1-2. Akka sitaonon aha do na diadopi naposo ni Jahowa?

 TIKKI masa sitaonon na massai borat tu hita, olo do toppu muba ngolutta. Contohna songon donganta si Luis. a Didok dokter do ibana marsahit kanker jala holan piga-piga bulan nai nama ibana mangolu. Contoh na asing, i ma si Monika. Godang do na diulahon ibana dohot suamina lao manomba Jahowa. Jala sahalak sintua do suamina. Alai di pudian ni ari, diboto ibana ma na ditabunihon suamina do dosa na balga saleleng martaon-taon. Contoh na asing muse, i ma donganta si Olivia. Ikkon lari do ibana maninggalhon jabuna ala naeng ro badai. Alai dung mulak muse ibana tu jabuna, nungnga hancur jabuna i. Jadi toppu do muba ngolu ni nasida na tolu. Boha molo hamu? Hea do masa sitaonon na mambahen toppu muba ngolumuna?

² Nang pe naposo ni Jahowa hita, alai sarupa do hita dohot halak na asing. Olo do marsahit hita jala mangadopi hasusaan. Alai dang holan i. Ala sisomba Jahowa hita, olo do taadopi paraloan manang penganiayaan sian akka halak na sogo rohana tu naposo ni Jahowa. Memang, diloas Jahowa dope hita manaon akka sitaonon i, alai marjanji do Ibana lao mangurupi hita. (Jes. 41:10) Hasilna boi ma hita toktong marlas ni roha, mambahen keputusan na denggan, jala toktong setia tu Jahowa  nang pe massai borat sitaononta. Di artikel on, tabahas ma opat cara ni Jahowa mangurupi hita tikki taadopi sitaonon. Tabahas ma muse aha do na porlu taulahon asa tadapot manfaat sian bantuan naung diparade Ibana.

JAGAON NI JAHOWA DO HAMU

3. Songon dia do perasaanta tikki borat sitaononta?

³ Olo do gabe maol hita marpikkir jala mambahen keputusan na denggan tikki borat sitaononta. Alana marsak hian do hita jala lungun rohatta. Gabe dang taboto be aha na lao taulahon. Songon i ma na dihilala dua donganta borua na dipaboa nakkin. Didok si Olivia, “Dung hancur jabukku alani badai, marsak hian do huhilala.” Songon i do tong na dihilala si Monika. Dung diboto ibana dang setia be suamina tu ibana, didok ibana do, “Kecewa hian do au, jala hira na ditikkam do au. Akka ulaon siganup ari pe, maol hian do huulahon. Dang hea tarpikkir au boi masa on tu au.” Jadi songon dia do janji ni Jahowa boi mangurupi hita tikki marsak?

4. Songon na disurat di Pilippi 4:​6, 7, aha do janji ni Jahowa tu hita?

⁴ Janji ni Jahowa. Marjanji do Jahowa lao mangalehon “hadameon” tu hita. (Jaha Pilippi 4:​6, 7.) Hadameon na dimaksud di ayat i, i ma dame ni roha na boi dihilala sasahalak na jonok hubunganna tu Jahowa. Dilehon Debata do hadameon “na so boi diattusi jolma”, lobi sian na boi tabayakkon. Hea do ra gomos hamu martangiang tu Jahowa, jala dung sae martangiang hamu, gabe dame ma rohamuna. Boasa boi songon i? Ala dilehon Jahowa do “hadameon” i tu hamu.

5. Aha do manfaatna ala dilehon Debata hadameon tu hita?

⁵ Di Pilippi 4:​7, dipaboa do tong hadameon na sian Debata i boi ‘manjaga roha dohot pikkiranta’. Hata Junani “manjaga” biasana dipakke lao manggombarhon akka tentara na menjaga sada kota asa toktong aman sian musu. Ala diboto akka halak na di kota i na dijaga akka tentara nasida, gabe aman ma dihilala nasida. Suang songon i ma, tikki hadameon na sian Debata i manjaga roha dohot pikkiranta, gabe boi ma aman jala tenang tahilala. (Ps. 4:8) Nang pe dang pittor muba situasitta songon pengalaman ni si Hanna, alai boi dope dame rohatta. (1 Sam. 1:​16-18) Jala molo dame rohatta, gabe boi ma hita denggan marpikkir jala mambahen keputusan.

