1. Aha do na uppetting di godangan halak saonari?

 SAONARI godang do halak na holan mamikkirhon dirina sandiri. Misalna di media sosial, dipatudu-tudu nasida do akka na adong di nasida. Alai holan saotik do halak na olo pasangappon Jahowa. Di artikel on, lao tabahas ma aha do lapatan ni pasangappon Jahowa, jala aha do na mambahen olo hita mangulahon i. Asing ni i, tabahas ma muse songon dia carana pasangappon Jahowa, jala di ari na naeng ro songon dia Jahowa patuduhon holan Ibana do na tama disomba.

AHA DO LAPATAN NI PASANGAPPON JAHOWA?

2. Songon dia do Jahowa patuduhon hasangaponna tikki di Dolok Sinai? (Ida sampul.)

² Dipaboa do di Bibel, Debata na massai sangap do Jahowa i. Piga-piga ari dung dipalua Ibana halak Israel sian Mesir, dipatudu Ibana ma hasangaponna tu nasida. Tikki i, marpungu ma marjuta halak Israel di jonok ni Dolok Sinai lao manangihon hata ni Jahowa. Dung i, adong ma ombun na hapal na manutupi dolok i. Toppu ma adong gempa, sillam, dohot ronggur, jala tarbege ma soara ni tarompet na gogo. (2 Mus. 19:​16-18; 24:17; Ps. 68:8) Bayakkon ma songon dia perasaan ni bangso Israel tikki diida nasida hasangapon ni Jahowa i.

3. Aha do lapatanna pasangappon Jahowa?

 ³ Hita pe boi do pasangappon Jahowa. Sada carana, tapaboa ma tu halak na asing taringot huasona dohot akka sifatna. Jala tapuji ma Ibana ala diurupi Ibana do hita mangulahon akka ulaonta. (Jes. 26:12) On ma na diulahon Raja Daud. Lomo do rohana pasangappon Jahowa. Tikki martangiang ibana di jolo ni bangso Israel, didok ibana do, “Ale Jahowa, balga do huasom, na gogo do Ho, na marmulia, na burju, jala na sangap. Ai appunam do saluhut na di langit dohot na di tano on.” Dung sae si Daud martangiang, “sude ma halak na marpungu i mamuji Jahowa”.—1 Kron. 29:​11, 20.

4. Aha do na diulahon Jesus lao pasangappon Jahowa?

⁴ Tikki di tano on Jesus, dipasangap ibana do Jahowa. Dipaboa ibana do tu akka halak, Jahowa do na mangalehon huaso tu ibana lao mambahen akka mukjizat. (Mrk. 5:​18-20) Asing ni i, jotjot do dipaboa Jesus taringot Bapakna tu akka halak, jala burju do ibana maradoppon halak na asing. Hea ma di sada tikki mangajar ma Jesus di sada sinagoga. Disi adong ma sahalak borua naung marsahit saleleng 18 taon dibahen suru-suruan na jahat. Gabe bukkuk do daging ni borua i, jala dang boi be tigor alani akka suru-suruan na jahat i. Pasti diattusi Jesus do na susa hian dihilala borua i, jala asi rohana mangida borua i. Jadi dijuppangi Jesus ma ibana, jala lambok ma Jesus makkatai tu ibana. Didok Jesus, “Ale inang, malum ma sahitmi.” Dung i, diappehon Jesus ma tanganna tu borua i, laos boi ma tigor muse borua i jongjong jala “dipuji ma Debata”. Mandok mauliate situtu do borua i tu Jahowa ala boi ibana sehat muse. (Luk. 13:​10-13) Jadi dipasangap borua i do Jahowa. Hita pe taulahon ma songon i.

BOASA OLO HITA PASANGAPPON JAHOWA?

