1-3. Aha do na mambahen hita sipata tangis?

 SUDE do hita hea tangis. Sipata tangis do hita alani las ni rohatta. Alai jotjotan hita tangis ala lungun rohatta. Misalna ala mate halak na tahaholongi. Songon i do na dihilala donganta si Laura na di Amerika Serikat. Ibana mandok, “Lungun hian do huhilala tikki mate borukku. Sipata alani arsak ni rohakku, dang huboto be aha sibahenokku. Huhilala dang boi be au marlas ni roha.” *

² Adong dope ra alasan na asing boasa tangis hita. Songon na dihilala donganta si Harumi, sahalak perintis na tinggal di Jepang. Didok ibana, “Metmet do rohakku ala godangan halak di daerah dinashu dang berminat tu Bibel. Olo do au tangis alani i. Martangiang ma au tu Jahowa asa boi juppangku halak na serep marroha.”

³ Hea do dihilala hamu songon na dihilala donganta i? Godang do ra sian hita hea makkilala songon i. (1 Ptr. 5:9) Taboto do, ikkon ‘marlas ni roha do hita manomba Jahowa’. Alai sipata ala mate halak na tahaholongi, marsak hita, jala metmet rohatta alani sitaononta, gabe dang boi hita marlas ni roha manomba Ibana. (Ps. 6:6; 100:2) Attong aha do na ikkon taulahon lao mangatasi perasaan sisongon i?

4. Aha do na lao tabahas di artikel on?

⁴ Saonari marsiajar ma jo hita sian Jesus. Hea do ibana mangadopi situasi na massai borat, na mambahen ‘manetek iluna’. (Joh. 11:35; Luk. 19:41; 22:44; Heb. 5:7) Saonari tabahas ma akka situasi i, jala tabahas ma muse aha na boi taparsiajari sian i.

5. Aha do na taboto taringot Jesus sian Johannes 11:32-36?

⁵ Taon 32 M tikki musim dingin, marsahit ma si Lasarus jala mate ma ibana. (Joh. 11:3, 14) Adong do dua iboto ni si Lasarus, i ma si Maria dohot si Marta. Ale-ale ni Jesus do halak i na tolu jala holong hian do roha ni Jesus tu nasida. Tikki na mate i si Lasarus, lungun hian do roha ni si Marta dohot si Maria. Dung mate si Lasarus, ro ma Jesus tu Betania mandapotton si Maria dohot si Marta. Disi dibege si Marta naung ro Jesus, pittor lao ma ibana mandapotton Jesus. Didok ibana, “Molo dison hian ho Tuan, dang mate ibotokki.” Boi do dibayakkon hamu songon dia lungun ni roha ni si Marta tikki i? (Joh. 11:21) Tikki diida Jesus tangis si Maria dohot akka na asing, gabe “manetek ma ilu ni Jesus”.—Jaha Johannes 11:32-36.

6. Boasa tangis Jesus tikki mate si Lasarus?

⁶ Boasa tangis Jesus di tikki i? Di bukku Pemahaman Alkitab didok ma songon on, “Tikki diida Jesus tangis akka iboto ni si Lasarus, gabe ‘manetek do ilu ni Jesus’.” * Tikki i dibayakkon Jesus do ra songon dia haccitna dihilala si Lasarus manaon sahitna, jala dibayakkon Jesus do ra songon dia perasaan ni si Lasarus tikki naeng mate nama ibana. Asing ni i, diida Jesus do lungun hian roha ni si Maria dohot si Marta, ala na mate i si Lasarus. Sarupa songon Jesus do ra pakkilalaanmuna molo adong keluarga manang sahabatmuna na mate. Pasti haccit hian do dihilala hamu. Saonari taida ma aha na boi taparsiajari sian situasi i.

