PARSIAJARAN 7
ENDE 15 Tapuji ma Jesus
Manfaat sian Pengampunan ni Jahowa tu Hita
“Disesa Ho do sude dosanami.”—PS. 130:4.
NA LAO DIBAHAS
Lao tabahas ma piga-piga ilustrasi di Bibel na manggombarhon songon dia Jahowa mengampuni hita. Hasilna, gabe diurupi ma hita asa lam mangargai pengampunan ni Jahowa.
1. Boasa maol mamboto maksud ni sasahalak tikki didok ibana nungnga diampuni ibana hita?
“NGA HUMAAPPON HO.” Boha do perasaanmuna molo adong na mandok songon i tu hamu? Pasti lega ate. Alai, biasana maol do mamboto na benar-benar do sasahalak mengampuni hita manang na daong. Bisa jadi halak na mandok songon i tu hamu toktong do gabe dongan kompakmuna. Alai adong do na gabe so olo be jonok tu hamu, nang pe nungnga dimaappon ibana hamu. Sian on boi ma taida, dang sai sarupa maksud ni halak tikki didok nasida nungnga diampuni nasida hita.
2. Songon dia do Bibel manggombarhon pengampunan ni Jahowa? (Ida surat na di toru.)
2 Dang sarupa pengampunan ni Jahowa tu pengampunan ni jolma. Dang adong na boi maniru cara ni Jahowa mengampuni sasahalak. Didok panurat psalmen do taringot Jahowa, “Disesa Ho do sude dosanami, asa dipasangap Ho.” a (Ps. 130:4) Holan Jahowa do na benar-benar boi mengampuni sasahalak. Holan Ibana do na boi patuduhon tu hita lapatan ni benar-benar mengampuni. Tikki paboahon taringot cara ni Jahowa mengampuni sasahalak, dipakke akka panurat ni Akka Bukku Heber do hata na so dipakke nasida tikki patorakkon cara ni jolma mengampuni.
3. Boasa dang sarupa pengampunan ni Jahowa tu pengampunan ni jolma? (Jesaya 55:6, 7)
3 Holan Jahowa do na benar-benar boi mengampuni dosatta. Jala diloas Ibana do hita boi gabe ale-alena muse. Massai las do rohatta ala rade Jahowa manesa dosatta.—Jaha Jesaya 55:6, 7.
4. Songon dia do Jahowa mangurupi hita mangattusi pengampunan na dilehon Ibana?
4 Ala jolma na so sempurna hita, attong boha ma caratta mangattusi dang sarupa pengampunan ni Jahowa tu pengampunan ni jolma? Dipakke Jahowa do akka ilustrasi na massai denggan lao mangurupi hita mangattusi taringot on. Lao tabahas ma i di artikel on. Akka ilustrasi on patuduhon molo bertobat hita, rade do Jahowa manesa dosatta jala diloas Ibana do hita boi marale-ale muse tu Ibana. Dung tabahas akka ilustrasi on, gabe lam tamba ma holong dohot pangargaionta tu Jahowa, ala massai burju do Ibana jala rade mengampuni hita.
DIBOLOKKON JAHOWA DO DOSATTA
5. Aha do hasilna tikki diampuni Jahowa dosatta?
5 Di Bibel, disarupahon do dosa i songon boban na borat. Songon on do na didok Raja Daud taringot dosana, “Gabe lonong do au dibahen dosakki. Songon boban na borat do i, na so tolap boanokku.” (Ps. 38:4) Alai disalpuhon Jahowa do dosa ni akka halak na bertobat. (Ps. 25:18; 32:5) Hata Heber “manalpuhon” boi do maksudna “mangangkat” manang “mamboan”. Boi do tabayakkon Jahowa songon sahalak bawa na gogo na mangangkat boban na borat sian bahutta jala dipadao ma i sian hita.
