininna adong do piga-piga gellengna. (1 Sam. 1:​1, 2) Alani marsakna, ‘gabe sai tangis ma si Hanna, dang olo mangan, jala lungun hian ma rohana’. (1 Sam. 1:​6, 7, 10) Molo hamu di posisi ni si Hanna, boha ma pakkilalaanmuna?

6. Aha do na diulahon si Hanna asa tarapul rohana?

⁶ Aha do na diulahon si Hanna asa tarapul rohana? Lao do ibana tu tabernakel, pusat ibadat na sittong di tikki i. Disi, “martangiang ma ibana tu Jahowa jala tangis do ibana”. Ra, di jonok ni pintu masuk halaman tabernakel i do ibana martangiang. Didok ibana ma tu Jahowa, ‘Ida ma hasusaan ni naposomon jala ingot ma au.’ (1 Sam. 1:10b, 11) Dipaboa si Hanna do sude na di rohana tu Jahowa. Pasti lungun hian do roha ni Jahowa mangida boruna i sai tumatangis.

7. Songon dia do pakkilalaan ni si Hanna dung dipaboa ibana sude na di rohana tu Jahowa?

⁷ Dung martangiang si Hanna tu Jahowa, dipapos Sintua Malim Eli ma roha ni si Hanna na ditangihon Jahowa do tangiangna i. Boha ma pakkilalaan ni si Hanna dukkon i? Didok di Bibel, “Mulak ma si Hanna, mangan ma ibana jala dang marsak be ibana idaon.” (1 Sam. 1:​17, 18) Memang dang mago dope sitaononna i, alai gabe dame do rohana. Pos do roha ni si Hanna diboto Jahowa do perasaanna dohot sitaononna i, jala pasti diurupi do ibana. Jala toho do i, ditangihon Jahowa do tangiangna. Di pudian ni ari, dibahen Jahowa ma ibana boi marianakkon.—1 Sam. 1:​19, 20; 2:21.

8-9. Songon na disurat di Heber 10:​24, 25, boasa ikkon berupaya hita asa toktong ro marpungu? (Ida gambar.)

⁸ Parsiajaranna tu hita. Adong do sitaononmuna saonari na mambahen lungun hian rohamuna? Mungkin adong keluarga manang donganmuna na baru mate. Di  situasi sisongon i, olo do ra gabe dang lomo rohamuna bergaul dohot akka dongan. Alai taingot ma si Hanna. Asa tarapul rohana, lao do ibana tu tabernakel. Songon i ma hita saonari. Tetap ma ro hita marpungu, nang pe hira na borat hian tahilala lao tusi. (Jaha Heber 10:​24, 25.) Di parpunguan, boi ma tabege akka ayat ni Bibel na mangapuli rohatta. On ma cara ni Jahowa mangurupi hita asa marpikkiran na positif. Alana molo positif pikkiranta, boi ma takendalihon perasaanta nang pe dang mago dope sitaononta i.

⁹ Asing ni i, di parpunguan pajuppang do hita dohot akka dongan na makkaholongi hita jala sai rade patoguhon rohatta. (1 Tes. 5:​11, 14) Taparrohahon ma pengalaman ni sahalak donganta perintis istimewa. Nungnga mate istri ni donganta on. Didok ibana, “Jotjot dope au tangis. Sipata hundul ma au sahalakku, jala sai tangis ma au ala masihol hian au tu istrikku. Alai molo ro au marpungu, gabe dame do huhilala. Diapuli akka dongan do au disi. Nang pe marsak hian au, alai dung sahat di parpunguan gabe tenang ma perasaanku.” Jadi boi do Jahowa patoguhon rohatta marhite akka dongan di parpunguan.

10. Tikki lungun hian rohatta, songon dia do hita boi maniru si Hanna?

¹⁰ Ala dipaboa si Hanna sude na di rohana tu Jahowa, gabe dame do dihilala ibana. Hita pe boi do songon i. ‘Tapasahat ma sude holso ni rohatta tu Jahowa’, jala pos ma rohatta ditangihon do hita. (1 Ptr. 5:7) Taparrohahon ma pengalaman ni donganta na mate tarbunu suamina. Didok ibana, “Hancur hian ma perasaanku, sappe hira na diribak-ribak ma rohakkon alani haccitna. Alai molo martangiang au tu Jahowa, dame ma huhilala. Memang, olo do sipata dang huboto aha na lao dokkonokku tikki martangiang. Alai pos rohakku, diattusi Jahowa do perasaanku. Alana huboto do holong hian rohana tu au. Jadi tikki lungun hian huhilala jala marsak, hupangido ma tu Jahowa asa dilehon tu au dame ni roha. Ujungna gabe tenang ma pakkilalaakku jala sanggup ma muse au mangulahon akka ulaonku.” Tikki tapaboa sude holso ni rohatta tu Jahowa, lungun do tong rohana mangida hita. Jala takkas do diboto Ibana songon dia perasaanta. Jadi nang pe dang mago dope situasi na mambahen lungun rohatta i, diurupi Jahowa do hita asa dame tahilala. (Ps. 94:19; Plp. 4:​6, 7) Jala molo tetap hita setia tu Jahowa, pasu-pasuonna do hita.—Heb. 11:6.

