Taon 1927 ma au tubu di sada kota na gelleng jonok ni Chicago, Illinois, Amerika Serikat. Lima ma hami marhaha maranggi, i ma si Jetha, si Don, au, si Karl, dohot si Joy. Marsitutu do hami asa toktong setia melayani Jahowa. Itokku na siakkangan, si Jetha, dohot do ibana tu Sikkola Gilead kelas paduahon taon 1943. Molo si Don, si Karl, dohot itokku siappudan si Joy melayani di Betel Brooklyn, New York. Si Don melayani mulai taon 1944, si Karl taon 1947, jala si Joy taon 1951. Semangat do nasida sude, termasuk ma bapak dohot omak. Lomo do rohakku asa boi songon nasida.

Ringgas do omak dohot bapakku manjaha Bibel. Holong hian do roha ni nasida tu Debata, jala diurupi nasida do tong hami asa makkaholongi Debata. Alai dung gabe tentara bapakku di Eropa saleleng Perang Dunia I, dang olo be ibana tu gareja. Mulak ma bapakku sian tugasna jala selamat do ibana. Las hian ma roha ni omak. Alani i, didok omakku ma tu bapak, “Pak, beta marminggu muse songon na uju i.” Alai didok bapak ma, “Hutaruhon pe ho annon, alai dang pola dohot au masuk da.” Disukkun omaknami ma, “Boasa?” Didok bapak, “Ho ma jo. Tikki di parporangan i, hubereng do akka pandita sian sada agama manangiakkon dua kelompok tentara na lao marporang. Na dia ma sian na dua kelompok i na didukung Debata?”

Sada tikki, ro ma dua Saksi Jahowa tu jabunami, hape pas lao omak tu gareja. Dilehon nasida ma tu bapak bukku na marjudul Light. Boi do bukku on dipakke lao marsiajar Bibel. Dua jilid ma bukku i, jala isina mambahas bukku Pangungkapon. Dijalo bapak ma bukku i jala lomo do rohana. Dung mulak omak, diida ibana ma dua bukku i jala dijaha ma i. Sada tikki pas lagi manjaha koran omak, diida ibana ma adong undangan lao marsiajar Bibel mamakke bukku Light i, jala lao dibahen ma i di jabu ni sahalak Saksi. Lao ma omak tusi. Dung sahat ibana, adong ma sahalak borua na matua na mambukkahon pintu. Dipatudu omak ma bukku i jala disukkun ma, “Hamu do na mangurupi akka halak mamparsiajari bukku on?” Didok borua i ma, “I do inang, masuk ma.” Saminggu dukkon i diboan omak ma hami na lima tusi, jala marsiajar ma hami ganup minggu.

Sada tikki, hea ma dipangido guru studinami au manjahahon Psalmen 144:15. Didok di ayat i, marlas ni roha do halak na manomba Jahowa. Terkesan do au tikki manjaha ayat i dohot dua ayat na  asing, i ma 1 Timoteus 1:11. Didok disi, “Debata na marlas ni roha” do Jahowa. Jala ayat na sada nai Epesus 5:1. Di ayat i, dijujui do hita asa ‘maniru Jahowa’. Sian on, gabe huboto ma adong dua na ikkon huulahon. Na parjolo, ikkon sian nasa rohakku do au manomba Jahowa jala parohon las ni roha do i. Na paduahon, ikkon huargai do hasangapon boi gabe sisomba Jahowa. Marsitutu do au mangulahon na dua on saleleng ngolukku.

Huria na unjonok sian jabunami adong di kota Chicago, 32 kilometer ma i sian kotanami. Nang pe songon i, tetap do hami marpungu jala martamba do torus parbinotoakku taringot Bibel. Huingot ma, hea di sada tikki martudu itokku si Jetha. Tikki hubege komentarna i, didok rohakku ma, ‘Ehe, boasa ma dang martudu au nakkin ate. Huboto do i alusna.’ Mulai sian i, sai persiapan do au asa boi mangalehon komentar. Lam leleng lam togu ma hubungakku tu Jahowa, songon i nang haha anggikku. Ujungna, tardidi ma au taon 1941.

