Andorang so marrumah tangga dope bapa dohot omak, nungnga marsiajar Bibel nasida sekitar taon 1920-an. Taon 1939 ma au tubu. Tikki gelleng au tinggal di Inggris do hami. Las do rohakku lao tu parpunguan rap dohot natua-tuakku. Jala dohot Sikkola Pakkobasion Teokratis ma au. Huingot dope songon dia au tikki pasahatton jamitakku na parjolo. Ala gelleng dope au tikki i, dibahen ma sada kotak sidegeokku asa boi huida hadirin. Taroktokon do au tikki i, alana onom taon dope umurhu, jala au do na upposo sian sude hadirin i.

Marumur ualu taon ma au tikki parjolo sahali manuktuk jabu ni halak lao pasahatton barita na uli. Dibahen bapa ma kartu kesaksian silehonokku tu parjabu. Las hian do rohakku tikki i, ala olo parjabu i manjaha kartu na hulehon i jala manjalo bukku “Karena Allah Itu Benar Adanya”! Pittor marlojong ma au paboahon i tu bapa, na paimahon au di pinggir dalan. Las hian do rohakku molo lao marbarita na uli dohot marpungu. Gabe tertarik do au naeng gabe pelayan sepenuh waktu.

Ala dituhor bapa do di au terbitan ni Joujou Paboahon, gabe lam holong ma rohakku tu Jahowa. Tiap ro terbitan ni majalah i pittor hujaha do i. Lam porsea ma au tu Jahowa, jala hubaen ma keputusan mangalehon diri tu Ibana.

Taon 1950, dohot ma keluarganami tu Kebaktian Pertambahan Teokratis di New York. Tema kebaktian di ari Kamis, i ma “Hari Utusan Injil”. Na pasahatton jamita pandidion di ari i, i ma donganta si Carey Barber. Di pudian ni ari gabe anggota ni Punguan na Mangaradoti  Organisasi do ibana. Di ujung ni jamitana i, dijahahon donganta on ma dua sukkun-sukkun tu akka na lao tardidi. Jongjong ma au jala hudok ma, “Olo!” Keputusan na penting do na hubahen on, nang pe marumur 11 taon dope au. Alai tikki i ala dang huboto dope marlange, gabe mabiar hian do au masuk tu kolam baptisan. Didongani bapa udakku ma au tu kolam i, jala didok ma asa unang pola mabiar au. Di kolam i, adong ma donganta na mangabing au, dididi ma au jala adong muse sahalak nai donganta na pittor mangabing au kaluar sian aek i. Jadi hatop hian do hurasa tikki na tardidi i, dang pola sanga hudege lante ni kolam i. Mulai sian i, torus do dibahen Jahowa au mardalan di dalan na tigor.

Nungnga hurencanahon hian molo dung tamat au sikkola, naeng merintis do au. Alai sai dijujui gurukku ma au kuliah, huoloi do i, kuliah ma au. Ujungna husadari ma, dang boi au torus setia tu Jahowa sambil fokus kuliah. Jadi huputusson ma asa unang kuliah be au. Hutangiakkon ma on tu Jahowa, di ujung ni taon pertama masuk kuliah hubahen ma surat pengunduran diri. Jala pittor merintis do au, ala pos do rohakku urupan ni Jahowa do au.

Di bulan Juli taon 1957 ma au mulai merintis di kota Wellingborough. Hupangido do tu Betel London asa ditugasson sahalak perintis na berpengalaman mandongani au. Donganta si Bert Vaisey do ditugasson mangurupi au. Rajin do ibana jala semangat. Diurupi ibana do au mambahen jadwal, asa lam denggan au marbarita. Di huria i holan onom do penyiar, i pe donganta borua naung matua do. Ala holan hami na dua do bawa, jadi ikkon hupersiappon do sude bahan parpunguan jala ikkon hami do tong na manguluhon. Alani i, gabe lam togu do haporseaokku tu Jahowa jala tarida do i.

Ala hutolak dinas militer, hea do au dipenjarahon. Alai dung i, pajuppang ma au dohot si Barbara, sahalak perintis istimewa. Dung i marhasohotan ma hami di taon 1959, jala rade do hami ditugasson manang tudia pe. Dung marhasohotan hami, tu kota Lancashire na di barat laut ni Inggris ma hami parjolo sahali ditugasson. Di bulan Januari 1961, diundang ma au asa dohot tu Sikkola Pakkobasion tu Harajaon di Betel London saleleng sabulan. Dung sae sikkola i ditugasson ma au gabe pengawas wilayah. Saleleng dua minggu dilatik sahalak pengawas wilayah na berpengalaman do au di kota Birmingham, jala diloas do si Barbara mandongani au. Dung i, mulak ma hami muse tu tempat penugasannami hian, i ma kota Lancashire dohot Cheshire.