“Disalpuhon Ho ma dosakku” (Ps. 32:5)
6. Sadia dao do Jahowa mamboan dosatta?
6 Adong muse ilustrasi na manggombarhon sadia dao Jahowa mamboan dosatta. Psalmen 103:12 dohot surat na di toru ni ayat i mandok, “Songon dao ni parbissar ni mataniari sian parbonom ni mataniari, songon i ma dao ni hasalaatta dipadao Ibana sian hita.” Dang hea mataniari bissar jala bonom di tempat na sarupa. Sian ilustrasi on taboto ma, massai dao do diboan Jahowa dosatta i sian hita. Gabe pos ma rohatta nungnga benar-benar diampuni Jahowa hita.
“Songon dao ni parbissar ni mataniari sian parbonom ni mataniari” (Ps. 103:12, surat na di toru)
7. Aha do na dibahen Jahowa tu akka dosatta? Paboa ma ilustrasina. (Mika 7:18, 19)
7 Molo nungnga diboan Jahowa dosatta sian hita, disippan Ibana dope i? Daong. Didok Raja Hiskia do taringot Jahowa, “Nungnga disappatton Ho be sude dosakki tu pudim.” Manang songon na dipaboa di surat na di toru ni ayat on, “Disesa Ho sude dosakku sian jolom.” (Jes. 38:9, 17; surat na di toru.) Lapatanna, nungnga dibolokkon Jahowa dosa ni akka halak na bertobat jala dang diingot-ingot Ibana be i. Ayat on boi do tong diterjemahon gabe songon on, “Dianggap Ho do dang hea huulahon dosakki.” Dibahen Jahowa do muse gombaran na sarupa taringot i di Mika 7:18, 19. (Jaha.) Didok di ayat i, hira na disappatton Jahowa do sude dosatta tu laut na bagas. Di jaman ni Israel najolo, molo adong benda na masuk tu bagas laut, dang boi be i diida manang dibuat.
“Nungnga disappatton Ho be sude dosakki tu pudim” (Jes. 38:17)
“Disappatton Ho do sude dosanami tu laut na bagas” (Mik. 7:19)
8. Aha do na taparsiajari sian akka ilustrasi on?
8 Sian akka ilustrasi on, gabe taboto ma tikki diampuni Jahowa hita, benar-benar dibolokkon Jahowa do dosatta. Jadi dang porlu hita torus merasa bersalah. Songon na didok si Daud, “Marlas ni roha ma halak na disalpuhon hasalaanna jala disesa dosana. Marlas ni roha ma halak na so dipaingot-ingot Jahowa be akka dosana.” (Rom 4:7, 8) On ma lapatanna benar-benar diampuni Jahowa dosatta!
DISESA JAHOWA DO DOSATTA
9. Aha do ilustrasi na dipakke Jahowa lao patorakkon pengampunan na sian Ibana?
9 Marhite tobusan, boi do Jahowa manesa sude dosa ni akka halak na bertobat. Taida ma songon dia ilustrasi na didok Bibel taringot on. Tajaha do di Bibel, na disussi Jahowa do akka dosatta. Gabe ias ma hita sian dosa. (Ps. 51:7; Jes. 4:4; Jer. 33:8) Dipaboa Jahowa do aha hasilna, “Nang pe songon merah ni mudar dosamuna, bottar do i bahenokku songon salju. Nang pe songon merah ni kain na massai merah dosamuna, bottar do i bahenokku songon wol.” (Jes. 1:18) Sasittongna, massai maol do manussi noda merah di kain. Alai marhite ilustrasi on, dipapos Jahowa do rohatta nang pe songon noda merah dosatta i, boi do i paiasonna jala gabe bottar muse.
“Nang pe songon merah ni mudar dosamuna, bottar do i bahenokku songon salju” (Jes. 1:18)
10. Aha do muse ilustrasi na dipakke Jahowa lao manggombarhon pengampunanna?
10 Songon naung tabahas di artikel sebelumna, disarupahon do dosatta songon utang. (Mat. 6:12; Luk. 11:4) Tikki mardosa hita tu Jahowa, songon na marutang do hita tu Ibana. Massai godang do utangta tu Jahowa. Alai, tikki diampuni Jahowa dosatta, dianggap Ibana do nungnga lunas be utangta i. Jala dang dipangido Ibana hita manggarar utang ni dosa naung diampuni Ibana. Tikki dianggap lunas utang ni sasahalak, pasti lega do perasaanna. Dos songon i ma hita. Pasti lega do tahilala tikki diampuni Jahowa dosatta!
