1. Boasa Borngin Parningotan ikkon dirayahon ganup taon? (Lukas 22:​19, 20)

 DI GANUP taon dirayahon naposo ni Jahowa do Borngin Parningotan hamamate ni Jesus. Massai penting do acara on di nasida, alana holan acara on ma na hea diparettahon Jesus asa diulahon akka siseanna. (Jaha Lukas 22:​19, 20.) Saonari tabahas ma piga-piga alasanna boasa tarpaima hita tu acara Borngin Parningotan on.

2. Boasa tarpaima-ima hita tu acara Borngin Parningotan?

² Acara on boi mangurupi hita asa mangarimangi sadia arga do tobusan ni Jesus, dohot pasu-pasu na lao tadapot alani tobusan i. Dipaingot do tong hita carana mangargai pengorbanan na dibahen Jesus tu hita. (2 Kor. 5:​14, 15) Asing ni i, di acara on boi ma hita “masipatoguan” dohot akka dongan. (Rom 1:12) Ganup taon sai adong do akka donganta na so aktif ro tu acara i. Piga-piga sian nasida gabe semangat muse manomba Jahowa ala dihilala nasida sambutan ni akka dongan. Godang do muse na olo marsiajar Bibel ala ro tu Borngin Parningotan i. Alani i ma massai penting do acara on di hita!

3. Songon dia do Borngin Parningotan mambahen hita gabe marsada dohot akka dongan di liat portibi on? (Ida gambar.)

³ Asing ni i, gabe marsada do hita dohot akka donganta di liat portibi on alani acara Borngin Parningotan i. Boasa boi tadok songon i? Alana di bagasan sadari i, sarupa do acara na diulahon saluhut huria di liat portibi on. Di ari i, marpungu do hita sude dung bonom mataniari. Sarupa do jamita na tabege na mambahas taringot rikkot ni tobusan. Taendehon do dua ende  puji-pujian tu Debata, diedarhon do roti dohot anggur, jala opat hali ma hita martangiang di acara i. Pasti las hian ma roha ni Jahowa dohot Jesus mangida hita marsada lao pasangappon nasida.

4. Aha do na lao tabahas di artikel on?

⁴ Di artikel on lao tabahas ma sukkun-sukkun on: Songon dia do hita paradehon rohatta tu Borngin Parningotan? Songon dia do hita mangurupi akka halak na taundang dohot akka donganta na so aktif asa mandapot manfaat sian acara on? Akka sukkun-sukkun on boi mangurupi hita asa rade dohot tu acara na penting on.

PARADEHON ROHATTA TU ACARA BORNGIN PARNINGOTAN

5. (a) Boasa porlu tapikkirhon pengorbanan na dibahen Jahowa dohot Jesus? (Psalmen 49:​7, 8) (b) Aha do na boi diparsiajari hamu sian video Boasa Ikkon Mate Jesus?

⁵ Sada cara lao paradehon rohatta tu acara on, i ma mamikkirhon pengorbanan na dibahen Jahowa dohot Jesus lao paradehon tobusan. Sasittongna, dang adong sian hita na boi paluahon ngolutta sandiri. (Jaha Psalmen 49:​7, 8; ida video Boasa Ikkon Mate Jesus?) a Alani i, disuru Jahowa ma Jesus mangalehon ngoluna lao paluahon hita. Jadi balga do pengorbanan na dibahen Jahowa dohot Jesus humokkop hita. (Rom 6:23) Molo tapikkirhon on sude, pasti lam taargai ma tobusan i. Di artikel on, lao tabahas ma aha do na diulahon Jahowa dohot Jesus lao paradehon tobusan i. Alai na parjolo, tabahas ma jo aha do sebenarna lapatan ni tobusan i.

