1. Aha do na porlu taulahon asa las roha ni Jahowa?

 BAYAKKON ma molo hamu mangalehon hadiah na massai arga tu halak na hinaholonganmuna. Boha do perasaanmuna molo disippan ibana hadiah i di lamari, jala dipasombu songon i? Pasti kecewa do hamu. Alai molo denggan do dipakke ibana hadiah i, jala didokkon mauliate tu hamu, pasti las hian ma rohamuna! Dos songon i ma Jahowa. Ala massai holong rohana tu hita, dilehon Ibana do Anak haholonganna i lao manobus hita. Silehon-lehon na massai arga do i. Molo tapatudu na taargai do silehon-lehon dohot holong na pinatudu ni Jahowa i, pasti massai las ma rohana!—Joh. 3:16; Rom 5:​7, 8.

2. Aha do na lao tabahas di artikel on?

² Ala nungnga leleng hita gabe Saksi Jahowa, olo do ra gabe moru pangargaiotta tu tobusan. Las do nian rohatta manjalo i. Alai hira na tabahen ma i di bagasan lamari jala tapasombu songon i. Jadi asa unang sappe songon i, jotjot ma tarimangi aha do naung diulahon Jahowa dohot Jesus tu hita. On ma na lao tabahas di artikel on. Lao tabahas ma aha do manfaat na tadapot sian tobusan i saonari dohot di ari na naeng ro. Jala tabahas ma muse aha do na porlu taulahon lao patuduhon na taargai do holong na dipatudu Jahowa, tarlumobi piga-piga minggu sebelum jala dukkon sae Borngin Parningotan i.

MANFAAT NA TADAPOT SAONARI

3. Aha do manfaat na tadapot sian tobusan i saonari?

³ Saonari, nungnga tadapot be manfaat sian tobusan i. Misalna, ala adong tobusan, gabe boi ma diampuni Jahowa dosatta. Sasittongna, dang wajib Jahowa mengampuni hita. Alai olo do Ibana mangulahon i. On ma na didok panurat psalmen taringot Jahowa, “Ale Jahowa, na burju do Ho jala rade manalpuhon hasalaan.”—Ps. 86:5; 103:​3, 10-13.

4. Tu ise do diparade Jahowa tobusan i? (Lukas 5:32; 1 Timoteus 1:15)

 ⁴ Adong do ra piga-piga halak na merasa dang tama nasida diampuni Jahowa. Memang sasittongna dang tama hita sude diampuni. Songon i do tong na dihilala Apostel Paulus. Didok ibana do, “Dang tama au didok apostel.” Alai didok ibana do muse, “Ala asi ni roha ni Debata na massai balga i do umbahen na boi au songon saonari on.” (1 Kor. 15:​9, 10) Pos ma rohatta, olo do Jahowa mengampuni hita molo bertobat hita. Diampuni Jahowa pe hita dang ala na tama hita manjalo i. Alai, ala holong do rohana tu hita. Jadi molo hamu merasa dang tama diampuni, ingot ma: Diparade Jahowa do tobusan i tu akka halak na mardosa na olo bertobat, dang tu akka halak na sempurna.—Jaha Lukas 5:32; 1 Timoteus 1:15.

5. Memang wajib do Jahowa mengampuni hita? Patorang ma.

⁵ Ra, nungnga martaon-taon hita manomba Jahowa, jala godang do pengorbanan naung tabahen tu Ibana. Memang, diargai Jahowa do sude na taulahon i. Alai, unang ma hita merasa gabe tama hita diampuni Jahowa alani sudena i. (Heb. 6:10) Ingot ma, dilehon Jahowa pe tobusan i, dang na lao mambalos sude naung taulahon tu Ibana, alai silehon-lehon do i tu hita. Jadi molo hita merasa tama do hita diampuni alani sude na taulahon tu Jahowa, hira na tadok ma tu Jahowa, “Dang porlu di au tobusan i.”—Bandingkon tu Galatia 2:21.

6. Boasa olo si Paulus mambahen godang pengorbanan tu Jahowa?

⁶ Godang do pengorbanan na dibahen si Paulus lao marhobas tu Jahowa. Alai, disadari ibana do dang na gabe tama ibana diampuni Jahowa alani pengorbananna i. Jadi, boasa olo ibana mangulahon sudena i? Diulahon ibana pe i, dang asa tama ibana diampuni. Alai, ala diargai ibana do asi ni roha ni Jahowa na massai balga i. (Eps. 3:7) Songon si Paulus, toktong ma hita semangat marhobas tu Jahowa. Taulahon pe songon i, dang asa tama hita diampuni. Alai, ala massai taargai do asi ni roha ni Jahowa.

7. Aha do muse manfaat na asing na tadapot sian tobusan i saonari? (Rom 5:1; Jakobus 2:23)

⁷ Aha do muse manfaat na asing na tadapot sian tobusan i saonari? Gabe boi ma hita marale-ale tu Jahowa. a Songon na didok di artikel na sebelumna, ala mardosa si Adam, gabe dohot ma hita sude pinopparna mardosa. Jala dang gabe bagian sian keluarga ni Jahowa be hita. Alai ala adong tobusan, boi ma hita “mardame tu Debata” jala marale-ale tu Ibana.—Jaha Rom 5:1; Jakobus 2:23.

