Katolik do natua-tuakku, jala ringgas hian do nasida na maragama i. Alai dung marsiajar Bibel jala diboto nasida adong do goar ni Debata, i ma Jahowa, gabe Saksi Jahowa na semangat do nasida. Tukkang hau do bapakku, jala somal do ibana mambahen patung ni Jesus. Alai dung gabe Saksi, dipakke bapak ma keterampilanna i lao mambahen ruangan lantai sada jabunami gabe Bale Harajaon. Jala i ma Bale Harajaon na parjolo di San Juan del Monte, di pinggiran ni kota Manila, ibu kota ni Filipina.

Taon 1952 ma au tubu. Adong opat abangku, jala tolu kakakku. Jotjot do natua-tuanami mangajarhon taringot Jahowa tu hami. Sian na gelleng, disuru bapak do asa hujaha Bibel, pinomatna sapasal ganup ari. Jala dipakke bapak do akka publikasitta lao mangajari au. Sipata, ditogihon natua-tuanami do pengawas wilayah dohot akka donganta na karejo di Betel manginap di jabunami. Jotjot do nasida paboahon pengalamanna tu hami, jala lomo do rohanami asa boi songon nasida.

Sitiruon na massai denggan do natua-tuakku di au. Alana, massai togu do haporseaon ni nasida tu Jahowa. Dung mate omak ala marsahit, merintis ma au dohot bapak mulai taon 1971. Alai taon 1973, tikki marumur 20 taon au, mate ma bapakku. Ala dang adong be omak dohot bapak, lungun hian do hurasa jala gabe kesepian ma au. Alai ala adong harapan sian Bibel ‘na mambahen hita togu jala marpos ni roha’, gabe boi ma au tetap positif, dang sai torus marlungun ni roha, jala toktong jonok tu Jahowa. (Heb. 6:19) Dang leleng dukkon mate bapak, ditugasson ma au gabe perintis istimewa di Coron, sada pulo di Provinsi Palawan.

Marumur 21 taon ma au tikki na melayani di Pulo Coron i. Ala sian kota do au, tarsonggot do au dung sahat di pulo i. Alana, godang do jabu disi na so adong dope listrikna, jala maol do aek disi. Dang godang dope disi kareta dohot mobil. Memang, adong do piga-piga disi akka donganta, alai holan  au do na merintis. Jadi sipata, dang adong donganku marbarita. Saleleng sabulan au disi, masihol hian ma au tu keluargakku dohot tu akka donganku. Hea ma di sada borngin, hutatap ma langit huhut ma manetek ilukku. Di tikki i, hurasa tumagon ma hutinggalhon tugashu on jala mulak tu jabunami.

Di tikki i, martangiang ma au tu Jahowa. Hupaboa ma sude na di rohakkon tu Ibana. Dung i, hurimangi ma muse akka hatorangan na patoguhon au na hea hujaha sian Bibel dohot akka publikasitta. Misalna, sai huingot do Psalmen 19:14. Sian ayat i, dipaingot do au molo hurimangi sude na mambahen las roha ni Jahowa, songon akka naung diulahon Ibana dohot akka sifatna, boi ma Jahowa i gabe ‘Dolok Batu di au, dohot na manobus au’. Asing ni i, adong sada artikel di Joujou Paboahon na tong patoguhon au. Judul ni artikel i “You Are Never Alone” (Sai Adong do Donganmuna). a Mulak-ulak do i hujaha. Jadi tikki holan sahalakku, boi do hurasahon na didongani Jahowa au. Disi ma tikkina au martangiang, marsiajar, jala mangarimangi.

Dang sadia leleng dung sahat au di Pulo Coron, dilantik ma au gabe sintua. Ala holan au do disi sintua, ganup minggu au do na memandu Sikkola Pakkobasion Teokratis, Parpunguan tu Parbarita, Parsiajaran Bukku Huria, dohot parsiajaran Joujou Paboahon. Jala au do tong na marjamita. Jadi ala sibuk au mangulahon akka tugashu, gabe dang kesepian be au!