7. Tangis do Jesus tikki mate si Lasarus. Aha ma na boi taparsiajari taringot Jahowa sian i?

⁷ Diattusi Jahowa do songon dia pakkilalaanmuna. “Suman situtu” do Jesus tu Bapakna, Jahowa. (Heb. 1:3) Jadi tikki na lungun i roha ni Jesus ala mate si Lasarus, pasti songon i do tong pakkilalaan ni Jahowa. (Joh. 14:9) Tarapul do rohatta mamboto on. Alani i pos ma rohamuna molo lungun rohamuna ala  mate halak na dihaholongi hamu, diattusi Jahowa do songon dia haccit na dihilala hamu. Jala Ibana pe lungun do rohana alani i. Lomo do roha ni Jahowa naeng pamaluppon lukka na di rohamuna i.—Ps. 34:18; 147:3.

8. Boasa boi pos rohatta lomo do roha ni Jesus pahehehon halak na mate?

⁸ Lomo do roha ni Jesus pahehehon halak na dihaholongi hamu naung mate. Tikki na mate i si Lasarus, didok Jesus do tu si Marta, “Mulak mangolu do muse ibotomi.” Porsea do si Marta tu hata ni Jesus i. (Joh. 11:23-27) Naposo ni Jahowa na setia do si Marta, jadi pos do rohana adong haheheon. Asing ni i, nga hea dibege ibana dipahehe si Elia dohot si Elisa halak na mate. (1 Raj. 17:17-24; 2 Raj. 4:32-37) Jala pasti nungnga hea tong dibege ibana Jesus pahehehon halak na mate. (Luk. 7:11-15; 8:41, 42, 49-56) Songon si Marta, pos ma rohamuna pasti hehe do annon halak na dihaholongi hamu. Aha ma na mambahen pos rohamuna? Ingot ma, dipahehe Jesus do si Lasarus ala boi do dihilala ibana songon dia lungun ni roha ni si Marta dohot si Maria. On patuduhon lomo hian do roha ni Jesus naeng pahehehon halak naung mate.

9. Boha do carana hita mangurupi akka donganta na marlungun ni roha? Paboa ma sada pengalaman.

⁹ Sai taurupi ma akka dongan na marlungun ni roha. Tikki diida Jesus tangis si Marta dohot si Maria, dohot do ibana tangis. Asing ni i, ditangihon Jesus do halak i jala dipatogu do roha ni nasida. Hita pe, porlu do tabahen songon i tu akka dongan na marlungun ni roha ala mate halak na dihaholongi nasida. Taida ma jo saonari aha na didok donganta si Daniel, sahalak sintua na tinggal di Australia. Didok ibana, “Tikki mate istrikku, hancur hian do perasaanku. Alai burju hian do akka dongan. Adong do piga-piga pasangan na sai rade mandongani au. Dang bosan nasida mambege au marcarita. Dang diorai nasida au tangis. Alani i gabe dang maila au patuduhon perasaanku di jolo ni nasida. Rade do nasida mangurupi au manucci mobil, belanja dohot mangaloppa. Jotjot do hami rap martangiang. Dos songon keluargakku do nasida, na sai adong di labbungku ‘tikki masa sitaonon’.”—Poda 17:17.

10. Caritahon ma aha na masa di Jerusalem songon na dipaboa di Lukas 19:36-40.

¹⁰ Di tanggal 9 Nisan 33 M, lao ma Jesus tu kota Jerusalem. Tikki masuk ibana tu kota i, godang do halak na menyambut ibana. Dipahembang nasida ma pakkean ni nasida di dalan, lao patuduhon na disambut nasida do Jesus gabe raja ni nasida. Marlas ni roha do halak i tikki i. (Jaha Lukas 19:36-40.) “Dung jonok Jesus tu Jerusalem, ditatap ibana ma kota i jala diandungi”. Mangida Jesus tangis, gabe heran do akka siseanna. Alana baru dope halak i marlas ni roha. Alai sabotulna na mambahen Jesus tangis ala diboto ibana do na lao hancur nama kota Jerusalem, jala i do na dipaboa ibana tu akka siseanna.—Luk. 19:41-44.

