1. Boasa roti i penting di akka halak na disurat di Bibel?

 DI JAMAN ni akka halak na disurat di Bibel, roti do sipanganon na utama. (1 Mus. 14:18; Luk. 4:4) Buktina, dipakke do hata “roti” piga-piga hali di Bibel lao mangartihon sipanganon. (Mat. 6:​11, surat na di toru) Asing ni i, hea do dibahen Jesus dua mukjizat mamakke roti. (Mat. 16:​9, 10) Boi ma taboto taringot sada sian mukjizatna i di Johannes bindu 6. Tikki tabahas taringot on, tadapot ma parsiajaran na boi taulahon di tikkitta saonari.

2. Boasa porlu diparade sipanganon di tikki i?

² Dung sae marbarita na uli, loja hian do akka apostel ni Jesus. Jadi ditogihon Jesus ma nasida asa istirahat. Lao ma nasida marparau jala menyeberangi Laut Galilea. (Mrk. 6:​7, 30-32; Luk. 9:10) Sahat ma nasida di inganan na lungun di Betsaida. Hape nungnga adong marribu halak disi, jala naeng pajuppang do nasida dohot Jesus. Nang pe songon i, dijakkon Jesus do nasida. Dilehon Jesus do tikkina lao mangajarhon taringot Harajaon ni Debata, jala pamaluppon akka na marsahit. Ala nungnga botari, gabe bingung ma akka siseanna songon dia lao mangalehon mangan marribu halak na ro i. Memang, adong do piga-piga halak na mamboan sipanganon. Alai godangan sian nasida ikkon lao do tu akka huta na jonok sian i lao manuhor sipanganon. (Mat. 14:15; Joh. 6:​4, 5) Jadi, aha do na diulahon Jesus?

PARADEHON ROTI MARHITE MUKJIZAT

3. Aha do na didok Jesus lao ulahonon ni akka apostelna? (Ida sampul.)

³ Didok Jesus ma tu akka apostelna, “Dang pola lao nasida, lehon hamu ma nasida mangan.” (Mat. 14:16) Alai dang mungkin  boi dilehon nasida mangan sude na ro i. Alana, holan akka bawa pe adong 5.000 halak, asing dope akka borua dohot dakdanak. Molo dietong sude, hira-hira 15.000 halak ma nasida. (Mat. 14:21) Alai ro ma si Andreas tu Jesus. Didok ibana ma, “Adong do sahalak dakdanak bawa dison, na mamboan lima roti barli dohot dua dekke na gelleng. Alai dia ma cukkup i tu akka jolma on?” (Joh. 6:9) Najolo, jotjot do akka halak mangallang roti barli dohot dekke na gelleng naung disirai jala naung dipakoring. Alai, dang cukkup lima roti barli dohot dua dekke na gelleng i lao allangon ni sude na ro i.

4. Aha do na taparsiajari sian Johannes 6:​11-13? (Ida gambar.)

⁴ Disuru Jesus ma akka na ro i hundul sasapunguan di duhut-duhut. (Mrk. 6:​39, 40; jaha Johannes 6:​11-13.) Sebelum dibagihon roti dohot dekke i, jolo martangiang do Jesus mandok mauliate tu Jahowa. Na diulahon Jesus on patuduhon sian Jahowa do sipanganon i, jala massai diargai ibana do i. Dung i, disuru Jesus ma asa dibagihon akka siseanna roti dohot dekke i, jala butong ma sude na ro i. Hape godang dope lobi sipanganon i jala dang olo Jesus gabe bolong i. Alani i, disuru Jesus ma akka siseanna papunguhon sipanganon i asa boi diallang muse. Contoh na denggan do na dibahen Jesus i. Ikkon jolo martangiang do hita sebelum mangan, dang soal tikki sahalakta manang tikki adong halak na asing. Hamu akka natua-tua, pakke ma contoh on lao mangajari gellengmuna asa martangiang sebelum mangan, burju tu na asing, jala olo berbagi.

5. (a) Boha do reaksi ni akka halak dung mangida mukjizat na dibahen Jesus i? (b) Boha do tanggapan ni Jesus?