Las hian do rohakku melayani di Pulo Coron. Adong do piga-piga parsiajar Bibelhu na tardidi. Alai adong do tong tantanganna. Sipata ikkon mardalan pat do au mulai sian pagi sahat tu siang lao tu sada daerah. Jala olo do dang huboto didia ma annon au modom bornginna i. Asing ni i, godang do pulo na gelleng na gabe daerah dinashu. Lao tu daerah i, ikkon mamakke solu na marmasin do au. Jala sipata adong do badai di laut i, hape so boi au marlange. Alai di tikki i, boi do huhilala na sai dijaga jala didongani Jahowa do au. Di pudian ni ari, baru pe husadari na lagi dilatik Jahowa do au asa boi mangadopi situasi na ubborat di tugashu na selanjutna.

Taon 1978, ditugasson ma au tu Papua Nugini. Daerah na mardolok-dolok do luat i. Godang ni pendudukna hira-hira 3 juta halak. Alai adong lobi sian 800 bahasa na dipakke disi. Tarsonggot hian do au mamboto i. Alai tuani ma godangan halak disi boi do marbahasa Pijin Melanesia manang bahasa Tok Pisin.

Mulana ditugasson ma au tu huria na marbahasa Inggris di Port Moresby, ibu kota Papua Nugini. Alai holan sementara do on. Dung i, pinda ma au tu huria na marbahasa Tok Pisin jala dohot tu kursus lao marsiajar bahasa i. Ala hupakke do na huparsiajari di kursus i tikki marbarita, gabe hatop ma au malo. Boi ma au marjamita mamakke bahasa Tok Pisin. Jala dang gok dope sataon au di Papua Nugini, ditugasson ma au gabe pengawas wilayah tu akka huria na marbahasa Tok Pisin.

Ala dao-dao do jarak ni akka huria dison, gabe sering do au lao sian sada daerah tu daerah na asing jala ikkon mangatur godang parpunguan wilayah. Mulana kesepian do hurasa alana ikkon mambahen penyesuaian do au tu ingananna, bahasana, dohot kebudayaanna. Asing ni i ala mardolok-dolok do daerah dison, dang boi au ro tu akka huria sian jalur darat. Jadi hampir tiap minggu ma au ikkon marpesawat, jala sipata holan au ma  penumpang ni pesawat i. Sarupa do ngerina hurasa songon na marparau.

Dison, dang godang akka donganta na adong teleponna. Jadi ikkon mambahen surat do au molo naeng berkomunikasi tu akka huria. Alai jotjot do au na parjolo sahat sian akka surathi. Asa boi au pajuppang dohot akka dongan, ikkon husukkun ma tu akka halak na tinggal di daerah i. Dung pajuppang hami, denggan do disambut akka dongan au. Las hian do rohakku ala dang sia-sia upayakki mangalului nasida. Sian on gabe lam pos ma rohakku sai diurupi Jahowa do au mangulahon tugashu, jala gabe lam jonok ma hubungakku tu Jahowa.

Tikki parjolo sahali au ro tu huria na di Pulo Bougainville, adong ma sapasang suami istri manjuppangi au jala tersenyum do nasida. Didok nasida ma, “Diingot Brur dope hami?” Huingot do memang hea au marbarita tu nasida tikki parjolo sahali sahat au di Port Moresby jala sanga do au na mangurupi nasida marsiajar Bibel. Alai ala pinda au sian i, hupangido ma sahalak donganta lao mangurupi nasida marsiajar. Hape saonari nungnga tardidi nasida! On ma sada sian godang pasu-pasu na huhilala saleleng tolu taon au melayani di Papua Nugini.