“Sesa ma utangnami” (Mat. 6:12)
11. Aha do maksudna tikki didok Bibel nungnga ‘disesa dosatta’? (Ulaon ni Apostel 3:19)
11 Di adopan ni Jahowa, utang manang dosatta i dang holan lunas. Alai disesa Ibana do i, manang dianggap dang adong be. (Jaha Ulaon ni Apostel 3:19.) Bayakkon ma ilustrasi on: Adong ma catatan ni utangta disurat di sada harotas. Alai adong ma sasahalak na mencoret harotas i, tanda nungnga dianggap lunas utangta i. Nang pe songon i, boi dope tarida sadia godang utangta na tarsurat di harotas i. Alai, beda do molo disesa. Bayakkon ma muse: Najolo, jenis tinta na dipakke halak biasana mura disesa mamakke spons na maraek. Jadi molo nungnga “disesa” surat na di harotas i, gabe ias ma i jala dang boi be i tarida. Pasti mandok mauliate do hita ala mamboto tikki disesa Jahowa dosatta, dianggap Ibana do i hira na so hea taulahon.—Ps. 51:9.
“Asa disesa dosamuna” (Ul. 3:19)
12. Aha do na boi taparsiajari sian ilustrasi taringot ombun na tobal?
12 Dipakke Jahowa do muse ilustrasi na asing lao manggombarhon songon dia Ibana manesa dosatta. Didok Ibana, “Sesaokku ma akka hasalaanmu songon na manabunihon i di balik ni ombun. Sesaokku ma akka dosam, songon na manutup i mamakke ombun na tobal.” (Jes. 44:22) Tikki diampuni Jahowa dosatta, hira na dipakke Ibana do ombun na tobal lao manabunihon dosatta i. Hasilna, haru Jahowa manang hita dang boi be mangida i.
“Sesaokku ma akka hasalaanmu songon na manabunihon i di balik ni ombun” (Jes. 44:22)
13. Songon dia do perasaanta tikki disesa Jahowa dosatta?
13 Aha do na boi taparsiajari sian akka ilustrasi on? Molo nungnga diampuni Jahowa dosatta, dang porlu be hita torus merasa bersalah saleleng ni ngolutta. Alana di adopan ni Jahowa, nungnga lunas be akka utangta marhite mudar ni Jesus Kristus. Jala dianggap Ibana do hira na so hea taulahon akka dosa i. Jadi molo bertobat hita, pos ma rohatta nungnga diampuni Jahowa hita.
DILOAS JAHOWA DO HITA MARALE-ALE MUSE TU IBANA
Pengampunan na dilehon Bapakta mambahen hita gabe boi muse marale-ale tu Ibana (Ida paragraf 14)
14. Boasa pos rohatta na diampuni Jahowa hita? (Ida gambar.)
14 Molo diampuni Jahowa hita, pos ma rohatta boi do hita marale-ale muse tu Ibana. Jadi dang porlu hita torus merasa bersalah. Asing ni i, dang porlu be mabiar hita na muruk dope Jahowa tu hita, manang dilului Ibana cara lao manghukum hita. Dang hea songon i Jahowa tu hita. Molo didokkon Jahowa nungnga diampuni Ibana hita, boi do pos rohatta tu hatana i. Didok Jahowa do tu Panurirang Jeremia, “Dang ingotokku be akka dosa ni nasida jala sesaokku ma hasalaan ni nasida.” (Jer. 31:34) Dikutip si Paulus do hata on. Didok ibana do di suratna, “Dang ingotokku be akka dosa ni nasida”. (Heb. 8:12) Alai aha do maksud ni hata on?