 ⁵ Longang do akka halak mangida akka mukjizat na dibahen Jesus jala denggan cara ni ibana mangajari. Diboto nasida, hea do didok si Musa na lao adong dipillit Debata sahalak panurirang na songon si Musa. Alani i, gabe didok roha ni nasida ma, ‘Jesus on do panurirang i?’ (5 Mus. 18:​15-18) Ra berharap do nasida asa Jesus na gabe pamimpin ni nasida. Alana sanggup do ibana mangalehon mangan sude halak Israel. Alani i ma gabe “naeng paksaon ni nasida [Jesus] gabe raja”. (Joh. 6:​14, 15) Molo dioloi Jesus pangidoan ni nasida i, gabe terlibat ma ibana tu urusan politik ni halak Jahudi. Hape di tikki i, Rom do na mamaretta nasida. Jadi aha do na diulahon Jesus? Didok di Bibel, ‘lao ma ibana sahalakna tu dolok’. Nang pe dipaksa Jesus, dang olo ibana terlibat tu urusan politik. Contoh na massai denggan do on tu hita.

6. Songon dia do caratta maniru Jesus? (Ida gambar.)

⁶ Memang, dang hea dipangido halak tu hita asa tabahen sipanganon marhite mukjizat, tapamalum na marsahit, manang dipangido hita asa gabe pamimpin. Alai olo do ra dijujui nasida hita mamillit manang mendukung sasahalak, na didok roha ni nasida boi gabe pamimpin na denggan. Tatiru ma Jesus. Dang olo Jesus terlibat tu urusan politik. Bahkan didok ibana do, “Dang sian portibi on Harajaokku.”  (Joh. 17:14; 18:36) Ikkon tatiru do cara marpikkir ni Jesus dohot tindakanna. Tadukung ma Harajaon ni Debata, tapaboa ma i tu na asing, jala tatangiakkon ma i asa ro. (Mat. 6:10) Saonari, tabahas ma parsiajaran na asing sian mukjizat ni Jesus tikki paradehon roti i.

“LAPATAN NI TANDA HALONGANGAN NA DIBAHEN TU AKKA ROTI I”

7. Aha do na diulahon Jesus, jala boha do reaksi ni akka apostelna? (Joh. 6:​16-20)

⁷ Dung dilehon Jesus mangan akka na ro i, lao ma akka apostelna marparau tu Kapernaum. Alai molo Jesus, lao do ibana tu dolok ala dipaksa ibana asa gabe raja. (Jaha Johannes 6:​16-20.) Tikki marparau akka apostel i, ro ma alogo na massai gogo, gabe balga ma galumbang ni laut i. Dung i, ro ma Jesus mandapotton nasida, mardalan di atas ni aek. Disuru Jesus ma tong si Petrus asa dohot mardalan di atas ni aek i. (Mat. 14:​22-31) Dung naik Jesus tu parau i, pittor so ma badai i. Gabe didok akka siseanna ma, “Tutu do ho Anak ni Debata.” a (Mat. 14:33) Alai, dung diida nasida do Jesus mardalan di atas ni aek baru pe didok nasida songon i. Hape tikki diparade Jesus sipanganon marhite mukjizat, dang didokkon nasida songon i. Parrohahon ma aha na didok si Markus taringot on. Didok ibana, “Longang ma [akka apostel i], ai dang diattusi nasida dope aha lapatan ni tanda halongangan na dibahen tu akka roti i, jala maol do i diattusi nasida.” (Mrk. 6:​50-52) Dang diattusi akka sisean i naung dilehon Jahowa huaso na massai balga tu Jesus. Jadi boi do diulahon Jesus akka ulaon na asing na luar biasa, dang holan paradehon roti marhite mukjizat. Dung i, dipaboa Jesus ma muse parsiajaran na asing sian mukjizatna i.

8-9. Boasa dilului na torop i Jesus? (Joh. 6:​26, 27)

⁸ Di ari na mangihut, ro ma muse akka halak na dilehon Jesus mangan i tusi. Hape dang disi be Jesus dohot akka apostelna. Alani i, borhat ma nasida mamakke parau na sian Tiberias lao mangalului Jesus di Kapernaum. (Joh. 6:​22-24) Boasa dilului nasida Jesus? Na naeng manangihon barita na uli taringot Harajaon ni Debata do nasida? Daong. Holan lao mandapot sipanganon do umbahen na dilului nasida Jesus. Sian dia taboto?