8. Boasa mandok mauliate hita ala boi martangiang tu Jahowa?

⁸ Pikkirhon ma aha do manfaat na tadapot ala marale-ale tu Jahowa: Boi do hita martangiang tu Ibana. Jala dang holan tangiang tikki di parpunguan na ditangihon Jahowa. Ditangihon Ibana do tikki martangiang hita sahalakta. Memang molo martangiang hita, gabe dame do tahilala. Alai dang holan i manfaat ni tangiang. Boi do i mambahen lam jonok hubungatta tu Jahowa. (Ps. 65:2; Jak. 4:8; 1 Joh. 5:14) Tikki di tano on dope Jesus, jotjot do ibana martangiang. Alana diboto ibana do tangihonon ni Jahowa do tangiangna i. Jala diboto ibana do muse, molo martangiang ibana, pasti lam jonok do hubunganna tu Jahowa. (Luk. 5:16) Jadi mandok mauliate do hita tu Jahowa. Ala adong tobusan, boi ma hita marale-ale tu Ibana, jala boi makkatai tu Ibana di bagasan tangiang!

 MANFAAT NA TADAPOT DI ARI NA NAENG RO

9. Aha do manfaat na lao didapot akka naposo ni Jahowa na setia sian tobusan i?

⁹ Di ari na naeng ro, aha do manfaat na didapot akka naposo ni Jahowa na setia sian tobusan i? Boi ma nasida mangolu salelengna. Alai godang do halak na mandok, dang mungkin boi jolma mangolu salelengna. Alana sian najolo, gabe matua do jolma jala mate. Hape sian mulana, lomo do roha ni Jahowa asa mangolu salelengna sude jolma. Autsugari ma dang mardosa si Adam, mangolu salelengna do hita sude. Jadi asa boi hita mangolu salelengna, nungnga dilehon Jahowa Anak haholonganna i asa mate humokkop hita. Silehon-lehon na massai arga do i di hita.—Rom 8:32.

10. Aha do na dipaima-ima akka na miniahan dohot biru-biru na asing?

¹⁰ Memang, di ari na naeng ro do boi hita mangolu salelengna. Alai mulai sian saonari, dipangido Jahowa do asa tabayakkon boha annon ngolutta disi. Tarpaima do akka na miniahan lao mangolu di surgo. Rap mamaretta dohot Kristus ma annon nasida tu tano on. (Pgk. 20:6) Molo biru-biru na asing, tarpaima do nasida lao mangolu di Paradeiso di tano on. Dang na lao adong be disi na marsahit, na marsitaonon, manang na marsak. (Pgk. 21:​3, 4) Bagian sian biru-biru na asing do hamu? Molo ido, unang ma hamu merasa ummarga do pasu-pasu na lao jaloon ni akka halak na mangolu di surgo sian pasu-pasu na lao jaloonmuna di tano on. Sian mulana, memang lao mangolu di tano on do akka jolma ditoppa Jahowa. Jadi, pasti las do rohamuna boi mangolu salelengna di tano on haduan.

11-12. Pasu-pasu aha do na tapaima-ima di Paradeiso haduan? (Ida gambar.)

¹¹ Bayakkon ma boha ngolumuna di Paradeiso haduan. Dang adong be sahit dohot hamatean. Jadi dang marsak be hamu mamikkiri i. (Jes. 25:8; 33:24) Lehonon ni Jahowa ma akka na denggan na dihalomohon rohamuna. Misalna, aha do na lao diparsiajari hamu annon di Paradeiso? Taringot binatang do? Marmusik? Manang  manggambar? Asing ni i, dihaporluhon do annon di Paradeiso i akka arsitek, tukkang bangunan, dohot partani. Jala porlu do tong akka halak na paradehon sipanganon, mambahen akka peralatan, dohot mangurus suan-suanan. (Jes. 35:1; 65:21) Ala nungnga mangolu salelengna annon hamu disi, godang ma tikkimuna lao mamparsiajari keterampilan manang aha pe.

¹² Bayakkon ma muse songon dia las ni rohamuna tikki pajuppang dohot akka halak naung dipahehe! (Ul. 24:15) Godang do muse na boi diparsiajari hamu taringot Jahowa sian akka toppaanna. (Ps. 104:24; Jes. 11:9) Na uppetting, ala nungnga sempurna hamu, dang diulahon hamu be akka ulaon na mambahen haccit roha ni Jahowa. Jala dang porlu be dipangido hamu pengampunan sian Jahowa. Jadi, olo do hamu manukkar sude pasu-pasu i holan lao “makkilala hasonangan na satokkin di bagasan dosa” saonari? (Heb. 11:25) Pasti daong kan? Gariada, pasti olo do hita mangulahon manang aha pe na mambahen las roha ni Jahowa asa dapotta pasu-pasu i. Ingot ma, Paradeiso i dang holan janji. Pasti saut do i. Alana lao pasautton i, nungnga dilehon Jahowa Anak haholonganna i gabe tobusan tu hita. On ma bukti na massai holong roha ni Jahowa tu hita!