6. Aha do lapatan ni tobusan i?

⁶ Tobusan, i ma arga na ikkon digarar lao manobus manang aha pe naung targade. Aha do naung targade umbahen na porlu adong tobusan? Taingot ma na masa tu jolma na parjolo. Sempurna do ditoppa si Adam, jala boi do ibana mangolu saleleng ni lelengna. Alai ala mardosa ibana gabe dang boi be ibana mangolu salelengna, songon i nang akka pinopparna. Asa boi mangolu salelengna akka pinopparna, ikkon adong ma jolma na sempurna dos songon si Adam na boi gabe tobusan. Holan Jesus ma na cocok gabe tobusan. Alana tikki di tano on Jesus “dang mardosa ibana jala dang hea ibana margabus”. (1 Ptr. 2:22) Jala sahat tu na mate Jesus, sempurna do ibana dos songon si Adam tikki parjolo sahali ditoppa Debata.—1 Kor. 15:45; 1 Tim. 2:6.

7. Aha do tantangan na diadopi Jesus tikki di tano on?

⁷ Tikki di tano on Jesus, dang sai mura di ibana mangoloi Jahowa. Contohna, tikki dakdanak Jesus ikkon unduk do ibana tu natua-tuana nang pe dang sempurna nasida. (Luk. 2:51) Tikki remaja Jesus, adong do ra donganna na menggoda ibana asa unang mangoloi natua-tuana jala asa unang setia tu Jahowa. Dung dewasa pe ibana, hea do digoda Sibolis ibana asa mangihutton giot-giot ni dagingna. Bahkan hea do langsung didok Sibolis asa unang dioloi Jesus be Jahowa. Ikkon tegas do Jesus menolak sude godaan i. (Mat. 4:​1-11) Alana lomo do roha ni Sibolis asa gabe mardosa Jesus jala dang boi mangalehon dirina gabe tobusan.

8. Tantangan aha do muse na diadopi Jesus?

⁸ Godang do muse tantangan na diadopi Jesus. Hea do ibana naeng dipamate akka musuna. (Luk. 4:​28, 29; 13:31) Ikkon sabar do muse ibana tu akka siseanna na so sempurna. (Mrk. 9:​33, 34) Jala tikki naeng mate ibana, digattung do ibana di sada hau jala direhe-rehei akka halak. Dung i songon parjahat do ibana dihukum jala haccit hian do ditaon ibana i.  (Heb. 12:​1-3) Sahat tu na mate Jesus, dipaloas Jahowa do ibana manaon na haccit. b—Mat. 27:46.

9. Songon dia do perasaanmuna dung mamboto balga ni pengorbanan ni Jesus lao humokkop hamu? (1 Petrus 1:8)

⁹ Takkas ma, balga hian do pengorbanan na dibahen Jesus asa boi ibana gabe tobusan. Molo tarimangi songon dia pengorbanan ni Jesus humokkop hita, gabe lam holong ma rohatta tu ibana.—Jaha 1 Petrus 1:8.

10. Pengorbanan aha do na dibahen Jahowa asa boi Jesus gabe tobusan?

¹⁰ Pengorbanan aha do na dibahen Jahowa asa boi Jesus gabe tobusan? Ala Anak hasianna do Jesus, pasti holong hian do roha ni Jahowa tu ibana. (Poda 8:30) Jadi boi do tabayakkon songon dia perasaan ni Jahowa mangida Jesus mangadopi godang tantangan tikki di tano on. Pasti lungun hian do rohana mangida Anakna susa jala dibahen na so adil tu ibana.

11. Paboa ma contoh na patuduhon songon dia perasaan ni Jahowa tikki mangida Anakna dipamate.

¹¹ Tabayakkon ma contoh on. Molo mate gelleng ni sahalak natua-tua, pasti hancur hian do perasaanna. Nang pe porsea ibana na lao dipahehe Jahowa halak na mate, alai tetap do lungun hian rohana molo mate gellengna i. Sian contoh on boi ma taattusi songon dia haccit ni perasaan ni Jahowa tikki mangida Anak hasianna manaon na haccit jala mate di taon 33 M. c—Mat. 3:17.

