1, 2. Songon dia do si Daud patuduhon roha na marsihohot tu Debata? (Ida gombar di mula ni parsiajaran.)

DI TONGA borngin, ro ma si Daud dohot si Abisai mardalan di tongatonga ni 3.000 halak tentara na modom. Di tongatonga ni kemah i, diida nasida ma Raja Saul modom. Ro raja i tu padang pasir Judea laho pamatehon si Daud. Dihusiphon si Abisai ma tu ibana, ”Loas ma ahu manullang ibana dohot mundimundingkon [hujur] tu tano nanggo sahali, ndang pola paduahalionku tu ibana.” Alai didok si Daud ma, ”Unang bunu ibana! Ai tung ise ma hea mangonai tangan tu na miniahan ni Jahowa, laos lias ibana sian uhum? . . . Dao ma anggo sian ahu, ala ni Jahowa, anggo tung ahu mangonai tangan tu na miniahan ni Jahowa.”​—1 Sam. 26:8-12.

² Diboto si Daud do aha lapatanna marsihohot tu Debata. Ndang olo ibana pamatehon si Saul. Boasa? Alana, si Saul, raja ni Israel na miniahan ni Debata. Naposo ni Debata na marsihohot ingkon do pasangaphon halak na miniahan  ni Debata. Dipangido Jahowa do tu sude naposoNa asa patuduhon holong na manongtong.​—Jaha Mika 6:8.

3. Songon dia do si Abisai marsihohot tu si Daud?

³ Diparsangapi jala dipatuduhon si Abisai do roha na marsihohot tu si Daud. Umpamana, asa unang tarboto na mangalangkup ibana, disuru si Daud ma si Joab angkang ni si Abisai pasombuhon si Uria asa mate di parporangan. (2 Sam. 11:2-4, 14, 15; 1 Kron. 2:16) Tontu diboto si Abisai do on, alai tongtong do diparsangapi ibana si Daud ala raja na miniahan. Dung i muse, nang pe si Abisai pemimpin ni tentara, alai ndang dipangke ibana huasona laho mambuat tahta harajaon. Gariada, dipalua do si Daud sian angka musuna.​—2 Sam. 10:10; 20:6; 21:15-17.

4. (a) Sian dia do taboto si Daud marsihohot tu Debata? (b) Angka aha do muse na laho taparsiajari?

⁴ Ndang olo si Daud pamatehon Raja Saul ala marsihohot ibana tu Jahowa. Tingki poso dope ibana, dialo ibana do si Goliat na mangasangi tentara ni Debata. (1 Sam. 17:23, 26, 48-51) Tingki raja si Daud, hea do ibana mangulahon dosa na balga. Alai, marhamubaon do ibana dung dipasingot panurirang Natan. (2 Sam. 12:1-5, 13) Dung matua, tongtong do si Daud marsihohot tu Debata. Umpamana, diparade ibana do angka na porlu laho pajongjongkon bagas joro. (1 Kron. 29:1-5) Nang pe hea si Daud mangulahon dosa, alai sai marsihohot do ibana tu Debata. (Ps. 51:6, 12; 86:2) Saonari, taparsiajari ma angka na masa di ngolu ni si Daud jala talului ma alus ni sungkunsungkun on: Ingkon tu ise do parjolo hita marsihohot? Angka parange aha dope na ringkot laho patuduhon na marsihohot hita tu Debata?

5. Aha do na taparsiajari sian pengalaman ni si Abisai?

⁵ Ala marsihohot tu si Daud, i do umbahen si Abisai naeng mambunu Raja Saul. Alai, ndang diloas si Daud si Abisai mangulahon i, ala diboto ibana na so jadi mangago halak na miniahan ni Jahowa. (1 Sam. 26:8-11) Sian on, tadapot ma parsiajaran na ringkot, i ma: Ingkon prinsip ni Bibel do na taihuthon laho manontuhon tu ise hita parjolo patuduhon roha na marsihohot.

6. Boasa porlu manat laho patuduhon tu ise hita parjolo marsihohot?

⁶ Las do rohanta patuduhon roha na marsihohot tu keluarga manang tu dongan. Alai, roha ni jolma na mardosa jotjot do marangkal. (Jer. 17:9) Alani i, tingki sasahalak na tahaholongi maninggalhon hasintongan, taingot ma ingkon tu Jahowa do hita jumolo patuduhon roha na marsihohot.​—Jaha Mateus 22:37.

