Diboto Hamu do?
Kareta hoda na songon dia do na dipakke pejabat Etiopia na dijuppangi si Pilippus?
DI BAHASA aslina, hata “kareta hoda” na dipakke di Bibel Terjemahan Tano na Imbaru, boi do patuduhon piga-piga jenis kareta hoda. (Ul. 8:28, 29, 38) Alai umbalga do kareta hoda na dipakke pejabat Etiopia sian kareta hoda na dipakke lao marporang, manang kareta porang. Taida ma piga-piga alasanna boasa boi tadok songon i.
Sahalak pejabat do halak Etiopia on jala dao do pardalananna. Bibel mandok, “Timbo do pangkatna di pamarettaon ni Kandake, ratu ni halak Etiopia.” (Ul. 8:27) Molo saonari, di daerah Sudan dohot sabola selatan ni Mesir ma Etiopia on. Jadi pasti dao do pardalanan ni halak Etiopia on. Jadi pasti dao do pardalanan ni halak Etiopia on. Saleleng pardalanan, olo do ra dang holan sada kareta hoda na ditoppang ibana. Jala godang do barang na diboan ibana. Molo di abad na parjolo, kareta hoda na biasa dipakke halak tu pardalanan na dao, i ma kareta hoda na umbalga jala na opat rodana. Songon on ma na didok sada bukku taringot kareta hoda i, “Umbalga do kareta hoda on. Jadi boi ma siat akka barang na diboan disi jala boi ma akka halak hundul disi. Alani i ma, kareta hoda on do na cocok dipakke tu pardalanan na dao.”
Lagi manjaha do halak Etiopia i tikki didapotton si Pilippus. Didok Bibel, “Marlojong ma si Pilippus di labbung ni kareta hoda i, gabe dibege ma halak Etiopia i manjaha bukku ni Panurirang Jesaya.” (Ul. 8:30) Kareta hoda na biasa dipakke halak tu pardalanan na dao, dang boi hatop mardalan. Ala lambat-lambat kareta on mardalan, gabe boi ma denggan halak Etiopia i manjaha. Jala gabe boi ma si Pilippus na lagi mardalan di labbung ni kareta i takkas mambege aha na dijaha halak Etiopia i.
‘Ditogihon halak Etiopia i do si Pilippus nakkok tu karetana i jala hundul di labbungna.’ (Ul. 8:31) Molo mamakke kareta porang do sasahalak, ikkon jongjong do ibana. Alai asing do molo kareta hoda. Umbalga do kareta hoda sian kareta porang. I do alana gabe boi ma halak Etiopia i dohot si Pilippus hundul disi.
Jadi mangihutton na disurat di bukku Ulaon bindu 8 dohot akka bukti sejarah, boi ma didok akka publikasitta, umbalga do kareta hoda na dipakke halak Etiopia on sian kareta porang.