6. Aha do na porlu taulahon asa boi makkilala hadameon na sian Debata? (Ida gambar.)

⁶ Na porlu taulahon. Songon akka halak na di kota na manjou akka tentara asa dijaga nasida, ikkon songon i ma hita tikki borat sitaononta. Tapangido ma bantuan ni Jahowa.  Boha do carana? Torus ma martangiang tu Ibana, sappe boi tahilala dame na sian Debata. (Luk. 11:9; 1 Tes. 5:17) On ma na diulahon si Luis na dipaboa nakkin. Aha do na mangurupi ibana dohot istrina si Ana dung diboto nasida holan piga-piga bulan nai nama ibana mangolu? Didok si Luis, “Memang tikki masa situasi sisongon on, maol hian do di hami mambahen keputusan taringot perawatan kesehatan dohot masalah na asing. Alai boi do toktong dame rohanami ala torus hami martangiang tu Jahowa.” Didok si Luis dohot istrina do, sai jotjot do nasida martangiang tu Jahowa. Jala mulak-ulak do dipangido nasida asa boi dame roha ni nasida, jala asa marbisuk nasida tikki mambahen keputusan. Dihilala nasida do bantuan ni Jahowa i. Tikki borat sitaononmuna, toktong ma hamu martangiang tu Jahowa. Hilalaonmuna ma dame na sian Jahowa i manjaga roha dohot pikkiranmuna.—Rom 12:12.

PAHOTON NI JAHOWA MA HAMU

7. Songon dia do perasaanta tikki borat sitaononta?

⁷ Tikki borat sitaononta olo do dang songon na biasa perasaanta, pikkiran, dohot tindakanta. Gabe muba-uba do perasaanta songon kapal na munggil-unggil alani galumbang. Songon i ma na dihilala si Ana na dipaboa nakkin. Muba-uba do perasaanna dung mate suamina si Luis. Didok ibana, “Sipata lungun do rohakku jala olo do husalahon dirikku. Olo do muse muruk au ala dang adong be si Luis.” Di tikki na asing, merasa kesepian do si Ana jala marsak. Molo najolo, si Luis do na biasana makkarejohon piga-piga urusan keluarga. Alai dung mate Luis, gabe ikkon si Ana ma na mambahen keputusan. Didok ibana, sipata hira songon kapal na munggil-unggil i do ibana. Jadi songon dia do Jahowa mangurupi hita tikki marsak?

8. Songon na disurat di 1 Petrus 5:​10, aha do janji ni Jahowa tu hita?

⁸ Janji ni Jahowa. Marjanji do Jahowa lao mambahen hita hot. (Jaha 1 Petrus 5:10.) Tikki masa badai di laut, olo do munggil-unggil kapal dibahen galumbang. Asa boi kapal i toktong hot, dipakke ma sirip ni kapal na adong di bagian partoru ni kapal i. Hasilna, gabe dang pola munggil-unggil kapal i alani galumbang. Asing ni i, boi ma aman jala nyaman akka penumpang na adong di kapal i. Alai boi pe berfungsi sirip ni kapal i molo tetap mardalan kapal i. Dos songon i ma, pahoton ni Jahowa do hita molo toktong hita setia manomba Ibana, nang pe massai borat sitaononta.