Dohot do au tikki dibahen kebaktian di Cleveland, Ohio, taon 1942. Dang tarhalupahon au na masa di tikki i. Saleleng di kebaktian i, di perkemahan do hami modom. Adong do tong akka dongan na dohot tu acara i marhite telepon di lobi sian 50 lokasi di Amerika Serikat. Di tikki i, masa dope Perang Dunia II jala lam tamba do godang ni dongan na dianiaya. Di tikki borngin, diparkirhon akka dongan ma mobilna di jolo ni perkemahan i. Alai bagian ni jolo ni mobil i mengarah tu luar ni perkemahan i. Diatur do asa adong na jaga malam di ganup mobil. Jadi molo adong na ro menyerang perkemahan i, dipangolu na jaga malam i ma lampu ni mobilna asa silau diida na menyerang i. Dung i, dipangolu nasida ma klakson asa ro akka dongan mangurupi nasida. Sian na masa on, didok rohakku ma, ‘Luar biasa do naposo ni Jahowa on. Sai rade do nasida mangadopi situasi manang aha pe!’ Saleleng na kebaktian i, lancar do acarana, dang adong masalah. Ganup borngin, ala aman hurasa, boi ma au renges modom.

Martaon-taon dukkon i, molo huingot muse na masa di kebaktian i, gabe huingot ma omakku. Pos situtu do rohana tu Jahowa dohot tu organisasina. Dang mabiar ibana di tikki i. Gabe sitiruon do ibana di au.

Nungnga gabe perintis biasa omak andorang so kebaktian i. Jadi molo adong jamita na mambahas taringot dinas sepenuh waktu, manat do i diparrohahon omak. Tikki di pardalanan lao mulak, didok omak ma tu hami, “Lomo hian do rohakku asa torus merintis. Alai annon molo merintis omak, boha ma karejotta di jabu ate.” Jadi didok omak ma asa marsiurupan hami di jabu. Alani i, dilehon ma tu hami tugas lao paiasson jabu andorang so sarapan. Dung borhat hami sikkola, dipastihon omak do nga ias be jabunami manang na daong. Dung i pe lao ibana marbarita. Sibuk hian do omak, alai tetap do denggan diurus ibana hami. Dung mulak hami sikkola, nga diloppa ibana sipanganonnami jala di jabu do ibana paimahon hami. Sipata ditogihon omak do hami dohot marbarita dung mulak sikkola. Gabe diboto hami ma songon dia na merintis i.

Merintis ma au tikki marumur 16 taon. Tikki i, dang Saksi dope bapak. Alai lomo do rohana  mamboto songon dia kemajuanku tikki marbarita. Di sada borngin, hea ma hupaboa tu bapak, dang adong dope parsiajar Bibelhu. Hape nungnga marsitutu au mangalului. Sip ma au satokkin, jala husukkun ma tu ibana, “Olo do bapak marsiajar dohot au?” Marpikkir ma ibana satokkin, jala didok ma olo do ibana. Jadi bapak ma studikku na parjolo. Sada kesempatan na istimewa do i di au!

Marsiajar ma hami mamakke bukku “The Truth Shall Make You Free”. Dung piga-piga tikki, boi hudok dohot do tong bapak mangurupi au asa denggan mamparsiajari isi ni Bibel jala gabe guru na terampil. Di sada borngin, dung dijaha hami sada paragraf, didok bapak ma, “Huattusi do na didokkon di bukku on. Alai aha ma buktina na sittong hatorangan na adong dison?” Dang boi hualusi sukkun-sukkunna i. Jadi hudok ma tu ibana, “Memang dang boi dope hualusi i, pak. Huriset ma jo da. Annon hupaboa pe alusna.” Jala memang dapottu do akka ayat na mendukung hatorangan na adong di bukku i. Jadi mulai sian i, lam jotjot ma au mangariset, asa boi au denggan patorakkon tikki memandu parsiajaran Bibel. Hasilna, lam diattusi hami ma isi ni Bibel, jala diulahon bapak do na diparsiajari ibana. Ujungna, tardidi ma ibana taon 1952.

Dung marumur 17 taon, dang tinggal di jabu ni natua-tuakku be au. Jala di taon i, gabe utusan injil ma itokku si Jetha, a jala abangku si Don melayani di Betel. Lomo hian do roha ni nasida mangulahon tugasna i. Au pe songon halak i ma nian. Jadi mandaftar ma au tu dinas Betel dohot tu Sikkola Gilead. Hupaima ma tudia bahenon ni Jahowa au. Ujungna taon 1946, diundang ma au tu Betel.

Nungnga 75 taon au melayani di Betel. Godang do na huparsiajari dison. Alana marragam do tugas na dilehon tu au. Contohna, huparsiajari do boha carana mancetak bukku, mangurus keuangan, bagian pembelian dohot pengiriman barang. Alai na paling hunikmati saleleng melayani dison, i ma ibadat pagi dohot akka jamita na dipasahat di Betel. Biasana didok do on ceramah Betel.