Taon 1978 sebelum lao au sian Pulo Coron, pajuppang ma au dohot sahalak donganta borua na bagak jala na lomo rohana mangurupi halak na asing. Goarna si Adel. Merintis do ibana huhut mangurus dua gellengna, i ma si Samuel dohot si Shirley. Jala ibana do tong na mangurus omakna naung matua. Bulan Mei taon 1981, mulak ma au tu Filipina asa menikah dohot si Adel. Dung menikah, rap merintis ma hami huhut mangurus keluarganami.

Nang pe nungnga markeluarga au, dilantik ma muse au gabe perintis istimewa di taon 1983. Ditugasson ma au tu Pulo Linapacan, di Provinsi Palawan. Pinda ma hami sakaluarga tu daerah i, jala dang adong Saksi Jahowa disi. Sataon dung disi hami, mate ma simatuakku boru. Borat do situasinami di tikki i. Alai ala toktong hami sibuk marbarita, gabe boi ma diadopi hami situasi i. Godang do parsiajar Bibelnami na mambahen kemajuan jala porlu do di hami inganan parpunguan. Jadi, dibangun hami ma i. Dung tolu taon hami melayani disi, adong 110 halak na ro tu acara Borngin Parningotan. Las hian ma rohanami. Jala di pudian ni ari, godang do sian nasida na gabe Saksi Jahowa.

Taon 1986 ditugasson ma au tu Pulo Culion, jala piga-piga taon dukkon i dilantik ma si Adel gabe perintis istimewa. Di pulo i, adong sada daerah inganan ni akka halak na marsahit kusta. Mulana mabiar do hami marbarita tu nasida. Alai dipapos akka dongan ma rohanami. Didok nasida, nungnga diubati akka na marsahit kusta i jala dang apala menular be sahitna i. Adong do piga-piga na marsahit kusta i ro marpungu tu jabu ni sahalak donganta borua. Ujungna gabe dang mabiar be hami marbarita tu akka halak na songon i. Saleleng on dihilala nasida, dang marguna jala dang arga nasida di Debata dohot di akka halak. Jadi tikki dibege nasida adong janji ni Debata sian Bibel na lao malum do sahit ni nasida i haduan, las hian ma roha ni nasida. (Luk. 5:​12, 13) Hami pe las hian do rohanami paboahon janji ni Debata i tu nasida.

 Alai boha do akka gellengnami? Boi do nasida marlas ni roha marbarita di Pulo Culion? Adong do dua donganta borua na poso sian Coron na ditogihon hami asa pinda tuson, gabe adong ma dongan ni si Samuel dohot si Shirley. Adong ma akka dakdanak na gabe parsiajar Bibel ni nasida na opat, jala natua-tua ni dakdanak i pe marsiajar Bibel do dohot hami. Bahkan hea do adong 11 keluarga na marsiajar Bibel dohot hami. Godang hian do halak na diurupi hami marsiajar Bibel jala dibahen nasida do kemajuan. Dang leleng dukkon i, boi ma dibahen hami sada huria na baru!

Mulana holan au do sintua disi. Jadi dipangido kantor cabang ma asa au na mamandu parpunguan di Culion dohot di Marily ganup minggu. Di Culion i adong ualu penyiar, jala di Marily i adong sia penyiar. Alai lao tu daerah i, ikkon markapal do hami saleleng tolu jom. Dung sae marpungu, mardalan pat ma hami muse saleleng piga-piga jom mangalewati akka inganan na mardolok-dolok lao mangurupi akka halak marsiajar Bibel di Halsey.

Godang do akka halak di Marily dohot di Halsey na lomo rohana marsiajar Bibel. Jadi ikkon dibangun hami do Bale Harajaon di dua inganan i. Songon na di Linapacan, akka dongan dohot akka peminat na dison, lomo do roha ni nasida mangalehon akka bahan bangunan jala dohot do nasida mambangun bale i. Siat do 200 halak di Bale Harajaon na di Marily i, jala boi do dibahen hami parpunguan wilayah disi. Alana nungnga dirancang bale i asa boi dipabalga.

