1. Aha do na boi mambahen hita mabiar?

 SUDE do jolma mabiar tu halak na mate, tu suruan-suruan na jahat, jala sai holsoan mamikkiri ari na naeng ro. Memang dung marsiajar Bibel hita, dang mabiar be hita tu sudena i. Alai di jamanta saonari, adong do na mambahen hita mabiar, songon porang, halak na jahat, dohot sahit. (Luk. 21:11) Olo do ra mabiar hita tu pamaretta manang anggota keluargatta na mangorai hita manomba Jahowa. Adong muse sian hita na mabiar dang boi mangadopi sitaononna saonari manang di ari na naeng ro.

2. Songon dia do situasi ni si Daud tikki di Kota Gat?

² Si Daud pe hea do mabiar. Misalna, tikki naeng dipamate Raja Saul ibana, lari do ibana tu Kota Gat, huta ni halak Palistim. Alai di pudian ni ari, diboto si Akis raja ni halak Gat i ma si Daud do hape tentara na pamatehon “marpulu ribu” halak Palistim. “Gabe mabiar situtu” ma si Daud alani i. (1 Sam. 21:​10-12) Mabiar do ibana so tung dipamate Raja Akis. Jadi aha ma na diulahon si Daud asa boi ibana tetap tenang?

3. Songon na disurat di Psalmen 56:​1-3, 11, aha do na mambahen si Daud tetap tenang?

³ Di Psalmen 56, dipaboa si Daud do songon dia perasaanna tikki di Kota Gat ibana. Di psalmen i, takkas do dipaboa si Daud aha na mambahen ibana mabiar. Alai dipaboa ibana do tong aha na mambahen ibana toktong tenang. Tikki mabiar ibana, pos do rohana tu Jahowa. (Jaha Psalmen 56:​1-3, 11.)  Jala memang diurupi Jahowa do ibana. Buktina dipasu-pasu Jahowa do rencana ni si Daud asa boi malua sian Raja Akis. Dibahen si Daud do dirina songon halak na rittik. Hira na so masuk akkal do rencanana i, alai marhasil do i. Gabe dang jadi ma dipamate Raja Akis ibana.—1 Sam. 21:13–22:1.

4. Songon dia do carana asa lam pos rohatta tu Jahowa? Paboa ma contohna.

⁴ Hita pe boi do toktong tenang molo pos rohatta tu Jahowa. Alai songon dia do carana asa lam pos rohatta tu Jahowa, tarlumobi tikki mabiar hita? Bayakkon ma jo contoh on. Molo taboto adong sahitta, pasti mabiar do hita di mulana i. Alai boi do gabe tenang hita molo pos rohatta tu dokterta. Ala nungnga godang diurupi ibana akka pasien na sarupa sahitna songon hita. Tikki tapaboa aha keluhanta jala songon dia perasaanta, denggan do ditangihon ibana hita. Jala olo do dipaboa ibana tu hita perawatan kesehatan naung marhasil di halak na asing. Dos songon i ma, boi do lam pos rohatta tu Jahowa molo torus tapikkirhon akka na diulahon Jahowa tu hita najolo, saonari, dohot di ari na naeng ro. On ma na diulahon si Daud, songon na disurat di Psalmen 56. Tabahas ma i di artikel on, jala tapikkirhon ma songon dia carana asa lam pos rohatta tu Jahowa jala toktong tenang tikki mabiar hita.

NA DIULAHON JAHOWA NAJOLO

5. Aha do na dipikkirhon si Daud asa boi ibana tetap tenang? (Psalmen 56:​12, 13)

⁵ Tikki terancam ngolu ni si Daud, sai dipikkirhon ibana do sude naung diulahon Jahowa najolo. (Jaha Psalmen 56:​12, 13.) On ma na jotjot diulahon si Daud saleleng ni ngoluna. Contohna ala dipikkirhon ibana taringot toppaan ni Jahowa, gabe dipaingot ma ibana na balga do huaso ni Jahowa jala holong hian do roha ni Jahowa tu jolma. (Ps. 65:​6-9) Dipikkirhon ibana do muse sude na diulahon Jahowa tu halak na asing. (Ps. 31:19; 37:​25, 26) Tarlumobi, dipikkirhon ibana do sude naung diulahon Jahowa tu ibana sandiri. Nungnga dijaga Jahowa si Daud mulai sian na di bortian ni omakna. (Ps. 22:​9, 10) Ala jotjot si Daud mamikkirhon sude naung diulahon Jahowa najolo, gabe lam pos ma rohana tu Jahowa!

