Lomo do roha ni si Mary dohot suamina si John a marbarita tu akka halak Filipina na tinggal di negara ni nasida. Saleleng pandemi COVID-19, godang do halak na diurupi si Mary marsiajar Bibel, dang holan di negara ni nasida tinggal alai dohot do tong di akka negara na asing. Songon dia ma ibana mangulahon i?

Biasana disukkun si Mary do songon on tu parsiajar Bibelna, “Adong do diboto hamu keluarga manang donganmuna na olo marsiajar Bibel?” Molo didokkon adong, dipangido si Mary ma asa dipatandahon ibana tu nasida. Biasana denggan do hasilna molo tasukkun songon i. Boasa? Alana molo nungnga lomo roha ni sasahalak tu na diparsiajari ibana sian Bibel, diceritahon ibana do i tu keluargana manang tu donganna. Jadi aha ma hasilna ala disukkun si Mary songon i nakkin tu parsiajar Bibelna i?

Adong parsiajar Bibel ni si Mary na margoar si Jasmin. Dipatandahon si Jasmin ma opat donganna na olo marsiajar Bibel. Sada sian i goarna si Kristine. Lomo hian do rohana marsiajar Bibel, sappe dipangido ibana do asa dua hali nasida marsiajar di bagasan saminggu. Tikki disukkun si Mary tu si Kristine adong do donganna manang keluargana na olo marsiajar Bibel, didok si Kristine, “Adong, hupatandahon pe annon nasida tu ho.” Piga-piga minggu dukkon i, dipatandahon si Kristine ma opat donganna na olo marsiajar Bibel tu si Mary. Dung i, dipatandahon si Kristine ma muse akka donganna na asing. Jala piga-piga sian nasida patandahon akka donganna muse tu si Mary asa marsiajar Bibel nasida.

Lomo do tong roha ni si Kristine asa marsiajar Bibel akka keluargana na tinggal di Filipina. Dipaboa ibana ma taringot on tu boruna na margoar si Andrea. Mulana didok si Andrea do, ‘Agama na sesat do Saksi Jahowa i. Dang porsea nasida tu Jesus, jala holan Perjanjian Lama do na dipakke nasida.’ Alai holan sahali dope ibana marsiajar, disadari ibana ma sala do hape pandapotna saleleng on taringot Saksi Jahowa. Tikki diparsiajari ibana sada hatorangan na sian Bibel na so diboto ibana dope taringot i saleleng on, didok ibana ma, “On do hasittongan, alana sian Bibel do on!”

Dung i, dipatandahon si Andrea ma dua donganna dohot sada dongan sakarejona tu si Mary asa diurupi nasida marsiajar Bibel. Jala adong namboru ni si Andrea na margoar si Angela. Mapitung do namboruna i. Tikki marsiajar si Andrea, dohot do namboruna i mambege-bege, alai dang diboto si Mary i. Di sada tikki, dipangido si Angela ma asa dipatandahon si Andrea ibana tu si Mary jala dipangido do asa marsiajar Bibel tong ibana. Lomo hian do roha ni si Angela marsiajar Bibel. Holan sabulan dope ibana marsiajar, nga godang hian  ayat na diingot ibana. Bahkan, dipangido ibana do asa opat hali nasida marsiajar di bagasan saminggu! Dohot do si Angela marpungu marhite video-conference jala diurupi si Andrea do ibana.

Adong do suami ni si Kristine, goarna si Joshua. Tikki marsiajar Bibel si Kristine dohot si Mary, dohot do hape si Joshua mambege-bege nasida. Alani i, ditogihon si Mary ma si Joshua asa dohot marsiajar. Didok si Joshua ma, “Holan mambege-bege pe au. Unang pola sukkun-sukkuni da. Molo disukkuni ho au, lao do au annon.” Hape holan lima menit dope hami marsiajar, nungnga unggodang sukkun-sukkun ni si Joshua sian si Kristine. Ujungna gabe marsiajar Bibel ma si Joshua.

Denggan do hasilna ala dibahen si Mary sukkun-sukkun na sederhana i. Godang do halak na olo marsiajar Bibel dohot ibana. Adong ma 28 halak sian opat negara na diurupi ibana marsiajar. Alai, dilehon ibana do deba parsiajar Bibelna i diurupi akka dongan na asing lao marsiajar Bibel.

Si Jasmin, nungnga tardidi ibana di bulan April 2021. Si Kristine pe nungnga tardidi di bulan Mei 2022, jala mulak do ibana tu Filipina asa rap tinggal dohot keluargana. Dung i, dua parsiajar Bibel na dipatandahon si Kristine tu si Mary i pe nungnga tardidi. Piga-piga bulan dukkon tardidi si Kristine, tardidi ma tong si Angela jala nungnga gabe perintis biasa be ibana. Si Joshua, si Andrea, dohot piga-piga parsiajar Bibel na asing, torus dope nasida marsiajar jala dibahen nasida do kemajuan.

Di abad na parjolo, godang do akka halak na mandapot hasittongan sian keluarga manang dongan ni nasida. (Joh. 1:​41, 42a; Ul. 10:​24, 27, 48; 16:​25-33) Alani i, coba ma sukkun tu parsiajar Bibelmuna manang tu halak na berminat na asing, “Adong do keluarga manang donganmuna na olo marsiajar Bibel?” Molo disukkun hamu songon i, olo do ra dapotmuna akka halak na lomo rohana marsiajar Bibel.