1. Boasa penting mangulahon Borngin Parningotan ganup taon?

 SILEHON-LEHON na massai arga do tobusan i! (2 Kor. 9:15) Boasa tadok songon i? Ala dilehon Jesus do ngoluna lao manobus hita, gabe boi ma hita marale-ale dohot Jahowa. Jala boi ma hita mangolu saleleng ni lelengna. Mandok mauliate godang do hita tu Jahowa ala dilehon Ibana tobusan, jala on patuduhon na massai holong do rohana tu hita! (Rom 5:8) Jadi dipangido Jesus do asa taulahon Borngin Parningotan ganup taon lao patuduhon na taargai do tobusan i.—Luk. 22:​19, 20.

2. Aha do na lao tabahas di artikel on?

² Di taon on, lao tabahen ma Borngin Parningotan di ari Sabtu, 12 April 2025. Pasti lomo do rohatta ro tu acara i. Jadi piga-piga minggu sebelum jala dukkon sae Borngin Parningotan, rimangi a ma akka aha do naung diulahon Jahowa dohot Jesus tu hita. Godang do manfaatna molo taulahon i. Di artikel on, lao tabahas ma aha do na taparsiajari taringot Jahowa dohot Jesus sian tobusan. Di artikel na mangihut, lao tabahas ma aha do manfaat ni tobusan, jala aha do na ikkon taulahon lao patuduhon na taargai tobusan i.

 NA TAPARSIAJARI TARINGOT JAHOWA SIAN TOBUSAN

3. Boasa boi sahalak jolma paluahon godang halak sian dosa dohot hamatean? (Ida gambar.)

³ Boi do taboto taringot hatigoran ni Jahowa sian tobusan. (5 Mus. 32:4) Boasa tadok songon i? Pikkirhon ma on: Ala dang dioloi si Adam Jahowa, gabe dohot ma hita mardosa jala mate. (Rom 5:12) Jadi lao paluahon hita sian i, disuru Jahowa ma Jesus mangalehon ngoluna lao manobus hita. Alai boasa boi sahalak jolma paluahon godang halak sian dosa dohot hamatean? Dipatorang Apostel Paulus ma songon on, “Alani sahalak jolma [si Adam] na so mangoloi, gabe godang ma jolma mardosa. Suang songon i ma, ala mangoloi do sahalak jolma [Jesus], boi ma godang halak didok mangulahon na sittong.” (Rom 5:19; 1 Tim. 2:6) Maksudna, gabe mardosa do sude jolma jala mate alani sahalak jolma na sempurna. Jadi ikkon adong do sahalak jolma na sempurna na mangoloi Jahowa lao paluahon nasida sude.

4. Boasa dang dipasombu Jahowa akka pinoppar ni si Adam na mangoloi Ibana mangolu salelengna?

⁴ Ala dang sempurna hita, olo do ra didok rohatta, “Sasittongna dang porlu Jesus mate lao paluahon hita. Boi hian do dipasombu Jahowa akka pinoppar ni si Adam na mangoloi Ibana mangolu salelengna.” Ra tahilala, i ma cara na dumenggan lao paluahon hita. Alai dang songon i pandangan ni Jahowa. Maralo do i tu hatigoranna. Alana molo diulahon Ibana songon i, gabe hira na diabaihon Jahowa ma dosa ni si Adam, jala hira na so mardosa ma akka pinopparna. Hape dang songon i na sasittongna.

5. Boasa pos rohatta sai sittong do na diulahon Jahowa?

⁵ Aha do na masa molo dang diparade Jahowa tobusan jala dipasombu Ibana pinoppar ni si Adam na so sempurna mangolu salelengna? Olo do gabe ragu akka jolma, “Debata na adil do Jahowa i? Dipasaut Ibana do sude janjina di ari na naeng ro?” Alai unang ma ragu hita tu Jahowa. Boasa? Alana mulai sian najolo, sai adil do sude pambahenan ni Jahowa. Bahkan lao mambuktihon Debata na adil do Ibana, rela do Ibana mangalehon Anak haholonganna i. Jadi pos ma rohatta, sai sittong do sude na diulahon Jahowa.

