1-2. (a) Molo adong na tahaholongi naung mate, andigan do khususna sai taringot hita tu ibana? (b) Perayaan aha do na ditetappon Jesus andorang so mate ibana?

 MOLO adong halak na tahaholongi mate, pasti sai taingot do ibana nang pe naung leleng ibana mate. Jala biasana sai taringot do hita tu ibana khususna di tanggal parmatena i.

² Massai holong do rohatta tu Jesus. Alani i ma ro hita tu acara Borngin Parningotan Ari Hamamate ni Jesus tiap taon. Jala marjuta do halak di liat portibi on na ro tu acara i. (1 Ptr. 1:8) Di acara i, taingot ma pengorbanan ni Jesus na mangalehon ngoluna lao paluahon hita sian dosa dohot hamatean. (Mat. 20:28) Lomo do roha ni Jesus asa sai taingot ari hamamatena i. Di borngin andorang so mate Jesus, dibahen ibana ma acara borngin parningotan jala diparettahon ibana do tu akka siseanna, “Toktong ma ulahon on bahen parningotan di au.”—Luk. 22:19.

3. Aha na lao tabahas di artikel on?

³ Adong dua kelompok na ro tu acara Borngin Parningotan Ari Hamamate ni Kristus. Na parjolo, i ma akka halak na harapanna tu surgo. Jumlah ni nasida saotik do. Kelompok na paduahon, akka halak na harapanna mangolu salelengna di tano on, adong do marjuta nasida. Di artikel on, tabahas ma alasanna boasa ikkon ro dua kelompok on tu acara Borngin  Parningotan tiap taon. Dung i tabahas ma muse manfaatna molo ro hita tu acara i. Na parjolo, tabahas ma boasa akka halak na lao mangolu tu surgo ikkon ro tu acara Borngin Parningotan i.

4. Boasa akka halak na harapanna mangolu tu surgo mangallang roti jala manginum anggur di acara Borngin Parningotan?

⁴ Setiap taon tikki taulahon acara Borngin Parningotan, sude akka halak na dipillit lao mangolu tu surgo mangallang roti dohot manginum anggur. Boasa diallang halak i roti jala diinum anggur i? Coba ma jo taingot aha na masa di borngin andorang so mate Jesus. Di tikki i, dung sae nasida mangallang sipanganon Paska, ditetappon Jesus ma sada perayaan na ikkon toktong taulahon, i ma Borngin Parningotan ni Tuan. Diedarhon Jesus do roti dohot anggur tu 11 apostelna na setia. Dung i disuru Jesus ma asa diallang halak i roti i jala diinum anggur i. Didok Jesus ma muse, na lao dibahen Jesus do dua parjanjian dohot nasida, i ma parjanjian na imbaru dohot parjanjian Harajaon. * (Luk. 22:19, 20, 28-30) Ala nungnga dibahen Jesus parjanjian dohot nasida, gabe boi ma akka apostel i dohot akka halak na dipillit lao mangolu tu surgo gabe raja dohot malim di surgo. (Pgk. 5:10; 14:1) Alani i ma, holan akka halak na dipillit tu surgo na mangolu di tano on do, na boi mangallang roti dohot manginum anggur di acara Borngin Parningotan i. Alana holan nasida do na dohot tu dua parjanjian i.

5. Aha do na diulahon akka halak na lao mangolu tu surgo asa boi dapot ni nasida harapan i?

⁵ Alasan na asing boasa halak na dipillit lao mangolu tu surgo ikkon ro tu acara Borngin Parningotan, ala di tikki i ma nasida boi mangarimangi harapan ni nasida. Akka aha do harapan na lao dijalo nasida? Dapot ni nasida ma daging na so boi busuk, boi ma nasida mangolu salelengna di surgo, rap mamaretta ma nasida dohot Jesus, jala boi ma nasida mangida Jahowa! (1 Kor. 15:51-53; 1 Joh. 3:2) Pasti las do roha ni nasida mandapot harapan i. (Tit. 2:13) Alai ikkon toktong do nasida setia tu Jahowa asa boi dapot ni nasida harapan i. (2 Tim. 4:7, 8) Boha ma akka ‘biru-biru na asing’? (Joh. 10:16) Boasa ma nasida ikkon ro tu acara Borngin Parningotan?

