Di piga-piga daerah, leas do roha ni akka bawa tu akka borua. Jala adong do akka bawa na dipagodang-godang di daerah na songon i. Songon i ma didok si Hans, sahalak pengawas wilayah di Bolivia. Didok ibana, “Di piga-piga daerah, dibahen natua-tua do anakna bawa gabe songon raja. Akibatna gabe leas ma roha ni akka bawa mangida borua.” Songon i ma muse na didokkon si Shengxian, sahalak sintua di Taiwan. Didok ibana, “Molo di hutakku, hira na so porlu do di akka bawa mangido pendapat sian akka borua. Molo adong bawa na paboahon pendapat ni sahalak borua, pasti direhei akka donganna do ibana.” Adong do muse akka bawa na patuduhon na so diargai nasida akka borua. Uppamana, olo do dibahen akka bawa gait-gait na mangalesengi akka borua.

Alai dang soal songon dia sahalak bawa dipagodang-godang manang songon dia pandangan ni akka halak di daerahna, boi do diuba bawa i cara marpikkirna asa unang leas be rohana tu akka borua. (Eps. 4:​22-24) Alani i, ikkon ditiru ibana do Jahowa. Di artikel on, lao tabahas ma songon dia Jahowa patuduhon na diargai Ibana akka borua, songon dia hita boi maniru Jahowa, jala songon dia akka sintua boi gabe sitiruon taringot on.

SONGON DIA DO CARA NI JAHOWA MANGARGAI BORUA?

Massai denggan do cara ni Jahowa mangargai akka borua. Ibana ma na gabe sitiruon tu akka bawa. Dos songon bapak na burju do Jahowa. Dihaholongi Ibana do hita sude jolma. (Joh. 3:16) Dibahen Ibana do akka borua na setia songon boru hasianna. Saonari tabahas ma songon dia Jahowa mangargai akka donganta borua jala makkaholongi nasida.

Dang dibeda-bedahon Jahowa bawa dohot borua. Ditoppa Jahowa do bawa dohot borua tudos songon Ibana. (1 Mus. 1:27) Dang dibahen Jahowa  ummalo manang unjago bawa sian borua. Dang umholong rohana tu bawa sian tu borua. (2 Kron. 19:7) Sarupa do ditoppa Jahowa bawa dohot borua boi mangattusi isi ni Bibel jala boi maniru parangena. Asing ni i, sarupa do upa na dilehon Jahowa tu akka bawa dohot borua na setia. Rap mangolu salelengna do nasida di tano on, manang rap mamaretta dohot Jesus gabe raja dohot malim di surgo. Takkas ma, dang dibeda-bedahon Jahowa bawa dohot borua.

Olo do Jahowa manangihon akka borua. Parduli do Jahowa tu perasaan dohot arsak ni roha ni akka borua. Contohna, olo do ibana manangihon jala mangalusi tangiang ni si Rahel dohot si Hanna. (1 Mus. 30:22; 1 Sam. 1:​10, 11, 19, 20) Asing ni i, disuru Jahowa do akka panurat ni Bibel manuratton goar ni akka bawa na olo manangihon akka borua. Contohna, disuru Jahowa do si Abraham manangihon hata ni istrina, i ma si Sara. (1 Mus. 21:​12-14) Olo do Raja Daud manangihon hata ni si Abigail. Jala dihilala ibana Jahowa do na manuru si Abigail makkatai tu ibana. (1 Sam. 25:​32-35) Jesus pe ditiru ibana do sifat ni Bapakna. Olo do Jesus manangihon hata ni omakna si Maria. (Joh. 2:​3-10) Sian on taida, cara ni Jahowa patuduhon na diargai Ibana akka borua, i ma olo manangihon nasida.

Pos do roha ni Jahowa mangalehon tugas tu akka borua. Contohna, dilehon Jahowa do tugas tu si Hawa asa dohot mangurupi si Adam mangurus tano on. (1 Mus. 1:28) On patuduhon dang gabe ummarga si Adam sian si Hawa di Jahowa. Alai dibahen Jahowa do si Hawa gabe dongan na boi mangurupi si Adam. Asing ni i dilehon Jahowa do tugas tu Panurirang Debora dohot Hulda lao mamodai bangsona, termasuk ma mangalehon saran tu akka raja dohot panguhum. (Pangh. 4:​4-9; 2 Raj. 22:​14-20) Saonari pe, pos do roha ni Jahowa mangalehon tugas tu akka borua. Dohot do akka borua gabe parbarita, perintis, dohot misionaris. Dohot do nasida mangarancang, mambangun, jala mangarawat Bale Harajaon dohot fasilitas cabang. Adong muse na karejo di Betel manang karejo di kantor penerjemahan. Dos songon tentara do akka borua i na dipakke Jahowa lao mangulahon lomo ni rohana. (Ps. 68:11) Takkas ma, dang hea leas roha ni Jahowa mangida akka borua. Alai massai arga jala marguna do nasida di Ibana.