6. Aha do na porlu taulahon asa lam marpos ni roha tu Jahowa?

 ⁶ Tikki mabiar hamu, pikkirhon ma akka naung dibahen Jahowa. Pikkirhon ma akka toppaanna. Contohna, parrohahon ma songon dia Jahowa mangurus akka pidong dohot akka bunga. Hape dang ditoppa Jahowa akka pidong dohot akka bunga asa boi maniru sifatna jala manomba Ibana. Tarlumobi ma hita, pasti dijaga Jahowa do hita. Molo tarimangi on, gabe lam pos ma rohatta tu Ibana. (Mat. 6:​25-32) Pikkirhon ma muse akka naung dibahen Jahowa tu naposona. Parsiajari ma akka ise na disurat di Bibel na togu haporseaonna. Manang jaha ma pengalaman ni akka naposo ni Jahowa di tikkitta saonari. a Asing ni i, pikkirhon ma akka naung dibahen Jahowa tu hamu. Songon dia do Jahowa mangurupi hamu asa boi manomba Ibana? (Joh. 6:44) Songon dia do Jahowa mangalusi tangiangmuna? (1 Joh. 5:14) Jala aha do manfaat na dihilala hamu sian tobusan ni Jesus ganup ari?—Eps. 1:7; Heb. 4:​14-16.

7. Aha do manfaatna ala dirimangi si Vanessa pengalaman ni Panurirang Daniel?

⁷ Taida ma pengalaman ni sahalak donganta di Haiti na margoar si Vanessa. b Adong sahalak bawa di hutana na jotjot manelepon dohot mangirim pesan tu ibana ganup ari. Sai dipaksa bawa i do si Vanessa asa berhubungan seks dohot ibana. Alai dang olo si Vanessa. Nang pe songon i, dang menyerah bawa i. Gariada, diancam ibana do si Vanessa. Didok si Vanessa, “Gabe mabiar do au alani i.” Aha do na diulahon si Vanessa? Dibahen ibana do piga-piga cara lao manjaga dirina. Jala diihutton ibana do saran ni sintua asa menghubungi polisi. Alai dang holan i. Dirimangi si Vanessa do songon dia Jahowa manjaga naposona najolo. Didok si Vanessa muse, “Pittor huingot do pengalaman ni Panurirang Daniel. Disappatton do ibana tu lubang singa, hape dang marsala ibana. Nang pe songon i, dijaga Jahowa do ibana. Ditutup Jahowa do baba ni singa i. Jadi martangiang do au tu Jahowa asa unang torus dipikkirhon bawa i au, jala asa diurupi au mangatasi masalahkon. Alana dang huboto be aha na naeng huulahon. Dung martangiang au, gabe tenang ma perasaanku.”—Dan. 6:​12-22.

NA DIULAHON JAHOWA SAONARI

8. Aha do manfaatna ala dipikkirhon si Daud sude na diulahon Jahowa di tikki i? (Psalmen 56:8)

⁸ Nang pe terancam ngolu ni si Daud di Kota Gat, alai berupaya do ibana asa tetap tenang. Sai dipikkirhon ibana do akka na diulahon Jahowa di tikki i. Boi do dihilala si Daud na ditogu-togu jala na dijaga Jahowa do ibana. Jala pos do rohana diattusi Jahowa do songon dia perasaanna. (Jaha Psalmen 56:8.) Dilehon Jahowa do muse akka dongan na setia mangurupi si Daud, songon si Jonatan dohot Sintua Malim Ahimelek. (1 Sam. 20:​41, 42; 21:​6, 8, 9) Jala nang pe sai dilele Raja Saul si Daud, sai malua do ibana. Gabe pos ma roha ni si Daud diboto Jahowa do sitaononna. Jala diboto Jahowa do songon dia perasaanna alani sitaononna i.

9. Tikki adong sitaononta, aha do na porlu taingot?

⁹ Tikki adong sitaononta na mambahen hita mabiar, adong do na porlu taingot. Diboto Jahowa do songon dia sitaononta i jala diboto Ibana do songon dia perasaanta alani sitaononta i. Contohna diboto Jahowa do dibahen halak Mesir na so denggan tu halak Israel. Alai dang holan i, takkas do diboto Jahowa “songon dia haccit ni sitaonon ni nasida”. (2 Mus.  3:7) Di ende ni si Daud pe didok ibana do, ‘diida ho hasusaakku dohot arsak ni rohakku’. (Ps. 31:7) Tikki susa pe naposo ni Jahowa alani kesalahan ni nasida sandiri, tong do ‘marsak do pakkilalaan ni Jahowa’. (Jes. 63:9) Jadi tikki mabiar hamu, diboto Jahowa do songon dia perasaanmuna alani sitaononmuna i. Jala lomo do rohana mangurupi hamu asa unang mabiar.