6. Sifat aha do muse na taparsiajari taringot Jahowa sian tobusan? (1 Joh. 4:​9, 10)

⁶ Sian tobusan, nungnga taboto Debata na adil do Jahowa. Alai dang holan i. Sian tobusan i, gabe taboto ma muse na massai holong do rohana tu hita. (Joh. 3:16; jaha 1 Johannes 4:​9, 10.) Disuru Jahowa do Anakna i mate humokkop hita. Alana lomo do rohana asa mangolu salelengna hita. Jala lomo rohana asa gabe bagian sian keluargana muse hita. Tikki mardosa si Adam, dang gabe bagian sian keluarga ni Jahowa be ibana. Akibatna, gabe  sude ma hita mardosa jala dang gabe bagian sian keluarga ni Jahowa. Alai ala adong tobusan i, boi ma diampuni Jahowa dosatta. Hasilna, boi ma denggan muse hubungatta tu Jahowa dohot tu akka dongan sahaporseaotta. Jala di ari na naeng ro, boi ma hita gabe bagian sian keluarga ni Jahowa muse jala mangolu salelengna. Sudena on boi tahilala ala dilehon Jahowa do tobusan tu hita. Jadi pasti lam pos do rohatta, holong hian do roha ni Jahowa tu hita!—Rom 5:​10, 11.

7. Massai haccit do ditaon Jesus lao mangalehon ngoluna gabe tobusan. Aha do na taparsiajari taringot holong ni Jahowa sian i?

⁷ Molo tarimangi songon dia perasaan ni Jahowa mangida Anakna i marsitaonon sahat tu na mate, gabe taattusi ma na massai holong do rohana tu hita. Didok Sibolis, dang adong nanggo sada pe naposo ni Jahowa na toktong setia molo mangadopi sitaonon na borat. Lao mambuktihon na sala do hata ni Sibolis i, dipasombu Jahowa do ditaon Jesus na haccit sahat tu na mate. (Job 2:​1-5; 1 Ptr. 2:21) Jadi, bayakkon ma songon dia perasaan ni Jahowa tikki diida Ibana Jesus direhei, dilissingi, jala dipakkuhon di hau partinaonan i. Dung i, mate ma Anakna i dukkon manaon sude na haccit i. (Mat. 27:​28-31, 39) Sasittongna, boi hian do Jahowa paluahon Jesus sian situasi na borat i. Misalna, tikki didok akka halak tu Jesus, “Molo tutu do lomo roha ni Debata tu ibana, pasti paluaon ni Debata do ibana saonari.” Alai dang diulahon Ibana i. (Mat. 27:​42, 43) Alana molo dibahen Ibana songon i, dang jadi be Jesus mangalehon ngoluna gabe tobusan jala dang adong harapan di hita. Alani i ma dipasombu Jahowa Anakna i manaon na haccit sahat tu na mate.

8. Lungun do roha ni Jahowa mangida Anakna i marsitaonon na borat? Patorang ma. (Ida gambar.)

⁸ Adong do ra halak na mandok, “Debata Pargogo na So Hatudosan do Jahowa i. Jadi dang lungun rohana tikki diida Ibana Anakna i susa!” Alai dang toho i. Didok di Bibel ditoppa Jahowa do hita mirip tu Ibana. Jadi molo lungun rohatta tikki mangida halak na asing susa, pasti lungun do tong roha ni Jahowa mangida Anakna i susa. Jala didok do muse di Bibel, boi do ‘haccit roha ni Jahowa’ alani pambahenan ni jolma. (Ps. 78:​40, 41) Asa boi tabayakkon songon dia perasaan ni Jahowa, rimangi ma perasaan ni si Abraham tikki naeng dipelehon ibana si Isak. (1 Mus. 22:​9-12; Heb. 11:​17-19) Bayakkon ma lungun ni roha na dihilala si Abraham. Nga ditiop ibana be piso jala naeng dibunu ibana ma anakna i. Bayakkon ma muse songon dia perasaan ni Jahowa tikki diida Ibana disiksa Anakna i sahat tu na mate. Pasti lungun hian do rohana mangida i!—Tonton ma video Tiru ma Haporseaon ni Nasida—Abraham, Bagian 2 di jw.org.