TANGIS ALA DIHIANATI

11. Boha do pakkilalaan ni si Daud tikki mangadopi akka sitaononna?

¹¹ Saleleng ngolu ni si Daud, godang do masalah na diadopi ibana na mambahen sappe tangis ibana. Misalna, godang do na marsogo ni roha tu ibana. Bahkan dihianati keluarga dohot donganna do ibana. (1 Sam. 19:​10, 11; 2 Sam. 15:​10-14, 30) Tikki masa situasi i, didok ibana do songon on, “Nungnga lam gale au alani arsak ni rohakku. Tangis do au saborngin manipat sappe maraek podomanku. Sappe maraek do podomanku alani ilukku.” Boasa sappe songon i perasaan ni si Daud? Didok ibana, “Alani sude halak na manusai au.” (Ps. 6:​6, 7) Jadi marsak hian do si Daud alani sitaononna i, jala sai tangis do ibana alani i.

12. Songon na disurat di Psalmen 56:​8, aha do na diboto si Daud taringot Jahowa?

¹² Nang pe godang sitaonon ni si Daud, alai pos do rohana na dihaholongi Jahowa ibana. Didok ibana do, “Tangihonon ni Jahowa do andung-andungku.” (Ps. 6:8) Asing ni i, hea do disurat si Daud ende na patoguhon roha  di Psalmen 56:8. (Jaha.) Hata na di ayat on patuduhon massai holong do roha ni Jahowa tu hita. Didok si Daud, hira na disippan Jahowa do ilu-iluna di inganan ni aekna, jala tarsurat do i sude di bukkuna. Jadi pos do roha ni si Daud, diparrohahon Jahowa do aha na masa tu ibana, jala diingot do sude na haccit na dihilala ibana. Alai dang holan i. Pos roha ni si Daud, takkas do diboto Jahowa aha pengaruh ni sitaononna i tu dirina.

13. Tikki dihianati hita, aha do na porlu taingot? (Ida gambar.)

¹³ Parsiajaranna tu hita. Hea do hamu dihianati sasahalak manang kecewa hamu dibahen? Ra diputusson halletmuna hamu, ditinggalhon dongan saripemuna hamu, jala adong keluarga manang donganmuna na so olo be manomba Jahowa. Songon i ma na hea dihilala sahalak donganta na mangalakkup istrina jala maninggalhon ibana. Didok ibana, “Tarsonggot hian do au jala dang husangka masa on tu au. Lungun hian do rohakku, muruk, jala dang marguna huhilala au.” Didok ibana muse, “Gabe huboto ma, boi do muba holong ni jolma. Alai molo Jahowa dang hea muba Ibana, tetap do setia Ibana. Dang soal aha na masa tu hita, sai urupanna do hita jala dang tinggalhononna akka naposona na setia.” (Ps. 37:28) Taingot ma, dao do umbalga holong ni Jahowa tu hita sian holong ni manang ise pe. Memang molo dihianati hita, pasti haccit hian do tahilala. Alai ingot ma, dang hea muba holong ni Jahowa tu hamu, arga situtu do hamu di Ibana. (Rom 8:​38, 39) Jadi, dang soal songon dia pambahenan ni halak tu hamu, toktong do dihaholongi Jahowa hamu jala dang tinggalhononna hamu.

14. Aha do janji ni Jahowa na dipaboa di Psalmen 34:18?

¹⁴ Hata ni si Daud na disurat di Psalmen 34:18 pe boi do patoguhon rohatta. (Jaha.) Sada referensi mandok, “halak na hancur rohana” boi do tong lapatanna “hira na so adong be semangatna lao mangolu”. Songon dia do perasaan ni Jahowa mangida halak na songon i perasaanna? Dipatudos do Jahowa songon sahalak ama na parholong, na rade maniop tangan ni ianakkonna jala mangapuli roha ni ianakkonna i. Didok di Bibel, “jonok do Jahowa” tu hita. Tikki adong na menghianati hita manang mambahen hita kecewa, takkas do diattusi Jahowa perasaanta jala pittor naeng diurupi Ibana do hita. Jadi molo adong situasi na mambahen hita merasa dang marguna jala hancur rohatta, ingot ma rade do Jahowa mangapuli hita. Jala dilehon Ibana do godang bantuan, asa  boi hita martahan mangadopi situasi i.—Jes. 65:17.