“Dang ingotokku be akka dosa ni nasida” (Jer. 31:34)
15. Aha do lapatanna tikki didok Jahowa dang ingotonna be dosatta?
15 Di Bibel, hata ‘mangingot’ dang selalu lapatanna mamikkirhon akka na masa di tikki naung salpu. Alai boi do muse lapatanna taringot sasahalak na bertindak lao mangulahon sada ulaon. Hea do sahalak parjahat na digattung di sapping ni Jesus mandok, “Jesus, ingot ma au molo dung masuk ho tu Harajaonmi.” (Luk. 23:42, 43) Sian hatana i boi ma taboto, dipangido ibana do Jesus asa bertindak tu ibana. Didok Jesus do tu bawa i lao paheheonna do ibana. Jadi tikki didok Jahowa dang ingotonna be akka dosatta, lapatanna nungnga diampuni Jahowa be hita. Jala dang na lao hukumonna hita di ari na naeng ro alani dosatta i.
16. Di Bibel, disarupahon songon aha do hita?
16 Molo diampuni Jahowa hita, gabe malua ma hita. Dipakke Bibel do ilustrasi na asing lao mangurupi hita mangattusi on. Didok Bibel, ala dang sempurna hita gabe “hatoban ni dosa” ma hita. Alai ala diampuni Jahowa hita, boi ma hita “dipalua sian akka dosatta”. (Rom 6:17, 18; Pgk. 1:5) Songon hatoban na marlas ni roha ala dipalua, hita pe marlas ni roha do ala nungnga diampuni Jahowa.
“Nungnga dipalua hamu sian dosa” (Rom 6:18)
17. Aha do hasilna ala diampuni Jahowa dosatta? (1 Petrus 2:24)
17 Jaha 1 Petrus 2:24. Didok di Bibel, disarupahon do jolma na mardosa songon halak na marsahit na posi. Alai alani tobusan ni Jesus, gabe dipamalum Jahowa do hita. (Jes. 53:5) Tikki mardosa hita, gabe sega do hubungatta tu Jahowa. Alai alani tobusan, gabe diampuni Jahowa ma hita jala gabe boi ma hita marale-ale muse tu Ibana. Songon halak na marlas ni roha ala nungnga dipamalum sian sahit na posi, hita pe marlas ni roha do ala boi denggan muse hubungatta tu Jahowa jala boi tabahen las rohana.
“Alani lukkana i do malum hamu” (1 Ptr. 2:24)
AHA DO PENGARUHNA TU HITA ALA DIAMPUNI JAHOWA DOSATTA?
18. Aha do na taparsiajari sian akka ilustrasi taringot pengampunan ni Jahowa? (Ida kotak “Cara ni Jahowa Mengampuni Hita”.)
18 Aha do na taparsiajari sian akka ilustrasi taringot pengampunan ni Jahowa? Tikki diampuni hita, dianggap Jahowa do hita dang hea mangulahon dosatta i. Jala pos rohatta, dang na lao dihukum Jahowa be hita di ari na naeng ro alani dosatta i. Gabe boi ma hita marale-ale muse tu Jahowa. Alai taingot ma, silehon-lehon sian Jahowa do pengampunan i. Dilehon Ibana pe i ala holong do rohana tu hita, dang ala na tama hita manjalo i.—Rom 3:24.
19. (a) Boasa massai las rohatta? (Rom 4:8) (b) Aha do na lao tabahas di artikel na mangihut?
19 Jaha Rom 4:8. Massai las do rohatta ala diampuni Jahowa dosatta! (Ps. 130:4) Alai molo lomo rohatta diampuni Jahowa, adong do na ikkon taulahon. Didok Jesus, “Molo dang disesa hamu sala ni halak tu hamu, dang sesaon ni Amamuna nang hasalaanmuna.” (Mat. 6:14, 15) Jadi ikkon tatiru do Jahowa, taampuni ma donganta na asing. Di artikel na mangihut, lao tabahas ma songon dia carana.
ENDE 46 Mauliate ma Jahowa
a Hata asli ni “manesa” manang mengampuni di bahasa Heber patuduhon holan Jahowa do na benar-benar boi manesa dosa.