5. Aha do na mambahen hormat hita tu Jahowa?

⁵ Tapasangap Jahowa ala hormat hita tu Ibana. Aha do na mambahen hormat hita tu Jahowa? Jahowa i Debata Natumimbul jala massai balga do huasona. (Ps. 96:​4-7) Asing ni i, takkas do tarida bisukna sian akka toppaanna. Ibana do mual ni hangoluan, jala diparade Ibana do sude na tahaporluhon asa toktong hita mangolu. (Pgk. 4:11) Setia do Ibana. (Pgk. 15:4) Sai saut do sude lomo ni rohana, jala sai ditepati Ibana do sude janjina. (Jos. 23:14) Alani i ma didok Panurirang Jeremia songon on, “Sian sude akka halak na marbisuk di tonga-tonga ni akka bangso dohot di tonga-tonga ni akka harajaon, dang adong na songon Ho.” (Jer. 10:​6, 7) Jadi, massai godang do alasanta lao manghormati Jahowa. Alai dang holan hormat hita tu Jahowa. Holong do tong rohatta tu Ibana.

6. Boasa holong rohatta tu Jahowa?

⁶ Tapasangap Jahowa ala holong rohatta tu Ibana. Boasa holong rohatta tu Jahowa? Ala Debata parasi roha do Ibana. (Ps. 103:13; Jes. 49:15) Tikki susa hita, dohot do Ibana susa. (Sak. 2:8) Diurupi Ibana do hita asa jonok tu Ibana jala gabe Ale-alena. (Ps. 25:14; Ul. 17:27) Serep do rohana. Bahkan didok do di Bibel, “Dipaunduk Ibana do dirina lao mangida langit dohot tano on. Dipalua Ibana do akka halak na dangol sian sitaonon ni nasida.” (Ps. 113:​6, 7) Jadi alani sudena on, gabe taronjar do rohatta lao pasangappon Jahowa.—Ps. 86:12.

7. Aha do na ikkon taulahon lao mambuktihon sala do gabus ni Sibolis i?

⁷ Tapasangap Jahowa ala lomo rohatta asa ditanda halak Ibana. Godang do halak saonari na so mamboto hasittongan taringot Jahowa. Boasa? Alana, dipaboa Sibolis do akka na so  sittong taringot Jahowa. Jala godang do halak na porsea tu gabusna i. (2 Kor. 4:4) Didok Sibolis do Jahowa i Debata na mura-mura muruk, dang parduli tu jolma, jala Jahowa do na mambahen godang hasusaan di portibi on. Alai taboto do dang songon i Jahowa! Jadi tapaboa ma tu akka halak Debata na songon dia Ibana. Jala taurupi ma nasida asa pasangappon Jahowa. (Jes. 43:10) Di artikel on, lao tabahas ma piga-piga ayat sian Psalmen 96. Alana disi dipaboa do boha carana lao pasangappon Jahowa. Tikki tabahas on, tapikkirhon ma akka aha do na porlu taulahon lao pasangappon Jahowa.

AHA DO NA IKKON TAULAHON LAO PASANGAPPON JAHOWA?

8. Aha do na ikkon taulahon lao pasangappon Jahowa? (Psalmen 96:​1-3)

⁸ Jaha Psalmen 96:​1-3. Tapaboa ma taringot Jahowa. Di ayat on, dijujui do hita asa ‘marende tu Jahowa’, ‘mamuji goarna’, ‘paboahon barita na uli taringot haluaon na sian Ibana’, jala ‘paboahon hasangaponna tu akka bangso’. On ma cara lao pasangappon Jahowa. Najolo pe marsitutu do akka naposo ni Jahowa lao paboahon Debata na songon dia Jahowa i. Jala dipaboa nasida do akka na denggan na dibahen Jahowa tu nasida. (Dan. 3:​16-18; Ul. 4:29) Boha do caratta lao maniru nasida?

9-10. Aha do na taparsiajari sian pengalaman ni si Anita? (Ida gambar.)

⁹ Taida ma pengalaman ni sahalak donganta borua na margoar si Anita, a na tinggal di Amerika Serikat. Barani do ibana mambela goar ni Jahowa di ingananna karejo. Ala karyawan na baru dope ibana disi, diundang ma ibana tu sada rapat. Di rapat i, dipangido ma tu akka karyawan na baru asa patandahon diri ni nasida. Jadi nungnga diparade si Anita hian sada gambar na patuduhon las ni roha na dihilala ibana ala gabe Saksi Jahowa. Alai sebelum giliranna, adong ma sahalak bawa dongan sakarejona na manceritahon pengalamanna. Didok bawa i, Saksi Jahowa do natua-tuana. Dung i, direhe-rehei ibana ma Saksi Jahowa dohot haporseaotta. Didok si Anita, “Mabiar hian do au di tikki i. Alai hudok ma di rohakku, ‘Dang pasombuonku diparoa-roa ibana Jahowa. Ikkon hupaboa do tu nasida Debata na songon dia Jahowa i.’”