TANGIS ALA MARSAHIT

15. Situasi aha do na mambahen gabe sai tangis si Hiskia?

¹⁵ Tikki marumur 39 taon Raja Hiskia, marsahit na parah ma ibana. Disuru Jahowa ma Panurirang Jesaya paboahon tu ibana na lao mate nama ibana alani sahitna i. (2 Raj. 20:1) Ala mambege barita i, sai tangis jala sai martangiang ma ibana mangido bantuan ni Jahowa. Jadi di tikki i, hira na so adong be jalan keluar tu situasina i.—2 Raj. 20:​2, 3.

16. Aha do na diulahon Jahowa dung diida Ibana sai tumatangis si Hiskia?

¹⁶ Tikki dibege Jahowa tangiang ni si Hiskia i jala diida Jahowa sai tumatangis ibana, gabe asi ma roha ni Jahowa mangida ibana. Alani i, didok Jahowa ma, “Nungnga hubege tangiangmu, jala nungnga huida ilum. Pamalumokku do ho.” Marhite si Jesaya, dipaboa Jahowa ma na lao bahenonna do ganjang umur ni si Hiskia. Jala paluaon ni Jahowa ma Jerusalem sian tangan ni halak Asiria.—2 Raj. 20:​4-6.

17. Tikki marsahit na parah hita, songon dia do Jahowa mangurupi hita? (Psalmen 41:3) (Ida gambar.)

¹⁷ Parsiajaranna tu hita. Marsahit na parah do hamu saonari jala dang marnamalum sahitmuna i? Paboa ma tu Jahowa sude perasaanmuna. Pasti tangihononna do tangiangmuna na mardongan angguk-angguk i. Dipaboa do di Bibel, Jahowa i “Ama parasi roha, na lambok, jala Debata Sipangapul na sumurung. Diurupi Ibana do hita asa margogo mangadopi sude sitaononta”. (2 Kor. 1:​3, 4) Memang dang boi hita berharap asa dipamago Jahowa sude sitaononta saonari. (Jaha Psalmen 41:3.) Alai pos ma rohatta, sai rade do Ibana mangurupi hita. Marhite tondi parbadia, lehonon ni Jahowa do gogo, bisuk, dohot dame ni roha tu hita. (Poda 18:14; Plp. 4:13) Asing ni i, dipatogu Ibana do rohatta marhite janjina na disurat di Bibel. Marjanji do Ibana, dang adong be na marsahit di ari na naeng ro.—Jes. 33:24.

18. Tikki diadopi hamu situasi na borat, ayat na dia do na mangapuli rohamuna? (Ida kotak “ Akka Ayat na Mangapuli Rohatta Tikki Tangis Hita”.)

¹⁸ Tarapul do roha ni si Hiskia dung mambege hata ni Jahowa. Hita pe boi do songon i. Molo marsak hita, boi do tarapul rohatta tikki tajaha Bibel. (Rom 15:4) Adong ma sahalak donganta borua di Afrika Barat na hona kanker. Jotjot do ibana tangis alani sahitna i. Didok ibana, “Sada ayat na mambahen tarapul rohakku, i ma Jesaya 26:3. Memang dang boi takendalihon situasitta. Alai di ayat i, marjanji do Jahowa lao urupanna do hita mangadopi sude sitaononta jala mambahen hita tetap tenang.” Boha molo hamu? Tikki  diadopi hamu situasi na borat jala hira na so adong jalan keluar sian masalahmuna, adong do ayat na mambahen tarapul rohamuna?

19. Pasu-pasu aha do na lao jalootta di ari na naeng ro?

¹⁹ Nungnga jonok hian panutup ni jaman on. Jadi pasti lam godang do situasi na mambahen marsak hita jala tangis. Alai taboto do, songon pengalaman ni si Hanna, si Daud, dohot Raja Hiskia, diida Jahowa do tikki tangis hita, jala diattusi Ibana do songon dia perasaanta. Hira na disippan Ibana ma sude ilu-ilutta i. Jadi tikki taadopi situasi na borat, tapaboa ma sude na di rohatta tu Jahowa. Unang ma mandao hita sian akka dongan di huria. Jala toktong ma tajaha hatana di Bibel asa tarapul rohatta. Pos ma rohatta, molo toktong hita setia, pasu-pasuon ni Jahowa ma hita. Nungnga marjanji Ibana, di ari na naeng ro, lao apusanna ma sude ilu-ilu sian mata ni jolma. Dang adong be na haccit, dang adong be na menghianati hita, jala dang na lao marsak be hita. (Pgk. 21:4) Jadi molo tangis pe hita haduan, ilu las ni roha nama i.