9. Aha do manfaatna molo tapakke alat risetta? (Ida gambar.)

⁹ Na porlu taulahon. Nang pe muba-uba perasaanmuna  alani sitaononmuna i, alai toktong ma hamu martangiang, ro tu parpunguan, dohot marbarita. Memang ala songon i perasaanmuna, gabe dang godang na boi diulahon hamu songon na biasana. Alai taingot ma, dang dipangido Jahowa hita mangulahon lobi sian na tolapta. (Bandingkon tu Lukas 21:​1-4.) Asing ni i, tabahen ma tikki lao pelajaran pribadi jala mangarimangi na taparsiajari i. Alana marhite organisasi ni Jahowa do dilehon tu hita akka artikel dohot video, na boi mangurupi hita asa toktong togu tikki mangadopi sitaonon. Pakke hamu ma akka alat riset songon aplikasi JW Library^®, Indeks Publikasi Menara Pengawal, dohot Panduan Riset untuk Saksi-Saksi Yehuwa. I ma na diulahon si Monika na dipaboa nakkin. Dipakke ibana do akka alat riset i lao mangalului saran tikki muba-uba perasaanna. Contohna diriset ibana ma taringot “kemarahan”. Di tikki na asing, diriset ibana ma taringot “penganiayaan” manang “kesetiaan”. Dijaha ibana do akka artikel i sappe tenang perasaanna. Didok ibana, “Tikki mulai mangariset au, holsoan dope au. Alai dung mulak-ulak hujaha artikel i, gabe huhilala ma hira na dihaol Jahowa do au. Tikki hujaha akka artikel i, huboto ma diattusi Jahowa do songon dia perasaanku, jala diurupi Ibana do au.” Songon si Monika, hamu pe boi diurupi Jahowa asa toktong tenang.—Ps. 119:​143, 144.

PATOGUON NI JAHOWA DO HAMU

10. Songon dia do perasaanta tikki masa sitaonon na mambahen hita trauma?

¹⁰ Tabayakkon ma sahalak atlet pelari na bertanding. Di mula ni pertandingan, hatop do ibana marlojong. Alai ala madabu ibana, gabe mekkat-ekkat ma ibana mardalan. Dos songon i ma hita. Tikki masa sitaonon na mambahen hita trauma, olo do gabe loja daging dohot pikkiranta. Akka ulaon na biasana mura taulahon, gabe maol hian ma taulahon. Manang dang semangat be hita mangulahon i. Olo do songon si Elia perasaanta. Dang semangat be hita lao dungo, jala naeng modom ma torus. (1 Raj. 19:​5-7) Jadi aha do janji ni Jahowa tu hita molo songon i perasaanta?

11. Songon na disurat di Psalmen 94:​18, aha do janji ni Jahowa tu hita?

¹¹ Janji ni Jahowa. Marjanji do Jahowa, patoguonna do hita. (Jaha Psalmen 94:18.) Songon atlet na tarlukka nakkin, porlu do ibana dipatogu asa boi lanjut bertanding. Dos songon i ma hita, porlu do hita diurupi asa toktong semangat manomba Jahowa. Tikki  songon i situasitta, dipapos Jahowa do rohatta. Didok Ibana, “Au do Jahowa Debatam na maniop tangan kananmu, jala Au do Debata na mandok tu ho, ‘Unang ho mabiar. Urupanku do ho.’” (Jes. 41:13) Raja Daud pe dihilala ibana do songon dia bantuan ni Jahowa. Tikki adong sitaononna jala tikki mangadopi akka musuna ibana, didok ibana do tu Jahowa, “Dipakke Ho do tanganmu na gogo i lao mangurupi au.” (Ps. 18:35) Jadi songon dia do Jahowa patoguhon hita?

12. Ise do na dipakke Jahowa lao patoguhon hita?

¹² Jotjot do dipakke Jahowa halak na asing lao patoguhon hita. Contohna si Daud. Tikki metmet rohana, ro ma ale-alena si Jonatan patoguhon ibana. (1 Sam. 23:​16, 17) Dos songon i ma tu si Elia. Dipakke Jahowa do si Elisa lao mangurupi ibana. (1 Raj. 19:​16, 21; 2 Raj. 2:2) Saonari pe, olo do dipakke Jahowa keluargatta, akka dongan sahaporseaon, dohot akka sintua lao patoguhon hita. Alai tikki marsak hita, olo do dang lomo rohatta didongani halak na asing. Naeng ma nian sahalakta. Wajar do i. Alai aha do na porlu taulahon asa boi dipatogu Jahowa hita?