¹⁰ Dung sae donganna i makkatai, martangiang ma si Anita di bagasan rohana. Dung i,  lambok ma didok ibana tu donganna i, “Sarupa do hape hita ate. Natua-tuakku pe Saksi Jahowa do. Jala au pe Saksi Jahowa do sahat tu saonari.” Tetap do tenang si Anita di tikki i. Dipatudu ibana do akka foto tikki dohot ibana tu acara parpunguanta, jala denggan do dipatorang ibana haporseaonna tu akka donganna i. (1 Ptr. 3:15) Aha do hasilna? Dung sae si Anita makkatai, gabe positif ma pandangan ni donganna i. Bahkan dipaboa ibana do akka pengalamanna na denggan tikki poso dope ibana jala bergaul dohot Saksi Jahowa. Didok si Anita ma, “Ikkon tabela do Jahowa jala sada hasangapon do on di hita.” Jadi hita pe, tapasangap ma Jahowa tikki adong halak na paroa-roahon Ibana. Alana sada hasangapon do on di hita.

11. Mulai sian najolo, songon dia do akka naposo ni Jahowa mangihutton prinsip di Psalmen 96:8?

¹¹ Jaha Psalmen 96:8. Talehon ma akka na adong di hita tu Jahowa. On ma na diulahon akka naposo ni Jahowa mulai sian najolo. (Poda 3:9) Misalna, dilehon halak Israel do sumbangan lao mambangun jala padenggatton bagas joro. (2 Raj. 12:​4, 5; 1 Kron. 29:​3-9) Asing ni i, ‘dipakke akka sisean ni Jesus do arta ni nasida’ lao mangurupi Jesus dohot akka apostelna. (Luk. 8:​1-3) Halak Kristen di abad na parjolo pe rade do mangalehon bantuan tu akka dongan na makkaporluhon. (Ul. 11:​27-29) Jala saonari pe boi do tapasangap Jahowa marhite mangalehon sumbangan.

12. Songon dia do sumbangan na talehon boi parohon sangap tu Jahowa? (Ida gambar.)

¹² Taparrohahon ma sada pengalaman na patuduhon gabe dipasangap do Jahowa ala talehon sumbangan. Di taon 2020, masa ma kelaparan na massai parah di Zimbabwe jala leleng do i masa. Akibatna, adong ma marjuta halak na kelaparan sappe naeng mate, termasuk ma donganta na margoar si Priska. Nang pe songon i situasi di tikki i, tetap do marbarita si Priska di ari Rabu dohot Jumat. Hape akka halak tu hauma do karejo. Alani i, gabe direhei akka tetanggana ma ibana jala didok nasida ma, “Sai holan na marbarita do ho. Kelaparan ma annon ho jala mate.” Alai lambok do si Priska mangalusi nasida. Didok ibana, “Pos rohakku, dang hea ditinggalhon Jahowa akka naposona.” Dang leleng dukkon i, dilehon organisasitta ma bantuan tu si Priska. Bantuan i boi diparade alani akka sumbangatta. Gabe longang ma akka tetangga ni si Priska  i jala didok nasida ma, “Tutu do ate, dang hea ditinggalhon Debata ho. Attong paboa ma jo tu hami taringot Debatami.” Dung i, adong ma pitu halak tetanggana na ro marpungu.

13. Ikkon boha do pangalahotta asa boi pasangappon Jahowa? (Psalmen 96:9)

¹³ Jaha Psalmen 96:9. Tajaga ma pangalahotta. Najolo, ikkon ias do akka malim tikki melayani di bagas joro. (2 Mus. 40:​30-32) Hita pe ikkon songon i do. Alai dang holan dagingta na tajaga asa ias. Tajaga ma pangalahotta asa toktong ias di adopan ni Jahowa. (Ps. 24:​3, 4; 1 Ptr. 1:​15, 16) Ikkon marsitutu ma hita mambolokkon “pangalaho na leleng”. Lapatanna, unang ma taulahon akka ulaon na mambahen sogo roha ni Jahowa. Alani i, tapakke ma “pangalaho na imbaru”. Lapatanna, tatiru ma akka sifat ni Jahowa dohot cara marpikkirna. (Kol. 3:​9, 10) Molo diurupi Jahowa, boi do halak na roa pangalahona jala jahat hinan gabe mamakke pangalaho na imbaru.