PATUDU MA NA DIARGAI HAMU DO HOLONG NI JAHOWA

13. Aha do na ikkon taulahon lao patuduhon na taargai holong ni Jahowa i? (2 Korint 6:1)

¹³ Aha do na ikkon taulahon lao patuduhon na taargai tobusan na dilehon Jahowa? Na parjolo, tabahen ma ulaon manomba Jahowa na uppetting di ngolutta. (Mat. 6:33) Molo taulahon songon i, on patuduhon na taargai do asi ni roha ni Jahowa na massai balga i. (Jaha 2 Korint 6:1.) Ingot ma, ‘nungnga mate Jesus humokkop sude jolma. Alani i dang mangolu tu dirina sandiri be sude jolma, alai mangolu tu Kristus naung mate jala naung dipahehe i do’.—2 Kor. 5:15.

14. Boha do carana patuduhon na porsea hita tu Jahowa?

¹⁴ Na paduahon, porsea ma tu Jahowa jala ihutton ma tudu-tudu na dilehon Ibana. Boha carana? Sebelum tabahen keputusan, misalna taringot kuliah manang parkarejoan, jolo tapikkirhon ma aha do na dihalomohon roha ni Jahowa. (1 Kor. 10:31; 2 Kor. 5:7) Molo tapatudu haporseaon sian tindakanta, gabe lam togu ma haporseaotta tu Jahowa. Asing ni i, lam jonok ma hubungatta tu Ibana, jala lam pos rohatta pasti saut do sude janjina.—Rom 5:​3-5; Jak. 2:​21, 22.

15. Aha do na ikkon taulahon piga-piga minggu sebelum jala dukkon sae Borngin Parningotan?

¹⁵ Na patoluhon, piga-piga minggu sebelum jala dukkon sae Borngin Parningotan, parsiajari jala rimangi ma taringot tobusan. Ro ma hamu tu Borngin Parningotan i, jala undang ma akka halak asa ro tusi. (1 Tim. 2:4) Patorang ma tu nasida songon dia Borngin Parningotan i dibahen. Jala patudu ma video Boasa  Ikkon Mate Jesus? dohot Pabadiahon Ari Hamamate ni Jesus na adong di jw.org. Asing ni i, ikkon diundang akka sintua do akka penyiar na so aktif. Bayakkon ma las ni roha na dihilala di surgo dohot di tano on molo adong biru-biru ni Jahowa na mulak muse tu Ibana! (Luk. 15:​4-7) Di Borngin Parningotan i, tasambut ma akka donganta. Alai, tasambut ma tong akka halak na parjolo sahali ro tusi manang akka halak naung leleng dang ro tu acara i.—Rom 12:13.

16. Piga-piga minggu sebelum jala dukkon sae Borngin Parningotan, boasa porlu talehon godang tikkitta tu Jahowa?

¹⁶ Piga-piga minggu sebelum jala dukkon sae Borngin Parningotan, olo do hamu mangalehon godang tikkimuna tu Jahowa? Molo diulahon hamu songon i, on patuduhon na diargai hamu do sude naung diulahon Jahowa dohot Jesus tu hamu. Lam godang tikkimuna marbarita, lam dihilala hamu ma bantuan ni Jahowa. Hasilna, gabe lam togu ma haporseaonmuna tu Ibana. (1 Kor. 3:9) Asing ni i, ihutton ma jadwal panjahaion Bibel di minggu Parningotan na adong di Manulikkit Hata ni Debata Ganup Ari dohot di Na Lao Diparsiajari. Boi do dipakke hamu akka ayat i gabe bahan tikki belajar pribadi hamu.

17. Aha do na mambahen las roha ni Jahowa? (Ida kotak “ Cara Patuduhon na Taargai Holong ni Jahowa”.)

¹⁷ Molo dang boi diulahon hamu sude saran na dipaboa di artikel on alani situasimuna, unang ma metmet rohamuna. Ingot ma, dang hea dibandingkon Jahowa sadia godang na boi dilehon hamu dohot na dilehon halak na asing tu Ibana. Alana, diboto Ibana do songon dia rohamuna na sasittongna. Jadi molo dipatudu hamu na diargai hamu tobusan i sian ias ni rohamuna, jala dianggap hamu i silehon-lehon na massai arga, nungnga las roha ni Jahowa disi.—1 Sam. 16:7; Mrk. 12:​41-44.

18. Boasa mandok mauliate hita tu Debata Jahowa dohot tu Jesus Kristus?

¹⁸ Rimangi ma: Boi diampuni Jahowa dosatta, boi hita marale-ale dohot Ibana, jala boi hita mangolu salelengna haduan. Molo dang adong tobusan, dang boi tanikmati sudena i. Jadi, sai anggiat ma tapatudu na massai taargai holong ni Jahowa. Alana, Ibana do na paradehon sudena i tu hita. (1 Joh. 4:19) Jala tapatudu ma na massai taargai sude na dibahen Jesus tu hita. Alana, massai holong do rohana tu hita. Rade do ibana mangalehon ngoluna humokkop hita!—Joh. 15:13.