Tikki liburan hami bulan Agustus taon 1962, ro ma surat sian kantor cabang na marisi formulir permohonan Sikkola Gilead. Hutangiakkon hami ma i tu Jahowa. Dukkon huisi hami formulir i, pittor hatop ma hukirimhon hami i tu kantor cabang. Lima bulan nai, diundang ma hami tu Sikkola Gilead di Brooklyn, New York, kalas 38. Saleleng sappulu bulan ma hami na sikkola i.

 Di Sikkola Gilead i, diajari do hami asa lam mangargai Hata ni Debata. Alai dang holan i, diajari do tong hami asa lam makkaholongi dongan sahaporseaon di liat portibi on. Marumur 24 taon dope au na sikkola i, istrikku marumur 23 taon. Jala godang do na huparsiajari hami sian akka dongan sakalasnami. Massai las do rohakku boi kerjasama tiap ari dohot donganta si Fred Rusk, sahalak instruktur. Saleleng kerja sama hami, adong do parsiajaran na penting na diajarhon ibana tu au, ikkon Bibel do hupakke tikki pasingotton na asing. Di sikkola i adong do piga-piga donganta na berpengalaman na pasahatton jamita. Misalna donganta si Nathan Knorr, si Frederick Franz, dohot si Karl Klein. Adong dope muse donganta na serep roha si A. H. Macmillan, na pasahatton jamita taringot cara ni Jahowa mangurupi naposona saleleng masa paraloan di taon 1914 sahat tu 1919!

Dung sae sikkola i, dipaboa donganta si Knorr ma penugasannami tu Burundi, Afrika. Pittor lao ma attong hami tu perpustakaan Betel mangalului Buku Tahunan asa huboto hami sadia godang penyiar di Burundi. Alai dang adong dapotnami informasi taringot godang ni penyiar disi. Ternyata, dang adong dope Saksi disi. Memang mabiar do hami ala otik do na huboto hami taringot inganan i. Alai tetap do hami lao tusi. Dung hutangiakkon hami i gabe pos ma rohanami.

Beda hian do tempat penugasannami na baru on sian na parjolo. Asing do cuacana, budayana, dohot bahasana. Baru ikkon marsiajar bahasa Prancis do muse hami. Jala maol do mangalului jabu dison. Dua ari dung sahat hami di Burundi, ro ma si Harry Arnott manjuppangi hami, dongan sakalashu hian di Sikkola Gilead. Kebetulan ibana naeng mulak tu penugasanna hian di Zambia. Diurupi ibana do hami mangalului apartemen, jala inganan i ma na gabe jabu ni missionaris. Hape dang lomo roha ni pamaretta tu hami, ala dang diboto dope taringot Saksi Jahowa. Baru dope hunikmati hami penugasannami dison, hape pittor disuru pamaretta ma hami pinda ala dang adong dope ijinnami. Nang pe lungun rohanami alai pinda ma hami tu Uganda.

Mabiar do nian hami na pinda on tu Uganda, ala so adong dope visanami. Alai porsea do hami tu Jahowa. Adong ma donganta halak Kanada naung parjolo melayani di Uganda mangurupi  hami patorakkon situasinami tu petugas imigrasi. Didok petugas i, boi do hami tinggal disi saleleng piga-piga bulan sappe kaluar ijin tinggalnami di negara i. Sude na masa on paposson rohanami na sai diurupi Jahowa do hami.

Beda do situasi di negara on dohot di Burundi. Ala nungnga adong 28 Saksi dison, jadi nungnga adong na marbarita na uli di negara on. Godang do muse halak na boi marbahasa Inggris dison. Alai asa boi huurupi hami akka parsiajar Bibel mambahen hamajuon, ikkon huparsiajari hami do bahasa ni nasida. Marbarita ma hami di Kampala, bahasa Luganda do na dipakke disi, alani i fokus ma hami mamparsiajari bahasa i. Nang pe jolo piga-piga taon hami asa boi lancar marbahasa Luganda, alai hasilna lam denggan ma hami di ulaon marbarita na uli. Gabe diattusi hami ma aha dope na porlu bahenonnami tu parsiajar Bibelnami asa mambahen hamajuon. Ala parduli do hami tu nasida, gabe olo ma nasida paboahon pakkilalaanna tu hami.

Massai las do rohanami mangurupi halak marsiajar Bibel. Jala tamba do muse las ni rohanami ala ditugasson hami gabe pengawas wilayah di negara i. Disuru kantor cabang Kenya ma hami mangalului daerah na porlu perintis istimewa. Burju-burju do halak disi. Olo do nasida manangihon hami pasahatton barita na uli, hape dang hea dope nasida pajuppang dohot Saksi, gariada dilehon do hami mangan.