14. Aha do na diparsiajari hamu sian pengalaman ni si Jack? (Ida gambar.)

¹⁴ Taparrohahon ma pengalaman ni si Jack, sahalak bawa na massai kejam jala jahat, sappe dilehon do tu ibana julukan Sibolis. Alani hajahatonna, naeng dihukum mate ma si Jack. Alai sebelum dihukum mate ibana, adong ma sahalak donganta bawa na ro tu penjara jala manogihon si Jack marsiajar Bibel. Olo do si Jack marsiajar dohot donganta i. Nang pe nungnga massai godang hajahaton na diulahon ibana, muba do si Jack. Jala dung piga-piga tikki, boi ma ibana tardidi gabe Saksi Jahowa. Dung marsiajar Bibel, godang do perubahan na dibahen si Jack. Gabe lam burju do ibana. Jadi tikki dihukum mate ibana, adong ma piga-piga panjaga ni penjara i na tangis. Bahkan adong do sahalak panjaga na mandok, “Najolo, si Jack on do memang tahanan unjahat dison. Alai saonari ibana do na paling burju.” Saminggu dung dihukum mate si Jack, ro ma piga-piga donganta tu penjara i lao mambahen parpunguan songon na somal. Alai adong ma sahalak tahanan na ro marpungu, jala parjolo sahali do ibana dohot disi. Boasa olo ibana marpungu? Ala terkesan ibana mangida si Jack. Jala lomo do rohana mamboto songon dia carana asa boi ibana manomba Jahowa. Jadi sian on takkas ma taboto, molo denggan pangalahotta, boi do i parohon sangap tu Jahowa.—1 Ptr. 2:12.

 NA DIULAHON JAHOWA LAO PASANGAPPON GOARNA

15. Di ari na naeng ro, aha do na diulahon Jahowa lao pasangappon goarna? (Psalmen 96:​10-13)

¹⁵ Jaha Psalmen 96:​10-13. Di akka ayat na parpudi sian Psalmen 96, dipaboa do molo Jahowa i Hakim jala Raja na adil. Songon dia ma cara ni Jahowa pasangappon goarna di ari na naeng ro? Lao dihancurhon Ibana ma Babel na Balga na mangaleai goarna. (Pgk. 17:​5, 16; 19:​1, 2) Alai tikki dihancurhon annon Babel na Balga i, ra gabe adong do akka halak na olo manomba Jahowa. Jala di Armagedon, lao dihancurhon Jahowa ma portibi na dirajai Sibolis on. Diripasson Ibana ma tong sude na mangalo Ibana jala na mangaleai goarna. Alai na lao paluaonna do akka halak na makkaholongi Ibana, mangoloi Ibana, jala na pasangappon goarna. (Mrk. 8:38; 2 Tes. 1:​6-10) Dung salpu ujian na parpudi di ujung ni Pamarettaon Saribu Taon ni Kristus, dipatudu Jahowa ma holan Ibana do na tama disomba. (Pgk. 20:​7-10) Di tikki i, “songon aek na manggohi laut, songon i ma tano on digohi parbinotoan taringot tu hamuliaon ni Jahowa”.—Hab. 2:14.

16. Aha do tekadmuna? (Ida gambar.)

¹⁶ Pasti tarpaima do hita annon sude halak pasangappon goar ni Jahowa. Alai huhut paimahon i, tapaboa ma taringot Jahowa tu akka halak, jala tajaga ma pangalahotta asa pasangappon goarna. Alani i ma dipillit Punguan na Mangaradoti Organisasi Psalmen 96:8 gabe ayat tahunan di taon 2025. Didok di ayat i, “Puji ma Jahowa alani goarna na sangap i.”