⁹ Taparrohahon ma na terjadi dung pajuppang nasida dohot Jesus di jonok ni Kapernaum. Terus terang do Jesus mandok tu nasida, holan lao mandapot sipanganon do nasida umbahen na ro mandapotton Jesus tusi. Nang pe ‘nungnga butong nasida mangallang roti i’, alai didok Jesus “sipanganon na olo busuk” do na diallang nasida i. Alani i ma dijujui Jesus nasida asa mangalului “sipanganon na so olo busuk na parohon hangoluan saleleng ni lelengna”. (Jaha Johannes 6:​26, 27.) Didok Jesus, Jahowa do na lao paradehon sipanganon i. Gabe longang ma nasida. Sipanganon aha do na boi parohon hangoluan salelengna? Jala songon dia do akka halak boi mandapot sipanganon i?

10. Aha do na ikkon diulahon na torop i asa dapot ni nasida hangoluan na salelengna?

¹⁰ Lomo do roha ni akka halak Jahudi i mamboto boha carana asa dapot ni nasida sipanganon i. Ra dirippu nasida ikkon mangulahon Patik ni si Musa do nasida. Alai didok Jesus ma, “Ikkon dipatudu hamu do na porsea hamu tu halak na sinuruna i. Songon i ma carana mangulahon ulaon na sian Debata.” (Joh. 6:​28, 29) Sebelumna hea do dipaboa Jesus, asa boi dapot ni sasahalak ‘hangoluan  na salelengna’, ikkon porsea do ibana tu halak na sinuru ni Debata. (Joh. 3:​16-18, 36) Jala di pudian ni ari pe, dipaboa Jesus do muse aha na ikkon taulahon asa tadapot hangoluan na salelengna.—Joh. 17:3.

11. Aha do na patuduhon molo akka halak Jahudi i holan mamikkiri sipanganon? (Psalmen 78:​24, 25)

¹¹ Dang olo akka halak Jahudi i porsea tu Jesus. Disukkun nasida ma Jesus, “Aha ma tanda halongangan na lao bahenonmu di jolonami asa porsea hami tu ho?” (Joh. 6:30) Dung i didok nasida ma molo di jaman ni si Musa, diparade do manna marhite mukjizat lao allangon ni akka ompu ni nasida ganup ari. (Neh. 9:15; Joh. 6:31; jaha Psalmen 78:​24, 25.) Takkas ma, holan sipanganon do na dipikkiri nasida. Dung i dipaboa Jesus ma taringot “roti na sittong sian banua ginjang”. Dang sarupa roti i tu manna. Alana roti i boi parohon hangoluan na salelengna. (Joh. 6:32) Jadi ala holan sipanganon do na dipikkiri nasida, gabe dang tertarik be nasida lao mamboto lapatan ni hata ni Jesus i. Aha ma parsiajaranna tu hita?

NA UPPETTING DI NGOLUTTA

12. Aha do na uppetting di Jesus?

¹² On ma parsiajaran na penting na tadapot sian Johannes bindu 6. Tabahen ma hubungatta tu Jahowa na uppetting di ngolutta, jala toktong ma taoloi Ibana. Tikki Jesus digoda Sibolis, dipatudu ibana do na dibahen ibana hubunganna tu Jahowa na uppetting di ngoluna sian sipanganon. (Mat. 4:​3, 4) Jala tikki dipasahat Jesus Jamita di Dolok, diajarhon ibana do tu akka halak na massai penting marale-ale tu Debata. (Mat. 5:3) Jadi tasukkun ma diritta, ‘Sian parniulaokku ganup ari, tarida do na hubahen hubungakku tu Jahowa na uppetting sian manang aha pe?’

