1. Boasa dibahen Jahowa perkawinan?

 “DEBATA na marlas ni roha” do Jahowa. Jala lomo do rohana asa hita pe marlas ni roha. (1 Tim. 1:11) Godang do silehon-lehonna na mambahen las rohatta. (Jak. 1:17) Sada sian akka silehon-lehonna i, i ma perkawinan. Tikki menikah sahalak bawa dohot borua, marjanji do nasida asa marsihaholongan jala saling mangargai. Molo toktong dijaga nasida togu holong ni nasida, boi ma nasida marlas ni roha.—Poda 5:18.

2. Boha do godangan suami saonari maradoppon istrina?

² Alai saonari godang do suami dohot istri na so toktong patuduhon holong jala dang mangargai pasanganna. Hape nungnga marjanji nasida lao mangulahon i. Akibatna dang marlas ni roha nasida. Sada laporan sian Organisasi Kesehatan Dunia paboahon, godang do suami na kejam tu istrina, kasar hatana tu istrina, jala mambahen haccit roha ni istrina. Adong do tong sahalak suami na burju tu istrina holan tikki di jolo ni halak. Alai molo di jabu, kasar do ibana tu istrina. Godang do tong suami na mangida pornografi, jala on mambahen istrina merasa dang dihaholongi jala dang marlas ni roha.

3. Boasa adong piga-piga suami na kasar tu istrina?

³ Boasa adong piga-piga suami na kasar tu istrina? Ra ala kasar bapakna tu omakna. Jadi didok rohana, dang sala molo songon i tong pambahenanna tu istrina. Adong do muse akka bawa na kasar tu istrina alana godangan bawa di humaliang ni nasida mangulahon i. Jadi didok roha ni nasida ikkon kasar do nasida tu istrina asa unduk istrina tu ibana. Adong do muse akka bawa na mura-mura muruk. Adong do tong akka bawa na jotjot mangida pornografi. Akibatna tikki dibereng ibana borua, pittor naeng mangulahon seks do na dipikkirhon ibana. Asing ni i godang do pakar na mandok dung masa pandemi COVID-19, lam godang do suami na kasar tu istrina. Alai manang aha pe alasanna, dang boi songon i pambahenan ni suami tu istrina.

4. Aha do na ikkon dihindari akka suami jala boasa?

 ⁴ Ikkon manat do akka suami asa unang ditiru nasida cara marpikkir ni portibi on taringot akka borua. a Boasa? Alana balga do pengaruh ni na tapikkirhon tu tindakanta. Alani i ma dipasingot Apostel Paulus akka halak Kristen na miniahan di Rom, asa ‘unang ditiru nasida akka halak na di portibi on’. (Rom 12:​1, 2) Sasittongna tikki dibahen si Paulus suratna i tu halak Kristen di Rom, nungnga gabe sisomba Jahowa nasida saleleng piga-piga taon. Alai sian surat ni si Paulus i boi taboto adong do piga-piga halak di huria i na maniru cara marpikkir dohot pangalaho ni akka halak di portibi on. Alani i ma dipodai ibana nasida asa muba. Marlakku do tong poda ni si Paulus i tu akka suami saonari on. Alana adong do piga-piga suami na maniru cara marpikkir ni portibi on jala gabe kasar tu istrina. b Jadi aha do na dipangido Jahowa asa diulahon akka suami? Tabahas ma alusna di artikel on.

5. Songon na disurat di 1 Petrus 3:​7, ikkon songon dia do suami maradoppon istrina?

⁵ Jaha 1 Petrus 3:7. Dipangido Jahowa do asa sangap dibahen suami tu istrina. Aha do maksudna? Ikkon burju jala ikkon dihaholongi suami do istrina. Di artikel on lao tabahas ma songon dia sahalak suami boi patuduhon na diargai ibana istrina. Alai na parjolo, tabahas ma akka ulaon aha do na so boi diulahon akka suami tu istrina.

AKKA ULAON NA IKKON DIHINDARI SUAMI

6. Boha do perasaan ni Jahowa molo adong suami na mamukkuli istrina? (Kolosse 3:19)

⁶ Unang ma pukkuli istrimuna. Sogo do roha ni Jahowa tu akka halak na jahat manang na mangulahon kekerasan. (Ps. 11:5) Dang lomo rohana mangida akka suami na kasar tu istrina. (Mal. 2:16; jaha Kolosse 3:19.) Songon na dipaboa di ayat tema ni artikel on i ma di 1 Petrus 3:​7, boi do gabe sega hubungan ni sahalak suami tu Jahowa molo dang denggan carana maradoppon istrina. Bahkan dang olo Jahowa manangihon tangiangna.

7. Sesuai tu Epesus 4:​31, 32, hata na songon dia do na ikkon dihindari akka suami? (Ida “Hata na Dipatorang”.)

⁷ Unang ma kasar tikki makkatai tu istrimuna. Adong do akka suami na lomo rohana manonggaki istrina jala lomo-lomona makkatai tu istrina. Sogo do roha ni Jahowa tu halak na ‘parmuruk, mura tarrimas, jotjot manonggaki jala mandok hata na mangaleai’. c (Jaha Epesus 4:​31, 32.) Dibege Jahowa do aha na didokkon suami tu istrina, bahkan tikki dang adong na mangida nasida. Sahalak suami na kasar makkatai tu istrina, boi do mambahen gabe sursar perkawinanna jala gabe sega hubunganna tu Debata.—Jak. 1:26.

