PARSIAJARAN 3
ENDE 35 Ulahon ma na Urrikkot
Bahen ma Keputusan na Palasson Roha ni Jahowa
“Biar mida Jahowa do parmulaan ni bisuk, jala parbinotoan taringot Debata Nabadia i do na mambahen halak mamboto dia na sittong dohot dia na sala.”—PODA 9:10.
NA LAO DIBAHAS
Asa boi tabahen keputusan na palasson roha ni Jahowa, porlu do adong di hita parbinotoan, pangattusion, dohot bisuk.
1. Aha do sipata na maol taulahon?
GANUP ARI do hita ikkon mambahen keputusan. Adong do keputusan na mura tabahen. Misalna, aha na lao taallang manang jam piga hita modom. Alai adong do tong keputusan na maol tabahen. Jala keputusan sisongon i boi do berpengaruh tu kesehatanta, las ni rohatta, keluargatta, manang hubungatta tu Jahowa. Pasti lomo do rohatta mambahen keputusan na bermanfaat tu hita dohot tu keluargatta. Alai na uppetting, tabahen ma keputusan na palasson roha ni Jahowa.—Rom 12:1, 2.
2. Aha do na ikkon diulahon hamu sebelum mambahen keputusan?
2 Adong do piga-piga na porlu taulahon sebelum mambahen keputusan, (1) lului ma akka hatorangan na adong hubunganna tu situasimuna, (2) pikkirhon ma boha pandangan ni Jahowa taringot situasimuna, (3) manat ma pikkirhon piga-piga pilihan na boi diulahon hamu. Di artikel on, lao tabahas ma taringot on jala boha carana asa marbisuk hita mamboto dia na sittong dohot na sala.—Poda 2:11.
LULUI MA AKKA HATORANGAN
3. Boasa ikkon talului akka hatorangan sebelum tabahen keputusan? Paboa ma ilustrasina.
3 Na parjolo na ikkon diulahon sebelum mambahen keputusan na denggan, i ma mangalului akka hatorangan na adong hubunganna tu situasitta. Boasa penting mangulahon on? Bayakkon ma adong sahalak pasien na marsahit na parah, ro ma ibana marubat tu dokter. Sebelum dipaboa dokter i perawatan na songon dia na ikkon diulahon pasienna, pasti jolo diperiksa ibana do pasienna i jala disukkun boha dihilala pasienna i. Dos songon i, ikkon jolo talului do akka hatorangan na adong hubunganna tu situasitta asa boi tabahen keputusan na denggan. Boha ma cara mangulahon i?
4. Songon na didok di Poda 18:13, aha do na ikkon diulahon hamu asa boi dapotmuna hatorangan na adong hubunganna tu situasimuna? (Ida gambar.)
4 Uppamana, adong ma na mangundang hamu tu acara ramah tamah. Sebelum dibahen hamu keputusan lao ro tu acara i manang na daong, pikkirhon ma on. Molo dang pola ditanda hamu na mambahen acara i, jala dang diboto hamu songon dia acarana annon, sukkun ma tu na mangundang i: “Didia jala andigan do dibahen acarana i? Sadia godang do halak na ro tusi? Jala akka ise ma nasida? Ise ma na mengawasi disi? Aha do na diulahon di acara i annon? Diparade do annon minuman na maralkohol disi?” Molo nungnga dapotmuna akka hatorangan taringot i, boi ma dibahen hamu keputusan na denggan.—Jaha Poda 18:13.
Lului ma godang hatorangan (Ida paragraf 4) a
5. Aha do na ikkon diulahon hamu dung dapotmuna akka hatorangan taringot situasimuna?
5 Dung dapotmuna akka hatorangan i, manat ma pikkirhon taringot situasina. Misalna, boha ma molo ro akka halak na so mangihutton aturan ni Jahowa tu acara i? Manang boha ma molo diparade minuman na maralkohol, alai dang adong na mengawasi? Jala boi do gabe mabuk annon akka halak di acara ramah tamah i? (1 Ptr. 4:3) Asing ni i, pikkirhon ma muse taringot tikkina manang jadwalna. Boha ma molo acara ramah tamah i sarupa jadwalna tu parpunguanmuna manang tu jadwalmuna lao marbarita? Molo nungnga manat dipikkirhon hamu taringot situasina, lam mura ma hamu mambahen keputusan na denggan. Alai adong muse na ikkon diulahon hamu. Ra nga diboto hamu, keputusan aha na lao dibahen hamu. Alai pikkirhon ma muse, boha do pandangan ni Jahowa taringot i?—Poda 2:6.
PIKKIRHON MA BOHA PANDANGAN NI JAHOWA
6. Sesuai tu Jakobus 1:5, boasa ikkon tapangido bantuan ni Jahowa?
6 Marjanji do Jahowa mangalehon bisuk tu hita, asa boi tabahen keputusan na palasson rohana. Didok di Bibel, ‘Burju do Debata mangalehon tu sude halak jala dang pailaonna hita.’ (Jaha Jakobus 1:5) Alani i tapangido ma tu Jahowa asa diurupi hita mamboto boha do pandanganna taringot situasitta.
