1. Hasusaan aha do na diadopi si Daud?

 SUSA do ngolu ni si Daud alana ikkon melarikan diri do ibana sian Raja Saul na naeng pamatehon ibana. Tikki i lao ma ibana tu kota Nob lao mangalului lima roti asa adong siallangonna. (1 Sam. 21:1, 3) Dung i ikkon martabuni do ibana muse rap dohot akka tentarana di gua. (1 Sam. 22:1) Alai boasa sappe naeng dipamate Raja Saul si Daud?

2. Boasa gabe sogo roha ni Jahowa mangida si Saul? (1 Samuel 23:16, 17)

² Cemburu do si Saul tu si Daud alana unlomo do roha ni halak mangida si Daud sian ibana. Dung i, unggodang do musu ditaluhon si Daud sian ibana. Asing ni i muse, nga ditolak Jahowa ibana jala si Daud ma na dipillit Jahowa lao manggattihon ibana. (Jaha 1 Samuel 23:16, 17.) Jadi berencana ma si Saul lao pamatehon si Daud. Dimanfaatton ibana ma tentarana na godang i lao mendukung rencanana. Alani i ma ikkon melarikan diri si Daud. Boasa gabe barani si Saul merencanahon lao pamatehon halak na pinillit ni Jahowa? Na dirippu si Saul do boi digagalhon ibana rencana ni Jahowa i? (Jes. 55:11) Memang dang dipaboa di Bibel aha alasanna. Alai na pasti, rencana ni si Saul i mambahen sogo roha ni Jahowa tu ibana. Jala dang adong manang ise pe na boi marhasil mangalo Jahowa.

3. Gabe muruk do si Daud tu Jahowa alani hasusaanna i?

³ Halak na serep marroha do si Daud on. Dang alani keinginanna sandiri gabe raja ibana. Alai Jahowa do na mamillit  ibana. (1 Sam. 16:1, 12, 13) Alani i sogo hian do roha ni si Saul mangida si Daud. Nang pe gabe susa si Daud, alai dang disalahon ibana Jahowa. Dang mengeluh ibana ala terbatas sipanganonna, jala ala ikkon martabuni di gua ibana. Nang pe songon i, dang berfokus ibana tu hasusaanna i. Gariada dipuji si Daud do Jahowa, dibahen ibana ma ende na massai uli tikki di gua i. Misalna songon ayat tema di artikel on na mandok, “Dang hurangan manang aha akka halak na mangalului Jahowa.”—Ps. 34:10.

4. Sukkun-sukkun aha do na lao tabahas, jala boasa penting ikkon tabahas i?

⁴ Godang do naposo ni Jahowa na pogos saonari. Maol do nasida mangalului sipanganon dohot kebutuhan na asing, * terutama ma di tikki pandemi on. Alai lam tu susana do parngoluotta molo nungnga masa “hasusaan bolon”. (Mat. 24:21) Alani i, taalusi ma jo opat sukkun-sukkun on: Boasa didok si Daud “dang hurangan manang aha” ibana? Boasa ikkon puas hita tu akka na adong di hita? Boasa ikkon pos rohatta na jagaon ni Jahowa do hita? Jala aha do na ikkon taparade lao mangadopi akka hasusaan di ari na naeng ro?

5-6. Songon na dipaboa di Psalmen 23:1-6, aha do maksud ni si Daud tikki didok ibana “dang hurangan manang aha” naposo ni Jahowa?

⁵ Aha do maksud ni si Daud tikki didok ibana “dang hurangan manang aha” naposo ni Jahowa? Boi do taboto lapatan ni hatana i molo tabandingkon tu Psalmen 23. (Jaha Psalmen 23:1-6.) Di ayat 1 sian Psalmen 23 i didok, “Jahowa do Siparmahan di au. Dang hurangan manang aha au.” Dung i dipaboa si Daud do muse akka pasu-pasu na dijalo ibana sian Jahowa, ala Jahowa do Siparmahan di ibana. Misalna ditogu-togu Jahowa do ibana “tu dalan na sittong”, jala torus do diurupi Jahowa ibana tikki susa nang sonang ngoluna. Dung i dipasu-pasu Jahowa do ibana, hira na diboan ma ibana maradi tu “inganan  parmahanan na lomak”. Alai takkas do diboto si Daud pasti adong do tantangan na mambahen susa ngoluna. Hea do metmet rohana, didok ibana ma songon na mardalan di “rura na massai golap” jala godang do akka musuna. Alai nang pe songon i, “dang mabiar” ibana ala Jahowa do Siparmahan di ibana.