Godang do tong au marsiajar sian anggikku si Karl. Nungnga di Betel ibana mulai sian taon 1947. Ringgas do si Karl marsiajar Bibel, jala malo do ibana mangajari. Hea ma tikki i lagi mempersiappon jamitakku au. Hupangido ma asa diajari ibana au. Hudok ma tu ibana, nungnga godang huriset bahan lao tu jamitakkon. Alai, gabe bingung do au na dia na lao pakkeonku sian akka bahan i. Jadi disukkun si Karl ma au, “Aha do haroa tema ni jamitami, bang?” Pittor huattusi ma maksud ni si Karl on. Dang porlu hape sude bahan i hupakke. Holan akka na adong hubunganna tu tema ni jamita i ma na porlu. Dang tarhalupahon au saran ni si Karl i.

 Asa tetap hita marlas ni roha melayani di Betel, ikkon ringgas do tong hita marbarita na uli. Alana pasti godang do pengalaman na patoguhon na dapotta sian ulaon marbarita. Huingot ma tikki i sore-sore, marbarita ma au dohot sahalak donganta di daerah Bronx di New York City. Pajuppang ma hami dohot sahalak borua na hea mandapot majalah Joujou Paboahon dohot Dungo ma! Didok hami ma tu borua i, “Sadari on, las do rohanami paboahon barita na uli sian Bibel.” Didok borua i ma, “Oh boi, masuk ma hamu.” Dijaha jala dibahas hami ma piga-piga ayat taringot Harajaon ni Debata dohot tano na imbaru. Las hian ma roha ni borua i. Bahkan di minggu na mangihut, ditogihon ibana ma piga-piga donganna asa dohot manangihon. Ujungna, gabe Saksi do borua i dohot suamina.

Adong do rencanakku menikah. Alai sappulu taon ma hupaima baru pe pajuppang au dohot istrikku. Aha ma na mangurupi au asa boi dapottu istri na burju? Martangiang ma au tu Jahowa jala manat ma hupikkirhon, ‘Aha do annon na uppetting di ngolunami molo dung menikah hami?’

Tikki kebaktian di Yankee Stadium taon 1953, pajuppang ma au tu sahalak donganta borua na margoar si Mary Aniol. Sakalas do ibana dohot itokku si Jetha di Sikkola Gilead kelas paduahon. Rap do nasida ditugasson gabe utusan injil di tempat na sarupa. Las hian do roha ni si Mary manceritahon taringot parsiajar Bibelna dohot pengalamanna saleleng melayani di Kepulauan Karibia. Jotjot ma hami komunikasi. Gabe diboto hami ma sarupa do hape cita-cita rohaninami. Mulai ma hami marhallet, jala menikah ma hami di bulan April 1955. Molo di au, hadiah sian Jahowa do si Mary on, jala sitiruon na denggan do ibana di au. Dang soal tugas aha na dilehon tu ibana, sai las do rohana mangulahon i. Ringgas hian do ibana, parduli tu na asing, jala sai diutamahon ibana do Harajaon ni Debata. (Mat. 6:33) Tolu taon ma au melayani gabe pengawas wilayah. Jala di taon 1958, diundang ma hami melayani di Betel.

Godang do au marsiajar sian si Mary. Misalna, tikki baru menikah hami, mulai ma hami rap manjaha Bibel. Dijaha hami ma hira-hira 15 ayat ganup ari. Dung sae dijaha hami akka ayat i, dibahas jala dilului hami ma aha parsiajaranna tu hami. Jotjot do dibagihon si Mary akka na diparsiajarina sian Sikkola Gilead manang sian pengalamanna tikki gabe utusan injil. Sudena i mangurupi au asa lam denggan marjamita. Jala gabe lam huattusi ma boha carana lao patoguhon akka donganta borua.—Poda 25:11.

Di taon 2013, mate ma istrikku si Mary. Hatop ma nian ro tano na imbaru i asa pajuppang au dohot si Mary. Nga masihol hian au tu ibana. Huhut paimahon i, bertekad do au asa torus marsiajar jala patoguhon haporseaokku tu Jahowa. (Poda 3:​5, 6) Jotjot do au mambayakkon aha na lao diulahon naposo ni Jahowa di tano na imbaru. On mambahen las rohakku jala tarapul. Misalna, godang hian ma annon na lao taparsiajari taringot Jahowa, Guru na Sangap i. Mandok mauliate do au tu Jahowa, ala sai diajari Ibana do au saleleng on jala dipatudu Ibana do holongna tu au marhite marragam cara.