8. Songon dia do perasaan ni Jahowa tu sahalak suami na mangida pornografi jala boasa?

⁸ Unang mangida pornografi. Sogo do roha ni Jahowa tu sahalak suami na mangida pornografi. Alana sahalak suami na mangida pornografi dang mangargai istrina jala manegai hubunganna tu Jahowa. d Dipangido Jahowa do asa toktong setia akka suami tu istri ni nasida. Sahalak suami na setia dang olo mangulahon seks na so patut tu borua na asing. Holan mamikkirhon i pe dang olo ibana. Alani i ma didok Jesus, molo adong sahalak bawa na mamereng  sahalak borua jala gabe tubu giot-giot ni dagingna manang nafsuna, nungnga mangalakkup be ibana “di bagasan rohana”. e—Mat. 5:​28, 29.

9. Boha do perasaan ni Jahowa mangida suami na kasar tu istrina tikki mangulahon seks?

⁹ Unang ma kasar tikki mangulahon seks. Tikki mangulahon seks, adong do suami na mamaksa istrina mangulahon sada ulaon seks na mambahen istrina magigi, dang mararga, jala dang dihaholongi. Sogo do roha ni Jahowa mangida pangalaho sisongon i. Alana dipangido Jahowa do asa sangap dibahen suami tu istrina, jala ikkon dihaholongi suami do istrina. (Eps. 5:​28, 29) Boha do molo adong sahalak suami na mangulahon sisongon i manang mangida pornografi? Aha do na ikkon diulahon ibana asa boi muba cara marpikkirna dohot pangalahona?

CARANA ASA BOI MUBA

10. Aha do na boi ditiru akka suami sian Jesus?

¹⁰ Molo adong sahalak suami na kasar tu istrina, aha do na ikkon diulahon ibana lao manguba pangalahona i? Ikkon ditiru ibana do Jesus. Nang pe dang menikah Jesus, alai boi do akka suami maniru cara ni Jesus maradoppon akka siseanna. (Eps. 5:25) Saonari tabahas ma aha do na boi ditiru akka suami sian cara ni Jesus maradoppon akka siseanna dohot carana makkatai tu nasida.

11. Boha do Jesus maradoppon akka apostelna?

¹¹ Nang pe Jesus Guru jala Tuan, alai dang lomo-lomona tu akka apostelna. Burju do ibana tu nasida, sangap do dibahen ibana nasida, jala dang kasar ibana tu nasida. Dang olo Jesus mamakke huasona lao mambahen akka siseanna mabiar tu ibana. Gariada serep do rohana jala olo do ibana melayani akka apostelna i. (Joh. 13:​12-17) Didok ibana, “Marsiajar ma hamu sian au asa marlas ni roha hamu. Ai na lambok jala na serep roha do au.” (Mat. 11:​28-30) Di ayat i didok, lambok do Jesus. Halak na lambok i dang halak na gale. Gariada halak na gogo do ibana, ala boi dikendalihon ibana dirina. Tikki adong na mambahen jut rohana, boi do ibana tetap tenang jala boi dikendalihon ibana emosina.

12. Songon dia do cara ni Jesus makkatai tu halak na asing?

¹² Sai patoguhon roha do hata ni Jesus. Dang hea kasar ibana makkatai tu akka siseanna. (Luk. 8:​47, 48) Bahkan tikki dileai akka musuna ibana jala dibahen haccit rohana, “dang dibalos ibana mangaleai” nasida. (1 Ptr. 2:​21-23) Sipata dang dialusi Jesus nasida. Didok rohana, tumagon do ibana sip daripada gabe kasar ibana makkatai. (Mat. 27:​12-14) Sitiruon na massai denggan do Jesus tu akka suami!

13. Songon na didok di Mateus 19:​4-6, aha do na porlu diulahon akka suami asa boi “toktong rap dohot istrina”? (Ida gambar.)

¹³ Dipangido Jesus do tu akka suami asa toktong nasida setia tu istrina. Dipaboa Jesus do tu akka siseanna hata ni Jahowa na mandok, asa ‘toktong rap suami dohot istrina’. (Jaha Mateus 19:​4-6.) Hata Junani na diterjemahon gabe “toktong rap” boi do lapatanna “dilem”. Jadi ikkon massai togu do ikatan perkawinan ni suami istri, sappe hira na dilem ma nasida. Molo adong suami manang istri na sengaja mambahen haccit roha ni pasanganna, pasti gabe susa ma nasida na dua. Sahalak suami na makkaholongi istrina, pasti dang olo ibana mangida pornografi. Dipadao ibana do matana sian “akka na so marguna”. (Ps. 119:37) Jadi songon si Job, marsitutu do ibana asa unang mangida borua na asing huhut tubu giot-giot ni dagingna tu borua i.—Job 31:1.