⁶ Nakkin didok si Daud do “dang hurangan manang aha” ibana. Taringot hubunganna tu Jahowa do na didok ibana disi. Ala jonok ibana tu Jahowa hira dang hurangan manang aha be ibana. Puas do si Daud tu akka na adong di ibana. Jadi dang arta na mambahen las rohana, alai hubunganna tu Jahowa do na paling penting di ngoluna. Pos do rohana jagaon ni Jahowa ibana jala pasu-pasuonna.

7. Situasi aha do na diadopi halak Kristen na tinggal di Judea songon na dipaboa di Lukas 21:20-24?

⁷ Sian hata ni si Daud nakkin gabe taboto ma dang boi tabahen arta na uppetting di ngolutta, nang pe boi las rohatta molo adong artatta. On sada paretta na ikkon diulahon halak Kristen na tinggal di Judea di abad na parjolo. (Jaha Lukas 21:20-24.) Nungnga dipaboa Jesus tu nasida na lao “markemah akka tentara di sakaliling ni Jerusalem”. Jala molo masa i ‘ikkon lari do nasida tu dolok’. Asing ni i ikkon tinggalhonon ni nasida do artana. Molo diulahon nasida paretta i, gabe selamat ma nasida. Taringot halak Judea on, hea do Menara Pengawal mandok, “Tadikkonon ni nasida do ladang dohot jabuna. Dang papunguon ni nasida arta ni nasida. Pos do roha ni nasida na urupan jala jagaon ni Jahowa do nasida. Alani i ma gabe boi dibahen nasida Jahowa na uppetting di ngolu ni nasida.” *

8. Parsiajaran aha do na boi tadapot sian halak Kristen na di Judea i?

⁸ Parsiajaran aha do na boi tadapot sian halak Kristen na di Judea i? Didok do muse di Menara Pengawal i, “Haduan olo do ra diuji haporseaotta lao patuduhon aha do na uppetting di ngolutta, arta do manang hubungatta tu Jahowa. Molo toktong do hita setia tu Jahowa, gabe selamat ma hita. Tikki masa hasusaan bolon i pasti lam susa do annon ngolutta. Jadi saonari ma tikkina, taparade rohatta asa boi mangadopi hasusaan i, songon halak Kristen na di Judea.”

9. Aha do manfaatna tu hita molo taihutton poda ni si Paulus tu halak Judea i?

⁹ Boi do dibayakkon hamu songon dia susa ni halak Judea i maninggalhon sude artana jala ikkon pinda tu inganan na baru? Pasti dang mura. Ikkon porsea do nasida na sanggup do Jahowa paradehon sude kebutuhan ni nasida. Alai lima taon andorang so ro halak Rom menyerang Jerusalem, nungnga dilehon si Paulus sipasingot tu halak i asa boi nasida mangadopi hasusaan i. Si Paulus mandok, “Unang ma holan hepeng na dipikkiri hamu di ngolumuna, alai las ma rohamuna tu akka na adong di hamu. Ai didok Debata do, ‘Dang tadikkonokku ho jala dang pasombuokku ho.’ Alani i, pos ma rohatta mandok, ‘Jahowa do na mangurupi au, dang mabiar au. Aha ma na boi bahenon ni jolma tu au?’” (Heb. 13:5, 6) Molo diihutton halak i poda ni si Paulus, gabe boi ma nasida martahan nang pe pogos nasida. Alana pos do roha ni halak i na paradeon ni Jahowa do sude kebutuhan ni nasida. Hita pe boi do pos rohatta songon halak i molo taihutton poda ni si Paulus.