7. Songon dia do donganta si Anne marsihohot tu Debata nang pe maol dihilala?

⁷ Boi do gabe maol tahilala patuduhon roha na marsihohot tingki adong keluarganta na maninggalhon hasintongan. Umpamana, sada tingki ditelepon omakna naung maninggalhon hasintongan ma si Anne ^[1] asa boi nasida pajumpang. Masihol omakna i tu keluargana. Lungun do roha ni si Anne mambege i jala marjanji do ibana mambahen surat mangalusi pangidoan ni omakna i. Alai, diida ibana ma angka prinsip ni Bibel andorang so dibahen suratna.  (1 Kor. 5:11; 2 Joh. 9-11) Di suratna i, dipaboa si Anne ma molo omakna i do na manadingkon nasida ala ndang olo marhamubaon. Didok si Anne muse, asa boi mulak tu keluargana, ingkon parjolo ma omakna i mulak tu Jahowa.​—Jak. 4:8.

8. Aha do na boi mangurupi hita patuduhon roha na marsihohot tu Debata?

⁸ Halak na marsihohot tu Debata di tingki ni si Daud, patuduhon parange na boi mangurupi hita laho marsihohot tu Debata, i ma serep ni roha, haburjuon dohot habaranion. Taparsiajari ma sadasada angka parange on.

9. Boasa diurupi si Abner Raja Saul laho mambunu si Daud?

⁹ Diida si Jonatan dohot si Abner panglima ni Raja Saul do si Daud mamboan ulu ni si Goliat tu jolo ni si Saul. Dung i, maraleale ma si Daud dohot si Jonatan jala marpadan nasida. (1 Sam. 17:57–18:3) Alai si Abner, diurupi ibana do si Saul laho mambunu si Daud. Didok si Daud ma, ”Angka halak na jahat naeng mamunu ahu.” (Ps. 54:5, Bibel siganup ari; 1 Sam. 26:1-5) Songon si Jonatan, diboto si Abner do si Daud na laho raja. Boi do si Abner marserep ni roha mangurupi si Daud ndang si Isboset, laho patuduhon na marsihohot ibana tu Debata dung mate si Saul. Boasa imbar si Jonatan sian si Abner maradophon si Daud? Dihalomohon si Abner do tahta harajaon ni Israel, tarida ma i tingki dibuat ibana gundik ni Raja Saul.​—2 Sam. 2:8-10; 3:6-11.

10. Aha do na mambahen si Absalom ndang marsihohot tu Debata?

¹⁰ Ndang marsihohot si Absalom tu Debata ala ndang serep rohana. Dibuat si Absalom do di ibana sandiri sada kareta dohot angka hoda, jala dipillit ma limapulu halak tentara pengawalna. (2 Sam. 15:1) Dibuat ibana roha ni halak Israel. Songon si Abner, naeng do dibunu si Absalom amana si Daud, nang pe diboto ibana Raja Daud na miniahan ni Jahowa.​—2 Sam. 15:13, 14; 17:1-4.

11. Aha do na taparsiajari sian si Abner, si Absalom dohot si Baruk?

¹¹ Songon si Abner dohot si Absalom, na so marserep ni roha jala naeng gabe na umsangap, on boi mambahen sasahalak ndang marsihohot tu  Debata. Tutu do, ndang adong naposo ni Jahowa na holan mamingkirhon dirina sandiri manang mangulahon hajahaton. Alai, ingkon manat do hita asa unang holongan di hepeng dohot hasangapon di portibi on na rumingkot di hita. Si Baruk sekretaris ni si Jeremia, dihalomohon ibana do hasangapon. Alani i, didok Jahowa ma tu si Baruk, ”Ida ma, gari naung hupauli, huloha do muse, jala naung husuan, hubutbut do muse, pola tung sandok tano on! Lam ho ma, tung tama ma angka hatimbulon luluanmu di ho? Unang lulu i!” (Jer. 45:4, 5) Ditangihon si Baruk do Jahowa. Saonari pe, ringkot do tatangihon hata ni Jahowa ala nunga jonok ajal ni portibi na jahat on.

12. Boasa ndang boi hita marsihohot tu Jahowa molo holan mamingkirhon dirinta sandiri? Bahen ma tudosan.

¹² Ingkon pilliton ni si Daniel, sahalak donganta na sian Meksiko, tu ise ibana marsihohot. Naeng dioli ibana borua na so Sitindangi Ni Jahowa. Didok si Daniel, ”Jotjot do hukirim surat tu ibana nang pe naung perintis ahu. Ala huboto nunga sala ahu, hupaserep ma rohangku paboahon tu sintua, dung i diurupi ma ahu. Didok nasida ma, ingkon so do ahu mangkirim surat tu borua i asa boi marsihohot tu Jahowa. Jotjot do ahu martangiang huhut tangis. Alai ujungna, boi ma ahu denggan merintis.” Saonari, nunga marhasohotan si Daniel dohot sahalak Sitindangi jala gabe sintua kaliling.