6. Boasa ikkon ro biru-biru na asing tu acara Borngin Parningotan?

⁶ Di taon 1938 do parjolo sahali diundang akka halak na naeng mangolu di tano on tu acara Borngin Parningotan. Memang dang dohot nasida mangallang roti jala manginum anggur di acara i. Alai las do roha ni nasida boi ro tu acara i. The Watchtower 1 Maret 1938 mandok, “Denggan do molo ro [biru-biru na asing] tu acara Borngin Parningotan. Boi ma diida nasida aha do na diulahon disi . . . Jala las do roha ni nasida ala boi dohot tu acara i.” Songon tamu na marlas ni roha tu acara pernikahan, songon i do biru-biru na asing marlas ni roha ro tu acara Borngin Parningotan.

7. Aha do na boi dirimangi biru-biru na asing saleleng acara Borngin Parningotan?

⁷ Acara Borngin Parningotan i gabe kesempatan na denggan do di akka biru-biru na asing lao mangarimangi harapan ni nasida. Boi ma dibayakkon nasida aha na lao bahenon ni Jesus dohot si 144.000 i  saleleng Pamarettaon Saribu Taon. Di tikki i, bahenon ni nasida ma tano on gabe Paradeiso jala diurupi nasida ma sude jolma asa boi gabe sempurna. Pasti saleleng Borngin Parningotan i, las hian do roha ni biru-biru na asing mambayakkon saut akka janji ni Debata. Songon na tarsurat di Jesaya 35:5, 6; 65:21-23, dohot di Pangungkapon 21:3, 4. Molo dibayakkon nasida akka janji ni Debata na lao jaloon ni nasida, gabe lam togu ma haporseaon ni nasida. Jala lam bertekad ma nasida asa toktong setia melayani Jahowa.—Mat. 24:13; Gal. 6:9.

8. Aha dope alasanna boasa ikkon ro biru-biru na asing tu acara Borngin Parningotan?

⁸ Adong dope alasanna boasa ikkon ro biru-biru na asing tu acara Borngin Parningotan. Alana nasida naeng patuduhon holong dohot dukungan ni nasida tu akka halak na tarpillit lao mangolu tu surgo. Jala nungnga disurirangkon di Bibel hian, na ikkon marsada do akka halak na harapanna tu surgo dohot akka halak na harapanna mangolu salelengna di tano on lao manomba Jahowa. Akka surirang na dia ma i? Taida ma piga-piga contohna.

9. Sesuai tu Sakaria 8:23, songon dia do hubungan ni biru-biru na asing tu akka halak na harapanna tu surgo?

⁹ Jaha Sakaria 8:23. Surirang on patuduhon massai jonok do hubungan ni biru-biru na asing dohot akka halak na dipillit lao mangolu tu surgo. Hata “sahalak Jahudi” dohot “bangsom” na didok di ayat i manggombarhon akka halak na dipillit lao mangolu tu surgo na adong dope di tano on. (Rom 2:28, 29) Jala “sappulu bawa na sian sude bahasa ni akka bangso” i manggombarhon biru-biru na asing. Didok do nasida ‘gomos maniop jubah ni halak Jahudi’ i lao patuduhon na toktong do biru-biru na asing setia mendukung halak na harapanna mangolu tu surgo. Jala marsada do nasida lao manomba Debata. Alani i tikki ro biru-biru na asing di acara Borngin Parningotan, on patuduhon na massai jonok do hubungan ni halak i dohot akka halak na dipillit lao mangolu tu surgo.