Didalani hami do godang inganan. Sian Kampala, markareta api ma hami dua ari tu Mombasa na di Kenya. Dung sian i, markapal laut ma hami tu Seychelles, sada pulo na adong di Samudera Hindia. Mulai sian taon 1965 tu 1972, nga diloas be si Barbara mandongani au molo lao berkunjung tu Seychelles. Mulana holan dua halak do penyiar disi. Dung i gabe adong ma kelompok, jala gabe adong ma sidang. Dung sian i lao ma muse hami manjuppangi akka dongan na di Eritrea, Etiopia, dohot Sudan.

Tikki mulak hami muse tu Uganda, nungnga muba be situasi politik disi. Gabe militer do na mangatur pemerintahan disi. Maol hian do situasi di tikki i. Jadi massai penting do huihutton hami prinsip ni Bibel, asa unduk tu pamaretta. (Mrk. 12:17) Dipangido do tikki i sude halak luar negeri na tinggal di Uganda, melapor tu kantor polisi na jonok tu jabu ni nasida. Pittor lao do hami. Piga-piga ari dukkon i, marmobil ma hami mangalewati Kampala. Adong ma polisi na pasohon mobilnami, tikki i rap do au dohot sahalak missionaris. Taroktokon do hami, ai ditudu do hami mata-mata. Ditakkup ma hami jala diboan tu kantor polisi na umbalga. Disi ma hupatorang hami sabotulna missionaris do hami. Hupaboa hami ma nungnga hea hami melapor tu kantor polisi, alai dang porsea nasida. Jadi diboan nasida ma hami muse tu kantor polisi na jonok tu jabunami lao mamastihon i. Disi sahat hami di kantor polisi i, pittor ditanda akka polisi na disi do hami. Jadi didok ma asa dipalua hami!

Tikki i jotjot do hami mabiar jala taroktokon molo diabbat tentara, apalagi tentara na mabuk. Molo masa i, pittor martangiang do hami asa tenang. Jala biasana gabe diloas do hami lewat. Alai taon 1973, disuru pamaretta ma sude missionaris maninggalhon Uganda.

Ditugasson ma hami muse tu Pantai Gading, Afrika Barat. Ikkon mambahen penyesuaian do hami muse, marsiajar budaya na baru, makkatai di bahasa Prancis, jala menyesuaikan diri tu akka  missionaris na berbeda latar belakangna. Alai ala pengaturan ni Jahowa do on, gabe boi ma diida hami muse akka halak na serep roha manjalo barita na uli. Takkas do diida hami dibahen Jahowa hami mardalan di dalan na tigor, ala porsea tu Ibana.

Alai ternyata marsahit kanker ma si Barbara. Alani i, jotjot do lao hami marubat tu luar negeri. Taon 1983 didok organisasi ma ikkon hutinggalhon hami do Afrika. Gabe lungun ma rohanami.

Lam leleng lam parah do sahit ni si Barbara on. Mate ma ibana tikki melayani hami di Betel London. Sai diapuli keluarga Betel do au, gabe boi ma au semangat muse. Adong do sapasang suami istri na jotjot mangurupi au asa torus porsea tu Jahowa. Dung i pajuppang ma au dohot si Ann, sahalak komuter Betel na hea gabe perintis istimewa. Togu do parale-aleonna tu Jahowa. Marrumah tangga ma hami taon 1989. Mulai sian i, rap melayani di Betel London ma hami.

Mulai sian taon 1995 sahat tu 2018, ditugasson ma au gabe wakil kantor pusat (najolo didok do goarna pengawas zona). Nungnga adong hampir 60 negara na hea hukunjungi hami. Boi ma huida songon dia Jahowa manjaga naposona.

Taon 2017 berkunjung ma hami tu Afrika. Las do rohakku patandahon negara Burundi tu si Ann. Longang do rohanami mangida perkembangan ni Saksi disi. Saonari nungnga adong lobi sian 15.500 penyiar di negara i. Jala dalan inganakku parjolo sahali marbarita na uli taon 1964, disi ma nuaeng dibangun Betel.

Dung i dilehon ma tu hami daftar ni akka negara na ikkon hukunjungi hami taon 2018. Sada sian akka negara na adong di daftar i, i ma Pantai Gading. Tikki sahat hami di ibukotana di Abidjan, hira na mulak tu huta do hurasa. Tikki di Betel, huboto ma sian daftar nomor telepon, molo kamarnami pas di sapping kamar ni sahalak donganta na margoar si Sossou. Jadi pittor huingot ma pengawas wilayah hian do si Sossou on tikki di Abidjan dope au. Hape sala do dugaanki. Dang si Sossou donganki hape ibana, anakna do on.

Sian akka pengalamanki huboto ma, tutu do sude na didok ni Jahowa i. Nang pe godang tantanganna, alai molo torus hita porsea tu Jahowa, boi do bahenonna hita mardalan di dalan na tigor. Bertekad do hami asa torus mardalan di dalan i, na lam tiur annon dung sahat hita di tano na imbaru.​—Poda 4:18.