12. Aha do na boi taulahon piga-piga minggu sebelum Borngin Parningotan?

¹² Mulai sian saonari, coba hamu ma mamparsiajari taringot tobusan tikki pelajaran pribadi hamu manang tikki ibadat keluarga. Pakke ma Panduan Riset untuk Saksi-Saksi Yehuwa manang alat riset na asing na mambahas taringot tobusan. d Asing ni i, ihutton ma jadwal manjaha Bibel saleleng minggu Parningotan, na dibahen di Hangoluan dohot Pangkobasion ni Halak Kristen​—Na Laho Diparsiajari. Jala di ari parningotan, unang ma lupa hamu manonton video Ibadat Pagi tu Parningotan. Molo nungnga taparade rohatta tu acara Borngin Parningotan, gabe boi ma taurupi na asing asa dohot mandapot manfaat sian acara i.—Esr. 7:10.

 MANGURUPI HALAK NA ASING

13. Boha do caratta mangurupi halak na asing asa mandapot manfaat sian acara Borngin Parningotan?

¹³ Boha do caratta mangurupi halak na asing asa mandapot manfaat sian acara Borngin Parningotan? Na parjolo, taundang ma nasida. Boi do talehon undangan tu akka halak na tajuppangi tikki marbarita. Asing ni i, boi do tabahen daftar akka ise na lao taundang tu acara i. Contohna keluargatta, dongan sakarejo, dongan sasikkola, dohot halak na asing na tatanda. Molo holan otik undangan tercetak na adong di hita, boi do tabagihon undangan versi elektronik. Molo tabahen songon i, bisa jadi adong sian akka undanganta i na ro di na so panagamanta.—Pjm. 11:6.

14. Paboa ma sada contoh na patuduhon manfaatna molo talehon undangan Parningotan.

¹⁴ Molo talehon undangan Parningotan tu sasahalak, olo do gabe taronjar rohana naeng ro. On ma na dihilala suami ni sahalak donganta na so Saksi Jahowa. Tarsonggot hian do donganta i tikki didok suamina naeng ro suamina i tu acara Parningotan. Boasa tarsonggot donganta i? Alana nungnga sering diajak donganta i suamina tu acara Parningotan. Alai dang hea olo suamina. Jadi boasa ma gabe olo suamina dohot? Didok suamina, “Adong na mangalehon undangan tu au.” Dipaboa suamina i ma, dapot ni ibana do undangan i sian donganta na ditanda ibana dohot sahalak sintua. Mulai sian i, sai ro do suamina i tu acara Parningotan.

15. Aha do na porlu taingot tikki mangundang akka halak tu acara Parningotan?

¹⁵ Adong do na porlu taingot tikki taundang sasahalak tu acara Parningotan, tarlumobi tu akka na so hea dope ro. Olo do ra godang sukkun-sukkun ni nasida. Alani i tapikkirhon ma aha do hira-hira na lao disukkun nasida. (Kol. 4:6) Contohna: ‘Aha do na lao diulahon di acara i?’ ‘Piga leleng annon acara i?’ ‘Songon dia annon pakkeanku lao tu acara i?’ ‘Adong do uang masuk lao tu acara i?’ ‘Adong do kolekte annon disi?’ Jadi molo taundang sasahalak tu acara on, boi do tasukkun nasida, “Adong do na naeng disukkun hamu taringot acara i?”, dung i alusi ma sukkun-sukkun ni  nasida. Asing ni i, boi do tapakke video Pabadiahon Ari Hamamate ni Jesus dohot video Aha do na Dipatupa di Bale Harajaon? lao mangurupi nasida mamboto songon dia acara parpunguanta dibahen. Manang boi do tapakke hatorangan taringot tobusan sian bukku Mangolu Saleleng ni Lelengna pelajaran 28.