13. Songon dia do si Natan marsihohot tu si Daud dohot tu Debata?

¹³ Boi do marlaba tu donganta molo marsihohot hita tu Jahowa. Marsihohot do panurirang Natan tu si Daud dohot tu Jahowa. Tingki mangalangkup si Daud jala dibunu si Uria, disuru Jahowa ma panurirang Natan pasingothon si Daud. Barani do ibana jala dioloi Jahowa. Manat do si Natan pasingothon si Daud asa diboto ibana dosana. Dibahen si Natan ma tudosan taringot halak na mora na mambuat birubiru ni sahalak na pogos. Dung dibege si Daud i, muruk ma ibana tu na mora i. Didok si Natan ma tu ibana, ”Ho do baoa i!” Dung i, disolsoli si Daud ma dosana!​—2 Sam. 12:1-7, 13.

14. Songon dia do haburjuon mangurupi hita marsihohot tu Jahowa?

 ¹⁴ Boi do hita marsihohot tu Jahowa dohot tu dongan molo burju hita tu nasida. Umpamana, molo taboto adong donganta mangulahon dosa, naeng do hita marsihohot tu ibana. Tarlumobi molo ibana alealenta manang keluarganta. Alai, ingkon patuduhononta do parjolo na marsihohot hita tu Jahowa. Songon si Natan, burju ma hita mangurupi ibana. Tadok ma asa dipaboa tu angka sintua. Molo ndang olo ibana, hita ma na ingkon paboahon. Molo songon i tabahen, on patuduhon na marsihohot do hita tu Jahowa jala burju tu donganta i ala taboto boi do sintua mangurupi ibana.​—Jaha 3 Musa 5:1; Galatia 6:1.

15, 16. Boasa ingkon barani si Husai laho marsihohot tu Debata?

¹⁵ Ingkon barani do si Husai, aleale ni si Daud laho marsihohot tu Debata. Tingki torop halak Israel mambahen si Absalom raja, tongtong do ibana marsihohot tu Raja Daud. (2 Sam. 15:13; 16:15) Tingki maporus si Daud sian Jerusalem, aha do na diulahon si Husai? Ihuthononna do Raja Daud, manang na urupanna do si Absalom? Nang pe naung matua Raja Daud, marsihohot do si Husai tu ibana. Alana, Jahowa do na mambahen si Daud raja, ro ma si Husai tu Dolok Jetun mandapothon si Daud.​—2 Sam. 15:30, 32.

¹⁶ Disuru si Daud ma si Husai mulak tu Jerusalem jala dibahen ibana songon dongan ni si Absalom asa boi sundatanna hata ni si Ahitopel. Boi do on parohon jea tu ngoluna, alai tongtong do ibana marsihohot tu si Daud dohot tu Jahowa. Ditangihon Jahowa do tangiang ni si Daud, diurupi do si Husai laho manundati hata ni si Ahitopel.​—2 Sam. 15:31; 17:14.

17. Boasa ingkon barani hita asa tongtong marsihohot tu Debata?

¹⁷ Ingkon barani do hita laho marsihohot tu Jahowa asa unang mangihuthon lomo ni roha ni keluarga, dongan karejo manang pamarenta na maralo tu patik ni Debata. Umpamana, si Taro sian Jepang, sian na metmet dipatuduhon ibana do holong na manongtong tu natuatuana jala dioloi ibana do nasida. Las do rohana mambahen sonang roha ni natuatuana. Alai, dung marsiajar Bibel ibana dohot Sitindangi Ni Jahowa, ndang lomo roha ni natuatuana. Mansai lungun do rohana tingki paboahon na ingkon tongtong do ibana marpungu. Didok si Taro, ”Alani muruk ni natuatuangku, ndang dipaloas ahu ro tu jabu saleleng martaontaon. Alai, martangiang do ahu asa tongtong marsihohot tu Debata. Saonari, nunga muba be natuatuangku jala boi ma ahu ro mangida nasida.”​—Jaha Poda 29:25.

18. Aha do na taparsiajari sian artikel on?

¹⁸ Songon si Daud, si Jonatan, si Natan, dohot si Husai, tahilala ma hadameon ala tongtong marsihohot tu Jahowa. Asing ni i, unang ma tatiru si Abner dohot si Absalom na so marsihohot. Taboto do, mardosa dope hita jala jotjot sala. Alai, boi do tapatuduhon na rumingkot do di hita marsihohot tu Jahowa.