1. Songon dia do pandapot ni godangan halak taringot mangolu salelengna?

 GODANG do halak na lomo rohana asa ganjang umurna. Jadi diallang nasida ma akka sipanganon na bergizi jala marolahraga. Alai dang hea dibayakkon nasida boi nasida mangolu saleleng ni lelengna, alana didok roha ni nasida dang mungkin i terjadi. Hape didok Jesus, boi do jolma ‘mangolu salelengna’ songon na disurat di Johannes 3:16 dohot 5:24.

2. Aha do na didok di Johannes 6:​39, 40 taringot mangolu saleleng ni lelengna?

² Songon naung tabahas sebelumna, luar biasa do mukjizat na dibahen Jesus tikki mangalehon mangan marribu halak marhite roti dohot dekke. a Alai lebih luar biasa dope na dihatahon Jesus di ari na berikutna. Tikki di Kapernaum, di jonok ni Laut Galilea, dipaboa ibana ma tu akka na ro i na lao dipahehe ma haduan akka naung mate jala boi mangolu salelengna. (Jaha Johannes 6:​39, 40.) Pikkirhon ma kesempatan aha do na boi didapot keluarga dohot akka donganmuna naung mate. Sian hata ni Jesus on, takkas ma taboto godang do halak naung mate na lao dipahehe haduan, jala boi ma  hamu dohot keluargamuna mangolu salelengna. Alai adong do hata ni Jesus na di Johannes 6 i na maol diattusi godang halak sahat tu saonari. Aha ma i?

3. Songon na dipaboa di Johannes 6:​51, aha do na didok Jesus taringot dirina?

³ Dung diparade Jesus roti tu na torop i, gabe diingot nasida do manna na dilehon Jahowa tu halak Israel tikki di padang belantara. Di Surat na Badia, didok do manna i “roti sian banua ginjang”. (Joh. 6:31) Jadi dipakke Jesus ma contoh manna i lao mangajarhon hasittongan na massai penting tu nasida. Dipatorang Jesus do dang sarupa manna i tu dirina. Alana nang pe manna i sian Jahowa, tong do mate akka halak na mangallang i. (Joh. 6:49) Alai didok Jesus do dirina “roti na sittong sian banua ginjang”, “roti na sian Debata”, jala “roti hangoluan”. Dung i didok ibana ma, “Manang ise na mangallang roti on, mangolu ma ibana saleleng ni lelengna.” (Joh. 6:​32, 33, 35; jaha Johannes 6:51) Gabe bingung ma akka halak Jahudi i. Dang diattusi nasida boasa didok Jesus dirina roti na sian banua ginjang, jala boasa dumenggan roti i sian manna na dilehon Debata tu akka ompu ni nasida. Dung i didok Jesus ma tu nasida, “Roti silehonokku, i ma dagingku.” Aha do maksud ni Jesus? Ikkon taboto do lapatan ni hata ni Jesus i. Alana sian on taboto ma, boi do hita dohot halak na tahaholongi mangolu salelengna. Saonari tabahas ma taringot i.

ROTI HANGOLUAN DOHOT DAGINGNA

4. Boasa tarsonggot piga-piga halak mambege hata ni Jesus?

⁴ Tarsonggot ma piga-piga halak Jahudi na mambege hata ni Jesus i. Alana didok Jesus ‘naeng lehononna ma dagingna asa mandapot hangoluan portibi on’. Dirippu nasida do ra na disuru Jesus nasida mangallang dagingna. (Joh. 6:52) Parrohahon ma hata ni Jesus muse na mambahen lam songgot roha ni nasida, “Molo dang diallang hamu daging ni Anak ni jolma i jala dang diinum hamu mudarna, dang dapotmuna hangoluan.”—Joh. 6:53.

5. Na disuru Jesus do halak Jahudi mangallang dagingna manang manginum mudarna? Patorang ma.

⁵ Di jaman ni si Noak, diorai Jahowa do jolma mangallang mudar. (1 Mus. 9:​3, 4) Songon i do tong na didok Jahowa tu halak Israel, “ikkon dipamate” do manang ise na mangallang mudar. (3 Mus. 7:27) Dijujui Jesus do tong halak Jahudi asa mangihutton patik ni Debata i. (Mat. 5:​17-19) Jadi dang mungkin disuru Jesus halak Jahudi mangallang dagingna manang manginum mudarna. Sebenarna sian hata ni Jesus i, Jesus naeng mangajarhon songon dia carana asa boi mandapot ‘ngolu salelengna’.—Joh. 6:54.

