1. Sukkun-sukkun aha do na ro tu rohatta tikki marsak hita?

DANG adong sian hita na lomo rohana marsak. Alai lomo do rohatta asa dame ngolutta. Nang pe songon i, sai adong do situasi na mambahen hita marsak. Alani i adong do piga-piga sisomba Jahowa na manukkun songon si Daud, “Sadia leleng nai do au sai marsak? Sadia leleng nai do lungun rohakku ganup ari?”​—Ps. 13:2.

2. Aha do lao taparsiajari di artikel on?

² Pasti adong do na mambahen hita marsak. Alai adong do na boi taulahon asa unang sai marsak hita. Di artikel on taparsiajari ma aha na mambahen hita marsak. Dung i taulas ma muse onom cara asa boi dame pakkilalaatta nang pe adong masalahta.

3. Aha do na mambahen hita marsak, jala sai boi do tapasae i?

³ Sipata adong do masalah na so boi tapasae na mambahen hita gabe marsak. Misalna, tamba taon tamba do arga ni sipanganon, arga ni pakkean, dohot sewa ni jabu, jala dang tarabbati hita i. Asing ni i, dang sai taboto sadia jotjot donganta sasikkola manang donganta sakarejo menggoda hita asa unang jujur manang asa mangulahon seks na so patut. Dung i, sai tamba do hajahaton di inganatta  tinggal. Masa pe sudena i, ala mangolu di tonga-tonga ni akka jolma na so mamboto prinsip ni Bibel do hita. Diboto Sibolis debata ni portibi on do, molo sai ‘holsoan hita mamikkiri parngoluan di tikki on’ boi do gabe dang tasomba be Jahowa. (Mat. 13:22; 1 Joh. 5:19) I do alana dang pola heran hita boasa gok masalah di portibi on.

4. Aha do na boi masa molo torus hita marsak mamikkiri masalahta?

⁴ Molo torus hita marsak mamikkiri masalahta, gabe dang boi be hita fokus mangulahon na asing. Misalna, olo do ra mabiar hita dang cukkup hepengta manuhor sipanganon. Manang mabiar hita molo sappe marsahit na parah dang boi be karejo. Jala mabiar do ra hita dang boi setia molo digoda. Satokkin nai pakkeon ni Sibolis nama akka bangso lao menyerang hita naposo ni Debata. Mabiar do ra hita molo sappe dang setia tikki masa i. Jadi sukkun-sukkun ma rohatta, sala do au molo songon i pikkiranku?

5. Boasa didok Jesus “unang be holsoan hamu”?

⁵ Hea do didok Jesus tu akka siseanna, “Unang be holsoan hamu.” (Mat. 6:25) Alai maksud ni Jesus dison dang na gabe so boi hita holsoan. Najolo adong do akka naposo ni Debata na holsoan. Alai toktong do dihaholongi Jahowa nasida. * (1 Raj. 19:4; Ps. 6:3) Sasittongna hata ni Jesus on patoguhon hita do, asa unang sappe tapasombu holso ni rohatta i mambahen hita marpikkir dang penting be hubunganta tu Jahowa. Attong aha do na boi taulahon molo marsak hita?​—Ida ma kotak “ Songon dia Carana”.

6. Sesuai tu Pilippi 4:6, 7, boasa boi dame pakkilalaatta nang pe marsak?

⁶ (1) Jotjot ma martangiang. Boi do gabe dame jala tenang pakkilalaatta molo martangiang hita tu Jahowa. (1 Ptr. 5:7) Dialusi Jahowa do tangiangta i, jala dilehon do tu hita “hadameon na so boi diattusi jolma”. (Jaha Pilippi 4:6, 7.) Boi do bahenon ni Jahowa dame pakkilalaatta marhite tondi parbadiana.​—Gal. 5:22.

7. Tikki martangiang hita tu Jahowa, aha do na porlu taingot?

⁷ Tikki martangiang hamu, takkas ma paboa sude na di rohamuna tu Jahowa. Paboa ma masalahna, jala paboa ma songon dia perasaanmuna. Molo dihilala hamu boi pasaehon sada masalah, pangido ma bisuk tu Jahowa lao mangalului cara pasaehon i. Jala pangido ma gogo asa boi mangulahon i. Alai molo dihilala hamu dang boi pasaehon sada masalah, pangido ma gogo sian Jahowa asa unang sai marsak hamu mamikkiri i. Molo takkas dipaboa hamu pangidoanmuna tu Jahowa, gabe boi ma takkas diida hamu songon dia Jahowa mangalusi tangiangmuna. Molo dang dialusi Jahowa dope tangiangmuna, torus ma tangiakkon hamu i. Lomo do roha ni Jahowa asa takkas dipaboa hamu pangidoanmuna jala torus ma tangiakkon hamu i.​—Luk. 11:8-10.