13. Aha do na porlu taulahon asa boi tahilala bantuan ni Jahowa? (Ida gambar.)

¹³ Na porlu taulahon. Unang ma mandao sian halak na asing. Alana boi do gabe holan diritta dohot masalahta na sai tapikkiri. Akibatna gabe maol ma hita mambahen keputusan na denggan. (Poda 18:1) Memang adong do tikkina hita naeng sahalakta, tarlumobi molo borat hian sitaononta. Alai molo palelengku hita mandao sian halak na asing, gabe dang boi be tahilala bantuan ni Jahowa. Alana marhite nasida do Jahowa patoguhon hita. Jadi manang songon dia pe borat ni sitaononta, tajalo ma bantuan ni keluargatta, donganta, dohot akka sintua. Taanggap ma nasida na dipakke Jahowa lao mangurupi hita.—Poda 17:17; Jes. 32:​1, 2.

APULAN NI JAHOWA DO HAMU

14. Di situasi na songon dia do olo hita mabiar?

¹⁴ Adong do ra situasi di ngolutta na mambahen hita mabiar. Di Bibel pe hea do dipaboa akka naposo ni Debata na mabiar jala marsak alani musu manang masalah na asing. (Ps. 18:4; 55:​1, 5) Dos songon i ma hita saonari. Olo do taadopi tantangan di sikkola, di tempat karejo, sian keluargatta, manang sian pamaretta. Asing ni i, mabiar do hita mate alani sahitta. Ala songon i situasitta, olo do mabiar hita dos songon dakdanak. Alai songon dia do Jahowa mangurupi hita?

15. Songon na disurat di Psalmen 94:​19, aha do janji ni Jahowa tu hita?

 ¹⁵ Janji ni Jahowa. Marjanji do Jahowa lao apulanna do hita jala bahenonna las rohatta. (Jaha Psalmen 94:19.) Tikki tajaha ayat on, tabayakkon ma sahalak dakdanak na mabiar jala dang boi modom alani soara ni ronggur. Dung i pittor ro ma bapakna makkaol ibana sahat tu na boi boruna i modom. Nang pe adong dope ronggur i, alai tenang do perasaan ni boruna i ala sai dihaol bapakna ibana. Dos songon i ma hita. Tikki mabiar hita alani sitaononta, lomo do roha ni Jahowa maniop tanganta jala makkaol hita sappe boi hita merasa tenang. Attong aha do na porlu taulahon?

16. Aha do na porlu taulahon asa boi tarapul rohatta? (Ida gambar.)

¹⁶ Na porlu taulahon. Jotjot ma martangiang tu Jahowa dohot manjaha Bibel. (Ps. 77:​1, 12-14) Molo nga terbiasa hamu mangulahon i, pittor diboto hamu ma aha na porlu diulahon hamu tikki marsak, i ma mangido bantuan ni Jahowa. Paboa ma tu Jahowa aha na mambahen hamu mabiar jala holsoan. Dung i jaha ma Bibel. Tikki dijaha hamu Bibel, dos songon na makkatai do Jahowa tu hamu. Jala i ma cara ni Jahowa mangapuli rohamuna. (Ps. 119:28) Jaha hamu akka bukku di Bibel na boi mangapuli rohamuna. Misalna bukku Job, Psalmen, dohot Poda, manang jamita ni Jesus na disurat di Mateus bindu 6. Molo martangiang hamu tu Jahowa jala dijaha hamu Bibel, gabe tarapul ma rohamuna.

17. Aha do na boi taparsiajari taringot Jahowa sian artikel on?

¹⁷ Pos ma rohamuna tu Jahowa na lao urupanna do hamu tikki mangadopi sitaonon na massai borat. Dang na lao tinggalhonon ni Jahowa hita. (Ps. 23:4; 94:14) Marjanji do Jahowa lao jagaonna, pahotonna, patoguonna, jala apulanna do hita. Jesaya 26:3 mandok, “Dijaga Ho do halak na mangasahon Ho sian nasa rohana. Toktong do dilehon Ho tu nasida hadameon, ai porsea do nasida tu Ho.” Jadi porsea ma tu Jahowa, jala berupaya ma mandapot manfaat sian sude bantuan ni Jahowa. Molo diulahon hamu i, gabe margogo ma hamu nang pe mangadopi sitaonon na massai borat.