7. Boha ma carana asa taboto pandangan ni Jahowa taringot situasitta? Bahen ma contoh.
7 Dung martangiang hamu mangido bantuan ni Jahowa, ikkon berupaya do hamu mamboto aha alus ni Jahowa. Dipatudos ma i songon on: Lao ma hamu mardalani tu sada inganan. Hape di tonga dalan, lilu ma hamu. Dung i disukkun hamu tu halak na tinggal di luat i. Andorang so dipaboa ibana tudia arah na ikkon sidalananmuna, pittor lao do hamu sian i? Tottu daong kan? Pasti manat do ditangihon hamu petunjuk na dilehon ibana. Dos songon i ma hita tikki mangido bisuk sian Jahowa. Porlu do talului aha alus ni Jahowa. Talului ma hukum dohot prinsip na adong di Bibel, na adong hubunganna tu situasitta. Misalna andorang so diputusson hamu ro do hamu manang na dang tu acara ramah tamah na dipaboa nakkin, porlu do dilului hamu prinsip ni Bibel. Lului ma prinsip taringot marpestai sahat tu na mabuk, mardongan tu halak na so denggan, jala manjumolohon Harajaon ni Debata sian lomo ni rohatta sandiri.—Mat. 6:33; Rom 13:13; 1 Kor. 15:33.
8. Aha do muse na porlu diulahon hamu asa diboto hamu pandangan ni Jahowa taringot situasimuna? (Ida gambar.)
8 Boi do muse dipangido hamu nasehat sian akka dongan na togu haporseaonna tu Jahowa, manang porlu do tong tabahen riset. Godang do diparade organisasi alat bantu lao mangurupi hita. Misalna Tudu-Tudu na Dipakke Saksi Jahowa Lao Marsiajar dohot Akka Ayat na Mangurupi Halak Kristen. Alai ingot ma, tujuanta i ma lao mambahen keputusan na palasson roha ni Jahowa.
Pikkirhon ma songon dia pandangan ni Jahowa (Ida paragraf 8) b
9. Boha ma carana asa pos rohatta keputusan na tabahen i palasson roha ni Jahowa? (Epesus 5:17)
9 Boha ma carana asa pos rohatta keputusan na tabahen i palasson roha ni Jahowa? Ikkon takkas do tatanda Jahowa. Didok di Bibel, “Parbinotoan taringot Debata Nabadia i do na mambahen halak mamboto dia na sittong dohot dia na sala.” (Poda 9:10) Jadi ikkon taboto do akka sifat ni Jahowa, aha lomo ni rohana, jala aha na dihasogohon rohana. Dung i pikkirhon ma sukkun-sukkun on, ‘Keputusan na songon dia na ikkon hubahen asa mambahen las roha ni Jahowa?’—Jaha Epesus 5:17.
10. Boasa uppetting di hita prinsip na adong di Bibel sian hasomalan manang budaya?
10 Sipata gabe kecewa do keluarga manang donganta ala tabahen keputusan na palasson roha ni Jahowa. Misalna, adong natua-tua na manjujui boruna asa muli tu bawa na mamora manang na boi mangalehon godang sinamot. Alai dang togu hubungan ni bawa i tu Jahowa. Denggan do nian tujuan ni natua-tuana i, asa tabo ngolu ni boruna. Alai boi do annon bawa i mangurupi boruna i asa lam jonok hubunganna tu Jahowa? Boha ma pandangan ni Jahowa taringot on? Tadapot ma alusna di Mateus 6:33. Di ayat i dijujui Jesus do hita asa ‘manjumolohon Harajaon ni Debata’. Memang ikkon hormat do hita tu natua-tuatta dohot tu akka halak na di sakalilingta. Alai na uppetting di hita, i ma mambahen las roha ni Jahowa.
PIKKIRHON MA PIGA-PIGA PILIHAN NA BOI DIULAHON HAMU
11. Songon na disurat di Pilippi 1:9, 10, aha do na ikkon diulahon hamu asa boi mambahen keputusan na denggan?
11 Dung tadapot akka prinsip ni Bibel na adong hubunganna tu situasitta, ikkon manat do tapikkirhon piga-piga pilihan na boi taulahon. (Jaha Pilippi 1:9, 10) Molo manat tapikkirhon taringot i, boi ma tabayakkon aha do hasil ni ganup sian akka pilihan i. Memang sipata boi do takkas taboto pilihan na dia na ikkon taulahon. Alai dang sai songon i situasitta. Jadi molo marbisuk jala manat tapikkirhon taringot i, boi ma tabahen keputusan na denggan nang pe maol situasi na taadopi.
