Lomo do roha ni Jahowa asa marlas ni roha akka naung menikah jala asa martahan rumah tangga ni halak i. (Mat. 19:4-6) Jadi molo naeng menikah hamu, boha do carana asa dapotmuna pasangan na pas? Diboto Jahowa do songon dia carana asa marlas ni roha akka naung menikah. Alani i, ihutton hamu ma petunjuk ni Jahowa asa marlas ni roha hamu dohot pasanganmuna. Saonari taparrohahon ma jo piga-piga prinsip ni Bibel taringot i.

Na parjolo, taingot ma ayat ni Bibel na mandok, “Massai akkal situtu do roha i.” (Jer. 17:9) Molo adong na naeng menikah jala baru pacaran dope halak i, unang ma pittor terikat secara emosi. Alana molo songon i, boi do dibahen halak i keputusan na sala jala ujungna kecewa. (Poda 28:26) Alani i ma molo baru marhallet dope hamu, unang ma pittor pacintahu hamu tu halletmuna i manang pittor mambahen janji na serius, alana dang takkas dope hamu marsitandaan.

Poda 22:3 mandok, “Molo dibereng halak na marbisuk adong jea, martabuni do ibana. Alai anggo halak na so marpengalaman, ditorusson do dalanna gabe marjea ma ibana.” Aha do bahayana mangalului hallet sian kencan online? Adong do piga-piga halak na marhallet lewat kencan online gabe kecewa, dung diboto ibana ternyata panipu do halletna i. Adong do na mamakke akun palsu asa boi ditipu ibana halak na polos jala dijaloi hepengna. Adong do muse na mangakku Saksi Jahowa, hape dang Saksi ibana.

Adong dope muse bahaya na asing molo mangalului hallet sian situs kencan online. Akka biro jodoh online holan mamakke program komputer do lao pacocokkon akka halak. Alai dang adong bukti patuduhon na marhasil cara i. Tottu dang marbisuk hita, molo taandalhon program sisongon i mambahen keputusan na penting lao mangalului pasangan hidup. Jala taingot ma, dang mungkin boi program komputer manggattihon prinsip ni Bibel.​—Poda 1:7; 3:5-7.

Poda 14:15 mandok, “Dihaporseai halak na so marpengalaman do sude hata, alai dipikiri halak na marbisuk do ganup lakkana.” Sebelum menikah hamu tu sasahalak,  ikkon takkas do tandaonmuna ibana. Alai dang takkas tatanda sasahalak molo holan lewat internet. Nang pe taboto piga-piga informasi taringot tu ibana manang jotjot hita makkatai tu ibana lewat internet, alai dang cukkup dope i. Adong do piga-piga halak na kecewa dung pajuppang dohot halletna na di internet. Alana dang sesuai tu na diharappon ibana.

Panurat psalmen mandok, “Dang mardongan au tu pangoto-otoi, jala hupadao do dirikku sian halak na munafik.” (Ps. 26:4) Godang do halak na manabunihon informasi taringot tu halak i di internet asa songon na menarik idaon. Ditabunihon halak i do ise halak i sasittongna, asa unang tarida sifatna na roa. Porlu do muse tapikkiri on, molo mangakku ibana Saksi Jahowa, memang naung tardidi do ibana? Jonok do hubunganna tu Jahowa? Songon dia do pandangan ni halak di huriana tu ibana? Bermasalah do kerohanianna? Mardongan do ibana tu “halak na so denggan”? (1 Kor. 15:33; 2 Tim. 2:20, 21) Mangihutton prinsip ni Bibel, bebas do ibana menikah? Ikkon botoonmuna do alus ni akka sukkun-sukkun i. Alai asa takkas botoonmuna, sukkun ma tu donganta Saksi na takkas mananda ibana. (Poda 15:22) Jala pasti dang adong naposo ni Jahowa na marpikkir naeng menikah tu “halak na so porsea”.​—2 Kor. 6:14; 1 Kor. 7:39.

Jadi takkas ma, berbahaya do mangalului hallet sian kencan online. Alai adong do cara na dumenggan mangalului pasangan. Boha ma carana? Boi do pajuppang hita dohot dongan Saksi na asing di parpunguan, di kebaktian, manang di pertemuan na asing.

Memang saonari alani pandemi COVID-19, lewat internet do hita marpungu. Alai boi do tapakke i lao marsitandaan dohot akka dongan na asing. Boi do taida disi songon dia akka donganta pasahatton jamita manang mangalean komentar. (1 Tim. 6:11, 12) Boi do muse makkata-hatai hita dohot na asing di breakout room dung sae marpungu. Manang molo lomo rohamuna tu sahalak donganta Saksi, boi do hamu bergaul dohot ibana rap dohot akka dongan na asing lewat internet. Parrohahon ma songon dia sikapna tikki na bergaul i hamu, asa diboto hamu songon dia do sebenarna sifat aslina. (1 Ptr. 3:4) Molo nungnga pacaran hamu, manat ma parrohahon sarupa do cita-citamuna manang na dang. Parrohahon ma muse akka sifatna, asa diboto hamu cocok do annon hamu gabe pasangan suami istri manang na dang.

Molo prinsip ni Bibel do dipakke hamu lao mangalului hallet, pasti bahagia do annon keluargamuna. Boi ma dihilala hamu hata ni bukku Poda na mandok, “Halak na mandapot istri [manang suami] na burju, dos do songon na mandapot arta, jala bahenonna do las roha ni Jahowa.”​—Poda 18:22.