10. Asa saut surirang na disurat di Hesekiel 37:15-19, 24, 25, aha do na ikkon diulahon Jahowa?

¹⁰ Jaha Hesekiel 37:15-19, 24, 25. Asa boi saut surirang on, ikkon bahenon ni Jahowa do marsada akka halak na harapanna mangolu tu surgo dohot biru-biru na asing. Di surirang i adong do dipaboa taringot dua tukkot. Tukkot na parjolo, i ma tukkot ni “si Juda” na manggombarhon akka halak na harapanna mangolu tu surgo. Cocok do gombaran i, alana sian marga Juda do najolo dipillit akka raja ni Israel. Dung i adong do muse dipaboa tukkot ni “si Epraim”, na manggombarhon akka halak na harapanna mangolu salelengna di tano on. * Dibahen Jahowa do marsada dua tukkot i. Lapatanna dibahen Jahowa do marsada biru-biru na asing dohot akka halak na harapanna mangolu tu surgo. Jala raja ni nasida sada do, i ma Jesus Kristus. Tikki ro nasida tu acara Borngin Parningotan, dang dua punguan nasida, alai “sada punguan” jala “sada parmahan”.—Joh. 10:16.

11. Sesuai tu Mateus 25:31-36, 40, songon dia do biru-biru na asing mangurupi akka haha anggi ni Jesus?

¹¹ Jaha Mateus 25:31-36, 40. “Biru-biru” na didok di perumpamaan i, i ma akka halak na sittong na naeng mangolu di tano on. Jala digoari do nasida biru-biru na asing. Setia do biru-biru na asing mangurupi akka haha anggi ni Jesus na lao mangolu di surgo. Misalna  diurupi nasida do akka haha anggi ni Jesus i mandalatton tanggung jawab ni nasida, i ma marbarita na uli tu liat portibi on dohot mambahen sisean.—Mat. 24:14; 28:19, 20.

12-13. Songon dia do biru-biru na asing mangurupi akka haha anggi ni Jesus?

¹² Piga-piga minggu sebelum Borngin Parningotan diulahon ganup taon, diurupi akka biru-biru na asing do haha anggi ni Jesus marbarita na uli mangundang akka halak asa ro tu Borngin Parningotan i. (Ida kotak “ Bahen ma Persiapan tu Acara Borngin Parningotan”.) Denggan do dipersiappon nasida akka na porlu tu acara i, nang pe dang adong di huria i na dohot mangallang roti dohot manginum anggur. Massai las do roha ni nasida mangurupi akka haha anggi ni Jesus on. Jala diboto nasida do manang aha pe na dibahen lao mangurupi haha anggi ni Jesus, dos songon mangurupi Jesus do i.—Mat. 25:37-40.

¹³ Aha dope alasan na asing ikkon ro hita tu Borngin Parningotan, dang soal tudia harapanta?

14. Songon dia do Jahowa dohot Jesus patuduhon holongna tu hita?

¹⁴ Mandok mauliate do hita alani holong ni Jahowa dohot Jesus tu hita. Godang do cara dibahen Jahowa lao patuduhon holongna. Alai holongna na umbalga, i ma mangalehon Anakna na sasada i asa mate humokkop hita. (Joh. 3:16) Holong do muse roha ni Jesus ala rade do ibana mate lao manobus hita. (Joh. 15:13) Dang tarbalos holong ni Jahowa dohot Jesus i. Alai boi do hita mandokkon mauliate. Tapatudu ma i sian parniulaotta ganup ari. (Kol. 3:15) Asing ni i, boi do tong tapatudu holongta tu nasida molo ro hita tu Borngin Parningotan. Ala di tikki i ma kesempatan na denggan tu hita boi mangarimangi holong ni Jahowa dohot Jesus.