13. (a) Boasa dang sala menikmati sipanganon? (b) Sipasingot aha do na dilehon si Paulus tu hita? (1 Korint 10:​6, 7, 11)

¹³ Memang, dang sala molo tapangido tu Jahowa akka na tahaporluhon jala tanikmati sudena i. (Luk. 11:3) Didok do di Bibel, denggan do molo ‘mangan, minum, jala marlas ni roha alani sude halojaotta. Alana sian Debata na sittong do i’. (Pjm. 2:24; 8:15; Jak. 1:17) Alai ikkon manat do hita. Unang ma tabahen arta na uppetting di ngolutta. On ma na dipaboa Apostel Paulus tu halak Kristen di abad na parjolo. Alana di tikki i, naeng dihancurhon nama Jerusalem dohot bagas joro. Dipaboa ibana ma tu nasida taringot halak Israel tikki di padang belantara, termasuk ma na diulahon halak Israel di Dolok Sinai. Dipasingot si Paulus do halak Kristen di tikki i ‘asa unang lomo roha ni nasida tu akka ulaon na jahat songon na dihalomohon [halak Israel]’. (Jaha 1 Korint 10:​6, 7, 11.) Tikki i, dibahen Jahowa do mukjizat lao paradehon sipanganon tu halak Israel. Alai, ala massai mokkus nasida, gabe parohon jea ma i tu nasida. (4 Mus. 11:​4-6, 31-34) Jala tikki disomba nasida anak ni lombu na sian mas, tarida ma na uppetting do di nasida sipanganon, siinumon, dohot ulaon marsonang-sonang sian mangoloi Jahowa. (2 Mus. 32:​4-6) Aha ma parsiajaranna tu hita? Saonari, hita pe nungnga jonok tu ujung ni ari parpudi on. Jadi unang ma tabahen kesalahan na sarupa songon na dibahen halak Israel najolo.

14. Aha do na didok Bibel taringot sipanganon di tano na imbaru?

¹⁴ Diajari Jesus do hita asa martangiang songon on, ‘Lehon ma di hami sipanganonnami sadari on.’ Jala diajari Jesus do tong hita asa tapangido saut lomo ni roha ni Debata “di tano on songon na di banua ginjang”. (Mat. 6:​9-11) Molo dung saut annon lomo  ni roha ni Debata, boha do ngolutta di tano on? Didok di Bibel, boi ma tanikmati godang sipanganon na tabo. Misalna songon na disurat di Jesaya 25:​6-8, gok do annon sipanganon na massai tabo na boi tanikmati di Harajaon ni Jahowa. Didok do muse di Psalmen 72:​16, “Godang ma tubu sipanganon di ladang, haru di pussu ni dolok pe godang do tubu suan-suanan.” Tarpaima do hamu boi annon bahenonmuna sipanganon na dihalomohon rohamuna, manang sipanganon na so hea dope dibahen hamu sebelumna? Asing ni i, boi do tong hamu mambahen ladang anggurmuna jala menikmati parbuena. (Jes. 65:​21, 22) Sude do jolma di tano on boi menikmati pasu-pasu i.

15. Aha do na lao diparsiajari akka halak na dipahehe haduan? (Joh. 6:35)

¹⁵ Jaha Johannes 6:35. Taingot ma muse akka halak na dohot mangallang roti dohot dekke na diparade Jesus i. Memang najolo dang dipatudu nasida haporseaon tu Jesus. Alai dilehon do kesempatan tu nasida lao dipahehe. Olo do ra pajuppang annon hita dohot piga-piga sian nasida. (Joh. 5:​28, 29) Alai dung dipahehe, porlu do diattusi nasida hata ni Jesus na mandok, “Au do roti hangoluan i. Manang ise na ro tu au dang na lao male be.” Ikkon porsea do nasida tu tobusan ni Jesus Kristus. Jala di tikki i, sude halak na dipahehe dohot akka dakdanak na tubu di tano na imbaru, porlu diajari taringot Jahowa dohot sakkapna. Pasti las situtu do rohatta mangajari nasida haduan. Alana unggodang do las ni roha tikki mangurupi akka halak marale-ale tu Jahowa sian apala menikmati godang sipanganon na tabo di tano na imbaru.

16. Aha do na lao tabahas di artikel na mangihut?

¹⁶ Nungnga tabahas be piga-piga parsiajaran sian Johannes bindu 6. Alai godang dope na diajarhon Jesus taringot ‘hangoluan na salelengna’ i. Massai penting do i diattusi halak Jahudi di tikki i, songon i ma nang hita saonari. Jadi di artikel na mangihut, tabahas ma parsiajaran na asing sian Johannes bindu 6.