10. Songon na didok si Paulus, aha do “rahasiana” asa boi makkalasson na adong di hita?

¹⁰ Hea do dilean si Paulus nasehat na sarupa tu si Timoteus. Didok ibana, “Molo adong sipanganon dohot pakkeatta, las ma rohatta  disi.” (1 Tim. 6:8) Aha do maksud ni hata ni si Paulus on? Na so boi do hita mangallang sipanganon na tabo, manang tinggal di jabu na nyaman, manang dang boi mamakke baju na baru? Dang i maksud ni si Paulus dison. Alai maksud ni hata ni si Paulus on, ikkon puas do hita tu akka na adong di hita. (Plp. 4:12) Jala didok si Paulus, i do “rahasiana” asa boi makkalasson na adong di hita. Sai taingot ma na ummarga di ngolutta on, hubungatta tu Jahowa do dang tu arta.—Hab. 3:17, 18.

11. Parsiajaran aha do na tadapot sian hata ni si Musa tu halak Israel?

¹¹ Sipata beda do cara marpikkirta dohot Jahowa taringot aha na tahaporluhon. Contohna songon na didok si Musa tu halak Israel tikki di gurun nasida saleleng 40 taon. Didok si Musa, “Nungnga dipasu-pasu Jahowa Debatamuna i sude ulaonmuna. Takkas do diboto Ibana songon dia pardalananmuna di gurun na bidang on. Saleleng 40 taon on, sai didongani Jahowa Debatamuna do hamu, jala dang hahurangan manang aha hamu.” (5 Mus. 2:7) Saleleng 40 taon i, sai dipasu-pasu Jahowa do nasida. Dilehon Jahowa do tu nasida sipanganon, i ma manna jala dang hea maribak baju ni nasida. Bahkan baju i do tong na dipakke nasida sian Mesir. (5 Mus. 8:3, 4) Nang pe songon i, godang do halak Israel na so puas. Hape songon na didok si Musa nungnga diparade Jahowa kebutuhan ni nasida. Sian on hita marsiajar, ikkon merasa puas do hita tu akka na adong di hita, asa boi tabahen las roha ni Jahowa. Taanggap ma sude na adong di hita termasuk na gelleng pe, pasu-pasu sian Jahowa do i.

12. Aha do buktina dang mangasahon dirina sandiri si Daud?

¹² Pos do roha ni si Daud, setia jala parduli do Jahowa tu akka halak na makkaholongi Ibana. Tarida do i sian ende na disurat ibana di Psalmen 34. Sabotulna tikki manuratton ende i susa do ngolu ni si Daud. Alana naeng dipamate si Saul do ibana. Alai pos do roha ni si Daud ‘markemah do suru-suruan ni Jahowa di sakalilingna’. (Ps. 34:7) Disarupahon si Daud do akka suru-suruan ni Jahowa i songon tentara na markemah di sakalilingna lao manjaga ibana sian akka musuna. Sahalak tentara na barani do si Daud jala raja na dipillit Jahowa, alai dang i na dipangasahon ibana. Pos do roha ni si Daud boi pe ibana monang ala na diurupi Jahowa do, dang alani malona mamakke ambalang manang mamakke podang. (1 Sam. 16:13; 24:12) Pos do muse roha ni si Daud dipakke Jahowa do akka suru-suruanna lao paluahon akka halak na makkabiari Ibana. Saonari dang taharappon be dibahen Jahowa mukjizat sisongon i lao manjaga hita. Alai taingot ma molo tung pe mate hita saonari, pos ma rohatta pasti paheheon ni Jahowa do hita jala bahenonna mangolu saleleng-lelengna.

