SAONARI hita mangolu di ‘tikki na gok hasusaan’. (2 Tim. 3:1) Alani gok ni sitaononta, olo do ra tahilala hira na so adong na mangurupi hita. Gabe metmet ma rohatta jala gabe kesepian. Alai pos ma rohamuna, adong do akka dongan na sai rade mangurupi hamu. Didok di Bibel, nasida ma ale-ale na songon haha anggi di “tikki masa sitaonon”.—Poda 17:17.

Saleleng gabe utusan injil si Paulus, adong do piga-piga ale-alena na mandongani jala mangurupi ibana mangulahon tugasna. (Kol. 4:​7-11) Tikki dipenjara si Paulus di Rom, akka donganna i ma na mangurupi ibana mangulahon tugas na so boi diulahon ibana. Misalna, si Epaproditus, ibana do na mamboan silehon-lehon sian akka dongan na di Pilippi tu si Paulus. (Plp. 4:18) Asing ni i, si Tikikus, ibana do na manaruhon akka surat ni si Paulus tu akka huria. Ala diurupi akka donganna i si Paulus, gabe boi ma ibana tetap patoguhon huria nang pe ditahan ibana, dang boi kaluar sian jabu, jala ujungna dipenjarahon. Saonari, aha do na boi taulahon asa gabe dongan na burju?

Saonari, godang do akka donganta na patuduhon molo nasida dongan na burju. Taparrohahon ma pengalaman ni donganta si Elisabet, sahalak perintis biasa sian Spanyol. Dung tarboto na marsahit kanker stadium akhir omakna, adong ma sahalak donganta borua na jotjot mangirim pesan na patoguhon rohana. Dikutip donganta i do ayat ni Bibel di pesanna i. Didok si Elisabet, “Tikki hujaha akka pesanna i, las hian do rohakku ala huboto adong na parduli tu au. Jala gabe margogo ma au mangulahon ulaonku siganup ari.”—Poda 18:24.

Asing ni i, molo taurupi akka donganta asa boi lao marbarita manang marpungu, boi ma lam jonok hita tu nasida. Misalna, adong do donganta naung matua na boi dialap hamu asa boi marpungu manang marbarita? Molo diulahon hamu i, boi ma hamu masipatoguan. (Rom 1:12) Alai, boha molo adong akka donganta na so boi kaluar sian jabu ni nasida? Aha ma na boi taulahon lao mangurupi nasida?

Adong do piga-piga donganta na so boi marpungu tu Bale Harajaon, misalna ala marsahit na parah. Taparrohahon ma pengalaman ni donganta si David na hona limfoma (kanker kelenjar getah bening). Ikkon kemoterapi do ibana saleleng lobi sian onom bulan. Jala saleleng na kemoterapi i, ikkon sian jabu nama si David dohot istrina si Lidia marpungu.

Aha do na diulahon akka dongan lao mangurupi nasida? Dung sae marpungu, adong do piga-piga dongan na makkatai tu si David dohot si Lidia sian video-conference. Asing ni i molo markomentar  si David dohot si Lidia, dikirim akka dongan ma pesan tu nasida dung sae marpungu. Mandok mauliate do akka donganta i tu komentar ni nasida i. Aha ma hasilna? Gabe boi ma dihilala si David dohot si Lidia na massai holong roha ni akka dongan tu nasida.

Molo adong akka donganta na so boi kaluar sian jabu, boi do tabahen rencana lao manogihon nasida marbarita. Tasesuaihon ma jadwalta asa boi hita kerja sama dohot nasida. Molo taulahon songon i, gabe pos ma roha ni nasida na parduli do hita tu nasida jala dang tahalupahon nasida. (Poda 3:27) Misalna, boi do marbarita hita dohot nasida sian telepon manang mambahen surat. Jala boi do dibahen akka sintua pengaturan asa adong parpunguan lao marbarita dibahen marhite video-conference. On ma dibahen di huria ni si David dohot si Lidia nakkin. Las hian do roha ni nasida ala adong pengaturan on. Didok nasida, “Ala boi hami rap dohot akka dongan disi, manangihon bahan na dibahas jala rap martangiang, gabe lam dipatogu ma rohanami.” Asing ni i, boi do sasahali disukkun hamu akka dongan na so boi kaluar sian jabu atik boha boi diboan hamu parsiajar Bibelmuna tu jabu ni nasida asa boi hamu marsiajar disi.

Tikki rap marbarita hita dohot akka donganta na so boi kaluar sian jabu, gabe lam tatanda ma nasida jala lam akrab ma hita tu nasida. Misalna, tikki diida hamu songon dia cara ni nasida mamakke Hata ni Debata lao mangurupi sasahalak asa jonok tu Jahowa, gabe lam holong ma rohamuna tu nasida. Jadi molo diurupi hamu akka donganta asa boi marbarita dohot marpungu, gabe lam godang ma donganmuna.—2 Kor. 6:13.

On ma tong na dihilala si Paulus. Ala ro si Titus mandongani jala mangurupi ibana, gabe dipatogu do rohana. (2 Kor. 7:​5-7) Aha ma parsiajaranna tu hita? Tapatogu ma roha ni akka donganta. Ro ma hita mandongani jala mangurupi nasida. Alana ikkon tarida do pangurupionta i sian pambahenan, dang holan sian hata.—1 Joh. 3:18.

Akka donganta na di Rusia ma na gabe sitiruon lao patuduhon holong. Contohna pengalaman ni si Sergey dohot istrina, si Tatyana. Adong ma ro akka polisi tu jabu ni nasida jala diboan ma nasida tu kantor polisi lao diinterogasi. Dung sae si Tatyana diinterogasi, mulak ma ibana tu jabu. Didok si Sergey, “Dung sahat si Tatyana di jabu, adong ma sahalak donganta borua na ro tu jabunami. Barani do donganta i ro tusi. Dung i, marroan ma muse akka dongan na asing lao mangurupi paiasson jabunami naung sursar dibahen akka polisi i.”

Didok si Sergey, “Las do rohakku mangingot Poda 17:17. Didok di ayat i, ‘Sai dipatudu ale-ale do holong ni roha jala songon haha anggi do i tikki masa sitaonon.’ Saleleng na dianiaya i au, huhilala dang sanggup au mangadopi i. Alai dilean Jahowa do godang akka dongan na barani lao patoguhon au jala sai rade do nasida mangurupi au. Jadi nga huhilala be na didok di Poda 17:17 i.” a

Ala lam tu susana nama situasitta, tahaporluhon do pangurupion ni akka donganta. Tarlumobi ma haduan di hasusaan bolon. Jadi mulai sian saonari, berupaya ma hita gabe dongan na burju!—1 Ptr. 4:​7, 8.