16. Dung ro akka halak tu Borngin Parningotan, aha dope na bisa jadi disukkun nasida?

¹⁶ Dung ro akka halak na taundang tu Borngin Parningotan, olo do sukkun-sukkun dope roha ni nasida. Contohna olo do disukkun nasida: ‘Boasa dang adong (holan otik) na mangallang roti dohot manginum anggur di acara i?’ ‘Piga hali do hamu mangulahon Borngin Parningotan di bagasan sataon?’ Manang, ‘Sarupa songon Borngin Parningotan i do sude parpunguanmuna?’ Memang godang do sian akka sukkun-sukkun i naung dialusi di jamita Parningotan. Alai lomo dope ra nasida mandapot gumodang hatorangan taringot i. Alani i lao mangalusi sukkun-sukkun ni nasida, boi do dipakke hamu artikel di jw.org na marjudul “Boasa Dang Sarupa Cara ni Saksi Jahowa Mangarayahon Borngin Parningotan dohot Akka Agama na Asing?” Marsitutu ma hita mangurupi akka halak na “marpangalaho na denggan” asa boi nasida mandapot manfaat sebelum, saleleng, jala dung sae acara Borngin Parningotan.—Ul. 13:48.

MANGURUPI AKKA DONGAN NA SO AKTIF

17. Boha do cara ni akka sintua mangurupi akka dongan na so aktif? (Hesekiel 34:​12, 16)

¹⁷ Ikkon boi ma dihilala akka dongan na so aktif na parduli do akka sintua tu nasida sebelum, saleleng, jala dukkon acara Borngin Parningotan. (Jaha Hesekiel 34:​12, 16.) Sebelum acara on, marsitutu ma menghubungi akka dongan na so aktif di huriamuna. Papos ma roha ni nasida, na holong do rohamuna tu nasida jala lomo rohamuna naeng mangurupi nasida. Dung i undang ma nasida asa ro tu acara on. Molo ro nasida annon, denggan ma jakkon nasida. Dung sae acara, marsitutu ma manjuppangi manang manelepon akka donganta i. Jala urupi ma nasida asa boi mulak tu Jahowa.—1 Ptr. 2:25.

18. Boha do caratta mangurupi akka dongan na so aktif? (Rom 12:10)

 ¹⁸ Sude hita boi do mangurupi akka dongan na so aktif. Boha do carana? Tikki ro nasida tu acara Borngin Parningotan, tapatudu ma na holong do rohatta tu nasida jala taargai ma nasida. (Jaha Rom 12:10.) Taingot ma, olo do ra nungnga marsitutu nasida asa boi ro muse tu parpunguan. Alana olo do mabiar nasida tu pandangan ni akka dongan taringot nasida. e Jadi unang ma tasukkun manang tadok hata na mambahen haccit roha ni nasida manang na mambahen maila nasida. (1 Tes. 5:11) Alana dongan sahaporseaotta do nasida. Gariada las do rohatta ala boi muse manomba Jahowa rap dohot nasida!—Ps. 119:176; Ul. 20:35.

19. Aha do manfaatna molo ro hita tu Borngin Parningotan?

¹⁹ Sada hasangapon do di hita boi mangulahon paretta ni Jesus lao pabadiahon ari hamamatena. Jala nungnga taboto be boasa massai penting acara on. Tikki ro hita tu acara on, godang do manfaatna tu hita dohot tu halak na asing. (Jes. 48:​17, 18) Misalna gabe lam bagas ma holongta tu Jahowa dohot tu Jesus. Boi ma tapatudu na taargai do sude pengorbanan na dibahen nasida tu hita. Asing ni i, gabe lam kompak ma hita dohot akka dongan sahaporseaon. Jala boi ma taurupi halak na asing mandapot manfaat sian tobusan ni Jesus. Alani i, berupaya ma hita sian nasa tolapta asa rade tu acara na massai penting di taon on, i ma Borngin Parningotan!