6. Boasa boi tadok bahasa kiasan do hata na dipakke Jesus di Johannes 6:53?

⁶ Tikki makkatai Jesus dohot na torop i di Kapernaum, mamakke bahasa kiasan do ibana. Sarupa ma i tikki makkatai ibana dohot borua Samaria. Didok ibana, “Manang ise na manginum aek na hulehon, dang mauas be. Ai aek na hulehon tu ibana gabe songon mata mual ma i di bagasan dirina, na mangalehon hangoluan na saleleng ni lelengna.” (Joh. 4:​7, 14) b Alai dang na berarti gabe boi borua i mangolu salelengna holan ala manginum aek sian sumur i. Songon i ma tong hata ni Jesus tu akka halak di Kapernaum. Dang na berarti boi nasida mangolu salelengna holan ala mangallang daging ni Jesus dohot manginum mudarna.

 SARUPA HATANA ALAI BERBEDA PERISTIWANA

7. Aha do na didok piga-piga halak taringot hata ni Jesus di Johannes 6:53?

⁷ Piga-piga halak mandok hata ni Jesus di Johannes 6:53 paboahon aha na ikkon diulahon akka na ro tu Borngin Parningotan. Ala menurut nasida, sarupa do hata na dipakke Jesus di ayat i tu na dihatahon ibana di Borngin Parningotan i. (Mat. 26:​26-28) Didok nasida, sude na ro tu Borngin Parningotan i ikkon mangallang roti jala manginum anggur na diedarhon disi. Toho do i? Porlu do taboto alus ni on. Alana ganup taon, marjuta do halak di liat portibi on na ro tu Borngin Parningotan rap dohot hita. Alai memang sarupa do hata ni Jesus di Johannes 6:53 i tu hatana tikki di Borngin Parningotan i? Tabahas ma alusna.

8. Aha do perbedaan ni hata ni Jesus di Johannes 6:53 dohot hatana di Borngin Parningotan? (Ida gambar.)

⁸ Adong dua perbedaanna. Na parjolo, didia jala nandigan do Jesus tikki mandok hatana na di Johannes 6:​53-56? Didok ibana do hatana i di Galilea di taon 32 M, hira-hira sataon andorang so dibahen ibana Borngin Parningotan di Jerusalem. Na paduahon, tu ise do hata ni Jesus i? Tu akka halak di Galilea na holan lao mandapot sipanganon sian ibana, alai dang olo marsiajar taringot Jahowa manang Harajaonna. (Joh. 6:26) Ala maol do diattusi nasida hata ni Jesus  i, dang olo be nasida manangihon Jesus. Bahkan adong do piga-piga siseanna na maninggalhon ibana. (Joh. 6:​14, 36, 42, 60, 64, 66) Alai dang songon i molo 11 apostel ni Jesus i. Nang pe dang diattusi nasida dope aha maksud ni Jesus, toktong do nasida setia. Hira-hira sataon dukkon i, rap do nasida dohot Jesus di Borngin Parningotan taon 33 M. Pos do roha ni akka apostel i, Jesus do Anak ni Debata na sian surgo. (Mat. 16:16) Alani i ma didok Jesus tu nasida, “Dang hea ditinggalhon hamu au tikki susa au.” (Luk. 22:28) Jadi dua perbedaan on patuduhon hata ni Jesus di Johannes 6:53 i dang na lao paboahon taringot aha na ikkon diulahon di Borngin Parningotan. Saonari tabahas ma muse perbedaan na asing.

LAPATAN NI HATA NI JESUS I TU HAMU

9. Tu ise do hata ni Jesus na didok ibana di Borngin Parningotan i?

⁹ Di Borngin Parningotan i, diedarhon Jesus ma roti na so marragi tu akka apostelna. Didok ibana ma tu nasida, roti i manggombarhon dagingna. Dung i diedarhon ibana ma tong anggur. Didok ma tu nasida, anggur i manggombarhon “mudar na mambahen sah parjanjian” i. (Mrk. 14:​22-25; Luk. 22:20; 1 Kor. 11:24) Didok Jesus do i “parjanjian na imbaru”. Alana parjanjian on dang tu sude jolma dibahen, alai holan tu akka halak na lao mamaretta dohot Jesus di Harajaon ni Debata do. (Heb. 8:​6, 10; 9:15) Di tikki i dang diattusi akka apostel i dope aha lapatan ni parjanjian i. Alai dang leleng dukkon i, naeng dimiahi ma nasida marhite tondi parbadia, gabe bagian sian parjanjian i, jala rap mamaretta dohot Jesus di surgo.—Joh. 14:​2, 3.

10. Aha do muse perbedaan ni hata ni Jesus tikki di Borngin Parningotan dohot hatana tikki di Galilea? (Ida gambar.)

¹⁰ Hata ni Jesus di Borngin Parningotan i marlakku tu “punguan na metmet”. Akka apostel na rap dohot ibana di Borngin Parningotan i ma na parjolo gabe bagian sian punguan na metmet i. (Luk. 12:32) Holan nasida dohot akka halak na lao gabe bagian sian punguan na metmet i do na boi mangallang roti dohot manginum anggur di Borngin Parningotan. Jala nasida ma na lao mamaretta dohot Jesus di surgo. Jadi on ma muse perbedaan ni hata ni Jesus di Borngin Parningotan i dohot na di Galilea. Na didok Jesus di Borngin Parningotan i marlakku holan tu punguan na metmet. Alai hata ni Jesus na di Galilea i marlakku tu godang halak.