14. Asa boi sahalak suami padenggatton hubunganna tu istrina dohot tu Jahowa, akka aha do na ikkon diulahon ibana?

 ¹⁴ Molo adong sahalak suami na kasar tu istrina jala lomo-lomona makkatai tu istrina i, adong piga-piga na ikkon diulahon ibana lao padenggatton hubunganna tu istrina dohot tu Jahowa. Na parjolo, ikkon disadari ibana do sala do na diulahon ibana saleleng on. Jala porlu diingot ibana, dang adong na buni di adopan ni Jahowa. (Ps. 44:21; Pjm. 12:14; Heb. 4:13) Na paduahon, ikkon muba do ibana jala unang kasar be tu istrina. (Poda 28:13) Na patoluhon, ikkon minta maaf do ibana tu istrina jala ikkon martangiang do ibana tu Jahowa mangido asa diampuni Jahowa ibana. (Ul. 3:19) Jala ikkon dipangido ibana do bantuan sian Jahowa asa diurupi ibana muba, jala asa boi dikendalihon ibana pikkiranna, hatana, dohot pangalahona. (Ps. 51:​10-12; 2 Kor. 10:5; Plp. 2:13) Na paopatton, ikkon hombar do pangalahona tu tangiangna i, jala ikkon marsitutu do ibana asa unang songon i be pangalahona. (Ps. 97:10) Na palimahon, ikkon dipangido ibana do bantuan sian akka sintua. (Jak. 5:​14-16) Na paonomhon, ikkon dibahen ibana do rencana asa unang diulahon be akka ulaon na mambahen haccit roha ni istrina. Suang songon i do tong suami na mangida pornografi. Ikkon diulahon do na onom on. Pasti dipasu-pasu Jahowa do upaya ni nasida asa boi muba. (Ps. 37:5) Alai dang holan i. Ikkon berupaya do ibana asa sangap dibahen ibana istrina. Songon dia carana?

SANGAP MA BAHEN HAMU ISTRIMUNA

15. Aha do na boi diulahon akka suami lao patuduhon na holong rohana tu istrina?

¹⁵ Patudu ma na holong do rohamuna tu istrimuna. Piga-piga suami paboahon ala dipatudu nasida na massai holong rohana tu istrina tiap ari, gabe marlas ni roha ma perkawinan ni nasida. (1 Joh. 3:18) Misalna boi do sahalak suami maniop tangan ni istrina dohot makkaol istrina. Jala boi do dikirim ibana pesan tu istrina jala didok, “Holong hian do rohakku tu ho” manang “Nga mangan ho?” Asing ni i, boi do dibahen ibana kartu ucapan lao paboahon na  massai holong rohana tu istrina i. Molo diulahon akka suami songon on, boi ma marlas ni roha perkawinan ni nasida jala on patuduhon na sangap do dibahen ibana istrina.

16. Boasa akka suami ikkon mamuji istrina?

¹⁶ Paboa ma na massai arga do istrimuna di hamu. Paboa ma tu istrimuna boasa massai arga ibana di hamu jala paboa ma akka na denggan taringot ibana. Sada carana ingot hamu ma mandok mauliate tu ibana alani sude naung diulahon ibana lao mangurupi hamu. (Kol. 3:15) Molo sian ias ni roha sahalak suami mamuji istrina, pasti las ma roha ni istrina. Hasilna, dame ma dihilala istrina, merasa dihaholongi, jala diargai.—Poda 31:28.

17. Boha do cara ni sahalak suami patuduhon na massai diargai ibana do istrina?

¹⁷ Burju ma hamu jala argai ma istrimuna. Sahalak suami na makkaholongi istrina pasti berupaya do ibana mambahen las roha ni istrina jala mangargai istrina i. Alana dianggap ibana do istrina i hadiah na massai arga sian Jahowa. (Poda 18:22; 31:10) Hasilna burju ma ibana tu istrina jala sangap ma dibahen ibana istrina i, bahkan tikki mangulahon seks nasida. Jala pasti dang olo ibana mamaksa istrina mangulahon sada ulaon seks na mambahen istrina i dang nyaman, merasa dang diargai, manang mambahen gabe targanggu panggora ni roha ni istrina. f Marsitutu do tong suamina i manjaga asa toktong ias panggora ni rohana di adopan ni Jahowa.—Ul. 24:16.

18. Aha do na ikkon toktong diulahon akka suami? (Ida kotak “ Opat Cara na Boi Diulahon Suami lao Mangargai Istrina”.)

¹⁸ Hamu akka suami, ingot ma las do roha ni Jahowa molo berupaya hamu mangargai istrimuna. Marsitutu ma hamu asa unang mangulahon akka ulaon na mambahen haccit roha ni istrimuna. Burju ma hamu tu istrimuna, haholongi hamu ma ibana, jala argai hamu ma ibana. Molo diulahon hamu songon i, on patuduhon na benar-benar dihaholongi hamu do istrimuna jala massai arga do ibana do hamu. Jadi molo sangap dibahen hamu istrimuna, boi ma toktong denggan hubunganmuna tu Jahowa.—Ps. 25:14.