8. Nang pe marsak hita, aha do na ikkon tadok di tangiangta?

⁸ Tikki martangiang hita paboahon arsak ni rohatta tu Jahowa, unang ma lupa hita mandok mauliate tu Ibana. Nang pe godang masalahta, denggan do molo taingot akka pasu-pasu naung tajalo sian Ibana. Jala tikki dang taboto manang aha  sidohonotta di tangiangta i taingot ma boi do alusan ni Jahowa i nang pe na boi tadok holan, ‘Tolong, urupi au.’​—2 Kron. 18:31; Rom 8:26.

9. Aha do na ikkon taulahon asa unang mabiar hita?

⁹ (2) Taasahon ma Jahowa, unang diritta sandiri. Di jaman ni si Jesaya, hea do ro halak Asiria menyerang halak Juda. Asa unang ditaluhon halak Asiria halak Juda dipangido nasida ma bantuan ni Mesir. (Jes. 30:1, 2) Ala mangasahon Mesir do halak Juda, gabe dipissang Jahowa ma nasida jala dipaboa Jahowa ma parohon jea do na dibahen nasida i. (Jes. 30:7, 12, 13) Jadi marhite si Jesaya dipaboa Jahowa ma aha na ikkon sibahenon ni nasida asa unang mabiar nasida. Didok si Jesaya, “Molo torus do hamu porsea jala dang busisaon, lam margogo ma hamu.”​—Jes. 30:15b.

10. Akka tantangan aha do na manguji haporseaotta tu Jahowa?

¹⁰ Akka tantangan aha do na boi manguji haporseaotta tu Jahowa? Parrohahon ma contoh on. Adong ma halak na manawarhon karejo na balga gajina tu hita, alani i gabe suda ma tikkitta holan tu karejo i gabe dang penting be di hita manomba Jahowa. Manang adong dongan sakarejo na patuduhon minat romantis tu hamu, hape dang Saksi Jahowa ibana. Manang olo do ra adong anggota keluargatta na mamaksa hita mambahen keputusan. Didok ma, “Pillit ma, au do manang agamami.” Situasi dia pe na taadopi saonari, pasti maol do mambahen keputusan. Alai sai urupan ni Jahowa do hita mambahen keputusan na denggan marhite Hatana. (Mat. 6:33; 10:37; 1 Kor. 7:39) Nang pe songon i bergantung tu hita do i, olo do hita mangihutton Hata ni Jahowa i manang na dang.

11. Akka ise do contoh na disurat di Bibel na tetap tenang tikki mangadopi paraloan?

¹¹ (3) Marsiajar sian pengalaman na denggan dohot na roa. Disurat do di Bibel pengalaman ni akka naposo ni Debata na toktong porsea tu Jahowa jala tetap tenang tikki mangadopi tantangan. Saonari taparsiajari ma songon dia cara ni Jahowa mangurupi nasida. Misalna, diboan do akka apostel tu pengadilan ni halak Jahudi na untimbo lao mangorai nasida asa unang marbarita na uli be. Alai barani do nasida mandok, “Urrikkot do di hami mangoloi [Debata] sian jolma.” (Ul. 5:29) Nang pe dilissingi akka apostel i tetap do tenang nasida. Ala diboto nasida do na toktong dihaholongi jala didongani Jahowa nasida. Alani i gabe boi ma torus nasida marbarita na uli. (Ul. 5:40-42) Songon i nang si Stepanus, tikki naeng dipamate, tetap do ibana tenang “jala songon bohi ni suru-suruan do bohina”. (Ul. 6:12-15) Boasa boi songon i? Ala pos do rohana las do roha ni Jahowa tu ibana.

12. Songon na tarsurat di 1 Petrus 3:14 dohot 4:14, boasa hita boi marlas ni roha nang pe dianiaya?

¹² Pos do roha ni akka apostel na didongani Jahowa do nasida di tikki i ala boi do dibahen nasida mukjizat. (Ul. 5:12-16; 6:8) Alai anggo saonari dang masa be mukjizat. Nang pe songon i pos do rohatta na dihaholongi Jahowa hita. Alana disurat do di Bibel molo toktong hita setia tikki dianiaya, sai urupanna do hita marhite tondi parbadiana. (Jaha 1 Petrus 3:14; 4:14.) Jadi unang pola marsak hita mamikkiri penganiayaan na so masa  dope. Tumagon ma hita fokus patoguhon haporseaotta tu Jahowa. Songon akka apostel di abad na parjolo porsea ma hita tu janji ni Jesus na mandok, “Lehonokku ma bisuk tu hamu jala urupanku do hamu mamboto aha na lao dohononmuna. Jala musumuna pe dang tolap mangalusi manang aha.” Didok Jesus do muse, “Molo toktong hamu setia jala martahan, mangolu ma hamu.” (Luk. 21:12-19) Molo tung pe mate hita ala setia tu Ibana, diingot Jahowa do sude naung taulahon lao manomba Ibana. Jadi pasti paheheonna do hita.