11. Boasa diandungi Jesus kota Jerusalem?

¹¹ Massai lungun do roha ni Jesus ala godang halak Jahudi na so olo manangihon barita na dipasahat ibana. Diboto Jesus do, molo ditolak halak Jahudi ibana gabe dihancurhon ma kota Jerusalem. Jala godang ma sian nasida na gabe tawanan. (Luk. 21:20-24) On ma na mambahen massai lungun roha ni Jesus. Hea do hamu merasa songon i? Olo do ra godang halak na manolak barita na uli na dipasahat hamu. Molo songon i do situasimuna, marsiajar ma hamu sian Jesus. Lungun do  rohana ala hancur nama kota Jerusalem. Saonari tabahas ma tolu parsiajaranna tu hita.

12. Tikki na diandungi Jesus i kota Jerusalem, parsiajaran aha na boi tadapot taringot Jahowa sian i?

¹² Parduli do Jahowa tu akka jolma. Tikki na diandungi Jesus i kota Jerusalem, taboto ma na holong do roha ni Jahowa tu akka jolma. Alana “dang lomo rohana diripasson manang ise pe, alai naeng ma sude jolma marhamubaon”. (2 Ptr. 3:9) Saonari boi do tong tapatudu holongta tu akka jolma, molo berupaya hita marbarita na uli tu nasida.—Mat. 22:39.

13-14. Songon dia do Jesus patuduhon asi ni rohana tu akka halak tikki marbarita na uli, jala songon dia do hita maniru ibana?

¹³ Berupaya do Jesus marbarita na uli tu sude halak. Ala holong roha ni Jesus tu akka halak jala asi rohana tu nasida, marbarita na uli do ibana setiap adong kesempatan. (Luk. 19:47, 48) Alani sibukna marbarita na uli, hea do Jesus dohot akka siseanna ‘sappe so sanga be mangan’. (Mrk. 3:20) Asing ni i, hea do muse ibana marbarita na uli tikki borngin tu si Nikodemus. Ala borngin do tikki na pas di si Nikodemus. (Joh. 3:1, 2) Memang dang sude halak na mambege barita na uli na dipasahat Jesus i gabe siseanna. Alai nungnga sude be nasida hea mambege barita na uli sian Jesus. Saonari ikkon berupaya do hita maniru Jesus marbarita na uli tu sude halak. (Ul. 10:42) Asa boi hita marbarita na uli tu sude halak, ikkon olo do hita menyesuaihon waktu dohot caratta marbarita.

¹⁴ Tasesuaihon ma tikkitta marbarita. Asa boi lam godang halak na tajuppangi, ikkon olo do hita menyesuaihon waktutta marbarita. Songon i do na diulahon si Matilda, sahalak perintis. Didok ibana, “Berupaya do au dohot suamikku menyesuaihon waktunami marbarita na uli. Molo pagi dope, marbarita na uli ma hami di daerah bisnis. Molo nga arian, marbarita na uli ma hami mamakke rak beroda. Alai dung botari, marbarita na uli ma hami sian jabu tu jabu.” Memang ummura do molo tabahen jadwalta sesuai tu waktu na pas di hita. Alai asa denggan hasilna jala unggodang halak na tajuppangi, ikkon tasesuaihon do waktutta marbarita na uli tu waktu na pas di nasida. Molo berupaya hita mambahen songon i, las ma roha ni Jahowa mangida hita.

15. Sesuai tu Lukas 22:39-44, aha do na diulahon Jesus di borngin andorang so mate ibana?

¹⁵ Di borngin tanggal 14 Nisan 33 M, lao ma Jesus tu taman Getsemane. Martangiang ma Jesus disi, paboahon sude na di rohana tu Jahowa. (Jaha Lukas 22:39-44.) Massai susa do dihilala Jesus tikki i. Alani susana, martangiang do Jesus paboahon “pangidoanna marhite angguk-angguk dohot ilu-ilu”. (Heb. 5:7) Aha do na ditangiakkon Jesus tikki i? Martangiang do Jesus mangido gogo sian Jahowa, asa boi ibana mangulahon lomo ni roha ni Jahowa jala toktong setia. Dialusi Jahowa do tangiang ni Jesus i. Disuru ibana do suru-suruan lao patoguhon Jesus.