12-13. Molo manat jala marbisuk hamu, songon dia do i mangurupi hamu tikki naeng mamillit parkarejoan?
12 Bayakkon ma hamu mangalului karejo lao memenuhi kebutuhan keluarga. Adong ma dapotmuna dua pilihan. Dung i lului hamu ma hatorangan taringot karejo i. Misalna aha na dikarejohon disi, songon dia jadwalna, sadia dao do i sian jabumuna dohot na asing. Jala dang maralo dua karejo i tu prinsip ni Bibel. Alai unlomo do ra rohamuna tu pilihan na parjolo, ala lomo rohamuna tu karejona manang ala untimbo gajina disi. Alai sebelum dibahen hamu keputusan, adong do muse na porlu dipikkirhon hamu.
13 Misalna molo karejo hamu disi, boi do taratur hamu marpungu? Adong dope annon tikkimuna tu keluarga, jala mangurupi nasida asa toktong jonok tu Jahowa? Molo dipikkirhon hamu taringot on, boi ma dijumolohon hamu akka na ‘rumikkot’, i ma hubunganmuna tu Jahowa dohot kebutuhan ni keluargamuna, dang holan mangalului godang hepeng. Dung i boi ma dibahen hamu keputusan na mambahen las roha ni Jahowa, jala pasti pasu-pasuonna do keputusanmuna i.
14. Sifat aha do na ikkon tapatudu asa unang tartuktuk halak na asing?
14 Molo manat jala marbisuk hita, boi ma tapikkirhon aha do pengaruh ni keputusanta tu halak na asing. Alana dang olo hita gabe “tartuktuk na asing” alani hita. (Plp. 1:10) Massai rikkot do on tarlumobi tikki tabahen keputusan taringot pakkean dohot penampilan. Misalna lomo do ra rohatta tu sada model pakkean manang penampilan. Alai boha ma molo gabe targanggu akka dongan di huria manang halak na asing alani i? Molo manat tapikkirhon taringot on, pasti gabe taargai do perasaan ni nasida. Jala ikkon tapatudu do holong, asa tapikkirhon “aha na penting di halak na asing” jala toktong hita marserep ni roha. (1 Kor. 10:23, 24, 32; 1 Tim. 2:9, 10) Molo taulahon songon i, boi ma tabahen keputusan na patuduhon na tahaholongi jala taargai do akka halak na asing.
15. Aha do na ikkon dipikkirhon hamu sebelum mambahen keputusan na balga?
15 Andorang so dibahen hamu keputusan na balga, pikkirhon ma aha do na porlu diulahon hamu asa boi mangulahon keputusan i. Alana dipaboa Jesus do tu hita asa jolo ‘taetong sadia godang hepeng sipakaluarotta’. (Luk. 14:28) Maksudna pikkirhon ma sadia godang do tikki, hepeng, dohot upaya na ikkon dibahen hamu lao mangulahon keputusan i. Sipata ikkon dibahas hamu do taringot keputusanmuna i tu anggota keluargamuna. Asa diboto nasida aha na ikkon diulahon nasida lao mendukung keputusanmuna i. Massai penting do on. Alana gabe boi do diboto hamu atik na porlu do disesuaihon keputusanmuna i, manang adong dope pilihan na asing na dumenggan hasilna. Jadi molo jolo disukkun hamu anggota keluargamuna sebelum mambahen keputusan jala ditangihon hamu pandapot ni nasida, gabe las ma roha ni nasida mendukung keputusanmuna i.—Poda 15:22.
BAHEN MA KEPUTUSAN NA DENGGAN
16. Akka aha do na porlu diulahon hamu asa boi mambahen keputusan na denggan? (Ida kotak “ Cara Mambahen Keputusan na Denggan”.)
16 Molo nungnga diihutton hamu akka saran naung tabahas nakkin, boi ma dibahen hamu keputusan na denggan. Nungnga dilului hamu akka hatorangan na adong hubunganna tu situasimuna. Jala nungnga dipikkirhon hamu akka prinsip ni Bibel, na mangurupi hamu mambahen keputusan na palasson roha ni Jahowa. Saonari pangido ma bantuan ni Jahowa asa diurupi hamu mangulahon keputusanmuna i.
17. Aha do na porlu taingot asa boi tabahen keputusan na denggan?
17 Mungkin saleleng on nungnga godang keputusan na denggan na dibahen hamu. Alai ingot ma, asa boi mambahen keputusan na denggan unang ma andalhon pengalamanmuna manang pikkiranmuna. Andalhon ma Jahowa, jala pangido ma bisuk sian Ibana. Alana holan Ibana do na boi mangalehon parbinotoan, pangattusion, dohot bisuk tu hamu. (Poda 2:1-5) Jadi pos ma rohamuna, pasti diurupi Jahowa do hamu mambahen keputusan na palasson rohana.—Ps. 23:2, 3.
ENDE 28 Gabe Ale-Ale ni Jahowa