11. Aha do na didok Jesus di Galilea jala tu ise do hatana i?

¹¹ Tikki di Galilea Jesus taon 32 M, godangan halak na ro tusi holan lao mangido sipanganon do sian ibana. Alai berupaya do Jesus mangurupi nasida mangattusi adong do muse na uppetting sian sipanganon i. Dipaboa ibana ma, adong do sipanganon na boi mambahen nasida mangolu salelengna. Jala didok Jesus do muse, na lao dipahehe do akka naung mate di ari parpudi jala boi mangolu salelengna. Jadi pasu-pasu na dipaboa Jesus di Johannes 6 on, dang sarupa tu pasu-pasu na dipaboa ibana tu punguan na metmet di Borngin Parningotan. Alana tikki di Galilea, dipaboa Jesus do taringot pasu-pasu na boi dapot ni sude halak. Didok ibana, “Manang ise na mangallang roti on, mangolu ma ibana saleleng ni lelengna. Roti silehonokku, i ma dagingku, na naeng lehonokku asa mandapot hangoluan portibi on.”—Joh. 6:51.

12. Aha do na porlu taulahon asa boi mangolu salelengna?

 ¹² Tikki didok Jesus hatana na di Galilea, na gabe otomatis do sude halak boi mangolu salelengna? Daong. Holan akka halak na “mangallang roti” i do, i ma akka halak na patuduhon haporseaon tu Jesus. Saonari godang do halak na mangakku Kristen mandok, molo nga ‘porsea tu Jesus’ jala diakkui nasida Jesus i sipalua, boi ma nasida malua. (Joh. 6:29) Alai cukkup do holan i? Daong. Alana godang do halak na di Galilea i mulana porsea tu Jesus. Alai ujungna ditinggalhon nasida do Jesus. Boasa?

13. Aha do na porlu diulahon asa boi gabe sisean ni Jesus?

¹³ Diihutton akka halak pe Jesus di tikki i holan asa dapot ni nasida do lomo ni roha ni nasida. Misalna asa dipamalum, dilehon sipanganon, jala manangihon ajaran na holan dihalomohon roha ni nasida. Alani i dipatorang Jesus ma tu nasida, tujuanna ro tu tano on dang holan lao mangalehon lomo ni roha ni nasida. Alai tujuanna lao mangajarhon aha na porlu diulahon nasida asa boi gabe siseanna. Didok Jesus, porlu do nasida “ro” tu ibana. Lapatanna, ikkon ditangihon nasida do Jesus jala ikkon dioloi nasida do sude na diajarhonna.—Joh. 5:40; 6:44.

14. Aha do na ikkon taulahon asa tadapot manfaat sian tobusan ni Jesus?

¹⁴ Diajarhon Jesus do tu nasida, massai penting do patuduhon haporseaon tu tobusan. Alana nungnga dilehon Jesus  dagingna dohot mudarna asa boi nasida mangolu salelengna. Ikkon porsea do akka halak Jahudi i tu tobusan ni Jesus, songon i ma nang hita saonari. (Joh. 6:40) Jadi, na didok Jesus di Johannes 6:53 i maksudna ikkon porsea do hita tu tobusan asa boi mangolu salelengna. Jala sude do jolma boi mandapot pasu-pasu on.—Eps. 1:7.

15-16. Parsiajaran aha do na tadapot sian Johannes bindu 6?

¹⁵ Godang do parsiajaran na massai penting na tadapot sian Johannes bindu 6, jala on boi patoguhon haporseaotta. Gabe taboto ma na massai holong do roha ni Jesus tu jolma. Tikki di Galilea, dipamalum ibana do akka na marsahit, diajarhon do tu nasida taringot Harajaon ni Debata, jala dilehon do kebutuhan ni nasida. (Luk. 9:11; Joh. 6:​2, 11, 12) Alai na uppetting diajarhon do tu nasida, ibana do “roti hangoluan” i.—Joh. 6:​35, 48.

¹⁶ Memang akka halak na gabe bagian sian ‘biru-biru na asing’ dang boi mangallang roti dohot manginum anggur di Borngin Parningotan. (Joh. 10:16) Alai boi do dapot ni nasida manfaat sian daging dohot mudar ni Jesus Kristus. Carana, ikkon porsea do nasida tu tobusan ni Jesus. (Joh. 6:53) Alai akka halak na mangallang roti dohot manginum anggur i, dohot do nasida tu parjanjian na imbaru jala na lao mamaretta do nasida di surgo. Jadi dang soal na miniahan manang biru-biru na asing, massai penting do taparsiajari na disurat di Johannes bindu 6. Sai anggiat ma toktong hita patuduhon haporseaon tu Jesus jala mandapot hangoluan na salelengna.