9. Aha do na taparsiajari taringot holong ni Jahowa sian Rom 8:​32, 38, 39?

 ⁹ Sian tobusan, gabe taboto ma dao do umbalga holong na dipatudu Jahowa tu hita sian holong ni manang ise pe, termasuk ma i holong ni keluarga manang ale-aletta. (Jaha Rom 8:​32, 38, 39.) Bahkan umholong do roha ni Jahowa tu hita sian apala hita makkaholongi diritta. Lomo do rohamuna mangolu salelengna? Unlomo do roha ni Jahowa asa mangolu salelengna hamu. Lomo do rohamuna asa diampuni Jahowa dosamuna? Unlomo do roha ni Jahowa mangulahon i. Jadi holan on do na dipangido Jahowa sian hita. Taargai ma tobusan i, porsea ma hita tu Ibana, jala taoloi ma Ibana. Jadi silehon-lehon na massai arga do tobusan i, na patuduhon balga ni holong ni Jahowa tu hita. Jala di tano na imbaru, godang nai dope na lao taparsiajari taringot holongna i.—Pjm. 3:11.

NA TAPARSIAJARI TARINGOT JESUS SIAN TOBUSAN

10. (a) Aha do na mambahen marsak situtu Jesus? (b) Songon dia do Jesus pabadiahon goar ni Jahowa? (Ida kotak “ Na Diulahon Jesus lao Mambela Goar ni Jahowa”.)

¹⁰ Massai penting do di Jesus goar ni Bapakna. (Joh. 14:31) Andorang so mate, marsak situtu do Jesus alana lao ditudu do ibana gabe parjahat jala mangaleai goar ni Bapakna. Alani i ma didok ibana tu Jahowa, “Ale Amang, molo boi pasiding ma makkuk panginuman on sian au.” (Mat. 26:39) Alai setia do Jesus tu Jahowa sahat tu na mate. On patuduhon dipabadia ibana do goar ni Bapakna i.

11. Songon dia do Jesus patuduhon na massai holong do rohana tu akka jolma? (Joh. 13:1)

¹¹ Sian tobusan, taboto ma muse na massai parduli do Jesus tu akka halak, tarlumobi tu akka siseanna. (Poda 8:31; jaha Johannes 13:1.) Misalna, diboto Jesus do na lao diadopi  ibana akka sitaonon na borat jala na lao dipamate do ibana. Nang pe songon i, diulahon ibana do tugasna i sian nasa rohana dang holan ala nga tugasna i. Marbarita do ibana, diajari ibana do akka halak, jala diurupi ibana do nasida. Sudena i diulahon ibana ala holong do rohana tu nasida. Bahkan di borngin andorang so mate ibana, disussi ibana do pat ni akka apostelna, diajari ibana do nasida, jala dipatogu do roha ni nasida. (Joh. 13:​12-15) Asing ni i, dung dipakkuhon ibana di hau partinaonan i, marbarita do ibana tu sahalak parjahat di labbungna jala dipangido ibana do asa diurus si Johannes omakna. (Luk. 23:​42, 43; Joh. 19:​26, 27) Jadi takkas do tarida holong ni Jesus sian sude pambahenanna tikki mangolu di tano on, dang holan tikki mate ibana humokkop hita.

12. Akka aha do na toktong diulahon Jesus sahat tu saonari?

¹² Memang ‘sahali sahat tu saleleng ni lelengna’ do Jesus mate. Alai sahat tu saonari, godang dope na diulahon ibana lao mangurupi hita. (Rom 6:10) Akka aha ma i? Nang pe nungnga di surgo Jesus saonari, alai torus dope dilehon ibana akka na denggan tu hita. Gabe Rajatta do ibana saonari, Sintua ni Malim, jala ulu ni huria. (1 Kor. 15:25; Eps. 5:23; Heb. 2:17) Dipapungu ibana do akka halak na miniahan dohot punguan na bolon. Jala ikkon sae do diulahon ibana i andorang so marujung hasusaan bolon. b (Mat. 25:32; Mrk. 13:27) Asing ni i, dipillit ibana do naposo haposan lao mangalehon sude na tahaporluhon asa toktong setia tu Jahowa di ari parpudi on. (Mat. 24:45) Jala annon di Pamarettaon Saribu Taon, torus dope ibana mangurupi hita. Sudena on boi tanikmati, ala adong tobusan. Jadi takkas ma taboto, dilehon Jahowa pe Anakna i dang holan asa mate humokkop hita, alai asa boi do torus Anakna i mangurupi hita.