15. Boasa ikkon taargai tobusan dang soal tudia harapanta?

¹⁵ Taargai do tobusan. (Mat. 20:28) Molo ro hita tu Borngin Parningotan ganup taon, i patuduhon na taargai do tobusan dang soal tudia harapanta. Massai arga do tobusan on tu halak na dipillit lao mangolu tu surgo. Alana molo porsea nasida tu tobusan ni Kristus, didok Jahowa ma nasida halak na tigor jala dianggap ma nasida anakna. (Rom 5:1; 8:15-17, 23) Songon i nang biru-biru na asing. Mandok mauliate do nasida alani tobusan. Molo porsea nasida tu tobusan, gabe sittong ma nasida di jolo ni Debata jala boi ma nasida manomba Ibana. Dung i boi ma nasida malua sian “hasusaan bolon”.—Pgk. 7:13-15.

16. Aha do alasan na asing boasa ikkon ro hita tu Borngin Parningotan?

¹⁶ Alasan na asing boasa ikkon ro hita tu Borngin Parningotan, ala lomo do rohatta mangoloi hata ni Jesus. Diparettahon Jesus do tu akka siseanna, “Toktong ma ulahon on bahen parningotan di au.”—1 Kor. 11:23, 24.

17. Boasa molo ro hita tu Borngin Parningotan mambahen hita lam jonok tu Jahowa?

¹⁷ Gabe lam jonok ma hita tu Jahowa. (Jak. 4:8) Songon naung tabahas nakkin, molo ro hita tu acara i, boi ma hita mangarimangi harapan naung dilehon Jahowa tu hita dohot mangarimangi balga ni holong ni Jahowa tu hita. (Jer. 29:11; 1 Joh. 4:8-10) Molo tarimangi i, gabe lam pos ma rohatta tu harapan i jala lam pos ma rohatta tu holong ni Jahowa. Hasilna gabe lam togu ma hubungatta tu Jahowa.—Rom 8:38, 39.

18. Molo tarimangi taringot parngoluon ni Jesus, aha do hasilna?

 ¹⁸ Gabe tergerak ma hita maniru Jesus. (1 Ptr. 2:21) Biasana andorang so dapot Borngin Parningotan, tajaha do kisah ni Jesus sian Bibel taringot parngoluonna saminggu sebelum mate ibana, songon dia parmatena, dohot haheheonna. Dung i di acara Borngin Parningotan i, dipaingot ma hita songon dia balga ni holong ni Jesus. (Eps. 5:2; 1 Joh. 3:16) Molo tarimangi i sude, hasilna gabe tergerak ma hita mangihutton “akka na diulahon ibana”.—1 Joh. 2:6.

19. Songon dia carana asa toktong hita di bagasan holong ni roha ni Debata?

¹⁹ Gabe berupaya ma hita asa toktong di bagasan holong ni roha ni Debata. (Jud. 20, 21) Songon dia carana? Na parjolo, taoloi ma parettana. Na paduahon, tapabadia ma goarna. Na patoluhon, tabahen ma las rohana. (Poda 27:11; Mat. 6:9; 1 Joh. 5:3) Jadi molo ro hita tu Borngin Parningotan i, gabe lam bertekad ma hita asa toktong di bagasan holong ni roha ni Jahowa salelengna.

20. Boasa ikkon ro hita tu Borngin Parningotan?

²⁰ Dang soal mangolu tu surgo manang mangolu di tano on harapanta, ikkon ro do hita tu Borngin Parningotan Ari Hamamate ni Jesus. Di acara i dipaingot ma hita na holong do roha ni Jesus tu hita. Jala dipaingot muse hita massai balga do holong ni Jahowa tu hita ala dilehon Anakna i gabe tobusan. Di taon on, dibahen ma acara Borngin Parningotan i di ari Jumat, tanggal 15 April 2022. Molo holong rohatta tu Jahowa dohot tu Jesus Anakna i, ikkon ro do hita tu acara Borngin Parningotan i.