10. Aha do buktina na parduli do Jahowa tu hamu jala lomo rohana mangurupi hamu tikki marsitaonon?

¹⁰ Alai tikki adong sitaonon, olo do sukkun-sukkun rohamuna songon dia cara ni Jahowa mangurupi hamu. Attong aha ma na boi diulahon hamu? Martangiang ma asa boi diida hamu songon dia cara ni Jahowa mangurupi hamu. (2 Raj. 6:​15-17) Olo do ra adong jamita, komentar di parpunguan, publikasi, video, manang lagu di JW Broadcasting na patoguhon hamu. Asing ni i, adong do ra dongan sahaporseaon na mambagihon ayat manang arta na arga sian Bibel na boi patoguhon hamu. Ala nga jotjot tadapot i sude, olo do ra gabe hurang taargai i. Alai sasittongna, hadiah na luar biasa do i sian Jahowa. (Jes. 65:13; Mrk. 10:​29, 30) Sudena i patuduhon na parduli do Jahowa tu hamu. (Jes. 49:​14-16) Jala i patuduhon na boi do pos rohamuna tu Ibana.

11. Boasa dang gabe marsak jala mabiar be si Aida tikki adong sitaononna?

¹¹ Taida ma pengalaman ni si Aida na tinggal di Senegal. Boi do dihilala ibana, na diurupi Jahowa do ibana tikki adong sitaononna. Ala anak siakkangan ibana, diharappon natua-tuana do asa dilului ibana godang hepeng lao mangurupi nasida. Alai ala merintis jala sederhana dibahen si Aida ngoluna, gabe dang boi diurupi ibana keluargana. Gabe muruk ma keluargana tu ibana. Didok ibana, “Marsak do au ala dang boi huurupi natua-tuakku. Jala mabiar do au so tung sogo roha ni halak mangida au. Olo do gabe husalahon Jahowa, ala dipasombu Ibana au susa.” Dung i, dibege si Aida ma sada jamita tikki marpungu. Didok ibana, “Dipaingot parjamita i do hami, diboto Jahowa do aha na mambahen hita marsak manang mabiar. Jala dipatogu akka sintua dohot akka dongan do au. Lam leleng gabe dipapos do rohakku, na dihaholongi Jahowa do au. Dung i, gabe pos ma muse rohakku lao  martangiang tu Jahowa. Boi ma muse dame rohakku, ala huida songon dia cara ni Jahowa mangalusi tangiakku.” Dang leleng dukkon i, dapot ni si Aida ma karejo. Gabe boi ma ibana tetap merintis jala mangurupi keluargana. Didok si Aida, “Sian pengalamanku, gabe marsiajar ma au ikkon marpos ni roha do au tu Jahowa. Saonari, molo nga martangiang au pittor dame do huhilala.”

NA LAO BAHENON NI JAHOWA DI ARI NA NAENG RO

12. Aha do manfaatna ala dirimangi si Daud na lao ulahonon ni Jahowa tu ibana?

¹² Jaha Psalmen 56:9. Di ayat on dipaboa do muse, aha na diulahon si Daud asa unang mabiar. Nang pe terancam ngoluna, dirimangi ibana do aha na lao bahenon ni Jahowa tu ibana. Diboto ibana do na lao paluaon ni Jahowa do ibana di tikkina. Alana nungnga dipaboa Jahowa hian tu ibana, na lao gabe raja ni halak Israel do ibana. (1 Sam. 16:​1, 13) Jadi pos do roha ni si Daud pasti saut do janji ni Jahowa tu ibana.

13. Aha do na lao bahenon ni Jahowa haduan?

¹³ Aha do janji ni Jahowa tu hamu? Memang dang disalpuhon Jahowa sude masalahta saonari. c Alai taingot ma marjanji do Jahowa salpuhononna do i sude haduan di tano na imbaru. (Jes. 25:​7-9) Ala Jahowa do na manoppa hita, dang maol di Ibana pahehehon halak na mate, pamaluppon sahitta dohot lungun ni rohatta, jala pamatehon sude musutta.—1 Joh. 4:4.

