INGOT ma aha na hea mambahen las rohamuna. Umpamana, songon dia do pangkilalaanmu tingki marhasohotan, tingki tubu anakhonmuna manang tingki tardidi? Olo do ra, las ni rohamuna na umbalga tingki hamu tardidi. Angka dongan sahaporseaon pe, mansai las do rohana marnida hamu ala rade hamu mangalehon diri tu Jahowa sian nasa roha, gogo dohot pingkiran!​—Mrk. 12:30.

Dung tardidi, ra mansai las do rohamuna. Alai, adong do penyiar na moru las ni rohana manomba Jahowa. Boasa boi masa on? Aha do na mambahen hita boi tongtong marlas ni roha manomba Jahowa?

Ulaon marbarita na uli, boi tongtong mambahen hita marlas ni roha. Boasa? Ala bagabaga ni Jahowa, i ma mambahen tano on inganan na sonang. Dung i muse, Sepania 1:14 paboahon tu hita, ”Jonok na ma ari ni Jahowa na bolon i; jonok na ma i, jala silu situtu do i ro.” Alai, molo palelengku do ari ni Jahowa i sian na tahirim, on mambahen moru las ni rohanta manomba Debata.​—Poda 13:12.

Tingki marsaor dohot dongan sahaporseaonta, on mangurupi hita patoguhon rohanta asa tongtong marlas ni roha manomba Jahowa. Olo do pangkilalaan sisongon on na mangonjar rohanta gabe mananda Jahowa jala manomba Ibana. (1 Ptr. 2:12) Alai, songon dia do pangkilalaanta molo adong dongan na dipinsang di huria ala ndang mangihuthon aturan ni Debata? Boi do on mambahen donganta na asing marmetmet ni roha jala ndang las be rohana manomba Jahowa.

Boi do muse moru las ni rohanta manomba Jahowa molo hamoraon do na sai tapingkiri. Portibi na nirajaan ni Sibolis on, jotjot mangelaela hita mangkaringkothon na so tahaporluhon. Taingot ma na didok ni Jesus, ”Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon!” (Mat. 6:24) Alani i, ndang boi  hita tongtong marlas ni roha manomba Jahowa molo sai talului hamoraon di portibi on.

Ndang maol di halak na mangkaholongi Jahowa mangoloi Ibana. (1 Joh. 5:3) Songon na didok ni Jesus, ”Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon.” (Mat. 11:28-30) Dapotta do las ni roha ala hita halak Kristen mangihuthon Jesus. Godang do na mambahen las rohanta manomba Jahowa. Taparsiajari ma tolu na mambahen hita ’mariaia mida Debata’.​—Hab. 3:18.

Debata na martua do Debata na tasomba. (Ul. 17:28; 1 Tim. 1:11) Taboto, marutang hangoluan do hita tu Jahowa. Jala, i do na mambahen hita marlas ni roha manomba Ibana nang pe naung leleng hita tardidi.

Songon si Hector, nunga 40 taon ibana gabe sintua kaliling. Tongtong do dihilala ibana las ni roha manomba Jahowa nang pe naung matua. (Ps. 92:13-15) Ndang boi be si Hector mangulahon godang ulaon di partondion ala marsahit tunggani boruna. Alai, marlas ni roha do ibana. Didok, ”Nang pe posa sahit ni tunggani borungku, alai ndang moru las ni rohangku manomba Jahowa. Tangkas do huboto, na marutang hangoluan ahu tu Jahowa, on mambahen ahu boi manomba Ibana sian nasa roha. Marsitutu do ahu asa dohot marbarita na uli jala sai hurimangi do pangkirimon di ari na naeng ro asa unang mago las ni rohangku.”

Diparade Jahowa do tobusan asa boi hita marlas ni roha mangolu salelengna. Didok do di Bibel, ”Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” (Joh. 3:16) Marhite tobusan, disesa ma dosanta jala boi mangolu salelengna. Tutu do on boi mangonjar rohanta patuduhon pangargaion tu Jahowa? Jala, boi do on mambahen hita marlas ni roha manomba Debata?

Si Jesús, donganta na tading di Meksiko mandok, ”Najolo dirajai karejongku do ahu, olo do ahu lembur karejo nang pe ndang disuru ala holan hepeng do hupingkiri. Dung marsiajar ahu taringot Jahowa, huboto  ma mansai arga do tobusan na nilehon ni Jahowa, i ma AnakNa. Lomo ma rohangku manomba Jahowa jala mangalehon diri tu Ibana. So ma ahu sian parkarejoanku nang pe naung 28 taon karejo. Dung i, merintis ma ahu.” Songon i ma mulana si Jesús marhobas tu Jahowa jala mangkilala las ni roha.

Marlas ni roha ala boi marparange na denggan. Diingot hamu do songon dia parngoluonmu andorang so mananda Jahowa? Didok si Paulus tu halak Kristen di Rom, ”hatoban ni dosa hian” do nasida najolo, alai saonari nunga ”hatoban ni hasintongan”. Ala marparange na denggan, boi ma nasida mangkirim tu hangoluan salelengna. (Rom 6:17-22, Bibel siganup ari) Ala taoloi do uhum ni Jahowa, ndang tahilala be pangkorhon na roa sian parange na so denggan, na gok hajahaton. Alani i, marlas ni roha ma hita.

Songon si Jaime, sahalak partinju porsea tu evolusi. Mulana, ro ibana tu parpunguan jala las rohana mangida angka holong ni dongan na sahaporseaon. Martangiang do si Jaime tu Jahowa asa boi ditadingkon ibana hasomalanna i. Si Jaime mandok, ”Lam leleng huboto ma, adong do Ama na parholong dohot parasi roha. Marlaba do huhilala uhum ni Jahowa laho mangondingi ahu. Autsugari ndang muba ahu, ra nunga mate songon donganku na asing. Saonari, las ma rohangku ala manomba Jahowa.”

Aha do sibahenonta andorang so dipasohot portibi na jahat on? Taingot ma, lomo ni roha ni Jahowa do na taulahon jala ”hangoluan salelenglelengna” do na tapaima. Alani i, ”Unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng.” (Gal. 6:8, 9) Marhite pangurupion ni Jahowa, tongtong ma hita marsihohot jala patoguhon parange na boi mangurupi hita malua sian ”haporsuhon godang”. Jala, sai marlas ni roha ma hita manomba Jahowa.​—Pgk. 7:9, 13, 14; Jak. 1:2-4.

Boi do pos rohanta, pasupasuon ni Jahowa hita molo marsihohot ala diingot do holong na tapatudu tu goarNa. Molo marlas ni roha hita manomba Jahowa, songon si Daud ma hita na mandok, ”Tongtong do hubahen Jahowa tu jolongku, ai molo di siamunhu Ibana, ndang tagamon humordit ahu. Ala ni las ma rohangku jala marolopolop tondingku, dagingku pe sinok do maringanan dibahen.”​—Ps. 16:8, 9.