SONGON DIA DO AKKA BAWA MANIRU JAHOWA?

Hita akka bawa, asa boi taboto na tatiru do Jahowa manang na dang, ikkon jujur do hita menilai diritta. Dos songon mesin rontgen na dipakke lao mamareso na sehat manang na dang jantung ni sasahalak, songon i ma hita. Porlu do hita diurupi akka dongan dohot Hata ni Debata lao mamboto na leas do rohatta tu akka borua manang na dang. Boha ma caratta mangulahon i?

Tasukkun ma tu donganta. (Poda 18:17) Tasukkun ma dongan na boi dihaporseai, na burju, jala na jujur menilai hita. Sukkun ma tu ibana, “Menurutmu saleleng on, huargai do akka donganta borua? Boi do dihilala akka donganta borua i na holong rohakku tu nasida? Adong do sikaphu na porlu hupauba?” Molo dipaboa donganta i adong na porlu tapauba, unang ma haccit rohatta jala hatop ma hita muba.

Taparsiajari ma Bibel. Cara na dumenggan lao mamboto na taargai do akka donganta borua manang na dang, i ma mamparsiajari Bibel. Tikki taparsiajari Bibel, gabe taboto ma akka bawa na disurat di Bibel na mangargai dohot na so mangargai akka borua. (Heb. 4:12) Dung i tanilai ma diritta, termasuk bawa na mangargai borua do hita manang na dang. Asing ni i, tikki tajaha sada ayat ni Bibel taringot akka borua, ikkon tabandingkon do i tu ayat na asing asa unang sala mangattusi hita. Contohna molo tajaha 1 Petrus 3:7 dohot surat na di toru ni ayat i, didok do “songon gucci na mura puttar” do akka borua. a Maksudna na gabe ummalo jala unjago do akka bawa sian borua? Dang songon i! Ikkon tabandingkon do muse ayat on tu Galatia 3:​26-29. Didok do disi, nungnga dipillit Jahowa akka bawa nang akka borua lao rap mamaretta dohot Jesus di surgo. Jadi molo taparsiajari Bibel jala tasukkun akka donganta lao menilai diritta, gabe taboto ma carana mangargai akka donganta borua.

BOHA DO CARA NI AKKA SINTUA MANIRU JAHOWA?

Boi do akka donganta bawa marsiajar sian akka donganta sintua songon dia carana mangargai  akka donganta borua. Jadi songon dia ma carana akka sintua boi gabe sitiruon taringot on? Tabahas ma piga-piga carana.

Mamuji nasida. Gabe sitiruon do Apostel Paulus tu akka sintua saonari. Tikki mambahen surat tu huria di Rom, dang maila si Paulus mamuji akka borua na adong di huria i. (Rom 16:12) Pasti las hian ma roha ni akka donganta borua i tikki dijahahon surat i di jolo ni akka dongan di huria. Dos songon i ma na diulahon akka sintua saonari. Molo adong diida akka sintua akka donganta borua patuduhon sifat na denggan jala bekerja keras tu Jahowa, dang maila akka sintua mamuji nasida. Ala dipuji akka sintua akka donganta borua, gabe boi ma dihilala akka donganta i na dihaholongi jala diargai do nasida. Jala hata na patoguhon sisongon i do na dihaporluhon nasida asa toktong setia manomba Jahowa.—Poda 15:23.

Alai tikki naeng mamuji akka donganta borua, ikkon sian ias ni roha do mamuji nasida jala ikkon takkas do dipaboa alani aha nasida dipuji. Alana molo songon i dibahen akka sintua, gabe boi ma dihilala akka donganta borua na massai arga jala marguna do nasida di huria. Songon i ma na didok donganta si Jessica. Didok ibana, “Las do rohanami akka borua on molo dipuji akka donganta bawa. Alai umlas do rohanami molo dipaboa nasida alani aha hami dipuji. Contohna, ala denggan diatur hami gellengnami hundul di parpunguan, manang ala dialap hami parsiajar Bibelnami asa boi dohot tu parpunguan.”