14. Aha do na boi tabayakkon molo mabiar hita?

¹⁴ Jadi molo mabiar hamu, bayakkon hamu ma aha na lao bahenon ni Jahowa di ari na naeng ro. Bayakkon hamu ma songon dia ngolutta haduan, molo dang adong be Sibolis, akka parjahat, jala gabe sempurna ma hita sian tikki tu tikki. Adong sada pertunjukan di parpunguan regional taon 2014 na mambahas songon dia carana hita boi mambayakkon janji ni Debata. Di pertunjukan i, adong sahalak ama rap dohot keluargana na mambahas songon dia ngolu ni nasida haduan molo nungnga gabe paradeiso tano on. Jala didok bapakna, gabe songon on ma haduan isi ni 2 Timoteus 3:​1-5, “Marlas ni roha ma hita di tano na imbaru, ai makkaholongi donganna ma jolma, lomo rohana marale-ale tu Debata, serep rohana, lomo rohana mamuji Debata, mangoloi natua-tuana jala mandok mauliate, setia do nasida, dihaholongi do keluargana, lomo rohana mardos ni roha jala makkatahon na denggan taringot donganna, boi mangorom diri, lambok, lomo rohana tu akka na denggan, boi dihaporseai, sipangoloi, unlomo do rohana mangoloi Debata sian apala mangoloi giot-giot ni rohana, jala dioloi nasida do Debata sian ias ni rohana. Marale-ale ma hamu tu halak sisongon i.” Hamu pe boi do tong mambahas taringot ngolutta di tano na imbaru rap dohot keluarga manang dongan sahaporseaonmuna.

15. Aha do na diulahon si Tania tikki mabiar ibana?

¹⁵ Godang do manfaatna molo tabayakkon janji ni Debata tikki mabiar hita. Songon i ma pengalaman ni sahalak donganta si Tania di Makedonia Utara. Dimuruki natua-tuana do ibana ala marsiajar Bibel. Didok ibana, “Molo dung mulak marpungu au, sai dipukkuli omakku do au. Didok natua-tuakku do na lao pamateonna au molo gabe Saksi Jahowa.” Ujungna memang diusir natua-tuana do si Tania. Jadi aha ma na diulahon ibana? Didok ibana, “Sai huingot do las ni roha na boi dapottu molo toktong au setia tu Jahowa. Memang godang do na hutinggalhon ala melayani Jahowa au. Alai sai huingot do tong songon dia annon  Jahowa mangalehon upa tu au di ari na naeng ro. Jala dang na lao ingotokku be akka na mambahen lungun rohakku.” Toktong do si Tania setia tu Jahowa. Ala diurupi Jahowa ibana, gabe dapotna ma tempat tinggal. Saonari nungnga menikah be ibana dohot sahalak donganta bawa na setia tu Jahowa. Jala melayani sepenuh waktu do nasida na dua.

MARLATIK MA ASA LAM MARPOS NI ROHA TU JAHOWA

16. Aha do na porlu taingot asa boi hita toktong barani tikki masa akka na dipaboa di Lukas 21:​26-28?

¹⁶ Saleleng hasusaan bolon, lao “pingsan ma akka halak alani biarna”. Alai molo hita naposo ni Jahowa, toktong do pos rohatta jala barani. (Jaha Lukas 21:​26-28.) Boasa songon i? Alana nga marlatik hita asa marhaposan tu Jahowa sian saonari. Si Tania na dipaboa nakkin mandok, ala nga hea dihilala ibana sitaonon, gabe siap ma ibana mangadopi sitaonon na asing di ngoluna. Didok ibana, “Sian pengalamanku, marsiajar do au manang aha pe sitaononta, pasti boi do Jahowa mangurupi hita. Godang do memang halak na marsogo ni roha ala tasomba Jahowa. Jala olo do tahilala hira na umgogo nasida sian hita. Alai sasittongna dao do umgogo Jahowa sian nasida. Jala songon dia pe borat ni sitaonon na taadopi, pasti marujung do i.”

17. Aha do manfaatna molo tarimangi ayat tahunanta di taon 2024 on? (Ida gambar sampul.)

¹⁷ Godang do saonari na boi mambahen hita mabiar. Alai songon si Daud, boi do hita tetap tenang nang pe adong sitaonon. Tangiang ni si Daud do na gabe ayat tahunanta di taon 2024 on. Didok ibana do, “Tikki mabiar au, pos do rohakku tu Ho.” (Ps. 56:3) Songon on ma na didok sahalak pakar ni Bibel taringot ayat on, “Dang tu sitaononna na sai dipikkirhon si Daud. Alai marhaposan do ibana tu Jahowa na boi paluahon ibana.” Di bagasan sataon on, pikkirhon ma ayat tahunanta on, tarlumobi molo mabiar hamu alani sitaonon. Pikkirhon ma akka na diulahon Jahowa najolo, saonari, dohot di ari na naeng ro. Molo diulahon hamu songon i, gabe sarupa ma pakkilalaanmuna songon si Daud na mandok, “Pos do rohakku tu Debata, dang mabiar au.”—Ps. 56:4.