16. Boasa susa hian dihilala Jesus tikki na martangiang i ibana di taman Getsemane?

¹⁶ Tikki na martangiang i Jesus di taman Getsemane, tangis do ibana. Alana marsak hian do Jesus di tikki i. Dihukum mate nama ibana ala ditudu sebagai parjahat na mangaleai goar ni Debata. Diboto Jesus do ikkon toktong ibana setia tu Jahowa, ala berpengaruh do kesetiaanna i tu goar ni Jahowa na badia. Jadi pasti susa jala marsak situtu do Jesus tikki i. Tikki diuji kesetiaanmuna tu Jahowa, aha ma na boi ditiru hamu sian Jesus? Taida ma tolu parsiajaran na boi tadapot sian Jesus.

17. Boasa ditangihon Jahowa pangidoan ni Jesus, jala aha do na boi taparsiajari sian i?

¹⁷ Ditangihon Jahowa do pangidoatta. Ditangihon Jahowa do pangidoan ni Jesus. Alana fokus utama ni Jesus, i ma pabadiahon goar ni Jahowa jala mampartahatton kesetiaanna tu Jahowa. Jadi tatiru ma Jesus. Molo berupaya hita pabadiahon goar ni Jahowa jala tapartahatton kesetiaatta tu Ibana, pasti urupanna do hita.—Ps. 145:18, 19.

18. Boasa boi tadok diattusi Jesus do pakkilalaatta?

¹⁸ Diattusi Jesus do pakkilalaatta. Tikki susa pakkilalaatta ala adong na mambahen hita khawatir, pasti porlu hian do hita diurupi akka dongan na boi mangattusi pakkilalaatta i. Khususna molo hea ibana mangalami situasi na sarupa. Jesus pe hea do songon i. Jadi takkas do diattusi ibana songon dia pakkilalaatta tikki susa hita. Diboto ibana do,  porlu hita diurupi “di tikki na tahaporluhon”. (Heb. 4:15, 16) Las do roha ni Jesus dipatogu suru-suruan di taman Getsemane. Alani i tatiru ma ibana. Tajalo ma bantuan na disediahon Jahowa marhite akka dongan, publikasi, akka video, jamita, dohot kunjungan penggembalaan sian akka sintua.

19. Songon dia do Jahowa patoguhon hita tikki mangadopi tantangan? Paboa ma sada contohna.

¹⁹ Dilehon Jahowa do tu hita “hadameon”. Songon dia carana Jahowa patoguhon hita? Molo martangiang hita, dilehon ma tu hita “hadameon na so boi diattusi jolma”. (Plp. 4:6, 7) Hadameon na sian Jahowa i boi mambahen tenang pakkilalaatta jala boi mangurupi hita marpikkir lao mambahen keputusan na denggan. Songon i do na dialami donganta si Lusi. Didok ibana, “Berjuang do au mangatasi rasa kesepian. Alana sipata olo do au merasa dang dihaholongi Jahowa be au. Molo ro pikkiran sisongon i, pittor martangiang do au asa boi hukendalihon perasaanki.” Sian pengalaman ni donganta on taboto ma massai penting do tangiang, alana boi do i mambahen dame pakkilalaatta.

20. Aha do na taparsiajari di artikel on?

²⁰ Di artikel on nungnga tabahas be tolu situasi na mambahen Jesus tangis. Jala nungnga tabahas be parsiajaran aha na boi tadapot sian i. Misalna molo adong halak na tahaholongi na mate, gabe dipapos ma rohatta sai dipatogu Jahowa dohot Jesus do hita. Jala hita pe, porlu do patoguhon akka dongan na mangalami situasi i. Asing ni i tikki diandungi Jesus Jerusalem, gabe taattusi ma massai holong do roha ni Jahowa dohot Jesus tu akka jolma. Jadi hita pe, ikkon tahaholongi do akka jolma. Berupaya ma hita marbarita na uli tu nasida. Dung i tikki dipatogu suru-suruan Jesus, taboto ma na diattusi Jahowa dohot Jesus do pakkilalaatta, jala olo do nasida mangurupi hita asa toktong setia. Sai anggiat ma boi taulahon akka parsiajaran naung tabahas di artikel on, sambil paimahon saut janji ni Jahowa lao ‘mangapus ilu-ilu sian matatta’.—Pgk. 21:4.