Taon 1993 dung lam balga-balga gellengnami, gabe pengawas wilayah ma au di Filipina. Dung i taon 2000, dohot ma au tu Sikkola Pelatihan Pelayanan jala dilatik do au lao gabe instruktur tu sikkola i. Hurasa dang sanggup au mangulahon tugas i. Alai sai dipatogu si Adel do au. Didokkon ibana do pasti sai rade do Jahowa mangalehon gogo tu au asa boi au mandalatton tugas na baru i. (Plp. 4:13) I do tong na dihilala si Adel. Boi do ibana mandalatton akka tugasna nang pe marsahit-sahit.

Di taon 2006 tikki gabe instruktur dope au, diboto hami ma na hona parkinson si Adel. Tarsonggot hian do hami di tikki i! Hudokkon ma tu si Adel, so ma jo hami sian tugasnami asa boi huurus  ibana. Alai didokkon si Adel ma, “Talului ma dokter asa boi mangurupi au. Pos do rohakku pasti sai diurupi Jahowa do hita asa boi tetap mangulahon tugasta on.” Dukkon i saleleng onom taon, torus do si Adel setia jala dang marungut-ungut ibana. Nang pe dang boi be ibana mardalan, tetap do lao ibana marbarita mamakke kursi roda. Jala nang pe nga maol ibana makkatai, alai tetap do ibana markomentar di parpunguan nang pe holan sada manang dua hata na boi dokkononna. Sai dipatogu akka dongan do ibana. Sering do dikirim nasida pesan tu si Adel lao paboahon massai arga do sitiruon na binahenna i. Ujungna mate ma si Adel taon 2013. Lobi sian 30 taon ma au rap dohot si Adel. Sahalak istri na setia do ibana jala parholong. Alai dung marujung ngolu ibana, gabe lungun do muse rohakku jala kesepian.

Ditonahon si Adel do asa tetap au sibuk melayani Jahowa, jala huulahon do i. Jadi ala toktong au sibuk, dang pola kesepian be hurasa. Sian taon 2014 sahat tu 2017, ditugasson ma au mengunjungi akka huria na marbahasa Tagalog b di negara-negara na mangorai ulaonta. Dukkon i, lao ma muse au mengunjungi akka huria na marbahasa Tagalog di Taiwan, Amerika Serikat, dohot Kanada. Di taon 2019, gabe instruktur Sikkola tu Parbarita Harajaon ma au di India dohot di Thailand. Kelas na huajari mamakke bahasa Inggris. Las hian do rohakku ala boi au tetap sibuk mangulahon tugas sian Jahowa.

Manang tudia pe au ditugasson, kompak do au tu akka dongan na disi. Jadi tikki naeng pinda tugas, borat do hurasa maninggalhon nasida. Alai di tikki sisongon i sai huandalhon do Jahowa jala hurasahon do na sai diurupi Jahowa au. Alani i, gabe sai rade ma au ditugasson manang tudia pe. Saonari gabe perintis istimewa do au di Filipina. Lomo hian do rohakku di huria on. Nungnga songon keluargakku akka dongan na dison, ala dihaholongi nasida do au jala sai rade mangurupi au. Bangga do tong au mangida si Samuel dohot si Shirley ala ditiru nasida do haporseaon ni omakna.—3 Joh. 4.

Godang do sitaonon na borat na huadopi saleleng on. Contohna, huida do massai haccit ditaon istrikku jala mate do ibana alani sahitna na parah i. Dung i ala jotjot au pinda tugas, ikkon godang do penyesuaian na hubahen. Alai nang pe songon i, boi do hurasahon na didok Bibel i, “dang dao [Jahowa] sian ganup hita on”. (Ul. 17:27) Jala “dang na hurang ganjang tangan ni Jahowa” lao mangurupi dohot patoguhon akka naposona, bahkan molo pe tinggal di inganan na massai dao nasida. (Jes. 59:1) Jadi tutu ma songon Dolok Batu do Jahowa i di au. Las hian do rohakku ala sai didongani Ibana do au. Dang hea dipasombu Ibana sahalakku.