Rade manangihon nasida. Molo serep roha ni akka sintua, diakkui nasida do dang holan nasida na boi mangalehon saran na denggan. Adong do akka sintua na olo manukkun pandapot sian akka donganta borua, jala rade do nasida manangihon tikki makkatai donganta borua i. Ala dibahen nasida songon i, gabe dipatogu nasida ma akka donganta borua i. Jala sasittongna bermanfaat do i tu nasida sandiri. Boasa tadok songon i? Sahalak  sintua na margoar si Gerardo na karejo di Betel mandok, “Jotjot do husukkun saran sian donganta borua. Ala hubahen songon i, gabe lam denggan ma au mangulahon karejokku. Alana biasana unggodang do pengalaman ni akka donganta borua sian hami akka bawa. Molo di huria godang do akka donganta borua na gabe perintis. Jadi unggodang do diboto nasida taringot akka halak na tinggal di daerah ni nasida.” Sahalak sintua na margoar si Bryan mandok, “Godang do na boi dilehon akka donganta borua di organisasi. Alani i, ikkon marsiajar do hita sian pengalaman ni nasida!”

Molo marbisuk sahalak sintua, pasti olo do ibana manangihon saran ni akka donganta borua. Sahalak donganta sintua na margoar si Edward mandok, “Saran dohot pengalaman ni akka donganta borua, boi do mangurupi hami akka bawa asa lam mangattusi sada parsoalan, jala boi do i mangurupi hami mangattusi perasaan ni halak na asing.” (Poda 1:5) Molo tung pe dang diihutton saran ni akka donganta borua i, boi dope sahalak sintua mandok mauliate ala nungnga dipaboa donganta borua i saranna.

Olo mangalatik nasida. Molo marbisuk sahalak sintua, pasti sai dilului nasida do kesempatan lao mangalatik akka donganta borua. Misalna diajari nasida do akka donganta borua i songon dia carana manguluhon parpunguan lao marbarita. Tujuanna asa boi do akka donganta borua i manguluhon parpunguan lao marbarita, molo dang adong donganta bawa na tardidi. Asing ni i, diajari akka sintua do akka donganta borua lao mamakke sada alat manang sada mesin. Tujuanna, asa boi akka donganta borua on mangurupi di ulaon pembangunan dohot pemeliharaan. Di Betel pe, marragam do tugas na dilehon akka pengawas tu akka donganta borua. Termasuk ma i tugas pemeliharaan, pembelian, keuangan, program komputer, dohot bagian na asing. Molo olo akka sintua mangajari akka donganta borua, on patuduhon na diargai jala na pos do roha ni nasida tu akka donganta borua.

Ala nga dilatik sintua akka donganta borua, gabe boi ma akka donganta borua i mangurupi na asing muse. Contohna, adong do akka donganta borua naung dilatik dohot tu proyek pembangunan. Alani i, gabe boi ma nasida dohot membangun jabu ni akka donganta na hona bencana. Adong muse do donganta naung dilatik asa lam denggan marbarita di tempat umum. Hasilna, gabe boi ma nasida mangurupi akka donganta borua na asing mangulahon i. Songon dia do perasaan ni akka donganta borua naung dilatik akka sintua? Sahalak donganta na margoar si Jennifer mandok, “Tikki dohot au tu proyek pembangunan Bale Harajaon, dilehon pengawashu do tikkina lao mangalatik au. Diparrohahon ibana do aha na huulahon, jala dipuji ibana do karejokku. Lomo do rohakku rap bekerjasama dohot pengawashu. Gabe huhilala ma na diargai ibana au, jala na pos do rohana mangalehon karejo tu au.”

BAHEN MA NASIDA SONGON KELUARGATTA

Massai holong do roha ni Jahowa tu akka donganta borua. Alani i, tahaholongi ma akka donganta borua, jala tabahen ma nasida songon keluargatta. (1 Tim. 5:​1, 2) Sada hasangapon do di hita boi rap kerjasama dohot nasida. Jala las do rohatta ala boi dihilala nasida na holong rohatta tu nasida. Sahalak donganta na margoar si Vanessa mandok, “Mandok mauliate do au tu Jahowa ala boi gabe bagian sian organisasina. Di organisasi on, boi ma huhilala godang do akka donganta bawa na patoguhon au.” Sahalak donganta borua di Taiwan mandok, “Mandok mauliate do au tu Jahowa dohot tu organisasina. Holan di organisasi on do boi huhilala na dihaholongi do hami akka borua jala diargai do perasaannami. Gabe lam dipatogu ma haporseaonku, jala lam bangga ma au boi gabe bagian sian organisasi ni Jahowa.”

Pasti bangga do Jahowa mangida akka donganta bawa na maniru Ibana mangargai akka donganta borua. Alana, dang mura lao mangulahon i! (Poda 27:11) Songon on ma na didok si Benjamin sahalak sintua di Skotlandia, “Leas do roha ni akka bawa di portibi on mangida borua. Jadi tikki ro akka donganta borua tu Bale Harajaon, sai anggiat ma nian boi dihilala akka donganta i na tahaholongi jala taargai nasida.” Jadi marsitutu ma hita asa boi maniru Jahowa lao makkaholongi jala mangargai akka donganta borua. Alana memang arga do nasida di hita.—Rom 12:10.