13. Boasa porlu taparsiajari pengalaman ni akka halak na so torus mangasahon Jahowa?

¹³ Adong do muse disurat di Bibel pengalaman ni akka halak na gabe busisaon ala dang torus mangasahon Jahowa. Porlu do hita marsiajar sian nasida asa unang taulahon hasalaan na sarupa. Misalna si Asa raja ni Juda, mulana mangasahon Jahowa do ibana tikki mangalo tentara ni Etiopia na massai godang jala monang do ibana. (2 Kron. 14:9-12) Alai dang diasahon ibana be Jahowa tikki mangalo tentara ni si Baesa raja ni Israel na holan saotik. Gariada digaji ibana do tentara ni Siria lao mangurupi ibana. (2 Kron. 16:1-3) Jala tikki naeng mate ibana alani sahitna na parah dang Jahowa na dilului ibana, pangubati do.​—2 Kron. 16:12.

14. Aha do na boi taparsiajari sian pengalaman ni si Asa?

¹⁴ Mulana mangasahon Jahowa do si Asa tikki pasaehon sada masalah. Alai di pudian ni ari mangasahon dirina sandiri do ibana. Memang hira na masuk akkal do idaon keputusan ni si Asa manggaji halak Siria lao mangurupi ibana. Alai hasilna holan satokkin do dame ngolu ni halak Juda. Marhite panurirangna didok Jahowa ma tu si Asa, “Sasittongna boi hian do ditaluhon ho tentara ni Siria, hape gabe dipalua ho do nasida. Ai gabe raja ni Siria do na dipangasahon ho, dang Jahowa Debatam.” (2 Kron. 16:7) Alani i, ikkon manat do hita unang sappe didok rohatta boi do tapasae sandiri masalahta. Gabe dang taasahon be Jahowa jala dang talului be akka prinsip ni Bibel lao pasaehon i. Molo tung pe ikkon hatop hita mambahen keputusan, torus ma taasahon Jahowa asa marhasil hita.

15. Aha do na boi taulahon tikki manjaha Bibel?

¹⁵ (4) Ingot ma akka ayat ni Bibel. Molo adong akka ayat ni Bibel na boi patoguhon haporseaotta tu Jahowa, taingot ma i. Asa lam mura taingot akka ayat i marsoara ma hita tikki manjaha, tasurat ma i, jala jotjot ma tajaha muse. Najolo diparettahon Jahowa do tu si Josua asa marsoara ibana tikki manjaha Patik. Dung i boi ma ibana marhasil jala marbisuk. Molo diihutton ibana paretta ni Jahowa i, gabe boi ma ibana marhasil mamimpin bangso ni Jahowa. (Jos. 1:8, 9) Saonari godang do situasi na mambahen hita marsak jala mabiar. Alai adong do akka ayat ni Bibel na boi patoguhon hita asa toktong tenang jala dame.​—Ps. 27:1-3; Poda 3:25, 26.

16. Songon dia do akka dongan di huria boi mangurupi hita asa unang busisaon jala toktong porsea tu Jahowa?

¹⁶ (5) Akka sisomba Jahowa ma tapillit donganta. Dipakke Jahowa do akka dongan sahaporseaon asa unang busisaon hita jala toktong porsea tu Ibana. Molo ro hita tu parpunguan dipatogu do hita marhite acara parpunguan, komentar ni akka dongan, jala dipatogu do hita tikki  makkata-hatai dohot nasida. (Heb. 10:24, 25) Boi do hita diurupi akka dongan di huria molo tapaboa holso ni rohatta tu nasida. “Akka hata na denggan” sian donganta, boi do mambahen tenang pakkilalaatta.​—Poda 12:25.

17. Songon na tarsurat di Heber 6:19, boasa hita toktong togu nang pe borat situasitta?

¹⁷ (6) Ingot ma akka janji ni Jahowa. “Songon jangkar ni kapal do” akka janji ni Debata di ngolutta. Boi do i mambahen hita dang busisaon tikki taadopi akka situasi na borat. (Jaha Heber 6:19.) Taingot ma akka janji ni Jahowa na lao salpu do haduan sude na mambahen hita marsak. (Jes. 65:17) Bayangkon ma hamu mangolu di tano na imbaru na gok hadameon. Dang adong be disi haduan akka na mambahen hita busisaon. (Mik. 4:4) Asa lam pos rohatta tu akka janji ni Debata i, tabaritahon ma i. Bahen ma sian nasa gogomuna marbarita na uli jala mambahen sisean. “Molo diulahon hamu songon i, boi ma pos situtu rohamuna sahat tu ujungna na lao saut sude na pinaima-imamuna i.”​—Heb. 6:11.

18. Situasi na songon dia do na lao masa di ari na naeng ro, jala ikkon songon dia do hita mangadopi i?

¹⁸ Nungnga lam jonok panutup ni jaman on. Alani i lam godang nama akka tantangan na taadopi jala lam godang na mambahen hita marsak. Ayat tahunan 2021 mangurupi hita asa toktong tenang mangadopi akka situasi na borat. Jala asa toktong hita mangasahon Jahowa, dang diritta sandiri. Di bagasan taon on, tapatudu ma na porsea hita tu janji ni Jahowa na mandok, “Molo torus do hamu porsea jala dang busisaon, lam margogo ma hamu.”​—Jes. 30:15.