13. Boasa dang porlu hita mabiar tikki ro Gog na sian Magog menyerang hita? (Ida gambar sampul.)

¹³ Haduan diuji dope haporseaotta tu Jahowa tikki ro serangan Gog sian Magog, i ma gabungan akka bangso na mangalo ibadat na sittong. Tikki i ikkon pos do rohatta tu Jahowa, na sanggup do Ibana paluahon hita. Alana haduan hira biru-biru na so adong parmahanna ma hita. (Hes. 38:10-12) Dang adong sinjatatta, dang hea hita marporang, gabe dirippu nasida ma mura hita ditaluhon. Sabotulna adong do suru-suruan na manjaga hita, alai dang boi diida nasida i, ala dang porsea nasida tu Debata. Pasti tarsonggot do nasida annon mangida suru-suruan i mambela hita!—Pgk. 19:11, 14, 15.

14. Aha do na ikkon taparade lao mangadopi akka hasusaan di ari na naeng ro?

¹⁴ Aha do na ikkon taparade asa boi martahan mangadopi akka hasusaan di ari na naeng ro? Unang ma tabahen arta na uppetting di ngolutta, alana tinggal do annon sudena i. Asing ni i ikkon puas do hita tu akka na adong di hita. Ala sabotulna na mambahen las rohatta holan hubungatta tu Jahowa do. Jadi tapatogu ma haporseaotta tu Jahowa, alana molo lam takkas tatanda Ibana gabe lam pos ma rohatta na jagaonna do hita tikki ro serangan ni Gog na sian Magog.

15. Pengalaman aha do na mangurupi si Daud gabe lam porsea tu Jahowa?

¹⁵ Saonari taparsiajari ma aha dope na mangurupi si Daud mangadopi hasusaanna. Si Daud mandok, “Uji jala ida ma na burju do Jahowa. Marlas ni roha do manang ise na marlinggom tu Ibana.” (Ps. 34:8) Ayat i patuduhon na porsea situtu do si Daud tu Jahowa. Ala Jahowa do na diandalhon si Daud, dang hea dibahen Jahowa kecewa ibana. Tarida ma i sian hatana tikki marporang mangalo si Goliat. Didok ibana, “Sadari on, pasahaton ni Jahowa ma ho tu tanganku.” (1 Sam. 17:46) Dung i tikki si Daud melayani Raja Saul, sai berupaya do Raja Saul lao pamatehon ibana. Alai dang marna saut rencana ni Raja Saul i, alana ‘sai didongani Jahowa do si Daud’. (1 Sam. 18:12) Ala sai diingot si Daud songon dia Jahowa mangurupi ibana di tikki naung salpu, gabe pos ma rohana sai urupan ni Jahowa do ibana mangadopi akka hasusaanna.

16. Situasi na songon dia do na manguji haporseaotta tu Jahowa? Paboa ma contohna.

 ¹⁶ Molo sai taandalhon Jahowa di ngolutta, gabe lam porsea ma hita tu Ibana. Misalna ala pos rohatta tu Jahowa, gabe barani ma hita mangido ijin sian tempat parkarejoatta asa boi dohot tu parpunguan wilayah manang regional, asa boi taratur marpungu, jala taratur marbarita na uli. Alai boha ma molo dang dapotta ijin jala gabe dipecat hita alani i? Molo songon i do situasitta, tottu porlu do haporseaon mangadopi i. Jala ikkon pos do rohatta, na sanggup do Jahowa paradehon kebutuhanta. (Heb. 13:5) Setia do Jahowa tu akka naposona. Buktina godang do pengalaman ni akka donganta na sepenuh waktu na patuduhon sai diurupi Jahowa do nasida, jala dilehon Jahowa do kebutuhan nasida.

17. Aha do ayat tahunanta di taon 2022 on, jala boasa pas ayat i tu tikkitta saonari?

¹⁷ Jadi dang adong be alasanta mabiar tu aha na lao masa di ari na naeng ro. Alana sai di labbungta do Jahowa, dang hea tinggalhononna hita saleleng tabahen ibana na uppetting di ngolutta. Alani i ma Punguan na Mangaradoti Organisasi mamillit Psalmen 34:10 na gabe ayat tahunanta di taon 2022 on, lao paradehon hita mangadopi akka hasusaan di ari na naeng ro. Jala paposson rohatta sai jagaon ni Jahowa do hita. Alani i toktong ma taingot ayat tahunanta on, “Dang hurangan manang aha akka halak na mangalului Jahowa.”