TORUS MA MARSIAJAR

13. Aha do na porlu taulahon asa taboto sadia balga holong ni Jahowa dohot Jesus tu hita?

¹³ Molo tarimangi sude naung dibahen Jahowa dohot Jesus tu hita, boi ma taboto taringot sadia balga holong ni roha ni nasida. Misalna, piga-piga minggu sebelum jala dukkon sae Borngin Parningotan, boi do dijaha hamu bukku Injil. Alai unang ma pagodangku bindu na dijaha hamu, jala unang ma buru-buru hamu tikki manjaha i. Jala sian na dijaha hamu i, pikkirhon ma aha do muse na mambahen lam holong  rohatta tu Jahowa dohot Jesus. Dung i, boi ma dipaboa hamu na diparsiajari hamu i tu na asing.

14. Molo dibahen hamu riset taringot tobusan manang akka topik na asing, aha do manfaat ni i tu hamu? (Psalmen 119:97) (Ida gambar.)

¹⁴ Nang pe nungnga leleng hamu gabe Saksi Jahowa, pasti sai adong dope na boi diparsiajari hamu taringot hatigoran ni Jahowa, holongna, dohot taringot tobusan. Alai boha do cara mangulahon i? Godang do publikasi na diparade organisasi na boi tapakke lao mangariset. Jadi molo adong hatorangan sian Bibel na so pola diattusi hamu, riset ma i. Dung i, rimangi ma aha naung diriset hamu jala rimangi ma aha do parsiajaran na dapotmuna sian i taringot Jahowa, Anakna, dohot holong ni nasida tu hamu.—Jaha Psalmen 119:97.

15. Boasa ikkon torus talului arta na arga na adong di Bibel?

¹⁵ Memang tikki tajaha Bibel manang tariset hatorangan sian i, olo do ra dang sai adong tadapot parsiajaran na baru manang na menarik. Alai unang ma metmet rohatta. Bayakkon ma hamu songon sasahalak na mangalului mas. Pasti habis do tikkina lao mangulahon i. Olo do ra sappe piga-piga ari dang menyerah ibana. Nang pe otik hian mas i dapotna, massai arga do i di ibana. Dos songon i ma arta na arga na adong di Bibel. Dao do i ummarga sian mas! (Ps. 119:127; Poda 8:10) Jadi toktong ma tajaha Bibel jala unang ma menyerah mangalului arta na adong di Bibel.—Ps. 1:2.

16. Songon dia do carana lao maniru Jahowa dohot Jesus?

¹⁶ Tikki marsiajar, pikkirhon ma boha carana lao mangulahon parsiajaranmuna i. Misalna, molo naeng ditiru hamu hatigoran ni Jahowa, unang ma beda-bedahon hamu halak. Molo naeng ditiru hamu holong ni Jesus, rade ma hamu mangulahon manang aha pe lao pasangappon Jahowa dohot mangurupi akka dongan. Jala molo naeng ditiru hamu Jesus na ringgas marbarita, ringgas ma hamu marbarita tu akka halak asa boi dipatudu nasida haporseaon tu tobusan. Alana silehon-lehon na massai arga do i sian Jahowa.

17. Aha do na lao tabahas di artikel na mangihut?

¹⁷ Molo lam godang na taparsiajari taringot tobusan, pasti lam holong ma rohatta tu Jahowa dohot Jesus. Jala nasida pe, lam holong ma rohana tu hita. (Joh. 14:21; Jak. 4:8) Jadi tapakke ma sude bahan na diparade organisasi ni Jahowa, lao mamparsiajari taringot tobusan. Di artikel na mangihut, lao tabahas ma manfaat na tadapot sian tobusan jala boha carana patuduhon na taargai do i.